Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 INỌTA 6

De Emwi Ne I Gha Ru Ne Ihua Mwẹ Ghẹ Sẹtin De yan Mwẹ?

De Emwi Ne I Gha Ru Ne Ihua Mwẹ Ghẹ Sẹtin De yan Mwẹ?

EVBỌ GU RU EKPATAKI

Adeghẹ u na mudia gbain, u gha mwẹ ẹmwẹ obọ ruẹ, na gha te ya miẹn wẹẹ emwa ọvbehe ẹre ọ ghi ru emwi yọ ruẹ obọ.

DE EMWI NE UWẸ GHA RU?

Ghee igiemwi na ghee: Brian ghi miẹn ihua re eva ne iran gba rre esuku, udu na wa siẹre. Ọna ẹre ọ ya gba vbe igbaha ne iran ke tama rẹn nọ deba iran si esiga.

Nokaro na kha wẹẹ:

“U vbe gbaro miomio nẹ vba, do deba ihua rrọ emwi re.”

Ọ na ghi fi obọ ye ẹkpo, rhie esiga ladian, ẹre ọ na rhie dae Brian nọ si.

Brian ghi miẹn esiga vbe obọre, ọ na kẹ kherhe ne udu ẹre vbọ fua.

“Brian na ghi khama rẹn wẹẹ “Ghẹ gui, I ka khama uwa wẹẹ I i si . . .”

Ọ ke guan fo, enukpogieva na fian ẹmwẹ yọ re unu wẹẹ: “U muohan gbe!”

“Brian na ya udinmwẹ khama rẹn wẹẹ “Ẹi re te I muohan”.

Ọ ghi rhie obọ la e Brian urhu, ọ na fẹko tama rẹn wẹẹ: “wa si ẹre.”.

Ẹre nọkpa na mu esiga nii sikẹ unu e Brian vbene ọ na fẹko tama rẹn wẹẹ: “Ma i khian tama ọmwa rhọkpa.”

Adeghẹ uwẹ ọre Brian, de emwi ne u gha te ru?

 MUẸN RORO ẸSẸSẸMWẸSE!

Ihua e Brian gele rẹn emwi ne iran ru ra? Uwẹ yayi wẹẹ ekhọe obọ iran ẹre iran ya ru ọna ra? Hiehie. Vbene ẹmwata, obọ emwa ọvbehe ẹre iran na miẹn uyinmwẹ na. Iran hoo ne iran gua usun ro, ẹre ọ siẹre ne iran na ru emwi ne emwa ọvbehe ru.

Adeghẹ uwẹ ẹre ọ werriẹ aro daa egbe ukpokpo otu ihegbe vbenia, de emwi ne u gha te ru ne u ya mudia gbain?

  1. YARO YE EMWI NỌ GHA SUNU

    E Baibol khare wẹẹ “Emwa ni wan gha miẹn wẹẹ orueghe dee, iran ghi rhie uhunmwu iran lẹre, sokpan, ọmwa nẹi roro iro ghi wa ya owẹ khian lahọ, ọ ghi ya gha gbe ima rẹn vbe okiekie.”—Itan 22:3.

    U gha sẹtin bẹghe ọlọghọmwa vbe ọ gha dee. Vbe igiemwi, adeghẹ u miẹn ivbi esuku eso si esiga vbe urria, u ghi yaro ye emwi nọ gha sunu ne u mieke na sẹtin muegbe yotọ.

  2. MUẸN RORO

    E Baibol khare wẹẹ: “Ghẹ gie ekhọe ruẹ bu ohiẹn gbuẹ hiehie.”—1 Pita 3:16.

    Nọ egbuẹ, ‘Vbọ khian kẹrikian deghẹ I na ru emwi rhunmwuda wẹẹ, emwa ọvbehe vbe ruẹ?’ Vbene ẹmwata, uwẹ vbe ihua sẹtin gu obọ egbe vbe ovbiẹghẹ kherhe. Sokpan de emwi ne u gha lae miẹn? U gha hoo ne u mu ẹkpẹn ne egbuẹ fua rhunmwuda u hoo ne u ya ẹko rhiẹnrhiẹn ihua ra?—Ẹksọdọs 23:2.

  3. ZẸ EMWI RU

    E Baibol khare wẹẹ: “Avbe umẹwaẹn ghi gha ya egbe lẹẹ ne orueghe.” —Itan 14:16.

    Yerre wẹẹ, atamuolọyan ne ima rhirhi ru keghi mwẹ emwi nọ kẹrikian. E Baibol guan kaan emwa eso ni ru atamuolọyan ni maan vbe na ghee Josẹf, e Job, kevbe Jesu. Ọ vbe guan kaan emwa eso ni ma gua zẹ ne egbe iran vbe na ghee Keni, Isọ kevbe Judas. De emwi ne uwẹ gha ru?

E Baibol khare wẹẹ: “De obọ mu emwi esi.” (Rom 12:9) Adeghẹ u ka roro ẹre nẹ ighẹ evbọ gha kẹrikian kevbe emwi ne u gha ru, ẹi ghi lọghọ vbe u gha zẹ enunu ruẹ kevbe wẹẹ u gha vbe miẹn ere vbọ.

Ẹi re te u khian wa gha gu ihua guan vbe na ghee ọmamwaemwi. Wa ya ekhọe hia kha wẹẹ ẹn o, erriọ wa sẹ. Ra deghẹ u hoo nọ vẹ ne iran rẹn wẹẹ, iran i khian sẹtin fi ekhọe ruẹ werriẹ, u sẹtin kha wẹẹ:

  • “I i gu uwa mwẹ obọ vbọ!”

  • “I i ru egbe emwi vberriọ!”

  • “Uwa ma ka rẹn aro ọmwa ne imẹ khin ra!”

Emwi nọ gha ru iyobọ nuẹ ọre ne u zẹ emwi ru vbobọvbobọ kevbe wẹẹ, ghẹ gha gbe yo gbe rre. U gha ru vberriọ, odẹ ne u ma zẹdẹ yaro yi ẹre iran khian ya lẹẹ nuẹ!

 VBENE U KHIAN YA LAE HẸ DEGHẸ IRAN NA GHA YA RUẸ GBOGIẸ

U gha kue ye emwi ne ihua khare, u do yevbe na ghee rọbọti ne ihua ya ku yo ku rre

Adeghẹ ihua na gha ya ruẹ gbogiẹ vbo? Vbọ vbe ye hẹ, deghẹ iran na kha wẹẹ, “Vbọ ru ruẹ—ohan mu ruẹ gbe?” Wa rẹn wẹẹ ukpokpo otu ihegbe ẹre na khin. De emwi ne u gha ru? Ghee emwi eva ne u gha sẹtin ru.

  • U sẹtin wa mu wuegbe. U wa kha wẹẹ, (“ẹmwata nọ, ohan gele wa mu mwẹ!” U ghi tae kuẹi ighẹ emwi nọ rrọ ruẹ ekhọe.)

  • U sẹtin lele iran vbọ. U gha ghi ta ẹmwẹ nọ rrọ ruẹ ekhọe fo nẹ, u ghi wẹẹ ne iran mu enegbe iran roro. U sẹtin kha wẹẹ, (“mẹ te wẹẹ ọmwa ne agbọn fi, ẹre ọ si esiga!”)

Adeghẹ ihua na ye gha ya ruẹ gbogiẹ, u ghi kpa vba rre! Yerre wẹẹ, vbene u ya kpẹẹ vba, erriọ ẹre iran khian ya gha kpikpi ruẹ sayọ. Adeghẹ u na kpa vba rre, ọni rhiema wẹẹ, u ma kue ne emwa ọvbehe fi ruẹ werriẹ.

Vbene ẹmwata, u i khian sẹtin lẹẹ ne ukpokpo otu ihegbe. Sokpan, u gha sẹtin zẹ ne egbuẹ, u gha sẹtin ta ẹmwẹ nọ rrọ ruẹ ekhọe, vbe nai na vbe sẹtin gbuẹ yo gbuẹ rre. Vbe okiekie ehia, obọ ruẹ, ẹre emwi hia ye!—Jọsua 24:15.