Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 67

Ogba Ekẹn Ọghe Jerusalẹm

Ogba Ekẹn Ọghe Jerusalẹm

Ọ vbe gha mwẹ Ovbi Izrẹl ọkpa na tie ẹre Nehimaia nọ ghaa re ọguọmwadia Ọba e Zakzis, vbe ẹvbo e Susa nọ rre otọ e Pẹsia. Vbe ọtiẹn e Nehimaia ọkpa ghi ke Juda rre, ọ na tama e Nehimaia wẹẹ: ‘Arrọọ ọghe Ivbi Izrẹl ni werriegbe gha rrie Jerusalẹm wa rre ikpadede, rhunmwuda, a ma he ye bọ ogba ekẹn ọghe iran, ne Ivbi e Babilọn guọghọẹ.’ Ọ keghi da e Nehimaia sẹ ugboloko vbe ọ họn iyẹn na. Ọ keghi na erhunmwu gie Jehova, ne ọ ya obọ kaan ọba ekhọe, ne ọba mieke na kpasẹ yọ ne irẹn gha rrie Jerusalẹm ya ru iyobọ ne Ivbi Izrẹl.

Vbọ ghi sẹ ẹdẹ ọkpa, ọba na do bẹghe ẹre wẹẹ e Nehimaia i ghọghọ. Ọ keghi tama e Nehimaia wẹẹ: ‘Aro ruẹ i mose vbe uhunmwu. Vbọ sunu?’ E Nehimaia keghi wanniẹn wẹẹ: ‘De vbene aro mwẹ khian ya gha mose vbe uhunmwu hẹ, vbene arrọọ ọghe emwa ni rre Jerusalẹm ne ẹvbo mwẹ, na rre ikpadede?’ Ẹre ọba na ghi nọ rẹn wẹẹ: ‘Vbua hoo ne I ru nuẹ?’ Vbobọvbobọ, e Nehimaia keghi na erhunmwu gie Jehova vbuwe ekhọe ọghẹe. Ọ na ghi tama ọba wẹẹ: ‘Lahọ, gu mwẹ gha rrie Jerusalẹm ne I ya dọlegbe bọ ogba ekẹn ọghẹe.’ Ọba e Zakzis keghi kpasẹ yọ ne Nehimaia gha khian, ọ na vbe ru emwamwa ne Nehimaia sẹtin sẹ e Jerusalẹm vbe egbe hẹnẹdẹn. Ọ na mu e Nehimaia ye ukpo ukọ arriọba ọghe Juda, ọ na vbe viọ erhan nẹ, ne ọ ya winna.

Vbe Nehimaia ghi sẹ e Jerusalẹm, ọ na kin ogba ekẹn nii lẹga. Iyeke ọni, ọ na si avbe ohẹn kevbe emwa ni khaevbisẹ koko, ọ na tama iran wẹẹ: ‘Ọna i zẹdẹ maan. Te ọ wa khẹke ne ima suẹn iwinna nia.’ Emwa hia keghi kueyọ, iran na suẹn ogba ekẹn nii na bọ.

Eghian ọghe Ivbi Izrẹl eso na gha ya iran gbogiẹ, iran na gha kha wẹẹ: ‘Umuọkhọkhọ gha wa hin ogba ekẹn na, ọ wa kharha kua.’ Sokpan Ivbi Izrẹl ma kue ne ẹmwẹ na, gbe orhiọn ye iran iwu. Eghian ọghe iran ke rẹn emwi nọ sunu, ogba ekẹn nii sẹ odukhunmwu nẹ.

Eghian ọghe iran ni rre ẹvbo ughughan na gha ru emwamwa ne iran do ya gu Ivbi Izrẹl khọn. Vbe iran ghi họn vbekpa re, ohan na gha mu iran. Sokpan e Nehimaia keghi tama iran wẹẹ: ‘Uwa ghẹ gi ohan mu uwa. E Jehova gu ima rrọọ.’ Ọ keghi ru emwamwa ne avbe ọbodẹ gha gbogba ga  emwa ni winna, rhunmwuda ọni, eghian ma ghi sẹtin sẹ eke ne iran ye.

Ikpẹdẹ 52 kẹkan ẹre ọ rhie iran re, ne iran ya bọ ogba ekẹn nii fo. E Nehimaia keghi gie na tie Ivbi e Livai hia gha die Jerusalẹm ne iran do ya ogba ekẹn nii fiohan gie Osanobua. Ọ na ghae iran ye ẹbu eva ni so ihuan. Zẹvbe ne iran ya gha bi la odukhunmwu ogba ekẹn nii khian, iran kegha rho e Jehova, vbene iran na gha kpee okpe, ukusẹ kevbe akpata. Ẹzra keghi lele ẹbu ọkpa la obọ ọkpa, e Nehimaia na lele ẹbu nọkpa la obọ ọvbehe, iran hia na ya vba egbe vbe ọgua Osa. Emwa hia​—⁠ikpia, ikhuo, ọmobọ ke ọmowẹ—keghi ru izọese gie Jehova, iran na gha ghọghọ. Ẹi mwẹ emwa ni rre ẹvbo ọvbehe ma gha họn vbe iran bọbọ ugie nii.

“Emwi igbinna ọkpa ne ọ gha sẹtin kuan ruẹn egbe i rrọọ.”—Aizaia 54:17