Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 ABỌ 3

Vbene A Ya Sọfurre Ye Ọlọghọmwa Hẹ

Vbene A Ya Sọfurre Ye Ọlọghọmwa Hẹ

“Uwa gha ya ẹkoata hoẹmwẹ egbe, rhunmwuda ahoẹmwọmwa gbe ebe gue orukhọ nibun.” —1 Pita 4:8

Zẹvbe ne uwẹ vbe ọmwa ne uwa gba ru orọnmwẹ ya mu agbọn hẹn, uwa gha werriẹ aro daa ọlọghọmwa ughughan. Ọ sẹtin gha re rhunmwuda ne uwa eveva na lughaẹn vbe odẹ ne uwa ya roro emwi, kevbe odẹ ughughan ne uwa ya ghee ẹmwẹ agbọn. Ọ sẹtin vbe gha re ọlọghọmwa nọ ke orere rre ra emwi na ma hoo na ma kọ.

Ọ sẹtin sunu wẹẹ ima gha hoo na lẹẹ ne ọlọghọmwa nọ rre otọ, sokpan e Baibol bu ima ude ne ima ghẹ lẹẹ ne ọlọghọmwa ọghe ima. (Matiu 5:23, 24) Odẹ nọ ghi maan sẹ ne u gha ya sẹtin sọfurre ye ọlọghọmwa ọghuẹ ọre ne u gha ya avbe ilele ọghe Baibol ru emwi.

 1 UWA KOKO ZIRO YAN NE ỌLỌGHỌMWA

EMWI NE BAIBOL KHARE: “Osanobua mwamwa . . . ẹghẹ yọ ne a ya guan.” (Asan-Ibo 3:1, 7) Ọ khẹke ne uwa gha koko ziro yan ọlọghọmwa nọ rre otọ. Gie ọmwa ne uwa gba rrọọ vbe orọnmwẹ gele rẹn vbene ẹmwẹ nii ye hẹ vbe ekhọe ruẹ. “Gha ta ẹmwata” ma ọmwa ne uwa gba rrọọ vbe orọnmwẹ vbe ẹghẹ hia. (Ẹfisọs 4:25) Ohu gha dobọ muẹn, u ghi hia ne u ghẹ giẹ si igbinna. Adeghẹ ẹmwẹ nọ khuẹrhẹ na gha ke ruẹ unu ladian, iro na gba fẹko zẹ i sẹtin khian ọghe ẹzọ.—Itan 15:4; 26:20.

A gha dobọ miẹn wẹẹ uwa eveva ma kue ye ẹmwẹ nii, gie ẹmwẹ nọ maan ye gha ke ruẹ unu ladian, ghẹ miamia ne u ya rhie ahoẹmwọmwa ma ọmwa ne uwa gba rrọọ vbe orọnmwẹ kevbe ne u ya rhie ọghọ nẹ. (Kọlose 4:6) Uwa hia ne uwa rherhe zuze ye ẹmwẹ nii, ọ ma khẹke ne uwa gha ya eghian su egbe.—Ẹfisọs 4:26.

EMWI NE U GHA SẸTIN RU:

  • Bu ẹghẹ nọ khẹke yọ ne uwa ya guan yan ẹmwẹ nii

  • Ọmwa ne uwa gba rrọọ vbe orọnmwẹ gha guan, hia ne u ghẹ fian ẹmwẹ yọre unu. Giẹ guan fo nẹ u ke guan

 2 GHA DANMWEHỌ KEVBE NE U GIE ẸMWẸ NA TA GHA LA RUẸ EKHỌE

EMWI NE BAIBOL KHARE: “Uwa kakabọ gha hoẹmwẹ egbe zẹvbe etẹn vbuwe Kristi, uwa giẹ gha bọbọ uwa egbe ighẹ ẹmwẹ ọghọ na rhie ne egbe.” (Rom 12:10) Emwi kpataki ẹre nọ ighẹ vbene u ya danmwehọ. Gha mwẹ ‘ekhọe itohan . . . kevbe imuegberriotọ’ ne u mieke na sẹtin rẹn ototọ iziro ọghe ọmwa ne uwa gba rrọọ vbe orọnmwẹ. (1 Pita 3:8; Jems 1:19) Ghẹ ba ru vbene a miẹn wẹẹ te u danmwehọ. Adeghẹ ọ na guẹ ru, sẹrae, ighẹ emwi ne u ru, nu wa danmwehọ ọmwa ne uwa gba rrọọ vbe orọnmwẹ vbe ọ gha gu ruẹ guan, ra khama rẹn wẹẹ, uwa gha guan kaan rẹn vbe ọ gha zẹ kpẹẹ. Gha ghee ọmwa ne uwa gba rrọọ vbe orọnmwẹ zẹvbe ogieva ruẹ, ẹi re zẹvbe oghian ruẹ. Adeghẹ ọ na gha yerriọ, ‘ohu i khian rherhe gha muẹn.’—Asan-Ibo 7:9.

EMWI NE U GHA SẸTIN RU:

  • Ọmwa ne uwa gba rrọọ vbe orọnmwẹ gha dobọ gha ta ẹmwẹ nẹi maan vbe ehọ ruẹ, ye gha danmwehọ zẹvbe ọmwa nọ mwẹ ẹkorhiẹnrhiẹnmwẹ

  • Ọ khẹke ne u rẹn emwi nọ gu ta ẹmwẹ nọ tae, kevbe wẹẹ, u ghi vbe rẹn vbene ugbaro ọre ghaa ye hẹ vbe ọ guan, kevbe urhu nọ loo ro

3 RHIE OWẸ LELE IRO NE UWA GBA ZẸ

EMWI NE BAIBOL KHARE: “Gha winna, u gha vbe khuan okhuan ẹdẹ ruẹ, adeghẹ te u tota gbe ọta khian, u gha khian ovbiogue.” (Itan 14:23) Na wa kue ye iro nọ maan na mu rre kẹkan ma sẹ. Ọ khẹke ne u rhie owẹ lele emwi ne uwa gba ta. Ọna keghi gualọ ẹrhiọn ẹsẹsẹmwẹse, sokpan ẹrhiọn na loo yọ, i re na mu rria. (Itan 10:4) Adeghẹ uwa na gha ru emwi zẹvbe ọkpa, uwa gha wa ‘miẹn ere’ vbọ rhunmwuda ẹrhiọn ne uwa loo yọ.—Asan-Ibo 4:9.

EMWI NE U GHA SẸTIN RU:

  • Ọ khẹke ne uwa tamuolọyan rẹn emwi ne dọmwadọghẹ gha ru ne uwa ya sọfurre ye ọlọghọmwa nọ rre otọ

  • Ke ẹghẹ ya se ẹghẹ, uwa gha ghee ẹre vbene uwa he mwẹ alaghodaro sẹ hẹ