Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

Gi Emwa Rẹn Imamwaemwi Ọghe Ẹmwata

Gi Emwa Rẹn Imamwaemwi Ọghe Ẹmwata

“Nọyaẹnmwa, . . . [ẹmwẹ, NW] ruẹ ọrọre ẹmwata.”—PSM 119:159, 160.

IHUAN: 29, 53

1, 2. (a) De iwinna ne Jesu mu ye okaro vbe arrọọ ọghẹe? Vbọzẹe ne ọ na muẹn ye okaro? (b) De emwi nọ khẹke ne ima ru deghẹ ima hoo ne ima musọe zẹvbe emwa ni gu Osanobua winna?

OWINNA kevbe ọmamwaemwi ẹre Jesu ghaa khin. (Mak 6:3; Rom 15:8) Te Jesu wa guẹ iwinna eva na fo vbe odẹ nọ gbae. Zẹvbe owinna, Jesu keghi ruẹ vbe ne a ya ya emadogua ughughan kae emwi ughughan ne emwa loo. Zẹvbe ọmamwaemwi, ọ keghi ya ifuẹro loo irẹnmwi ọghe Evbagbẹn Nọhuanrẹn nọ mwẹ ya ru iyobọ ne ivbiogue, ne iran mieke na do rẹn imamwaemwi ẹmwata ni rre Ẹmwẹ Osanobua. (Mat 7:28; Luk 24:3245) Vbe Jesu ghi rre ukpo 30, ọ keghi sẹ iwinna owinna rae, rhunmwuda ọ rẹnrẹn wẹẹ, iwinna ne Jehova waa irẹn re, ẹre ọ ru ekpataki sẹ. Jesu tobọre tae wẹẹ, iwinna ikporhu iyẹn nọ maan ẹre ọ mobọ zẹe ne Osanobua na gie irẹn gha die agbọn. (Mat 20:28; Luk 3:23; 4:43) Iwinna ikporhu na, ẹre Jesu mu ye okaro vbe arrọọ ọghẹe, ọ vbe gha hoo ne emwa ọvbehe ru vberriọ.—Mat 9:35-38.

2 Nibun vbuwe ima i re kabita ra owinna, sokpan emwa ni kporhu iyẹn nọ maan ẹre ima hia khin. Iwinna ikporhu na ru ekpataki sẹrriọ wẹẹ, Osanobua tobọre vbe mwẹ obọ vbọ. E Baibol keghi kha wẹẹ, te ima gu Osanobua winna. (1 Kọr 3:9; 2 Kọr 6:4) Ma rẹnrẹn wẹẹ, ‘ẹmwata ọre ẹmwẹ Osanobua khin.’ (Psm 119:159, 160) Ọni ẹre ọ si ẹre nọ na khẹke ne ima gha “maa emwa re ẹse ighẹ ẹmwata Osanobua,” vbe ima ghaa kporhu. (Tie 2 Timoti 2:15.) Nọnaghiyerriọ, te ọ khẹke ne ima hia vbe odẹ ke odẹ ne ima gha mwẹ alaghodaro vbe odẹ ne ima ya ye Baibol maa emwa emwi, rhunmwuda, e Baibol, ọre emadogua nọ hiunsi sẹ ne ima ya maa emwa emwi vbekpae Jehova, Jesu kevbe  Arriọba Osanobua. Ne ima mieke na sẹtin musọe vbe iwinna ikporhu, otu e Jehova keghi kpemehe emwi ni gha ru iyobọ ne ima. Emwi ne iran kpemehe ẹre, ọre Emadogua Ne A Ya Maa Emwa Emwi. Ọ khẹke ne ima gha ya ifuẹro loo avbe emadogua na.

3. De emwi nọ khẹke ne ima rhie aro tua vbe ima ghaa kporhu? Vbe ima miẹn ruẹ vbe ebe Iwinna 13:48 nọ gha ru iyobọ ne ima?

3 Emwa eso sẹtin gha roro ẹre wẹẹ, Emadogua Na Ya Kporhu ẹre ọ te khẹke na gha tie ẹre, ẹi re Emadogua Ne A Ya Maa Emwa Emwi. Evba ye “ikporhu” kha, ọre ne a ya iyẹn wewe, sokpan ne a “maa ọmwa emwi” ọre na rhan otọ emwi ma ọmwa vbe odẹ ne ọ gha ya rẹn otọ re, ọ sẹ ọre ekhọe, ọ vbe yae ru emwi. Ovbi ẹghẹ kherhe ẹre ọ ghi kẹ ne agbọn na sẹ ufomwẹ. Rhunmwuda ọni, ma ghaa kporhu, emwi nọ khẹke ne ima rhie aro tua ọre, ne ima suẹn gha gu emwa tie Baibol. Ọni rhiema wẹẹ, ọ khẹke ne ima gha gualọ emwa ni mwẹ ekhọe ata, ne a ya miẹn ọnrẹn yi, odẹ nọ su rrie arrọọ ọghe etẹbitẹ. Ma ghi vbe ru iyobọ ne iran, ne iran mieke na do gha ga e Jehova.—Tie iwinna 13:44-48.

4. Vbe ima khian ghi ya rẹn emwa ni mwẹ ekhọe ata ne a ya miẹn odẹ ọghe ẹmwata yi? Vbe ima khian ya miẹn iran hẹ?

4 Vbe ima khian ghi ya rẹn emwa ni mwẹ ekhọe ata, ni hoo ne iran gha rrọọ vbe etẹbitẹ? Zẹvbe nọ ghaa ye vbe orre nokaro, ma gha sẹtin miẹn emwa vberriọ deghẹ ima ye ikporhu. Nọnaghiyerriọ, te ọ khẹke ne ima rhie owẹ lele emwi ne Jesu khare. Ọ khare wẹẹ: “Ẹvbo ne uwa a rhirhi lao, . . . wa gualọ ọmwa ne ọ gha miẹn uwa yi.” (Mat 10:11) Ọ khẹke ne ima rẹn wẹẹ emwa eso i khian miẹn odẹ ọghe ẹmwata yi, vbe na ghee emwa ni tọn egbe mu, ni ta ohoghe kevbe emwa ne ẹi ka Osanobua yọ. Sokpan emwa ni mu egbe rriotọ, ni mwẹ ekhọe ata kevbe ni hoo ne iran rẹn vbekpae Osanobua ẹre ima gualọ. Ma sẹtin ya ọna gie odẹ ne Jesu ya gha gualọ erhan nọ maan, nọ gha gi ẹre ya ru ẹkhu, urọnghọn kevbe emwi nibun ne avbe owinna ya erhan ru. Ọ gha ghi miẹn erhan vberriọ, ọ ghi ya ifuẹro loo emadogua ya ru emwi ke emwi nọ hoo nọ ru. Erriọ vbe khẹke ne ima gha ya ifuẹro loo emadogua ọghomwa ya ru iyobọ ne emwa ni mwẹ ekhọe ata.—Mat 28:19, 20.

5. Vbọ khẹke ne ima rẹn vbekpae Emadogua Ne A Ya Maa Emwa Emwi? Ru igiemwi yọ. (Ghee efoto ni rre omuhẹn.)

5 Dọmwadẹ emadogua ne ima ya winna mwẹ iwinna kpataki ne iran ye. Vbe igiemwi, emadogua ughughan ẹre Jesu loo ro vbe ọ ru iwinna ekabita? * Ẹi mwẹ Jesu ma loo emadogua na ya mwaan erhan, na ya fiaẹn, na ya haa uvun yọ, na ya kaa re, na ya dia re kevbe ne ya kaan rẹn kugbe. Erriọ edọmwadẹ emadogua ne ima ya maa emwa emwi vbe mwẹ iwinna ne iran ye. Nia, gi ima guan kaẹn vbene a ya loo avbe emadogua na hẹ.

EMADOGUA NI YE EMWA RẸN ARO EMWA NE IMA KHIN

6, 7. (a) De vbene u he ya loo ekadi nọ dia ọmwa lae wẹbsait ọghomwa? (b) De iyobọ eva kpataki ne ebe itie ọghe iko ye ne ima?

6 Ekadi Nọ Dia Ọmwa Lae Wẹbsait Ọghomwa. Agharhemiẹn wẹẹ te avbe ekadi na ye kherhe, ọ ya emwa rẹn aro emwa ne ima khin, ọ vbe ru iyobọ ne emwa ya lae wẹbsait ọghomwa. Iran gha laọ, te iran miẹn emwi ruẹ, nọ gha ya iran rẹn aro emwa ne ima khin. Iran sẹtin vbe nọ, ne a do gha ye Baibol maa iran emwi. Vbene a guan na, ọ gberra orhunmwu 400,000 ne ọ he nọ vbe jw.org ne a do gha ye Baibol maa iran emwi. Ẹdẹgbegbe, ẹre emwa iyisẹn nibun ni lae wẹbsait ọghomwa vbe ya nọ, na do gha ye Baibol maa iran emwi. Te ọ khẹke ne ima gha viọ avbe ekadi na lele egbe vbe ẹghẹ hia, ne ima mieke na gha yae kporhu ma emwa vbe ẹghẹ ke ẹghẹ ne ẹkpotọ ya kie.

7 Avbe Ebe Itie. Ebe itie ọghe iko nọ rrọọ, wa mwẹ iyobọ eva kpataki nọ ye. Evba gbẹn ye odaro ọre nakhin: “A gie na tie ruẹ nu do gu Avbe Osẹe Jehova do iko.” Ebe itie na vbe kha  wẹẹ, iran sẹtin gha die iko ọghe ima ra iran ghi nọ, na do gha ye Baibol maa iran emwi. Ebe itie na ya emwa rẹn aro emwa ne ima khin, ọ vbe ru iyobọ ne ima ya gie na tie emwa ne ohanmwẹ gbe vbe odẹ oghe orhiọn. (Mat 5:3) Emwa hia ẹre ima gie na tie gha die iko ọghomwa, ọ gha khọnrẹn wẹẹ, iran ma kue ne ima gha ye Baibol maa iran emwi. Iran gha rre, aro iran ghi bẹghe ẹre wẹẹ, imamwaemwi ẹmwata ni rre Baibol ẹre ima maa emwa re.

8. Vbọzẹe ne ọ na khẹke ne ima gha tie emwa vbe ẹghẹ hia, ne iran gha die iko ọghomwa, ọ gha khọnrẹn wẹẹ uhukpa kẹkan ẹre iran sẹtin rre? Ru igiemwi yọ.

8 Te ọ wa khẹke ne ima gha tie emwa vbe ẹghẹ hia, ne iran gha die iko ọghomwa, a gha wẹẹ uhukpa kẹkan ẹre iran sẹtin rre. Vbọzẹe? Rhunmwuda, iran gha rre, iran gha bẹghe alughaẹn nọ rre imamwaemwi ẹmwata ni rre uwu e Baibol ne Avbe Osẹe Jehova maa emwa re kevbe ọghe ohoghe ne a miẹn vbe ugamwẹ okeke. (Aiz 65:13) Ọ mwẹ ọdọ vbe amwẹ ọkpa ni rre United States, ni bẹghe alaghuẹn nọ rre uwu ẹkpo Avbe Osẹe Jehova kevbe ugamwẹ ọvbehe. Eni ọdọ vbe amwẹ na, ọre Ray kevbe Linda. Vbe ukpo eso nọ gberra, ọdọ vbe amwẹ na keghi zọe vbe iro wẹẹ iran gha suẹn gha yo esọsi, rhunmwuda iran yayi wẹẹ, Osanobua gele rrọọ, iran vbe hoo ne iran rẹn ọnrẹn sayọ. Erriọ iran ya suẹn gha yo esọsi ughughan. Ẹi re avbiẹ iran yo. Sokpan iran na wẹẹ, emwi eva ẹre ọ khian ya iran deba esọsi rhọkpa. Ọkaro, iran ghi miẹn emwi kpataki ruẹ vbe esọsi nii. Nogieva, emwa ni rre esọsi nii ghi gha yin vbe emwa ni gele ga Osanobua. Vbuwe ukpo nibun ne iran ya gha gualọ esọsi nọ maan ne iran gha deba, ai miẹn esọsi ọkpa ne iran ma yo vbe ẹvbo nii. Egbe na ghi do wọọ iran rhunmwda, iran ma miẹn emwi agbọn ruẹ vbe esọsi hia ne iran yo, emwa ni rre esọsi ughughan ne iran yo ma vbe gha mu egbe ẹse. Ẹdẹ ọkpa vbe iran ghi zobọ vbe esọsi nokiekie ne iran yo, e Linda na gha rrie isiwinna vbene Ray na gha rrie owa. E Ray ghi hin imọto rrie owa, ọ na bẹghe Ọgua Arriọba ọghomwa, ọ na wẹẹ ne irẹn ba van evba, ne irẹn ya ghee emwi ne iran ru vba. Ọ ghi gele lae uwu Ọgua Arriọba ọghomwa, emwa hia na wa gbe ọbokhian nẹẹn, te iran hia wa vbe ya mu egbe ẹse. Ọna ọre emwi ne ọ ma he ka miẹn ẹdẹ vbe esọsi hia nọ ka yo. Odaro, ẹre Ray tota yi vbe ẹdẹrriọ, ọ wa vbe gbọyẹmwẹ ye emwi hia nọ ruẹ re. Ọna ya ima yerre, ẹmwẹ ne ukọ Pọl tae vbekpae ọmwa no rhirhi rrie iko ọghe Ivbiotu e Kristi vbe ẹghẹ okaro, Ọ ghi wẹẹ, “Osanobua gu uwa rre emwa na.” (1 Kọr 14:23-25) Ẹghẹ hia ẹre Ray ghi ya gha rrie iko ne a do vbe ẹduzọla nọkhua. Ọ na ghi vbe suẹn gha rrie iko ne a do vbuwe uzọla. Ọvbokhan rẹn ighẹ Linda na vbe suẹn iko ne a yo. Odẹ ukpo 70 ẹre iran ye vbe ẹghẹ na. Iran na kue yọ ne a do gha ma iran emwi, vbe ọ ma he kpẹ vba, iran na dinmwiamẹ.

EMADOGUA NE IMA YA MU ẸMWẸ SO

9, 10. (a) Vbọzẹe ne avbe asobọrrie na, na khuẹrhẹ na loo? (b) Rhan otọ re vbene a ya loo asobọrrie na hẹ vbe ikporhu​—⁠De Emwi Ne Arriọba Osanobua Khin?

9 Avbe Asobọrrie. Asobọrrie erẹnrẹn ẹre ima mwẹ. Avbe asobọrrie na wa maan ne a ya mu ẹmwẹ so vbe ikporhu. Ke na ya suẹn gha gbẹnnẹ avbe asobọrrie na vbe ukpo 2013, ọ se odẹ uye isẹn (5 billion) ne a he printi ladian! Emwi ne avbe asobọrrie na ya maan ọre wẹẹ, odẹ ọkpa ẹre a wa ya mwamwa ehia. Rhunmwuda ọni, u gha rẹn vbene a ya loo ọkpa hẹ, u gha vbe sẹtin loo enikẹre. De vbene u gha ya sẹtin ya avbe asobọrrie na mu ẹmwẹ so hẹ, vbe ikporhu?

10 Gia kha wẹẹ, asobọrrie nọ mwẹ uhunmwuta nọ khare wẹẹ, De Emwi Ne Arriọba Osanobua Khin ẹre u khian loo. U sẹtin ma ọmwa ne u khian kporhu ma inọta nọ rre odaro asobọrrie na, u ghi nọ rẹn wẹẹ: “Uwẹ gele rẹn emwi ne Arriọba Osanobua khin ra? U gha kha wẹẹ . . . ?” Ẹghẹ nii, u ghi wẹẹ ne ọ zẹ ọkpa vbuwe ewanniẹn eha nọ rre asobọrrie na. Esa i rrọọ ne u ya tama rẹn deghẹ ewanniẹn ne ọ zẹ gba ra ọ ma gba. U ghi wa rhiẹre ekhọe ghee ako nọ mwẹ uhunmwuta nọ khare wẹẹ, “Emwi Ne Baibol  Khare.” Vbe iyeke ọni, u ghi tie evbọ rre ebe Daniẹl 2:44 kevbe Aizaia 9:6. Ẹkpotọ gha ye kie, u ghi rhan otọ re ma rẹn. Vbe iyeke ọni, u ghi nọ ọta na ya gbe ẹyotọ ọghe atuẹwerriegbe nọ rre iyeke asobọrrie na, “De vbene agbọn na khian gha ye hẹ vbe ototọ ukhamwẹ ọghe Arriọba Osanobua?” Inọta na rre ototọ uhunmwuta nọ khare wẹẹ, “Emwi Nọ Khẹke Nu Mu Roro.” Ọna ọre inọta ne u khian ghi ye Iruẹmwi 7 ọghe ne ebe ẹmu, Iyẹn Nọma Nọ Ke Obọ Osanobua Rre! zẹ ewanniẹn yi, vbe u gha ghi dọlegbe rre. Ebe ẹmu na keghi re ọkpa vbe usun emadogua ne ima ya gu emwa tie Baibol.

EMADOGUA NI YA EMWA GBỌYẸMWẸ YE IMAMWAEMWI ẸMWATA

11. De aro ne emwa ya ghee avbe ebe iyẹn ọghomwa? De emwi ne ọ khẹke ne ima rẹn vbekpae dọmwadẹ uhunmwuta ne a gbẹnnẹ ladian vbọ?

11 Avbe Ebe Iyẹn. Ebe iyẹn na ghi gbẹnnẹ ladian sẹ kevbe na ghi zedu ẹre sẹ vbe uhunmwu otagbọn hia, ọre The Watchtower kevbe Awake! Uhunmwuta ni ladian vbe avbe ebe iyẹn na, keghi re ni yẹẹ emwa vbe uhunmwu otagbọn hia. Ọna ẹre ọ si ẹre ne ọ na khẹke ne ima gha loo ẹre ya rhie emwa ekhọe ghee emwi ni gele ru ekpataki vbe arrọọ. Ne ima mieke na sẹtin ru ọna, ọ khẹke ne ima rẹn emwa na rhunmwuda re gbẹnnẹ dọmwadẹ uhunmwuta ni ladian vbọ.

12. (a) De emwa ne a rhunmwuda re gbẹnnẹ Awake! ladian? De iyobọ nọ ru ne emwa ni tie ẹre? (b) Ya unu kaẹn odẹ ne u he ya ya ifuẹro loo Awake! vbe nọ ma he kpẹ gbe na.

12 Awake! Emwa ni mwẹ irẹnmwi kherhe ọghe Baibol kevbe ne ẹi zẹdẹ mwẹ irẹnmwi ọghe Baibol ẹre a rhunmwuda re gbẹnnẹ Awake! ladian. A sẹtin miẹn wẹẹ, emwa vbenian ma zẹdẹ rẹn emwi rhọkpa vbekpae iyayi ọghe Ivbiotu e Kristi ra iran i zẹdẹ hoo ne iran ya ehọ họn ẹmwẹ ugamwẹ. A sẹtin vbe miẹn wẹẹ, iran ma rẹn ighẹ e Baibol gha sẹtin ru iyobọ ne iran vbe arrọọ ọghe iran. Iyobọ kpataki ne Awake! ru ne emwa ọre wẹẹ, ọ ya iran rẹn ighẹ Osanobua rrọọ. (Rom 1:20; Hib 11:6) Ọ vbe ya emwa ni tie ẹre rẹn wẹẹ, “ẹmwẹ Osanobua” ẹre Baibol “gele khin.” (1 Tẹs 2:13) Uhunmwuta eha ni ladian vbe Awake! ọghe ukpo 2018 ọre: “The Way of Happiness,” “12 Secrets of Successful Families,” kevbe “Help for Those Who Grieve.”

13. (a) De emwa ne a rhunmwuda re gbẹnnẹ ebe Ọwa Ọkhẹ ne a rhie ye orere? (b) Ya unu kaẹn odẹ ne u he ya ya ifuẹro loo ebe Ọwa Ọkhẹ ne a rhie ye orere vbe nọ ma he kpẹ gbe na.

13 The Watchtower. A keghi gbẹnnẹ ebe Ọwa Ọkhẹ na rhie ye orere rhunmwuda emwa ni ya Osa yi kevbe emwa ni rẹnrẹn wẹẹ, Ẹmwẹ Osanobua ẹre Baibol khin. Emwa vbenian mwẹ irẹnmwi ọghe Baibol sokpan, iran i mwẹ irẹnmwi nọ gbae. (Rom 10:2; 1 Tim 2:3, 4) Uhunmwuta eha ni ladian vbe ebe Ọwa Ọkhẹ ne a rhie ye orere ọghe ukpo 2018, keghi zẹ ewanniẹn ye inọta eha na: “Is the Bible Still Relevant Today?,” “What Does the Future Hold?,” kevbe “Does God Care About You?

EMADOGUA NI GUA EMWA KPA

14. (a) De iyobọ ne vidio enẹ ne a guan kaẹn na ru ne emwa ne ima kporhu ma? (b) Ya unu kaẹn odẹ ne u he ya ya ifuẹro loo avbe vidio na.

14 Avbe Vidio. Vbe ẹghẹ Jesu, emadogua ne a ya obọ kẹkan loo, ẹre avbe owinna ya gha winna. Emadogua ọghe masini ni loo ẹlẹtrik ne a ya fian erhan, ne a ya ha uvun ye erhan kevbe ne a ya kan ise ye erhan, ẹre owinna nibun ghi loo vbe ẹdẹnẹrẹ. Erriọ ima vbe ya mwẹ vidio nibun ne ima loo vbe iwinna ikporhu iyẹn nọ maan vbe ẹdẹnẹrẹ. E vidio enẹ ni rre usun emadogua ne ima ya maa emwa emwi keghi re: Vbọzẹe Ne A Gha Na Ruẹ E Baibol?, De Vbene Iruẹmwi Ọghe Baibol Ye Hẹ?, De Emwi Na Ru Vbe Ọgua Arriọba?, kevbe Jehovah’s Witnesses—Who Are We? Avbe vidio ni ma sẹ ifuanro eva ẹre ọ khẹke ne ima gha kpe vbe otuẹ nokaro. A sẹtin kpe vidio ni gberra ifuanro eva ma emwa vbe atuẹwerriegbe kevbe emwa ne ẹi khirhi rrie ehe rhọkpa. Avbe vidio gha sẹtin ye emwa suẹn iko na yo, ọ vbe ya iran kue yọ ne a gha maa iran e Baibol.

15. De vbene vidio ọghomwa ne emwa ghee re vbe urhuẹvbo ọghe iran ya gu iran kpa hẹ? Ru igiemwi yọ.

15 Vbe igiemwi, vbe ọtẹn nokhuo miẹn  okhuo ọkpa ne ọ ke Micronesia rre vbe ẹvbo ọvbehe, ọ keghi kpe ne vidio Vbọzẹe Ne A Gha Na Ruẹ E Baibol ma rẹn vbe urhuẹvbo ọghẹe nọ re Yapese. E vidio nii ghi kpee, okhuo nii na kha wẹẹ: “Urhuẹvbo mwẹ na khin.” Ogiemwi na khin! Ovbi ẹvbo mwẹ ẹre ọ wa guan na. Iyeke ọni, ọ na wẹẹ irẹn gha tie emwi hia na ya urhuẹvbo irẹn gbẹn vbe jw.org, ọ na vbe wẹẹ irẹn gha ghee vidio hia ọghe urhuẹvbo ẹre ni rre jw.org. (Yae taa Iwinna 2:811.) Gia vbe guan kaẹn emwi ẹwaẹn ọvbehe. Ọtẹn nokhuo ọkpa ne ọ rre United States keghi gie ẹre ma ovbi ọtiọnrẹn nokpia nọ rre otọ ẹvbo ọvbehe, odẹ nọ gha ya sẹtin ghee vidio ne a guan kaẹn na. Ọmokpia nii ghi ghee ẹre nẹ, ọna, ọre emwi nọ gbẹn gie ọtẹn nokhuo na: “Asefẹn nọ guan kaẹn orhiọn dan nọ kha yan agbọn na wa gele sẹ mwẹ ekhọe, ọni ẹre ọ gua mwẹ kpa ya gbẹn emwi ye itanẹt ne ọmwa do gha gu mwẹ tie Baibol.” Otọ ẹvbo ne a na mu awua ye iwinna ima ẹre ọmokpia na ye.

EMADOGUA NE IMA YA GIE ODẸ ỌGHE ẸMWATA MA EMWA

16. De vbene a ya loo edọmwadẹ ebe ẹmu na hẹ: (a) Danmwehọ Osanobua kevbe Nu Gha Rrọọ Ẹdẹdẹmwẹdẹ. (b) Iyẹn Nọma Nọ Ke Obọ Osanobua Rre! (c) Who Are Doing Jehovah’s Will Today?

16 Avbe Ebe Ẹmu. Ma gha miẹn emwa ne ẹi mobọ gua tie ebe ra emwa ne ẹi mwẹ ebe ọghọmwa vbe urhuẹvbo iran, vbe ima khian ya maa iran emwi hẹ? Ma sẹtin loo ne ebe ẹmu Danmwehọ Osanobua kevbe Nu Gha Rrọọ Ẹdẹdẹmwẹdẹ. * Ebe ọvbehe nọ wa vbe maan ne a ya maa emwa emwi ọre Iyẹn Nọma Nọ Ke Obọ Osanobua Rre! U sẹtin mu uhunmwuta 14 nọ rre iyeke ẹre ma ọmwa, nọ tobọre zẹ nọ yẹẹ ọre vbọ. Vbe iyeke ọni, u wa suẹn gha gu ẹre ruẹ uhunmwuta nii. Uwẹ he ka ru ọna ẹdẹ ra? Ebe ẹmu ọvbehe nọ vbe rre usun emadogua ne ima ya ma emwa emwi ọre Who Are Doing Jehovah’s Will Today? Ebe ẹmu na ẹre a loo ya dia emwa lae otu e Jehova. Ebe Iwinna ọghomwa ọghe March 2017, keghi rhie adia ne ima vbe nọ dekaẹn odẹ ne ima gha ya sẹtin ya ebe na ru iyobọ ne dọmwadẹ emwa ne ima gu tie Baibol.

17. (a) De iyobọ kpataki ne avbe ebe na ru ne emwa ne ima maa re emwi? (b) Emwa ne ima gu tie Baibol gha dinmwiamẹ nẹ, de emwi nọ ye khẹke ne iran ru?

17 Avbe Ebe. U gha ghi suẹn gha gu ọmwa tie ebe ẹmu nẹ, ọ gha sẹ ẹghẹ, u sẹtin suẹn gha loo What Can the Bible Teach Us? Ebe na gha ya emwa ne ima gu tie Baibol gha mwẹ irẹnmwi nọ somwa. U gha ghi gu ẹre tie ebe na fo nẹ, u na bẹghe ẹre wẹẹ ọ mwẹ alaghodaro, u ghi suẹn How to Remain in God’s Love. Ebe na gha ru iyobọ ne ọmwa ne u maa re emwi ya gha lele ilele ni rre Baibol vbe arrọọ ọghẹe. Emwa ne ima gu tie ebe gha dinmwiamẹ nẹ, te ọ wa ye khẹke ne iran tie ebe na fo, rhunmwuda, ọ na gha ya iran gha mwẹ ẹyotọ nọ wegbe vbe odẹ ọghe orhiọn.—Tie Kọlose 2:6, 7.

18. (a) De adia ne ima miẹn vbe ebe 1 Timothy 4:16? Ma gha lele adia na, de emwi nọ kẹrikian? (b) De emwi nọ khẹke ne ima gha mwẹ vbe orhiọn zẹvbe ne ima ya loo Emadogua Ne A Ya Maa Emwa Emwi?

18 Iwinna ne Jehova waa ima re zẹ vbe eguọmwadia ọghẹe, ọre ne ima kporhu “iyẹn nọ maan” ọghe ẹmwata, nọ gha su emwa lae arrọọ ọghe etẹbitẹ. (Kọl 1:5; tie 1 Timoti 4:16.) Ne ima mieke na sẹtin musọe, otu keghi kpemehe Emadogua Ne A Ya Maa Emwa Emwi. (Ya ghee ne ẹkpẹti “ Emadogua Ne A Ya Maa Emwa Emwi.”) Gi ima hia gha ya ifuẹro loo emadogua na. Dọmwadẹ ima ẹre ọ khian ya ekhọe obọ ọre zẹ emadogua ne ọ gha loo vbe ọ gha miẹn ọmwa ne ọ rhie ehọ nẹẹn ta yi. Sokpan, ẹi re ebe na ghae ẹre ọ khẹke ne ima rhie aro tua, ọ ma vbe khẹke ne ima rhie ebe ọghomwa ne ọmwa ne ẹi khian tie ẹre. Emwi nọ khẹke ne ima kọ ye orhiọn ọre ne ima ya emwa khian erhuanegbe Jesu—emwa ni mu egbe rriotọ, ni mwẹ ekhọe ata, ne ohanmwẹ orhiọn gbe kevbe emwa ni mwẹ ekhọe ne a ya miẹn ọnrẹn yi ighẹ odẹ nọ su rrie arrọọ ọghe etẹbitẹ.—Iwinna 13:48; Mat 28:19, 20.

^ okhuẹn 5 Ya ghee uhunmwuta nọ khare wẹẹ, “The Carpenter” kevbe ne ẹkpẹti “The Carpenter’s Toolbox” nọ ladian vbe The Watchtower ọghe August 1, 2010.

^ okhuẹn 16 Deghẹ ọmwa ne u miẹn vbe ikporhu i zẹdẹ gua tie ebe, u ghi loo ne ebe emu Danmwehọ Osanobua, nọ mwẹ efoto nọbun, ya maa re emwi.