Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 86

Jesu Huẹn E Lazarọs Kpaegbe

Jesu Huẹn E Lazarọs Kpaegbe

Jesu ghaa mwẹ ọse eha ne kankankan vbe Bẹtani. Eni iran ọre Lazarọs, Meri kevbe Mata. Etẹn ẹre iran eha ghaa khin. Vbe Jesu ghi rre odin ọghe Perea vbe ẹdẹ ọkpa, e Meri vbe Mata keghi gie uhunmwu gie ẹre. Iran keghi tama rẹn wẹẹ: ‘E Lazarọs khuọnmwi. Lahọ, zẹgiẹ gha dee!’ Sokpan Jesu ma yo vbobọvbobọ. Vbe ikpẹdẹ eva ghi gberra nẹ, Jesu keghi tama erhuanegbe ẹre wẹẹ: ‘Wa gi ima gha rrie Bẹtani. E Lazarọs vbiẹ, I khian ya huẹn ọnrẹn.’ Avbe ukọ ọghe Jesu keghi tama rẹn wẹẹ: ‘Adeghẹ e Lazarọs vbiẹ, egbe gha rran rẹn, vbe ọ gha rhiọrre nẹ.’ Jesu na ghi gbe ẹre ẹho rua ma iran wẹẹ: ‘E Lazarọs wu nẹ.’

Vbe ọ ghi rre ikpẹdẹ nogienẹ na ya ree Lazarọs, Jesu keghi sẹ e Bẹtani. Emwa nibun ni rre do rhie ifuẹko ne Meri vbe Mata ghaa rre evba. E Mata ghi họn wẹẹ Jesu rre, ọ na rhulẹ bu Jesu. Ọ na tama rẹn wẹẹ: “Nọyaẹnmwa, akpawẹ u rre emwa na, ọtẹnmwẹ ghẹ wu.” Jesu keghi tama rẹn wẹẹ: ‘Ọtuẹn gha rhiọkpaegbe. E Mata, uwẹ ya ọna yi ra?’ E Mata na wanniẹn ọnrẹn wẹẹ: ‘I yayi wẹẹ ọ gha kpaegbe vbe ẹdẹ arhiọkpaegbe.’ Ẹre Jesu na tama rẹn wẹẹ: “Mẹ ọre arhiọkpaegbe kevbe arrọọ.”

E Mata na bu e Meri ya tama rẹn wẹẹ: ‘Jesu rre nẹ.’ E Meri kevbe emwa ni gbẹbu na wa rhulẹ bu Jesu. E Meri keghi fan fi iguẹ vbe odaro Jesu, ọ na gha viẹ. Ọ keghi tama Jesu wẹẹ: ‘Nọyaẹnmwa, u kpa gha rre emwa, ọtẹnmwẹ ghẹ te wu!’ Jesu ghi bẹghe vbene Meri ya viẹ hẹ, irẹn tobọ irẹn na vbe suẹn eve. Vbe emwa ni gbẹbu ghi bẹghe Jesu vbe ọ viẹ, iran na kha wẹẹ: ‘U ma miẹn vbene ọ hoẹmwẹ e Lazarọs hẹ!’ Sokpan eso vbuwe iran na gha kha wẹẹ: ‘Vbọzẹe ne ọ ma na ru ẹre ne ọsiọre ghẹ wu?’ De emwi ne Jesu khian ghi ru?

Jesu kegha rrie idin na ree Lazarọs yi. Okuta nọkhua ghaa rre odaro nene idin. Jesu na ghi tama iran wẹẹ: ‘Wa werriẹ okuta na hin.’ Ẹre Mata na kha wẹẹ: ‘Nẹghẹdẹnẹ ẹre a ghi muẹn yotọ! Ẹi mwẹ ọ ma gha wia nẹ.’ Iran ghi werriẹ nene okuta hin nẹ, Jesu keghi na erhunmwu gie Jehova wẹẹ: ‘Evbavba, I kpọnmwọn ne u na danmwehọ mwẹ. Ẹghẹ hia ẹre u ya danmwehọ mwẹ. Sokpan rhunmwuda iran ni rre emwa, ẹre I gu na erhunmwu na ladian, ne iran mieke na rẹn wẹẹ, uwẹ ẹre ọ gie mwẹ rre.’  Vbe iyeke ọni, ọ keghi ya urhu nọ lae kha wẹẹ: “E Lazarọs, ladian!” Vbe ọwarọkpa nii, e Lazarọs keghi ladian, ke irẹn ke ukpọn na ya gbalọe. Ẹre Jesu na ghi kha wẹẹ: “Wa rhan rẹn, ne uwa gi ẹre gha khian.”

Emwa nibun ni miẹn emwi ọyunnuan na keghi mu ẹtin yan Jesu. Sokpan emwa eso na ya tama Ivbi e Farisi emwi nọ sunu. Ke ẹghẹ nii kpa, Ivbi e Farisi na gha gualọ vbene iran khian ya gbe Jesu vbe Lazarọs rua hẹ. Judas Iskariọt nọ re ọkpa vbe ukọ 12 ọghe Jesu, keghi bu Ivbi e Farisi ya nọ iran wẹẹ: ‘Inu igho ẹre uwa khian rhie mẹ deghẹ I na rhie Jesu ye uwa obọ?’ Iran na tama e Judas wẹẹ, iran gha hae esiliva 30. Ke ẹghẹ nii kpa, e Judas kegha gualọ vbene ọ khian ya mu e Jesu ye obọ Ivbi e Farisi hẹ.

“Osanobua mwa, Osanobua ne ọ miẹn ọmwa fan ọre nọ, rẹn ọre Nọyaẹnmwa, ne Nọyaẹnmwa ne ọ wọlọ mwa ladian hin uwu rre.”—Psalm 68:20