Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 68

Elizabẹt Biẹ Ọmọmọ

Elizabẹt Biẹ Ọmọmọ

Vbọ ghi gberra ukpo 400 na bọ ogba ekẹn ọghe Jerusalẹm, ohẹn ọkpa na tie ẹre Zẹkaraia kevbe amwẹ ọnrẹn ighẹ Elizabẹt na do gha rrọọ. Ọ kpẹẹ re ne iran ghi ya ru orọnmwẹ sokpan iran ma miẹn ọmọ biẹ. Vbe Zẹkaraia ghi giẹn eturari vbe ọgua Osa vbe ẹdẹ ọkpa, e Gebriẹl ne odibosa na rhiegbe ma rẹn. Orrirri keghi gbe kue Zẹkaraia, sokpan Gebriẹl keghi tama rẹn wẹẹ: ‘Ghẹ gi ohan muẹn. Iyẹn nọ maan nọ ke obọ e Jehova rre ẹre I do na ma ruẹ. Ọvbokhan ruẹ ighẹ Elizabẹt gha biẹ ọmọ okpia nuẹ, a ghi gha tie ọmọ nii e Jọn. Ọ mwẹ iwinna ne kpataki ne Jehova hoo ne ọmọ na ru.’ Zẹkaraia keghi kha wẹẹ: ‘Ọni gha sẹtin sunu ra? Mẹ vbe ọvbokhan mwẹ nọ khian ọmaẹn nẹ gha ye sẹtin biẹ ra?’ E Gebriẹl keghi kha wẹẹ: ‘Osanobua ẹre ọ wẹẹ ne I gie ruẹ uhunmwu na. Sokpan rhunmwuda wẹẹ u ma ya mwẹ yi, u i khian ghi sẹtin guan vbe ẹi re te a biẹ ọmọ na nẹ.’

Emwa na gha khẹ Zẹkaraia nọ ladian vbe ogiukpo rhunmwuda ẹi ka kpẹẹ sẹrriọ. Vbe ọ ghi ladian, emwa na gha hoo ne iran rẹn emwi nọ si ẹre ne ọ na kpẹẹ sẹrriọ. Sokpan e Zẹkaraia ma sẹtin gu iran guan. Obọ ẹre ọ ghi ya gha gbe ekhakha. Ọna keghi ya emwa rẹn wẹẹ, te Osanobua gie uhunmwu gie ẹre.

Vbe ọ ma he kpẹẹ vba, Elizabẹt na suẹn gha hanmwa, ọ na do biẹ ọmọ okpia zẹvbe ne odibosa tae yotọ. Avbe ọsiọre kevbe ẹgbẹe ọre na gha ghọghọ, iran na rre do tuẹ ọmọmọ. Elizabẹt na wẹẹ e Jọn ẹre a khian gha tie nene ọmọ. Emwa ni rre do tuẹ ọre keghi tama rẹn wẹẹ: ‘Ọmwa rhọkpa i rrọọ na tie ẹre Jọn vbe ẹgbẹe ọghe uwa. Wa mu eni erhae nẹ.’ Sokpan Zẹkaraia keghi gbẹn ọnrẹn ye ebe wẹẹ e Jọn ẹre a khian gha tie ẹre. Vbe ọwarọkpa nii, Zẹkaraia na suẹn gha guan! Iyẹn ọghe ọmọ na keghi gba otọ e Judia hia, emwa hia na gha hoo ne iran rẹn vbene ọmọ na, khian gha ye hẹ vbe ọ gha waan nẹ.

Lekpae orhiọn nọhuanrẹn ọghẹe, Osanobua keghi rhie ẹtin ne Zẹkaraia ne ọ ya ta ẹmwẹ akhasẹ na, nọ khare wẹẹ:  ‘Ekpọnmwẹ vbe urhomwẹ ọre ọghe Jehova. Ọ ru eyan ma Ebraham wẹẹ irẹn gha gie Mezaia rre nọ do miẹn ima fan. Akhasẹ ẹre Jọn khian gha khin, irẹn ẹre ọ khian vbe ru emwamwa yotọ khẹ Mezaia.’

Ọ vbe mwẹ emwi ọkpa ne kpataki nọ sunu dae Meri ne ọtiẹn Elizabẹt. Ma gha guan kaan rẹn vbe uhunmwuta nọ lelẹe.

“Emwi nẹi gia ru ọre ọna khin ne emwa ne agbọn sokpan a i miẹn emwi nẹi gie Osanobua ru.”—Matiu 19:26