Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 72

Vbe Jesu Ye Kherhe

Vbe Jesu Ye Kherhe

E Nazarẹt ẹre Josẹf, e Meri, Jesu kevbe emọ ọvbehe ne Josẹf vbe Meri biẹlẹ ghaa ye. Iwinna ekabita ẹre Josẹf ghaa ru, ne ọ ya gha koko ẹgbẹe ọre; ọ vbe gha maa ẹgbẹe ọre Uhi e Jehova. Ẹghẹ hia ẹre iran ya gha yo e sinagọg, ya gha ga Osanobua; ukpo ukpo ẹre iran vbe ya gha yo e Jerusalẹm ya gha do Ugie Alagberra.

Vbe Jesu ghi rre ukpo 12, ẹgbẹe ọre na mu okhian gha rrie Jerusalẹm vbene iran ka ruẹ. Emwa bun ni rrie Jerusalẹm rhunmwuda Ugie Alagberra. Vbe iran ghi do ugie fo nẹ, e Josẹf vbe Meri na werriegbe gha die owa, vbene iran na gha roro ẹre wẹẹ Jesu rre uwu ẹbu ni mu okhian dee. Sokpan vbe iran ghi gualọ Jesu vbuwe ẹbu etẹn iran, iran ma miẹn ọnrẹn.

Iran na werriegbe gha rrie Jerusalẹm ya gualọ ovbi iran. Vbe ọ ghi rre ikpẹdẹ eha, iran na do miẹn Jesu vbe ọgua Osa, vbe ọ tota ye uwu ẹbu avbe ọmamwaemwi gha danmwehọ iran kevbe wẹẹ, ọ na gha nọ iran ọta ughughan ne kpataki. Ẹmwẹ Jesu na wa gha yẹẹ avbe  ọmamwaemwi na, iran na vbe gha nọ rẹn ọta. Jesu gha wa rhie ewanniẹn ye inọta ọghe iran, egbe ghi wa wọọ iran. Ọ na wa vẹ ne iran rẹn wẹẹ Jesu rẹn Uhi e Jehova ẹsẹsẹmwẹse.

Orhiọn e Meri vbe Josẹf ma sotọ ne iran ya gha gualọ Jesu. E Meri keghi tama Jesu wẹẹ: ‘Ọ kpẹẹ re ne ima ke gualọ ruẹ ovbimwẹ! Vbua la?’ Jesu keghi wanniẹn wẹẹ: ‘De ehe ọvbehe ne I khian gha ye, vbọ gberra owa erha mwẹ?’

Jesu na ghi lele evbibiẹ ọre gha rrie Nazarẹt. E Josẹf keghi maa Jesu iwinna ekabita. De aro ọmwa ne uwẹ yayi wẹẹ Jesu ghaa khin vbe ọ rre igbama? Vbene Jesu ya gha waan, erriọ ẹre ọ vbe ya gha mwẹ ẹwaẹn yọ, ẹmwẹ ọnrẹn na gha yẹẹ Osanobua kevbe emwa nagbọn.

“U miẹn vbe iho ruẹ ne a ru yẹẹ mwẹ hẹ Osanobua mwẹ! I rhie iruẹmwi ruẹn ye uwu ekhọe mwẹ.”—Psalm 40:8