Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 IRUẸMWI 60

Arriọba Nọ Khian Gha Rrọọ Vbe Ẹdẹdẹmwẹdẹ

Arriọba Nọ Khian Gha Rrọọ Vbe Ẹdẹdẹmwẹdẹ

Vbe asọn ọkpa, Ọba e Nebukiadnẹza keghi mina imina nọ gbe orrirri. Ọ kpokpo ẹre orhiọn sẹrriọ wẹẹ ọ ma ghi miẹn ovbe. Ọ na ghi tie avbe ọbo edunna ọghẹe ne iran rhan otọ imina ne irẹn minaẹn. Iran keghi kha wẹẹ: ‘Umogun, tama ima aro imina ne u minaẹn.’ E Nebukiadnẹza na wẹẹ ne iran tobọ iran tama irẹn imina ne irẹn minaẹn, vbe ẹi re erriọ, irẹn ghi gbe iran rua. Iran na ye gha tama rẹn ne ọ ta imina ne ọ minaẹn. Ọ na ghi kha wẹẹ: ‘Te uwa ya ena si ẹmwẹ taan. Uwa tama mwẹ imina ne I minaẹn!’ Iran keghi tama rẹn wẹẹ: ‘Orhunmwu ọkpa i rre agbọn na, nọ khian sẹtin rhan otọ imina ma ruẹ, vbe ẹi re te u tama rẹn imina ne u minaẹn.’

Ohu mu e Nebukiadnẹza sẹrriọ wẹẹ ọ na wẹẹ na gbele umẹwaẹn hia ni rre otọ nii rua. Ọni rhiema wẹẹ te a khian vbe gbe Daniẹl, Siẹdrak, Mesiak kevbe Abẹdnigo rua. E Daniẹl na rinmwian e Nebukiadnẹza ne ọ zin egbe kherhe. Ẹre Daniẹl vbe ọsiọre eha na rinmwian e Jehova ne ọ ru iyobọ ne iran. De emwi ne Jehova ghi ru?

Vbe umian, e Jehova na tama e Daniẹl vbekpa imina ọghe Nebukiadnẹza kevbe emwi nọ demu. Ẹdẹ ghi gbe, e Daniẹl keghi ya tama ọguọmwadia ọba, nẹ ghẹ gbele umẹwaẹn ni rre otọ nii rua. Ọ na tama rẹn wẹẹ irẹn gha sẹtin rhan otọ imina nii. Ọguọmwadia ọba nii keghi rhie Daniẹl bu e Nebukiadnẹza. E Daniẹl keghi tama Nebukiadnẹza wẹẹ: ‘Emwi nọ khian sunu vbe odaro ẹre Osanobua mu ma ruẹ na. Vbe imina ruẹ, u keghi bẹghe amazẹ nọkhua, nọ mwẹ uhunmwu igoru, nọ mwẹ ẹwẹ kevbe obọ ọghe esiliva; ẹko amazẹ na, wa ya sẹ ekuawẹ ọghẹe keghi re oze, owẹ ọre na gha re ematọn, vbene atata owẹ ọre na gha re ematọn kevbe obuẹ. Okuta nọkhua ọkpa keghi ke uhunmwu oke nọ yo de gbe atata owẹ ọghe nene amazẹ. Ẹre amazẹ nii na rẹnkhuan, ogbigbi ẹhoho na kpolo ebubẹ ọghẹe gha rrie. Okuta nọ rrọọ kẹghi do khian oke nọ yo ẹsẹsẹmwẹse, nọ vẹwa gba uhunmwu otagbọn hia.’

 E Daniẹl na ghi kha wẹẹ: ‘Emwi ne imina ruẹ demu ẹre na khin: Uhunmwu amazẹ na, nọ re igoru keghi mudia ye ihe arriọba ọghuẹ. Esiliva nọ rrọọ ọre arriọba nọ khian gha kha vbe ọghuẹ gha ghi gberra nẹ. Arriọba ọvbehe nọ yevbe oze gha vbe kha yan uhunmwu otagbọn hia. Nọ khian kha lelẹe ghi wegbe vbe na ghee ematọn. Vbe okiekie, a gha miẹn arriọba nọ ghae egbe ye ihe ughughan, abọ eso ghi wegbe vbe na ghee ematọn, abọ eso ghi gha vburriẹ vbe na ghee obuẹ. Okuta nọ khian uhunmwu oke nọ yo sẹ ọre Arriọba Osanobua. Ọ gha guọghọ avbe arriọba na rua, ọ ghi gha rrọọ vbe ẹdẹdẹmwẹdẹ.’

Ọba keghi fan fi iguẹ vbe odaro e Daniẹl, ọ na kha wẹẹ: ‘Osa ọghuẹ ẹre ọ rhan otọ imina na ma ruẹ. Ai miẹn Osa nọ yevbe ọre.’ Ne ọ gha te ya gbe Daniẹl rua, ọ keghi yae khian ọkaolotu ọghe umẹwaẹn hia, ọ na vbe muẹn ye ukpo nọ yo vbe ẹvbo nii. U ma bẹghe vbene Jehova ya họn erhunmwu ọghe Daniẹl hẹ?

“Avbe orhiọn keghi do silo avbe ọba nii hia koko ye ihe ọkpa ne emwa Hibru tie ẹre Amagẹdọn.”—Arhie Maan 16:16