Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 ABỌ 7

Vbene U Khian Ya Ma Ovbuẹ Emwi Hẹ

Vbene U Khian Ya Ma Ovbuẹ Emwi Hẹ

‘Ghẹ miamia avbe uhi ne I viọ ne uwa ẹdẹnẹrẹ na, kevbe te uwa gha vbe ma ivbi uwa re.’—Diuteronomi 6:6, 7

Vbe ẹghẹ ne Jehova ya ru emwamwa ẹgbẹe, irẹn keghi rhie asẹ ne evbibiemọ ne iran ya gha gbaroghe ivbiran. (Kọlose 3:20) Uwẹ ẹre ọ bi yọre egbe zẹvbe evbibiemọ ne u ya ma ovbuẹ re nọ hoẹmwẹ Jehova kevbe nọ waan rre zẹvbe ọmwa nọ rẹn enegbe. (2 Timoti 1:5; 3:15) Te u gha vbe rẹn emwi nọ rre ekhọe ọghe ovbuẹ. Vbene ẹmwata, igiemwi ọghuẹ keghi re emwi ne kpataki. Odẹ nọ ghi maan sẹ ne u gha ya ma ovbuẹ emwi vbekpae Jehova, ọre ne uwẹ ka ma egbe uwẹ re nẹ.—Psalm 40:8.

 1 KIE ẸKPOTỌ YỌ NE IVBUẸ GHA GU RUẸ GUAN VBE ẸGHẸ KE ẸGHẸ

EMWI NE BAIBOL KHARE: “Uwa ghi gha re ne ọ rherhe danmwehọ ẹmwẹ, sokpan nẹi rherhe guan.” (Jems 1:19) Ọ khẹke ne ivbuẹ sẹtin gha gu ruẹ guan vbe ẹghẹ ke ẹghẹ. Te u gha gie iran rẹn wẹẹ u muegbe ne u ya danmwehọ, vbe ẹghẹ ke ẹghẹ ne iran khian ya gu ruẹ guan. Gha ru emwi nọ gha gua iran kpa ya sẹtin fannọ otọ ẹko iran ma ruẹ. (Jems 3:18) Iran gha roro ẹre wẹẹ, u gha van mu iran, ra u gha gu iran gui, iran i ghi ta ẹmwata ma ruẹ. Gha mwẹ iziengbe vbe iran gha gu ruẹ guan, kevbe gha tama iran vbe ẹghẹ hia wẹẹ u hoẹmwẹ iran.—Matiu 3:17; 1 Kọrinti 8:1.

EMWI NE U GHA SẸTIN RU:

  • Gha mwẹ ẹghẹ ne iran vbe iran gha khian gu ruẹ guan

  • Gha gu ivbuẹ ziro vbe ẹghẹ hia, ẹi re vbe ẹghẹ ne ọlọghọmwa ya de rre ọkpa

2 HIA NE U RẸN OTỌRE EMWI NE IRAN HOO NE IRAN TA

EMWI NE BAIBOL KHARE: “Gha danmwehọ emwi ne a ma ruẹ re, ọ gha dunna nuẹ.” (Itan 16:20) Ugbẹnso, te ọ khẹke ne u rẹn otọ emwi ne iran khian ta, ẹi re vbene iran ya tae, ne u mieke na rẹn emwi nọ gele rre iran ekhọe. Emwi nọ wa gu igbama obọ ro nọ, ne iran gha fian ba ẹmwẹ, ugbẹnso iran keghi ta ẹmwẹ eso nẹi te gele rre iran orhiọn. “Gha danmwehọ ẹmwẹ nẹ, u kegha rhie ewanniẹ yọ, adeghẹ ẹi re vberriọ, te u ru emwi ọzuọ.” (Itan 18:13) Ghẹ gie ohu rherhe gha  muẹn.—Itan 19:11.

EMWI NE U GHA SẸTIN RU:

  • Ẹi mwẹ vbene ọ khian wegbe sẹ hẹ ighẹ ẹmwẹ ne ivbuẹ tae, hia ne u ghẹ fian ẹmwẹ ye iran unu vbe iran gha gu ruẹ guan kevbe wẹẹ, ghẹ vbe mu ohu gberra egbe

  • Hia ne u yerre vbene ekhọe ruẹ ghaa ye hẹ vbe ẹghẹ ne u na gha re igbama vbene iran ye, kevbe emwi nọ ghaa yẹẹ ruẹ vbe ẹghẹ nii

 3 GIE IVBI UWA GHA DẸGHE ẸRE WẸẸ UWA MWẸ AKUGBE

EMWI NE BAIBOL KHARE: “Ovbimwẹ, u ghi gha danmwehọ ẹmwẹ ne erha kevbe iyuẹ tama ruẹ.” (Itan 1:8) Erha ọmọ vbe iye ọmọ ẹre Jehova rhie asẹ na nọ gbaroghe emọ. Te u gha ma ivbuẹ re ne iran gha rhie ọghọ nuẹ kevbe ne iran vbe gha họn ẹmwẹ nuẹ. (Ẹfisọs 6:1-3) Adeghẹ evbibiemọ i na mwẹ iziro ọkpa, emọ ne iran biẹ gha rẹn. (1 Kọrinti 1:10) Uwa hia ne uwa ghẹ gha muan ẹmwẹ vbe odaro ivbi uwa, rhunmwuda deghẹ uwa na ru vberriọ, ẹkpẹn ne egbe uwa ẹre uwa yae mu fua zẹvbe evbibiemọ.

EMWI NE U GHA SẸTIN RU:

  • Uwa koko tae vbene uwa khian ya gha gbe ivbi uwa hin ọkhọ rre hẹ

  • Adeghẹ ọ ma gu egbe ro ighẹ ẹmwẹ ne uwẹ vbe ọmwa ne uwa gba rrọọ vbe orọnmwẹ tae vbe nọ dekaan vbene uwa khian ya ma ivbi uwa emwi hẹ, u ghi hia ne u rẹn evbọzẹ nọ na mwẹ egbe iziro vberriọ

 4 UWA RU EMWAMWA YOTỌ

EMWI NE BAIBOL KHARE: “Ma ọmọ vbene ọ gha yin hẹ.” (Itan 22:6) Ne u sẹtin musọe vbe odẹ ne u ya ma ivbuẹ emwi, i re iwinna ẹdẹ ọkpa. Ọ khẹke ne uwa gha mwẹ emwamwa ne uwa lele, usun emwamwa nii, ọre na gha gbe emọ hin ọkhọ rre. (Psalm 127:4; Itan 29:17) Na gbe ọmwa hin ọkhọ rre ma wa rhiema wẹẹ te a khian wa gha rrie ọmwa oya, sokpan ọ keghi dekaan ne u gha ru iyobọ ne ivbuẹ ne iran rẹn evbọzẹ nọ na khẹke ne iran lele uhi na rhie yotọ. (Itan 28:7) Deba ọni, u ghi vbe ma iran re ne iran gha mwẹ ẹkorhiẹnrhiẹnmwẹ daa ẹmwẹ ọghe Jehova kevbe ne iran rẹn ilele ọghẹe. (Psalm 1:2) Ọna gha ya iran gha mwẹ ekhọe ọguọmwaziro nọ huanrẹn.—Hibru 5:14.

EMWI NE U GHA SẸTIN RU:

  • Gia miẹn wẹẹ, u ru iyobọ ne ivbuẹ ya gha ghee Osanobua zẹvbe ọmwa nọ gele rrọọ ne iran gha sẹtin mu ẹtin yan

  • Ru iyobọ ne iran ya dẹghe ẹre kevbe ne iran lẹẹ nẹ, ighẹ ẹbe nọ rre avbe uyinmwẹ esakan na miẹn vbe Itanẹt kevbe avbe ako ni rre itanẹt ne a na gu emwa muobọ. Ma iran re vbene iran khian ya lẹẹ ne emwa ni mu ọmwa yagha hẹ

“Ma ọmọ vbene ọ gha yin hẹ”