Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 ABỌ 1

Lele Adia Ọghe Osanobua Ne Orọnmwẹ Ruẹ Mieke Na Gha Mwẹ Oghọghọ

Lele Adia Ọghe Osanobua Ne Orọnmwẹ Ruẹ Mieke Na Gha Mwẹ Oghọghọ

“Vbe omuhẹn, ayi ne ọ yi ọmwa, yi iran ọdọ vbe amwẹ.”—Matiu 19:4

Osanobua ne Jehova * ẹre ọ ku ọdọ vbe amwẹ nokaro kugbe vbe orọnmwẹ. E Baibol khama ima wẹẹ, Osanobua ghi yi okhuo nokaro nẹ, ‘ọ na rhiẹre bu ne okpia gha dee.’ Vbene Adam ghi ghọghọ sẹ, ọ na kha wẹẹ: “A ghi he vbe miẹn ne ima gba re ọkpa, ugboloko na rhie vbe ugboloko mwẹ kevbe ifun na rhie vbe ifun mwẹ.” (Gẹnẹsis 2:22, 23) E Jehova ye hoo ne emwa ni ru orọnmwẹ gha mwẹ oghọghọ.

U gha wa da ru orọnmwẹ, u sẹtin gha roro wẹẹ erriọ khian wa gha rhiẹnrhiẹn khian. Sokpan ọghe ne ẹmwata, ọlọghọmwa eso gha rhiegbe ma, ẹi mwẹ vbene ọdọ vbe amwẹ nii gha hoẹmwẹ egbe sẹ hẹ. (1 Kọrinti 7:28) Avbe ilele ọghe Baibol wa rre ebe ẹmu na, adeghẹ u na yae ru emwi, ọ gha ye orọnmwẹ ruẹ kevbe ẹgbẹe ruẹ gha mwẹ oghọghọ.—Psalm 19:8-11.

 1 MIẸN ỌNRẸN YI IGHẸ UKPO NE JEHOVA MU RUẸ YI

EMWI NE BAIBOL KHARE: Ọdọ ọre uhunmwuta ọghe ẹgbẹe.—Ẹfisọs 5:23.

Adeghẹ ọdọ ẹre u khin, e Jehova hoo ne u ye obọ tẹtẹtẹ gha mu ọvbokhan ruẹ. (1 Pita 3:7) Te irẹn yi ẹre zẹvbe ruẹ, kevbe irẹn vbe hoo ne u ye ọghọ kevbe ahoẹmwọmwa gha guẹ loo. (Gẹnẹsis 2:18) Te u gha hoẹmwẹ ọvbokhan ruẹ sẹrriọ wẹẹ, u gha sinmwi ọghẹe u ke gha sinmwi ọghuẹ.—Ẹfisọs 5:25-29.

Adeghẹ amwẹ ẹre u khin, e Jehova hoo ne u gha rhie ọghọ nọ dinmwi ne ọdafẹn ruẹ kevbe ne u vbe gha ru iyobọ nẹ, nọ mieke na sẹtin ru iwinna nọ bi ye ọre izabọ zẹvbe ọdọ. (1 Kọrinti 11:3; Ẹfisọs 5:33) Rhie obọ ba atamuolọyan ọghẹe kevbe ne u ya ekhọe hia kuobọ gbe ba re. (Kọlose 3:18) U gha ru vberriọ, u ghi ye mosee vbe odaro Osanobua kevbe ọdafẹn ruẹ.—1 Pita 3:1-6.

EMWI NE U GHA SẸTIN RU:

  • Nọ ọmwa ne uwa gba rrọọ vbe orọnmwẹ, emwi nu gha ru nọ gha ye uwa gha mwẹ oghọghọ sayọ. U ghi fẹko danmwehọ, kevbe u ghi vbe hia nu gha mwẹ alaghodaro vbe odẹ ne u ya yin

  • Gha mwẹ iziengbe. Ọ gha rhie ẹghẹ a te miẹn wẹẹ, uwa rẹn emwi ne uwa gha ru, nọ gha ye uwa gha mwẹ oghọghọ

2 GHA MU ẸMWẸ ỌMWA NE UWA GBA RRỌỌ VBE ORỌNMWẸ RORO

EMWI NE BAIBOL KHARE: Ọ khẹke ne u gha daa ne ọmwa ne uwa gba rrọọ vbe orọnmwẹ. (Filipai 2:3, 4) Gha ye aro nọ ghaan ghee ẹre, kevbe ghẹ miamia wẹẹ, e Jehova hoo ne eguọmwadia ọghẹe hia gha re nọ ‘fuẹko vbe odaro emwa hia.’ (2 Timoti 2:24) “Te ẹmwẹ ekpọ balọ vbene a miẹn wẹẹ te a ye abẹ so ọmwa, sokpan ẹmwẹ nọ ke unu ọmwa ẹwaẹn ladian gha sẹtin mu ọmwa egbe rhaan.” Rhunmwuda ọni, u gha roro ẹmwẹ nẹ, u ke gha tae. (Itan 12:18) Orhiọn nọhuanrẹn ọghe Jehova gha ru iyobọ nuẹ ya sẹtin gha guan zẹvbe ọmwa nọ mwẹ ekhọe esi kevbe ahoẹmwọmwa.—Galatia 5:22, 23; Kọlose 4:6.

EMWI NE U GHA SẸTIN RU:

  • A te miẹn wẹẹ uwẹ vbe ọmwa ne uwa gba rrọọ vbe orọnmwẹ guan kaan emwi eso nọ ru ekpataki, u ghi na erhunmwu gie Osanobua nọ ru iyobọ nuẹ ya sẹtin fu ekhọe rre kevbe ne u gha mwẹ ekhọe na ya ghee emwi ẹse

  • U ke ta ẹmwẹ, u ka gha roro ẹre ẹse, kevbe wẹẹ, u ka vbe roro ẹre vbene u gha ya mu ẹmwẹ nii ye owa hẹ

 3 UWA GHA MWẸ IZIRO ỌKPA

EMWI NE BAIBOL KHARE: U gha ru orọnmwẹ nẹ, “ọkpa” ẹre uwẹ vbe ọmwa ne uwa gba ru orọnmwẹ ghi khin. (Matiu 19:5) Sokpan orhunmwu eva ẹre uwa ye khin kevbe uwa i khian wa gha roro emwi ghee obọ ọkpa. Rhunmwuda ọni, te ọ khẹke ne u rẹn emwi ne u gha ru, ne uwa mieke na gha mwẹ iziro ọkpa kevbe amuroro ọkpa. (Filipai 2:2) Emwi nọ ru ekpataki nọ ne u wa gha mwẹ akugbe vbe uwa gha ru atamuolọyan. E Baibol khare wẹẹ: ‘Adeghẹ a na si uhunmwu koko, emwamwa ghi dunna.’ (Itan 20:18) Gie avbe ilele ni rre Baibol gha dia uwa vbe atamuolọyan ne kpataki ne uwa rhirhi koko ru.—Itan 8:32, 33.

EMWI NE U GHA SẸTIN RU:

  • Ẹi re iyẹn ọkpa ẹre u khian gha na ma ọmwa ne uwa gba rrọọ vbe orọnmwẹ, ọ vbe khẹke ne u gha giẹ rẹn emwi ne u mu roro

  • A te miẹn wẹẹ u rhie obọ ye emwi ke emwi, ọ khẹke ne u ka gha muẹn ma ọmwa ne uwa gba rrọọ vbe orọnmwẹ

^ okhuẹn 4 E Jehova ọre eni ọghe Osanobua zẹvbe nọ rre Baibol.