Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 INỌTA 7

Vbia Khian Ru Vbe A Gha Kpikpi Mwẹ Ne I Ru Emwi Ọdọ Vbe Amwẹ?

Vbia Khian Ru Vbe A Gha Kpikpi Mwẹ Ne I Ru Emwi Ọdọ Vbe Amwẹ?

EVBỌ GU RU EKPATAKI

U gha vba re vbe odaro ighẹ vbene u rhirhi ya loo ẹgẹn ruẹ hẹ nia.

DE EMWI NE UWẸ GHA RU?

Ghee igiemwi na ghee: Uki eva ẹre ọ wa ye na, ne Heather vbe Mike ke si egbe obọ, sokpan iku ọghe iran eveva yevbe na miẹn wẹẹ ẹi ghi re eban iran ghi rẹn egbe. Ẹghẹ hia ẹre iran ya gie uhunmwu gie egbe vbe efoni kevbe wẹẹ, iran gha guan vbe ẹrẹna vbe efoni ẹi fo! Sokpan banbanna nia, ẹi ghi re ọni ọkpa ẹre Mike ghi gualọ.

Ke ne iran ke gha rrọọ, emwi ne iran mobọ ru ma gberra na wa da egbe obọ yi kevbe iran vbe mu unu soso egbe kherhe. Heather ma hoo nọ gberra vberriọ. Sokpan irẹn ma vbe hoo ne Mike sẹ irẹn rae. Ọmwa ọvbehe i rrọọ nọ wa mu irẹn tẹtẹtẹ vbene Mike ruẹ. Gberra ọni, irẹn vbe gha roro ẹre wẹẹ, irẹn vbe Mike wa hoẹmwẹ egbe

Adeghẹ uwẹ ọre Heather kevbe wẹẹ, u vbe sẹ nọ zẹ egbakhian, de emwi ne uwẹ gha te ru?

MUẸN RORO ẸSẸSẸMWẸSE!

Emwi ọdọ vbe amwẹ na ru keghi re ẹse ne Osanobua ya wee emwa ni ru orọnmwẹ nẹ ọkpa. Te ọmwa nọ ru emwi ọdọ vbe amwẹ ọ ke ru orọnmwẹ ya ẹse ọghe Osanobua na, ya ru ọkpọghọzọghọ. Ọ yevbe ọmwa nọ ya ukpọn ne mose mose na ya nẹ, khian usọmwẹ ukpọn na ya ka otọ

Adeghẹ ọmwa na ru emwi nọ gbodan ghee uhi nọ dia evbayi, vbene uhi ọghe graviti ye, ẹbe ghi rhuan rẹn. Erriọ ẹbe khian vbe kẹrikian deghẹ ọmwa na rra uhi nọ dia uyinmwẹ, vbe na ghee nọ khare wẹẹ: ‘Lẹẹ ne uyinmwẹ alamoghẹ.’—1 Tẹsalonaika 4:3.

Vbe a lae miẹn deghẹ a na rra uhi na? E Baibol khare wẹẹ: “Ọmwa nọ ru oghẹ, ikinnegbe ẹre, ẹre ọ ru khọ.” (1 Kọrinti 6:18) Ẹmwata ẹre ọna gele khin ra?

 Emwa ni ru ezanzan gualọ otọre miẹn nẹ wẹẹ avbe igbama ni ru emwi ọdọ vbe amwẹ, iran ke ru orọnmwẹ keghi werriẹ aro daa ọlọghọmwa eso na khian yunu kaan na.

  • AKHIẸ. Ni bun sẹ vbe avbe igbama ni ru emwi ọdọ vbe amwẹ iran ke ru orọnmwẹ, keghi gbe I ma rẹn vbe iran gha ruẹ nẹ.

  • AI GBA ẸKO EGBE. Iran gha ghi ru emwi ọdọ vbe amwẹ nẹ, dọmwadọghẹ ghi do gha roro ẹre wẹẹ, ‘a ghi rẹn inu emwa nọ he ka lovbiẹ ke?’

  • IROHANMWA. Aro okpia ne ivbialeke nibun gele gualọ, ọre nọ gha gbaroghe iran, ẹi re okpia nọ gha ya iran gha ru ọghe enegbe ẹre ọkpa. Erriọ vbe ye, ẹmwẹ okhuo na miẹn wẹẹ ọ ka kue ne iran nẹ, i ghi mobọ yẹẹ avbe adesusu nibun.

  • Ẹmwata nọ rrọọ ọre wẹẹ: Adeghẹ u na ru emwi ọdọ vbe amwẹ vbene u ma na he ru orọnmwẹ, emwi ighobioye ẹre u mu fua. (Rom 1:24) Egbe ruẹ i re emwi nọ khẹke na ya fialasẹ hiehie!

Rhiẹre maa wẹẹ u gbegba nọ gha sẹtin ‘Lẹẹ ne uyinmwẹ alamoghẹ.’ (1 Tẹsalonaika 4:3) U gha ghi ru orọnmwẹ nẹ, u sẹtin gu ọmwa ne uwa gba ru orọnmwẹ gha ru emwi ọdọ vbe amwẹ. Ẹghẹ nii, u ghi gele sọyẹnmwẹ ọnrẹn vbene u i na siosi, vbene u i na gbe I ma rẹn, vbene u i na fian afianma, vbene emwa ni ru emwi ọdọ vbe amwẹ iran ke ru orọnmwẹ ye.—Itan 7:22, 23; 1 Kọrinti 7:3.

 VBE UWẸ A GHEE ẸRE HẸ?

  • Ọmwa nọ gele hoẹmwẹ ruẹ gha ru emwi nẹi khian ya orhiọn ruẹ sotọ ra?

  • Ọmwa nọ gele hoẹmwẹ ruẹ gha ya ruẹ ru emwi nọ gha muẹn rria ighẹ asikẹgbe ne u gu Osanobua mwẹ ra?—Hibru 13:4.