Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

Etẹn Ni Khian Eniwanrẹn Nẹ—Aro Nọ Ghan Ẹre Jehova Ya Ghee Ẹkoata Ne Uwa Rhiema

Etẹn Ni Khian Eniwanrẹn Nẹ—Aro Nọ Ghan Ẹre Jehova Ya Ghee Ẹkoata Ne Uwa Rhiema

VBE uhunmwu otagbọn hia, aro nọ ghan ẹre ediọn ya ghee ukpamuyọmọ ne iran mwẹ vbe otu e Jehova. Iyobọ nọkhua ẹre iran ye ne ima! Vbe nọ ma he kpẹ gbe na, otu keghi ru afiwerriẹ eso. Otu na wẹẹ ne ediọn ni khian ọmaẹn nẹ, sẹ iwinna eso rae ne ediọn ni ma he khian ọmaẹn. De odẹ nọ khin?

Avbe ọgbaroghe ọghe otako kevbe ediọn ni siẹnro owebe ọghe otu (field instructors) gha ghi sẹ ukpo 70 nẹ, iran ghi sẹ iwinna na rae ne etẹn ni ma he khian eniwanrẹn sẹrriọ. Ọdiọn nọ re ọsiemwiẹnro ọghe ẹbu ediọn vbe iko gha sẹ ukpo 80 nẹ, ọ ghi sẹ iwinna nii rae ne ọdiọn nọ ma he khian enọwanrẹn sẹ vberriọ. Ọdiọn nọ vbe re ọsiemwiẹnro ọghe Agbaziro vbe Abotu gha vbe sẹ ukpo 80 nẹ, ọ vbe sẹ iwinna nii rae ne ọdiọn nọ ma he khian enọwanrẹn sẹrriọ. Ediọn ne afiwerriẹ na kaan rẹn ku obọ gbe ba emwamwa na ra? Ẹn! Iran ku obọ gbe ba emwamwa ọghe Jehova kevbe otu ọghẹe!

Ọtẹn Nokpia Ken nọ ghaa re ọsiemwiẹnro ọghe Agbaziro vbe Abotu vbe owara ukpo 49 keghi kha wẹẹ: “Ekhọe hia ẹre I ya ku obọ gbe ba emwamwa na. Vbene afiwerriẹ na te rhiegbe ma, I ka wa gha na erhunmwu ne ọtẹn nokpia nọ ma he khian enọwanrẹn sẹ vbene imẹ ye do gha re ọsiemwiẹnro ọghe Agbaziro vbe Abotu ọghomwa.” Ẹmwẹ ne Ọtẹn Nokpia Ken tae na, keghi re emwi nọ rre ekhọe ediọn nibun ni khian eniwanrẹn nẹ vbe uhunmwu otagbọn hia. Ọrheyerriọ, afiwerriẹ na ka ya  egbe wọọ eso vbuwe iran rhunmwuda, iran te ye hoo ne iran gha ga.

Esperandio nọ ghaa re ọsiemwiẹnro ọghe ẹbu ediọn keghi kha wẹẹ: “Afiwerriẹ na ma ka ya ẹko rhiẹnrhiẹn mwẹ, sokpan I ghi mu ukpa mu uwerhẹn ghee ẹre, I na do bẹghe ẹre wẹẹ, Ii khian ghi gha miẹn ẹghẹ nọ somwa ne I khian ya gha winna iwinna ọsiemwiẹnro ọghe ẹbu ediọn rhunmwuda, egbe fẹko khian ọmaẹn nẹ.” Ọtẹn nokpia na ma gi egbe wọọ re, ọ ye ru iyobọ nọ khẹke ne etẹn vbe iko ne ọ ye.

Ọwara ukpo nibun ẹre etẹn eso ya ga zẹ vbe ọgbaroghe ọghe otako, a te miẹn wẹẹ iwinna iran fiwerriẹ. Vbọ gha ye iran hẹ vbe afiwerriẹ na rhiegbe ma? Ọtẹn nokpia Allan nọ ya ukpo 38 ga zẹvbe ọgbaroghe ọghe otako keghi kha wẹẹ: “Vbe I ghi rẹn vbekpae afiwerriẹ na, egbe na wa wọọ mwẹ.” Vbọrhirhighayehẹ, ọtẹn nokpia na ma gi ẹtin fuẹ, ọ na ye mudia gbain vbe ugamwẹ e Jehova, erriọ vbe ya gha ru iyobọ ne etẹn nikpia ni ma he khian eniwanrẹn.

Ọtẹn Nokpia Russell nọ gae zẹvbe ọgbaroghe ọghe otako kevbe ọkpa vbe ediọn ni siẹnro owebe ọghe otu vbe ukpo 40 gbalaka, keghi kha wẹẹ: “Vbe imẹ vbe ọvbokhan mwẹ họn iyẹn na, iro na han ima, rhunmwuda, ma ye gha mwẹ ẹtin ne ima khian ya gha ru iwinna na.” Sokpan, e Russell vbe ọvbokhan rẹn wa ya irẹnmwi ne iran mwẹ ya ru iyobọ ne etẹn ni rre iko ne iran na ga nia.

Deghẹ emwi vbenian ma he sunu daa ruẹ ẹdẹ, okha ne ọ rre ebe 2 Samuẹl gha ya ruẹ rẹn vbe nọ ye hẹ.

OKPIA NỌ RU EMWI YE OREGHE

Ẹghẹ ne ovbi e Devid ne a tie ẹre Absalọm ya sọtẹ daa re, Devid keghi ke Jerusalẹm lẹẹ gha rrie Mahanẹm, nọ re ẹvbo nọ rre odẹ ekẹn ọghe Ẹzẹ Jọdan. E Devid kevbe emwa ni lelẹe ghi sẹ ẹvbo nii, iran kegha rre ivbabọ. Vbọ ghi sunu?

Ikpia eha ni rre ẹvbo nii keghi viọ evbare, ebẹdi kevbe emwi hia na loo vbe owa gi iran. E Bazilai kegha re ọkpa vbe usun ikpia na. (2 Sam 17:27-29) Isọtẹ ọghe Absalọm ghi sẹ ufomwẹ nẹ, e Devid na werriegbe gha die Jerusalẹm. Ọ ghi khian, e Bazilai keghi su ẹre sẹ Ẹzẹ Jọdan. Evba nii ẹre e Devid na tama rẹn wẹẹ nọ wa lele irẹn gha rrie Jerusalẹm. E Devid keghi tama rẹn wẹẹ, irẹn gha kpemehe emwi hia nẹẹn vbe odẹ ọghe ikpakpa. Sokpan ọmwa nọ “fe ẹsẹse” ẹre Bazilai ghaa khin, nọ rhiema wẹẹ, ọ mwẹ emwi hia ne ọ gualọ vbe odẹ ọghe ikpakapa. (2 Sam 19:31-33) Ọ gha kẹ, akpa ni maan ọghe Bazilai kevbe ude nọ maan ne ọ gha te gha bu e Devid re, ẹre ọ si ẹre ne Devid na te gha hoo ne ọ lele irẹn gha rrie Jerusalẹm. Vbọrhirhighayehẹ, ukpamuyọmọ nọ hiunsi nọ, ne ọmwa gha winna vbe ẹguae ọba.

Ọmwa ne ọ ru emwi ye oreghe ẹre Bazilai ghaa khin, ọni ẹre ọ si ẹre ne ọ na tama e Devid wẹẹ, “ukpo iyenẹ ẹre I ye na.” Ọ na vbe rhie tẹ wẹẹ, irẹn i ghi rẹn ‘evbare nọ khọ vbe unu ra ne ẹi khọ vbe unu.’ Vbe ọ ya ẹmwẹ na kha? E Bazilai i ghi re ọvbokhan vbe ẹghẹ  na, nọnaghiyerriọ, ọ mwẹ ẹwaẹn, ọ gha vbe sẹtin rhie ibude nọ maan ne Devid vbene “eniwanrẹn” vbe ya rhie ibude ne Ọba e Rẹhoboam. (1 Ọba 12:6, 7; Psm 92:12-14; Itan 16:31) Ọna rhiema wẹẹ, emwi ne Bazilai tae vbekpa ‘evbare nọ khọ vbe unu ra ne ẹi khọ vbe unu’ sẹtin dekaẹn afiwerriẹ nọ rhiegbe ma vbe a ghaa khian ọmaẹn nẹ. Ọna ẹre ọ si ẹre ne ọ na kha wẹẹ, emwi i ghi gbe irẹn otiti kevbe wẹẹ irẹn i ghi họn ẹmwẹ ẹse. (Asan 12:4, 5) E Bazilai keghi tama e Devid nọ rhie igbama ọkpa ne a tie ẹre Kimham gha rrie Jerusalẹm. Ọ khọ wẹẹ ovbi e Bazilai ẹre Kimham ghaa khin.—2 Sam 19:35-40.

EMWAMWA NE A YA MU EGBE KHẸ ODARO

Te afiwerriẹ ne a ya unu kaẹn ban vbe omuhẹn ye vbe iro ne Bazilai gu e Devid zẹ. Zẹvbe na ghee Bazilai, ọ vbe khẹke ne ima gha mwẹ ọnrẹn vbe ekhọe wẹẹ, ẹi re rhunmwuda arhunmwu ọkpa ẹre ọ ya otu ru afiwerriẹ na, ne ediọn mieke na gha ru iwinna iran vbe odẹ nọ dagbẹn kevbe ne otu e Jehova mieke na gha mwẹ alaghodaro ẹre ọ zẹe ne otu na ru afiwerriẹ na.

Uhukpa ẹre ediọn ni mwẹ azamemwi ya bẹghe ẹre wẹẹ afiwerriẹ na keghi re nọ gha ya otu e Jehova gha mwẹ alaghodaro, deghẹ etẹn ni ma he khian eniwanrẹn na suẹn gha ru iwinna ọghe etẹn ni khian ọmaẹn nẹ. Etẹn ni khian eniwanrẹn nẹ, ẹre ọ mobọ maa etẹn ni ma he khian eniwanrẹn emwi zẹvbe ne Bazilai ya maa ovbi ẹre emwi kevbe vbene ukọ e Pọl vbe ya maa e Timoti emwi. (1 Kọr 4:17; Fil 2:20-22) Te etẹn nikpia na maa re emwi ghi mwẹ iyobọ kpataki ne iran ye vbe iko ọghe Ivbiotu e Kristi, rhunmwuda iwinna ne iran ru keghi ya otu e Jehova mwẹ alaghodaro.—Ẹfis 4:8-12; yae taa Nọmbas 11:16, 1729.

ẸKPOTỌ ỌVBEHE KEGHI KIE NE IRAN VBE UGAMWẸ JEHOVA

Ediọn nibun ni khian eniwanrẹn nẹ, ni ghi sẹ iwinna ne iran te ru rae ne etẹn ni ma he khian ọmaẹn, keghi do bẹghe ẹre wẹẹ, ẹkpotọ ọvbehe vbe kie ne iran ya ru iwinna ọvbehe vbe ugamwẹ Jehova.

Ọtẹn nokpia Marco ne ọ ru iwinna ọgbaroghe ọghe otako vbe ukpo 19 keghi kha wẹẹ: “Te I ghi miẹn ẹghẹ ya gha kporhu ma arowa etẹn nikhuo ne ẹi re Osẹe Jehova.”

Ọtẹn nokpia Geraldo ne ọ ru iwinna ọgbaroghe ọghe otako vbe ukpo 28 keghi kha wẹẹ, “Okhuo ne ima ghi fian ne egbe ima nia ọre, iyobọ ne a ru ne emwa ni worua vbe odẹ ọghe orhiọn kevbe ne ima gu emwa nibun gha tie Baibol.” Arhunmwu 15 ẹre irẹn vbe ọvbokhan rẹn ghi gu tie Baibol nia kevbe wẹẹ, iran vbe sẹtin ru iyobọ ne etẹn ni te worua vbe odẹ ọghe orhiọn ya werriegbe suẹn iko na yo.

Allan ne a guan kaẹn vbe omuhẹn keghi kha wẹẹ: “Te ẹkpotọ ghi kie ne imẹ vbe ọvbokhan mwẹ ya rhiegbe ye iwinna ikporhu iyẹn nọ maan sayọ. Ma wa sọyẹnmwẹ iwinna ikporhu iyẹn nọ maan ọghe adesẹ orere, vbe ehe ne emwa na do ẹki, ma vbe kporhu ma emwa ni rre ẹdogbo ne ima ye. Eva vbuwe iran lele ima yo iko vbe ẹdẹ ọkpa.”

Adeghẹ ọkpa vbe usun ediọn ne a ghi fi iwinna rẹn werriẹ ẹre u khin, u gha ye sẹtin ru iyobọ kpataki vbe otu e Jehova. U gha sẹtin gha rhie adia ne etẹn nikpia ni wan dee vbe otu e Jehova. E Russell ne a ka guan kaẹn ban keghi kha wẹẹ: “E Jehova wa ye maa etẹn nikpia ni ye re igbama emwi, erriọ vbe ya loo iran vbe ugamwẹ ọghẹe.” Etẹn hia wa miẹn ere vbe iwinna ne etẹn na ya izọghae ru vbe iko.—Ya ghe ẹkpẹti nọ mwẹ uhunmwuta nọ khare wẹẹ, “ Ru Iyobọ Ne Etẹn Nikpia Ni Ye Re Igbama Ne Iran Mieke Na Gbegba.”

ARO NỌ GHAN ẸRE JEHOVA YA GHEE ẸKOATA NE U RHIEMA

Adeghẹ ọkpa vbe usun ediọn ne a ghi fi iwinna rẹn werriẹ ẹre u khin, ghẹ gi ẹtin gbe yọ ruẹ iwu. U ru iyobọ ne etẹn nibun nẹ, u gha ye sẹtin gha ru vberriọ. Etẹn nibun hoẹmwẹ ruẹ, iran nibun ye gbọyẹmwẹ ye iwinna esi ne u ru.

Nọ ghi ru ekpataki sẹ ọre wẹẹ, e Jehova gbọyẹmwẹ ye iwinna esi ne u ru. Ẹ Jehova i  khian “mianmian iwinna ne uwa winnaẹn, ra vbene uwa ya rhie maan hẹ ighẹ wa hoẹmwẹ ọnrẹn, vbe ekpa iyobọ ne uwa rhie ne ivbi iyayi ne iho uwa, kevbe ne uwa ye rhie ne iran do sẹ banban na.” (Hib 6:10) Ako na ya ima rẹn wẹẹ, e Jehova gha fiangbe ima ye emwi ne ima ka ru kevbe ne ima ye ru nia vbe ugamwẹ ọghẹe. Vbene ẹmwata, e Jehova i khian mianmian emwi ke emwi ne ima ru vbe ugamwẹ ọnrẹn.

Deghẹ iwinna ne u ru ma he fiwerriẹ, afiwerriẹ ne a guan kaẹn na ye kaan ruẹ. De odẹ nọ khin?

Deghẹ ọ mwẹ ọdiọn nọ khian enọwanrẹn nẹ, ne otu fi iwinna rẹn werriẹ, ne ọ rre iko ne u ye, u gha miẹn emwi kpataki ruẹ vbe obọ re. Emwi gha susu yọ ruẹ aro, tama rẹn ne ọ rhie ibude nuẹn, u vbe gi aro ruẹ gha sẹ otọ vbe odẹ ne ọ ya ya irẹnmwi ọghẹe ga e Jehova vbe ẹkpotọ ọvbehe nọ ghi kie nẹẹn vbe ugamwẹ e Jehova.

Deghẹ enọwanrẹn ẹre u khin vbe otu e Jehova ra u ma he khian enọwanrẹn, gha mwẹ ọnrẹn vbe ilẹkẹtin wẹẹ, aro nọ ghan ẹre Jehova ya ghee ẹkoata ne u ya gae.