Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 ABỌ 8

Adeghẹ Emwi Nọ Wegbe Na Sunu

Adeghẹ Emwi Nọ Wegbe Na Sunu

“Wa gie ọyẹnmwẹ ọna gha sẹ uwa, agharhemiẹn wẹẹ ẹi mwẹ uwa ma gha mwẹ ẹkorriaramwẹ vbe ẹghẹ kherhe, rhunmwuda edanmwẹ ughughan ne uwa miẹn.”—1 Pita 1:6

Ẹi mwẹ vbene u khian hia sẹ hẹ ne orọnmwẹ ruẹ kevbe ẹgbẹe ruẹ gha mwẹ oghọghọ, emwi ne a ma hoo ne a ma kọ sẹtin sunu nọ gha yae lọghọ na ye gha mwẹ ọyẹnmwẹ. (Asan-Ibo 9:11) Osanobua keghi ya ekhọe ahoẹmwọmwa ru iyobọ ne ima vbe ima gha werriẹ aro daa ọlọghọmwa. Adeghẹ u na yae ru emwi ighẹ avbe ilele ọghe Evbagbẹn Nọhuanrẹn na khian guan kaẹn na, uwẹ vbe ẹgbẹe ruẹ gha sẹtin ziengbe ẹre ighẹ ọlọghọmwa nọ ghi wegbe sẹ.

 1MU ORHIỌN RUẸ YAN E JEHOVA

EMWI NE BAIBOL KHARE: “Ye enegbe ruẹ hia yan rẹn, rhunmwuda, irẹn ẹre ọ gbaroghe ruẹ.” (1 Pita 5:7) U ghi yerre wẹẹ, ẹi re Osanobua ẹre ọ si e ne u ye yọ ruẹ egbe. (Jems 1:13) Zẹvbe ne u ya sikẹ ọre, ọ gha ru iyobọ nuẹ vbe odẹ nọ ghi maan sẹ. (Aizaia 41:10) “Uwa ta enegbe uwa hia ma rẹn.”—Psalm 62:8.

U gha vbe miẹn ifuẹko vbe u gha tie Baibol kevbe u na gha ruọre vbe ẹdẹgbegbe. Vbe okiekie, u ghi do miẹn vbene Jehova ya “ye ima obọ vbe uwu ọlọghọmwa mwa hia” hẹ. (2 Kọrinti 1:3, 4; Rom 15:4) Irẹn yan rẹn wẹẹ irẹn gha rhie “ọfumwegbe Osanobua, ne ọ gberra ne ọmwa ne agbọn gha sẹtin rẹn otọre” nuẹ.—Filipai 4:6, 7, 13.

EMWI NE U GHA SẸTIN RU:

  • Na erhunmwu gie Jehova nọ ru iyobọ nuẹ ne u ya sẹtin ko udu rre kevbe ne u ya sẹtin gha roro emwi ẹse

  • Muẹn roro odẹ nu gha la kevbe u ghi zẹ enọ maan sẹ vbọ ne u gha sẹtin ru

2 GBAROGHE EGBUẸ KEVBE ẸGBẸE RUẸ

EMWI NE BAIBOL KHARE: ‘Ẹkokoudu ọghe ọmwa nọ mwẹ arẹn otọ emwi keghi mwẹ irẹnmwi, kevbe ehọ ọghe ọmwa ẹwaẹn keghi gualọ irẹnmwi.’ (Itan 18:15) Hia ne u miẹn otọ emwi hia. Gualọ otọre ẹse emwi ne emwa hia vbe ẹgbẹe ruẹ gualọ. Gu iran guan. Danmwehọ iran.—Itan 20:5.

Adeghẹ ọmwa ne uwa hoẹmwẹ ọnrẹn na wu vbo? U sẹtin khiẹ vbene ọ ya balọ ruẹ. U ghi vbe yerre wẹẹ Jesu tobọ re vbe “viẹe.” (Jọn 11:35; Asan-Ibo 3:4) Ọ vbe khẹke ne u gha hẹwẹ kevbe ne u gha vbiẹ ẹse. (Asan-Ibo 4:6) Ọna gha ru iyobọ ne uwa ya sẹtin ziengbe ẹre ighẹ ọlọghọmwa nọ wegbe.

EMWI NE U GHA SẸTIN RU:

  • A te miẹn wẹẹ emwi nọ wegbe sunu, giẹ gha re emwi nọ gua ruẹ obọ ro ne u gha gu ẹgbẹe ruẹ ziro vbe ẹghẹ hia. Ẹi khian ghi lọghọ iran ne iran ya gha gu ruẹ guan vbe ọlọghọmwa gha rre

  • Vbe gu emwa ọvbehe ni ka vbe la egbe ọlọghọmwa vberriọ gberra nẹ guan

 3 GUALỌ IYOBỌ NỌ KHẸKE

EMWI NE BAIBOL KHARE: “Avbe ọse ghi gha rhie ahoẹmwọmwa ma vbe ẹghẹ hia, ẹdẹ oseghe ọ re a ye etẹn khẹ.” (Itan 17:17) Ọ sẹtin gha rre avbe ọse ruẹ orhiọn ne iran ru iyobọ nuẹ, sokpan egbọre iran ma rẹn emwi ne iran gha ru nuẹ. Ghẹ siegbe ne u ya nọ iran emwi ne u gele gualọ. (Itan 12:25) Deba ọni, u ghi vbe gualọ iyobọ orhiọn vbe obọ emwa ni mwẹ irẹnmwi ọghe Baibol. Adia ne iran gha rhie nuẹ vbe Baibol gha ru iyobọ nuẹ.—Jems 5:14.

U gha miẹn iyobọ ne u gualọ, deghẹ u na gha gu iran muobọ ighẹ emwa ni gele mwẹ amuẹtinyan daa Osanobua kevbe ni mwẹ ilẹkẹtin yan avbe eyan ọghẹe. Orhiọn ruẹ gha vbe sotọ deghẹ u na vbe gha ru iyobọ ne emwa ni gualọ ifuẹko. Tama emwa vbekpae amuẹtinyan ne u mwẹ daa e Jehova kevbe avbe eyan ọghẹe. Gha ru iyobọ ne emwa ni gualọ iyobọ vbe ẹghẹ hia, ghẹ vbe zẹ egbe ruẹ hin usun rre vbe ehe ne emwa ni gele hoẹmwẹ ruẹ ye.—Itan 18:1; 1 Kọrinti 15:58.

EMWI NE U GHA SẸTIN RU:

  • Gu ọse ne u hoẹmwẹ ọnrẹn guan, kevbe ne u giẹ ru iyobọ nuẹ

  • Wa gha tama iran iyobọ ne u hoo ne iran ru nuẹ