Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 INỌTA 1

De Ọmwa Ne Imẹ Khin?

De Ọmwa Ne Imẹ Khin?

EVBỌ GU RU EKPATAKI

Adeghẹ u na rẹn aro ọmwa ne u khin kevbe emwi ne u yayi, ọ gha ru iyobọ nuẹ ya ru atamuolọyan nọ maan sẹ vbe ẹghẹ ne emwa ya kpikpi ruẹ.

DE EMWI NE UWẸ GHA RU?

Ghee igiemwi na ghee: Ọ ma he sẹ ifuanro igbe ne Karen sẹ iku ọkpa nọ yo, vbe ọ họn vbe ọsiọre khama rẹn wẹẹ:

“Vbe uwẹ a ru vbe imudia vba yi?”

Vbe Karen ghi gbaro ghee iyeke, ọ na bẹghe ọsiọre ighẹ Jessica vbe ọ da ọgọ ayọn eva yi. Karen rẹnrẹn ighẹ ayọn nọ gbe ọmwa nọ. Jessica na mu ọkpa ne Karen vbene ọ na khama rẹn wẹẹ, “Uwẹ i ghi re ọvbokhan, te a sọyẹnmwẹ egbe!

Karen ma te hoo nọ miẹn ọnrẹn ayọn nii, sokpan ọse ẹre iran eveva khin. Ọ ma vbe hoo ne Jessica do gha ghee irẹn wẹẹ, ai miẹn ne irẹn gu agbọn ye. Gberra ọni, Jessica i re ọmwa dan. Adeghẹ Jessica wọn vbe ayọn nii, ọni rhiema wẹẹ ẹi re emwi dan. Karen na gha roro ẹre wẹẹ, ‘ayọn kẹkan nọ nia, ẹi vbe re ikpukhunmwu na minọ re.’

Adeghẹ uwẹ ọre Karen, de emwi nu gha te ru?

MUẸN RORO ẸSẸSẸMWẸSE!

Ne u sẹtin ru atamuolọyan nọ maan vbe egbe emwi vbenia gha sunu, ọ khẹke ne u gha mwẹ evba ya yi ruẹ ẹro. Ọna ẹre ọ khian ghi ye ruẹ ẹre rre vbekpae aro ọmwa ne u khin kevbe emwi ne u yayi. Adeghẹ u na rẹn aro ọmwa ne u khin, u ghi sẹtin gha mwẹ ẹmwẹ obọ ruẹ, na gha te ya miẹn wẹẹ emwa ọvbehe ẹre ọ ghi tama ruẹ emwi ne u gha ru.—1 Kọrinti 9:26, 27.

Vbọ khian ya ruẹ gha mwẹ egbe ẹrhiọn vberriọ? Avbe inọta na, keghi re usun emwi nọ khian ka wa ru iyobọ nuẹ.

 1 DE AKPA NỌ MAAN NE IMẸ MWẸ?

Adeghẹ u na rẹn emwi ne u gha sẹtin ru kevbe uyinmwẹ esi ne u mwẹ, ọna gha ya ruẹ gha mwẹ ilẹkẹtin sayọ.

IGIEMWI NỌ RRE BAIBOL: Ukọ e Pọl keghi gbẹn wẹẹ: “Ọ gha kẹ, I ma he guẹ ẹmwẹ ne a guan, sokpan, ẹi yerriọ vbe ọghe irẹnmwi.” (2 Kọrinti 11:6) Rhunmwuda ne ọ na rẹn Evbagbẹn Nọhuanrẹn ẹsẹsẹmwẹse, e Pọl keghi sẹtin mudia gbain vbe emwa ọvbehe si irẹn evẹn. Irẹn ma gie ẹmwẹ nọ ma khẹke ne emwa ọvbehe ta gbe irẹn orhiọn muotọ.—2 Kọrinti 10:10; 11:5.

ZANZAN EGBUẸ GHEE: Gbẹn emwi ọkpa ne u wa guẹ ye ototọ mwa.

Nia, gbọẹn yotọ akpa ọkpa ne kpataki ne u mwẹ. (Vbe igiemwi, ọmwa nọ mwẹ ẹghẹ ne emwa ọvbehe ẹre u khin ra? U zẹ emwi obọ ra? Ọmwa nọ gia hẹnhẹn egbe yan ẹre u khin ra? U ru emwi ye ẹghẹ ra?)

2 DE AKO NE I NA VBURRIẸ?

Adeghẹ ọgiọrọ ọghe ikẹkẹ na fian vbe eke ọkpa, ikẹkẹ nii i ghi mwẹ evbọ gia ya ru, erriọ vbe ye ne ima, adeghẹ ima na gha rhie aro tua ako ne ima na vburriẹ, ma i vbe rẹn emwi ya ru.

IGIEMWI NỌ RRE BAIBOL: E Pọl keghi rẹn eke ne irẹn na gha vburriẹ. Irẹn keghi gbẹn wẹẹ: ‘Ọ gele wa yẹẹ mwẹ ighẹ uhi ọghe Osanobua vbene ekhọe mwẹ ye, sokpan I do bẹghe ẹre wẹẹ vbuwe egbe mwẹ, uhi ọvbehe rrọọ nọ gu ẹre khọn ighẹ uhi ọghe ekhọe mwẹ, nọ ghi do ya imẹ khian ọviẹn ọghe uhi ọghe orukhọ, nọ rre uwu egbe mwẹ.’—Rom 7:22, 23.

ZANZAN EGBUẸ GHEE: De ako eso ne u na vburriẹ nọ khẹke ne u winna yan?

 3 VBỌ RE EVBAKỌNRẸN ỌGHOMWẸ

U gha wa gheghe la imọto vbene u i na mwẹ eke nu rrie, ne u khama ọmwa nọ guae nọ wa gha mu ruẹ yo, mu ruẹ rre a te miẹn wẹẹ, e fuẹl fo vbe ne imọto ra? Ẹi re emwi ukọnmwẹ ni khin kevbe ẹki na ya mu igho rria?

Vbe ima miẹn ruẹ vbe igiemwi na? Adeghẹ evbakọnrẹn rrọọ ne u rhie aro tua, u ghi wa rẹn eke ne u rrie kevbe eke ne u ke dee.

IGIEMWI NỌ RRE BAIBOL: E Pọl keghi gbẹn wẹẹ: ‘Ulẹ ne I rhie, ẹi re ọghe ihoi.’ (1 Kọrinti 9:26) Na gha te ya miẹn wẹẹ, te irẹn wa zozo kẹkan vbuwe agbọn, e Pọl keghi fian okhuo ne egbe ẹre kevbe ọ na vbe gha khu ẹre khian.—Filipai 3:12-14.

ZANZAN EGBUẸ GHEE.

Gbẹnnẹ evbakọnrẹn eha ne u hoo nu dobọ mu ọ te sẹ ukpo nọ dee.

4 DE EMWI NE IMẸ YAYI?

Adeghẹ u na gele gha mwẹ evba ya yi ruẹ ẹro, u ghi yevbe erhan nọ gbọzinian, ne okpẹhoho i khian sẹtin mu gbotọ

Vbene u i na mwẹ emwi ne u yayi, u i sẹtin ru atamuolọyan rhọkpa. Vbe na ghee ẹrokhi, u ghi gha fi egbe werriẹ ne u mieke na gu obọ avbe ọse ruẹ—ọni rhiema wẹẹ u ma rẹn aro ọmwa ne uwẹ khin.

Vbe obọ nọkpa, deghẹ u na gha yin zẹvbe nọ gua iyayi ọghuẹ ro, u ghi ye gha re ọmwa ne u khin—ọ gha khọnrẹn wẹẹ emwa ọvbehe ru emwi nọ lughaẹn ne ọghuẹ.

IGIEMWI NỌ RRE BAIBOL: Egbọre ehọnrre ẹre akhasẹ ighe Daniẹl ghaa khin vbe ọ ‘tamuolọyanrẹn vbe ekhọe ọghẹe’ wẹẹ te irẹn khian lele uhi ọghe Osanobua, ọ gha khọnrẹn wẹẹ ẹgbẹe ọre i rre evba. (Daniẹl 1:8) Atamuolọyan ọghe irẹn na, keghi ya irẹn gha mwẹ ẹmwẹ obọre. E Daniẹl keghi yin zẹvbe nọ gua emwi ne irẹn yayi ro.

ZANZAN EGBUẸ GHEE: De emwi ne uwẹ yayi? Vbe igiemwi: Uwẹ ya Osanobua yi ra? Adeghẹ erriọ nọ, vbọsiẹ ne u na yaeyi? De emwi nọ ya uwẹ yayi wẹẹ ọ gele rrọọ?

Uwẹ yayi wẹẹ, umamwẹ ọghe egbe ima ẹre ima yae gualọ deghẹ ima na gha lele uhi ọghe Osanobua ra? Adeghẹ erriọ nọ, vbọsiẹ?

De ne uwẹ hoo ne uwẹ gha khin vbọ vbe okiekie—ebe nọ kharha kua ne ẹhoho mu yo mu rre ra erhan nọ gbọzinian ne okpẹhoho i sẹtin mu gbotọ? Adeghẹ u na gie emwa rẹn aro ọmwa ne u khin, u gha yevbe erhan nii. Ẹghẹ nii u ghi sẹtin zẹ ewanniẹ ye ne inọta, De ọmwa ne imẹ khin?