Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 ABỌ 5

Vbene Uwẹ Vbe Emwa Vbuwe Ẹgbẹe Khian Ya Gu Obọ Egbe Hẹ

Vbene Uwẹ Vbe Emwa Vbuwe Ẹgbẹe Khian Ya Gu Obọ Egbe Hẹ

“Uwa gha mwẹ . . . itohan, imuegberriotọ, ọmẹhẹ, kevbe iziengbe.”—Kọlose 3:12

A gha ru orọnmwẹ nẹ, ẹgbẹe ọgbọn ẹre a ghi mwẹ. Agharhemiẹn wẹẹ u gha ye gha rhie ọghọ ne evbibiẹ ruẹ kevbe u gha ye hoẹmwẹ iran, ọmwa ne uwa gba rrọọ vbe orọnmwẹ ẹre ọ ghi sikẹ ru ẹ sẹ vbe agbọn na. Emwa eso vbe ẹgbẹe ruẹ i khian ghee ẹre vberriọ. Sokpan ilele nọ rre Baibol gha sẹtin ru iyobọ nuẹ ya ru emwi hia ye oreghe, ne u mieke na gu obọ emwa vbuwe ẹgbẹe, zẹvbe ne u ya hia ne asikẹgbe ne khuankhuankhuan gha rre ẹgbẹe ọghe ọgbọn ne u mwẹ.

 1 GHA YE ARO NỌ KHẸKE GHEE EMWA NI RRE ẸGBẸE RUẸ

EMWI NE BAIBOL KHARE: “Ye ọghọ ne erha kevbe iyuẹ.” (Ẹfisọs 6:2) Ẹi mwẹ vbene u khian waan sẹ hẹ, ọ khẹke ne u rhie uyi kevbe ọghọ ne evbibiẹ ruẹ. U ghi vbe rẹn wẹẹ, te ọ khẹke ne ọmwa ne uwa gba rrọọ vbe orọnmwẹ gha mwẹ ẹghẹ ne evbibiẹ ọre. ‘Ahoẹmwọmwa i gbọvo,’ rhunmwuda ọni, ghẹ fian afianma ye asikẹgbe ne ọmwa ne uwa gba rrọọ vbe orọnmwẹ gu evbibiẹ ọre mwẹ.—1 Kọrinti 13:4; Galatia 5:26.

EMWI NE U GHA SẸTIN RU:

  • Ghẹ gie ẹmwẹ wa gha fo vbe unu ruẹ, ne u gha ta egbe ẹmwẹ vbennia wẹẹ, “Ẹgbẹe ruẹ i ghee mwẹ sẹ ọmwa” ra “Emwi ọkpa i rrọọ ne I ru nọ ya ẹko rhiẹnrhiẹn iyuẹ”

  • Uwẹ vbe ya roro egbe ghee

 2 MUDIA YE ẸMWẸ OBỌ RUẸ VBE ẸGHẸ NỌ KHẸKE

EMWI NE BAIBOL KHARE: “Ọna ẹre ọ zẹe ne okpia gha na sẹ erhae kevbe iyẹe raẹ, ọ ghi rhikhan mu amwẹ ọnrẹn, iran ghi gha re ọkpa.” (Gẹnẹsis 2:24) U gha ru orọnmwẹ nẹ, evbibiẹ ruẹ sẹtin ye gha roro ẹre wẹẹ ototọ iran ẹre u ye ye, rhunmwuda ọni, iran sẹtin ye gha hoo ne iran gha guan ye ẹmwẹ orọnmwẹ ruẹ nọ ma te kaan iran.

Uwẹ vbe ọmwa ne uwa gba rrọọ vbe orọnmwẹ ẹre ọ khian tae, ẹmwẹ uwa nọ gha gie evbibiẹ uwa guan yi, kevbe uwa ghi tae ma iran vbe odẹ ne khuẹrhẹ. U gha sẹtin ta ẹmwẹ nọ rrọọ ruẹ orhiọn kevbe u wa vbe suigiẹ yọ vbene u i na ze vbe udu. (Itan 15:1) Imuegberriotọ, ekhọe ọmẹhẹ kevbe iziengbe gha ru iyobọ nuẹ ya gha gu emwa ni rre uwu ẹgbẹe loo vbe ọyẹnmwẹ kevbe ne u vbe sẹtin ‘ya ekhọe ahoẹmwọmwa gha mu emwi wuegbe vbe ẹghẹ hia.’—Ẹfisọs 4:2.

EMWI NE U GHA SẸTIN RU:

  • Adeghẹ ẹko i rhiẹnrhiẹn ruẹ yọ vbene ẹgbẹe ya fi ukpẹ ye ẹmwẹ uwa, gualọ ẹghẹ ne khuẹrhẹ ya gu ọmwa ne uwa gba rrọọ vbe orọnmwẹ guan vbekpa re

  • Uwa eveva ta unu ọkpa vbe nọ dekaan odẹ ne uwa gha la vbe ẹmwẹ na