Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 INỌTA 2

Vbọsiẹ Ne I Na Kpokpo Egbe Ba Ẹmwẹ Ukhuegbe?

Vbọsiẹ Ne I Na Kpokpo Egbe Ba Ẹmwẹ Ukhuegbe?

EVBỌ GU RU EKPATAKI

Emwi eso rrọọ ni ru ekpataki sẹ emwi ne u bẹghe vbe ughegbe.

DE EMWI NE UWẸ GHA RU?

Ghee igiemwi na ghee: E Julia ghi ghee ughegbe, ọ na do miẹn wẹẹ te irẹn ghi wa kpọlọ. Agharhemiẹn wẹẹ evbibiẹ ọre kevbe avbe ọsiọre tama rẹn wẹẹ te ọ yevbe igban owẹ, ọ na ye kha wẹẹ, “I wa hoo ne I siamẹ.”

Vbe ọ ma he kpẹẹ gbe na, e Julia na kha wẹẹ, irẹn ma na siamẹ, evbakha i rrọọ. Ọ na wa ban evbare vbe ikpẹdẹ eso . . .

Adeghẹ uwẹ ọre Julia, de emwi ne uwẹ gha te ru?

MUẸN RORO ẸSẸSẸMWẸSE!

Aro ne u ya ghee egbe ruẹ sẹtin yevbe ọmwa ne ọ ghee egbe ẹre vbe ughegbe nẹi maan nọ ya emwi khian ne pirri pirri

Ọ ma de emwi nọ rria deghẹ u na gha mu ẹmwẹ ukhuegbe ruẹ roro. Vbene ẹmwata, e Baibol wa guan kaan ukhuegbe nọ maan ọghe ikpia kevbe ikhuo nibun. Usun iran na keghi re Sera, e Rekiẹl, Abigẹl, e Josẹf, kevbe Devid. E Baibol khare wẹẹ okhuo ọkpa na tiẹre Abisag wa gha “mose ẹsẹse.”—1 Ọba 1:4.

Vbọrhirhighayehẹ, igbama nibun keghi wa kpokpo egbe ba ẹmwẹ ukhuegbe. Ọna sẹtin zẹ ẹbe. Muẹn roro:

  • Vbe asẹ ọkpa, ivbialeke 58 eso vbuwe 100, na gha roro ẹre wẹẹ, iran kpọlọ gbe sokpan vbe a ghi gele ghee ẹre, 17 kẹkan ẹre ọ ghaa kpọlọ vbọ.

  • Vbe ẹghẹ ọvbehe, ivbialeke 45 eso vbuwe 100 na gha roro ẹre wẹẹ, iran kpọlọ gbe sokpan vbene ẹmwata te iran wa ye fẹghẹẹ!

  • Rhunmwuda wẹẹ iran hoo ne iran siamẹ, igbama nibun keghi khuọnmwi emiamwẹ ọghe ẹko nẹi gua evbare. A ya ohanmwẹ gbe egbe ọmwa keghi si emiamwẹ na, nọ sẹtin gbe ọmwa rua.

 Adeghẹ u mwẹ egbe ọlọghọmwa na giere na, gualọ iyobọ. Vbe okaro, gu evbibiẹ ruẹ ra enọwanrẹn ọvbehe ne u gu obọ re guan. E Baibol khare wẹẹ: “Avbe ọse ghi gha rhie ahoẹmwọmwa ma vbe ẹghẹ hia, ẹdẹ oseghe ọre a ye etẹn khẹ.” —Itan 17:17.

UMOSEMWẸ NỌ KHẸKE NE U RHIE ARO TUA!

Vbene ẹmwata, ekhọe ọre ose. Vbe igiemwi, gia ghee ẹre, aro ọmwa ne Absalọm ne ovbi Ọba e Devid ghaa khin. E Baibol khare wẹẹ:

“A ma vbe miẹn orhiọnkpa vbe Izrẹl ne a gha ya gie Absalọm vbe ose. . . . Okan rhọkpa i vbe rrọ ọre egbe.”—2 Samuẹl 14:25.

Ọrheyerriọ, ọmwa itengbemu kevbe ọmwa isọtẹ ẹre iren ghaa khin! Rhunmwuda ọni, e Baibol ma zẹdẹ ta ẹmwẹ Absalọm nọ maan; ọ giẹre zẹvbe ọmwa ọyọmwadẹ ne ekhue i mu, kevbe ọmwa ikhẹko kevbe ọmwa nọ mwẹ ekhọe izigha.

Ọna ẹre ọ siẹre ne Baibol na rhie ibude na ne ima:

‘Wa mu akpa ọghe ọgbọn yọ.’—Kọlose 3:10.

“Wa ghẹ gha ya emwi itegbe te egbe ne uwa ba miẹn ehe na gha mose . . . , sokpan, ọ kere ne ose uwa gha re ọghe ekhọe.”—1 Pita 3:3, 4.

Agharhemiẹn wẹẹ, ẹi re emwi dan deghẹ a hoo na gha mose, sokpan emwi nọ ru ekpataki sẹ ọre uyinmwẹ ọmwa. Vbene ẹghẹ ya khian, uyinmwẹ ruẹ ẹre ọ khian mobọ ye emwa gha si ruẹ kẹ egbe, ẹi re ukhuegbe ruẹ! Ovbialeke ọkpa na tiẹre Phylicia khare wẹẹ “Ose ẹre emwa ka wa rherhe bẹghe, sokpan vbene ekhọe ruẹ ye hẹ kevbe uyinmwẹ esi ọghuẹ ẹre emwa mobọ yerre sẹ vbe a gha mu ẹmwẹ ruẹ rre.”

ADEGHẸ U NA GHEE VBENE U YE HẸ

Ẹko rriara ruẹ vbe ẹghẹ hia ra, rhunmwuda vbene ukhuegbe ruẹ ye hẹ ra? Ohu egbe ruẹ mobọ mu ruẹ vbe u gha ghee vbene u ye hẹ ra?

Uwẹ he ka muẹn roro ẹdẹ, deghẹ ne u ya ori bolo egbe, ra ne u ya ohanmwẹ gbe egbuẹ, ne u mieke na gha mwẹ ukhuegbe nọ maan ra?

Ọ kpa guẹ ru, de emwi ne u gha te fi werriẹ vbe egbe ruẹ? (Sẹ ako lẹgaa enọ khin vbọ.)

  • UTANMWẸ

  • UKPỌLỌMWẸ

  • ETO

  • UKHUEGBE

  • UGBARO

  • ẸMU ỌGHE EGBE

Adeghẹ ẹẹn ọre ewanniẹ ruẹ vbe inọta nokaro kevbe nogieva, kevbe deghẹ u na sẹ ako lẹgaa emwi eha ra nọ gberra vberriọ vbe inọta nogieha, yerre wẹẹ: Ẹi wa re aro ne uwẹ ya ghee egbuẹ, ẹre emwa ọvbehe ya ghee ruẹ. Adeghẹ u na gha kpokpo orhiọn gbe ba ẹmwẹ ukhuegbe, banbanna u khian gberra uwu nẹ.—1 Samuẹl 16:7.