Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 61

Iran Ma Gbe Uhunmwu Kotọ

Iran Ma Gbe Uhunmwu Kotọ

Vbe Daniẹl ghi rhan otọ imina ọghe Ọba e Nebukiadnẹza nẹ, e Nebukiadnẹza keghi ma amazẹ ọghe igoru nọkhua ye Dura. Ọ na tie emwa ni hiunsi vbe Babilọn ne iran si egbe koko vbe odaro amazẹ nii. Usun emwa ne ọ tiere ọre Siẹdrak, e Mesiak kevbe Abẹdnigo. E Nebukiadnẹza keghi yi iyi wẹẹ: ‘Wa gha ghi họn vbe a kpee okpe, ẹgogo, ukusẹ kevbe akpata, uwa ghi gbe uhunmwu kotọ ne amazẹ na! Ọmwaikọmwa nọ ma gbe uhunmwu kotọ rre ne amazẹ na, a gha fi ẹre fi uwu erhẹn.’ Wẹ yayi wẹẹ Ivbi Hibru eha na, gha gbe uhunmwu kotọ rre ne amazẹ na ra, ra e Jehova ọkpa ẹre iran khian ga?

Vbe ẹghẹ ne ọba ghi ya tama emwa, ne iran kpee emwi hia na ya so ihuan, emwa hia keghi gbe uhunmwu kotọ rre ne amazẹ nii, vbọ gberra e Siẹdrak, e Mesiak kevbe Abẹdnigo. Emwa eso ni bẹghe ẹre wẹẹ iran ma gbe uhunmwu kotọ rre, na ya tama ọba wẹẹ: ‘Ivbi Hibru eha nii, ma gbe uhunmwu kotọ rre ne amazẹ ruẹ.’ E Nebukiadnẹza keghi gie na tie iran, ọ na tama irạn wẹẹ: ‘I gha kie ẹkpotọ ọvbehe ne uwa, ne uwa ya gbe uhunmwu kotọ rre ne amazẹ mwẹ. Adeghẹ uwa ma na ru vberriọ, te I khian fi uwa fi uwu erhẹn. Osa ọkpa i rrọọ nọ khian sẹtin miẹn uwa fan vbe obọ mwẹ.’ Iran keghi tama rẹn wẹẹ: ‘Esa i rrọọ ne u khian ya kie ẹkpotọ ọvbehe ne ima. Osa ọghe ima gha sẹtin miẹn ima fan. A na dobọ miẹn wẹẹ ọ ma miẹn ima fan, ẹghẹ ọkpa i rrọọ ne ima khian ya gbe uhunmwu kotọ rre ne amazẹ ruẹ, umogun.’

Ẹmwẹ ne iran ta na, keghi ya ohu mu e Nebukiadnẹza sayọ. Ọ na tama emwa ọghẹe wẹẹ ne iran “koko erhẹn  nii, nẹ ọ ya ukhukhu ihinrọn sẹẹ vbene ọ te ka baa sẹ.” Ọ na ghi tama ivbi iyokuo ọghẹe wẹẹ: ‘Wa gbalọ iran, ne uwa filo iran ku uwu erhẹn!’ Erhẹn nii baa sẹrriọ wẹẹ, vbe ivbi iyokuo ghi filo iran yọ nẹ, ivbi iyokuo nii na wulo ye evba. Vbe Nebukiadnẹza ghi ghee uwu erhẹn, ọ na bẹghe vbe ikpia enẹ khian yo khian rre vbuwe ẹre. Ohan na gha muẹn, ọ na nọ ekhaẹmwẹ ọghẹe wẹẹ: ‘Ẹi re orhunmwu eha ima filo ku uwu erhẹn ban? Orhunmwu enẹ ẹre imẹ ghi bẹghe na, ọkpa vbọ yevbe odibosa!’

Vbe Nebukiadnẹza ghi sikẹ ọkpẹn erhẹn nii, ọ na da tie iran wẹẹ: ‘Uwa ladian, uwa ne eguọmwadia ọghe Osa Ne Oghodua!’ Egbe na wa wọọ emwa hia, vbe iran ghi bẹghe wẹẹ Siẹdrak, e Mesiak kevbe Abẹdnigo ladian vbene emwi rhọkpa ma na ru iran. Erhẹn ma giẹn iran hiehie, ighogho ma vbe gha wia lele iran.

E Nebukiadnẹza keghi kha wẹẹ: ‘Osa ọghe Siẹdrak, e Mesiak kevbe Abẹdnigo wa mwẹ ẹtin. Ọ gie odibo ọghẹe rre nọ do miẹn iran fan. Ai miẹn osa nọ yevbe ọre.’

Deghẹ ọ rhiẹnrhiẹn ra deghẹ ọ rriara, uwẹ muegbe ne u ya da imudiase ọghuẹ yi vbe na ghee Ivbi Hibru ne eha ra?

“Osanobua ruẹ ọkpa wẹ gha ga, ne u gha vbe ya uhunmwu rhanmwa otọ na.”—Matiu 4:10