Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 OKHA ỌGHE ẸDAGBỌN ỌMWA

E Jehova Wa Fiangbe Atamuolọyan Ne I Ru

E Jehova Wa Fiangbe Atamuolọyan Ne I Ru

Vbe ukpo 1939, ọ mwẹ ogiasọn ọkpa ne ima hia rhiọrre vbe ovbe, ma na hin imọto gha rrie ẹvbo ne a tie ẹre Joplin nọ rre odẹ ahọ ọghe Missouri vbe U.S.A. Ọ gberra ughaẹdẹ ọkpa ma ke sẹ evba. Ma ghi sẹ evba, ma na suẹn gha fẹko viọ asobọrrie ye ototọ ẹkhu ọghe dọmwadẹ owa ni rre ẹdogbo nii. Vbe iyeke ọni, ma na la imọto gha rrie ehe ne ima vbe etẹn nikẹre ni la imọto ọvbehe rre, khian na vba egbe. Ma ghi sẹ evba, ma na mudia khẹ iran. Owiẹ fioro ghi nọ vbe ẹghẹ na. U sẹtin gha roro ẹre wẹẹ, ‘Vbọzẹe ne ima na ya kporhu vbe ogiasọn, ma na vbe zobọ vbene ẹdẹ te gbe?’ I gha rhan otọ re vbe ọ gha sẹ ẹghẹ.

UKPO 1934 ẹre a biẹ mwẹ. Eni erha mwẹ ọre Fred Molohan, eni iye mwẹ na gha re Edna Molohan. Ọ sẹ ukpo 20 ne iran ke ga e Jehova, a ke biẹ mwẹ. Te I wa ye gbọyẹmwẹ ye odẹ ne iran ya ye Baibol maa mwẹ emwi ke otọ gha dee. Ovbi ẹvbo ne a tie ẹre Parsons nọ rre odẹ ahọ ọghe Kansas ẹre ima ghaa ye. Iyobemwahia ni ghaa rre iko ima vbe ẹghẹ nii kegha re etẹn na hannọ zẹe. Te ẹgbẹe mwẹ wa gha yo iko vbe ẹghẹ hia, erriọ ima vbe ya gha zọghae vbe iwinna ikporhu iyẹn nọ maan. Avan vbe ẹdẹ Saturday ẹre ima ya gha ladian vbe ikporhu adesẹ orere. Ugbẹnso, vbene a te zobọ, egbe ghi wọọ ima. Ma gha ghi zobọ nẹ, erha mwẹ ghi ya dẹ “ice cream” ne ima, ne ima ya rọkhọ erhuan. Erriọ wa gha ruẹ.

Te iko ọghe ima ye kherhe vbe ẹghẹ nii, sokpan ako ne ima na kporhu wa gha kpọlọ. Ẹvbo nibun ni rre ikinkin nii kevbe ako ne emwa na mu ugbo ẹre ima na gha kporhu. Ma gha ya kporhu ma avbe ọgbugbọ, ima na viọ ebe iyẹn ọghomwa ne iran, ọkhọkhọ, ekẹn ọkhọkhọ kevbe ebe afọ ẹre iran ya ha osa. Ena wa gha ru iyobọ ne ima vbe owa. Sokpan, te erha mwẹ ka rhie igho ye ẹkpẹti okozẹ nẹ, ọ ke viọ ebe iyẹn, ọni ẹre ọ si ẹre ne ima na sẹtin gha miẹn avbe ọgbugbo nii emwi ne iran viọ ne ima.

EMWAMWA ỌGHE IKPORHU IYẸN NỌ MAAN

Evbibiẹ mwẹ ghaa mwẹ e giamafon ne iran gha loo vbe iwinna ikporhu iyẹn nọ maan. Sokpan, ne I na gha re ọvbokhan vbe ẹghẹ nii, ima sẹtin tobọ mwẹ gha loo ẹre vbe ikporhu. Vbọrhirhighayehẹ, I ghaa lele evbibiẹ mwẹ ye ikporhu. Izọghae ẹre I ya gha gu iran kpe rrẹkọdi ọghe ọta ne Ọtẹn Nokpia Rutherford ya guan, nọ dekaẹn atuẹ werriegbe kevbe Baibol na gu emwa tie.

Mẹ vbe evbibiẹ mwẹ vbe odaro imọto amigbo ọghe ima

Erha mwẹ keghi ya imọto ima ne a tie ẹre Fọrd khian imọto ne a ya kporhu. Ọ keghi mu amigbo nọkhua ye odukhunmwu ẹnrẹn. Imọto nii ẹre ima  ya gha kporhu lele ehe hia. Ẹgiọn ẹre ima ka kpe, ne emwa mieke na gbẹdọ, ma ke suẹn gha kpe ọta ne etẹn ya guan. Ma gha ghi kpe ẹre fo nẹ, ma ghi ghae ebe ọghomwa ne emwa ni mwẹ ẹkorhiẹnrhiẹnmwẹ.

Vbe ẹvbo ne kherhe ne a tie ẹre Cherryvale vbe Kansas, avbe olakpa keghi tama erha mwẹ ne ẹi ghẹ mu imọto amigbo sẹ uwu ehe ne emwa na rọkhọ erhuan vbe ẹdẹ izọla nọkhua, sokpan ọ sẹtin ye loo ẹre vbe asẹ nii. Erha mwẹ ma zẹdẹ gu iran muan ẹmwẹ, ọ na mu imọto nii gha rrie idunmwu nọ rre odaro ehe ne emwa na rọkhọ egbe. Te emwa ni rre ẹdogbo nii hia wa gha họn ọta na rrẹkọdi ne erha mwẹ ghaa kpe. Te emwi vbenian wa gha gbe mwẹ otiti katekate vbe I gha deba erha mwẹ kevbe ọtẹn mwẹ nọdiọn nokpia Jerry vbe iwinna orere.

Vbe odẹ ukpo 1936 ya sẹ 1939, ma keghi ru emwamwa ne kpataki nibun ọghe ikporhu iyẹn nọ maan vbe ehe ne emwa na gha gbodan ye iwinna ima. Ogiasọn ẹre ima ya gha rhiọrre, ma ghi ya viọ ebe ọghomwa ye ototọ ẹkhu ọghe owa emwa ni rre ẹdogbo nii, zẹ vbene I ya unu kaan rẹn ban vbe omuhẹn. Vbe iyeke ọni, ma ghi ya si egbe koko vbe ako ọkpa, ne ima mieke na rẹn deghẹ olakpa mu ọtẹn rhọkpa.

Ọ mwẹ odẹ ọvbehe ne ima vbe ya gha kporhu vbe ẹghẹ nii. A gha ghi gbẹnnẹ emwi eso ye plakadi nẹ, ma ghi yọe vbe na yọ ẹwu, ma ghi do ya ye uviẹn. Vbe iyeke ọni, ma ghi khian la orere ẹvbo hia. Ọ mwẹ ọkpa vberriọ ne etẹn ru vbe ẹvbo ima, emwi ne iran gbẹnnẹ ye plakadi ne iran yọe ọre “Religion Is a Snare and a Racket.” (Ugamwẹ Keghi Re Ẹki Ne A Ya Mu Emwa Rẹrẹ) Ọ sẹ ibiriki ọkpa ne iran khian la, iran ke zobọ. Iran ma miẹn igbodan rhọkpa, te emwa nibun ni bẹghe iran wa gha mwẹ ẹkorhiẹnrhiẹnmwẹ.

AVBE ASIKOKO NE A DO VBE I RRE ỌVBOKHAN

Texas ẹre I ma na yo asikoko nọkhua vbe ẹghẹ nii. Isiwinna ne a tie ẹre Missouri-Kansas-Texas Railroad ẹre erha mwẹ na gha winna vbe ẹghẹ nii, rhunmwuda ọni, asẹ ọghe erha mwẹ, ẹre ima ya gha ya okọ erhẹn la odẹ. Ma gha mu otuẹ gi etẹn vbuwe ẹgbẹe, ma ghi ke evba gha rrie asikoko nọkhua. Ọtien iye mwẹ nokpia nọdiọn ne a tie ẹre Fred Wismar kevbe ọvbokhan rẹn ne a tie ẹre Eulalie ke gha rre ẹvbo ne a tie ẹre Temple vbe Texas. Odẹ ukpo 1900 ẹre Fred ya miẹn odẹ ọghe ẹmwata yi, ọ na dinmwiamẹ, ọ na vbe maa etien ọnrẹn odẹ ọghe ẹmwata. Erriọ iye mwẹ ya la otu e Jehova. Etẹn nibun wa rẹn Fred vbe Texas rhunmwuda, ọ ka ga vbe odin e Texas zẹvbe ọguọmwadia odin, na ghi tie ẹre ọgbaroghe ọghe otako. Te I wa gha hoo ne I ya egbe tae Fred rhunmwuda ọmwa esi nọ.

Ọ ghi rre ukpo 1941, ma keghi la okọ erhẹn gha rrie asikoko nọkhua vbe St. Louis, Missouri. Vbe asikoko nii, iran na wẹẹ ne igbama hia tota ye ako ọkpa vbe ọgbẹlẹzẹ nii, ne iran mieke na danmwehọ ọta ne Ọtẹn Nokpia Rutherford ya guan, nọ ghaa mwẹ uhunmwuta na: “Children of the King.” Ọta nii ghi fo nẹ, Ọtẹn Nokpia Rutherford kevbe etẹn ni ru iyobọ nẹẹn keghi rhie ebe ne a tie ẹre Children ne dọmwadẹ ima ni tota ye ihe ọkpa. Ma gberra 15,000. Ọyẹnmwẹ na wa gha sẹ ima hia.

 Vbe uki April ọghe 1943, ma na yo asikoko nọ mwẹ uhunmwuta na: “Call to Action” vbe ehe ne a tie ẹre Coffeyville vbe Kansas. Asikoko nii ẹre otu na mu Owebe Ọghe Ukhamwẹ Osa gbọọ, asikoko nii ẹre otu na vbe rhiẹre ladian, ebe nọ mwẹ iruẹmwi 52 na ghaa loo vbe owebe nii. Ukpo nii ẹre I ya ọta nokaro guan vbe owebe nii. Ii khian mianmian asikoko nii rhunmwuda, asikoko nii ẹre imẹ vbe etẹn eso na dinmwiamẹ vbe ovbi ẹzẹ nọ wa gbe oni.

TE I WA GHA HOO NE I GA VBE BẸTẸL

I ghi yo owebe nogieva fo vbe ukpo 1951, I keghi ru azẹ nọ dekaẹn emwi ne I khian ya arrọọ mwẹ ru. Ọ na wa gha rrọọ mwẹ orhiọn ne I ya ga vbe Bẹtẹl. Ọtẹnmwẹ nọdiọn ighẹ Jerry, ka gha winna vbe Abotu. I na ghi gbẹn ebe gie Abotu. Vbọ ma he kpẹ vba, otu na tie mwẹ ne I do gha winna vbe Bẹtẹl. March 10, 1952 ẹre I ghi suẹn gha winna vbe Bẹtẹl. Azẹ ne I ru na, wa kie ẹkpotọ mẹ ya rhiegba ye ugamwẹ e Jehova.

I te wa gha hoo ne I winna vbe ugha ne a na print ebe ne I mieke na gha mwẹ obọ vbe ebe iyẹn ọghomwa ne a printi ladian. Sokpan, iwinna evbare ne a le kevbe ne a mwamwa ye eteburu ẹre I ghaa ru. I wa sọyẹnmwẹ iwinna nii rhunmwuda I ruẹ emwi nibun. Ẹghẹ ọkpa i rrọọ ne I ya winna vbe ugha ne a na print ebe. Ọ mwẹ ẹghẹ ne etẹn ni winna vbe ukoni ya hẹwẹ vbe avan. Ẹghẹ na, ẹre I wa gha loo ya tie Baibol vbe aza ebe nọ rre Bẹtẹl. Ọna keghi ya amuẹtinyan mwẹ wegbe sayọ. Ọ na vbe ya mwẹ do gha mwẹ ekhọe ọghe ne I ya ya arrọọ mwẹ hia ga vbe Bẹtẹl. Ukpo 1949 ẹre Jerry ne ọtẹn mwẹ nọdiọn kpa vbe Bẹtẹl, ọ na rhie ọtẹn nokhuo ne a tie ẹre Patricia, sokpan, ọkpẹn Bẹtẹl ẹre iran ghaa ye. Iran wa gha rhie igiọdu mẹ vbe I da sẹ Bẹtẹl.

Vbe I da sẹ Bẹtẹl, otu keghi ru emwamwa ọghe ne a ya hannọ etẹn nikpia eso ni gua ya ọta guan, bae ni ka ya ọta guan. Etẹn ni ghaa mwẹ obọ vbe emwamwa na kegha mu otuẹ gie iko ni rre olẹga ọghe Brooklyn, sokpan ehe ne iran yo i gberra ibiriki 200. Iran gha ghi ya ọta guan fo nẹ, iran ghi vbe deba etẹn yo ikporhu. I deba etẹn ne iran hannọ zẹe. Ọta nokaro ne I ya guan ma zẹdẹ gha khuẹrhẹ mẹ, te ohan wa gha mu mwẹ vbe ughaẹdẹ ọkpa ne I ya ya ọta nii guan. Okọ erhẹn ẹre I mobọ gha lao ye iko ughughan. I yerre emwi nọ sunu vbe ẹdẹ Sunday ọkpa vbe ẹghẹ avan vbe ukpo 1954, ẹghẹ ne oni ya gha fi vbe gha nọ. Ẹghẹ ota vbe Ẹdẹ Sunday nii, ẹre ọ te khẹke ne okọ erhẹn ne I la re ya sẹ New York. Sokpan, ogbigbi ẹhoho na gha la, oni nọ zeze ọmwa na gha fi, esia na vbe gha dele. Ezini okọ erhẹn ma ghi gha winna ẹse. Odẹ ẹgogo isẹn vbe owiẹ vbe ẹdẹ Monday ẹre okọ erhẹn nii ghi ya sẹ ehe ne okọ erhẹn na kun sie vbe New York. Evba nii, ẹre I ghi ke gha die Bẹtẹl. I wa sẹ Bẹtẹl, I na wa gha rrie ukoni. Ima rherhe suẹn iwinna vbe owiẹ nii, egbe vbe wọọ mwẹ, sokpan, ọyẹnmwẹ wa gha sẹ mwẹ rhunmwuda iwinna esi ne I ya ru kevbe etẹn nibun ne I vbe ya egbe rhorho.

Vbe ima khian suẹn gha guan ladian vbe ẹkpẹti ọta ọghe otu (WBBR)

Vbe I da sẹ Bẹtẹl, I na vbe gha mwẹ ọghae vbe emwamwa ọghe Baibol na gu ọmwa tie ne otu ghaa ya ẹkpẹti ọta (WBBR) ru vbe uzọla uzọla vbe ẹghẹ nii. E studio ne ima ghaa loo kegha re egedege nọ rre 124 Columbia Heights. Ọtẹn Nokpia A.  H. Macmillan, nọ kpẹre nẹ vbe Bẹtẹl vbe ẹghẹ nii, wa vbe gha mwẹ ọghae vbe emwamwa na. Ọtẹn Nokpia Mac ẹre ima mobọ gha tie ẹre. Ọmwa ne a ya egbe taa ẹre ọtẹn na wa gha khin, rhunmwuda amuẹtinyan kevbe izinegbe nọ rhiema vbe ọ rre uwu ọlọghọmwa.

Asobọrrie na, ẹre ima ya gha wewe ẹkpẹti ọta ọghe otu (WBBR)

Iwinna mwẹ keghi fiwerriẹ vbe ukpo 1958. Etẹn ni rrie owebe Gilead ẹre I ghi gu gha ru emwamwa ọghe visa kevbe emwamwa ọghe vbene iran khian ya mu okhian gha rrie ehe ughughan ne otu gie iran yo, vbe iran gha ghi ladian nẹ. Te igho ne a ya la okọ ẹhoho vbe ẹghẹ nii wa gha ghan, rhunmwuda ọni, ibozẹghẹ etẹn ni ladian vbe owebe Gilead ẹre ọ ghaa la okọ ẹhoho. Etẹn nibun ne a gie ye otọ Africa kevbe Odẹ Ekẹn Ọghe Asia kegha loo okọ ẹzẹ. Igho ne a ya la okọ ẹhoho ghi rrie otọ nẹ, okọ ẹhoho ẹre etẹn nibun ni ladian vbe owebe Gilead, ghi gha lao.

Vbe I mwamwa e sẹtifiket ọghe etẹn ni khian ghi ladian vbe owebe Gilead

ASIKOKO UGHUGHAN NE I MU OKHIAN GHA RRIE

Vbe ukpo 1960, iwinna ọvbehe na deba iwinna ne I ka gha ru. Mẹ ẹre ọ ru emwamwa ọghe okọ  ẹhoho hia ni ke United States mu etẹn gha rrie asikoko ọghe uhunmwu otagbọn ne a do vbe Europe vbe ukpo 1961. Ọkpa vbe usun avbe okọ ẹhoho na, ẹre I lao gha rrie asikoko nii vbe Hamburg, Germany. Asikoko nii ghi sẹ ufomwẹ nẹ, mẹ kevbe etẹn eha ni ga vbe Bẹtẹl na ya haya imọto. Ma na ke Germany hin imọto nii gha rrie Abotu nọ rre Rome vbe otọ ẹvbo Italy. Ma na vbe ke evba gha rrie France. Ma na ke France fian Pyrenees Mountains rra gha rrie Spain. Vbe ẹghẹ nii, arriọba mu awua ye iwinna ima vbe Spain. Ma na viọ ebe eso ne etẹn vbe Barcelona, sokpan te ima vbuọre vbe na ghee emwi ọhẹ. Ọ wa sẹ ima ọyẹnmwẹ vbe ima miẹn iran. Ma ghi ke evba nii hin imọto sẹ Amsterdam, ma na ke Amsterdam la okọ ẹhoho gha rrie New York.

Odẹ ukpo ọkpa ghi vbe gberra nẹ, otu na wẹẹ ne I ru emwamwa ne etẹn 583 ni mu okhian gha rrie ehe ughughan vbe uhunmwu otagbọn rhunmwuda asikoko ọghe otagbọn hia ne a do vbe 1963. Uhunmwuta ọghe asikoko nii ọre “Everlasting Good News.” Otọ ẹvbo ughughan ne etẹn na mu okhian gha rrie ọre, Europe, Asia, South Pacific, Honolulu, Hawaii, Pasadena kevbe California. Etẹn na vbe sẹ Lebanon kevbe Jordan, ena keghi re ehe ne emwa ni gbẹn Baibol na yin. Ugha ne I na gha winna ẹre ọ ru emwamwa ọghe okhian na, e hotẹl ughughan ne iran tota yi kevbe visa hia ne iran loo ro.

ỌMWA NE IMA GHI GBA GHA MU OKHIAN YO EHE UGHUGHAN

Emwi ọvbehe nọ ye ukpo 1963 ru ekpataki ọre wẹẹ, ukpo nii ẹre I rhie okhuo. June 29, ẹre imẹ vbe Lila Rogers ru orọnmwẹ, Missouri ẹre ọ ke rre, 1960 ẹre ọ suẹn gha ga vbe Bẹtẹl. Uzọla ọkpa ghi gberra nẹ ne ima ru orọnmwẹ, mẹ vbe ọvbokhan mwẹ keghi deba etẹn ọvbehe mu okhian gha rrie ehe nibun vbe uhunmwu otagbọn. Ma sẹ Greece, Egypt kevbe Lebanon. Ma na ke Lebanon lae okọ ehoho gha rrie Jordan, nọ re odẹ ekẹn ọghe Jerusalem, nọ ghaa rre ototọ e Lebanon vbe ẹghẹ nii, sokpan, vbe ẹghẹ na kha na, a mu awua ye iwinna ima vbe Jordan, rhunmwuda ọni, arriọba ma kue gha rrie visa ne Avbe Osẹe Jehova. Orhiọn ima ma sotọ rhunmwuda ima ma rẹn emwi nọ khian sunu vbe ima gha sẹ evba. Ọyẹnmwẹ nọ ghaa sẹ ima i gia gie vbe ima miẹn ẹbu etẹn vbe ehe ne okọ ẹhoho na kun sie vbe Jordan. Emwi ne a gbẹn ye ukpọn ne iran mu mwẹ ọre: “Avbe Osẹe Jehova, Wa Bokhian.” Emwi ọyunnuan wa gha nọ vbe ima miẹn ehe ne Abraham, Isaac kevbe Jacob na yin, ehe ne Jesu kevbe erhuanegbe ẹre na kporhu kevbe ehe ne iyayi ọghe Ivbiotu e Kristi ke vẹwae la “otọ agbọn hia.”—Iwinna 13:47.

Ukpo 55 ẹre ọ ye na ne ima vbe Lila ru orọnmwẹ. Irẹn ọre ọyobọ mwẹ vbe iwinna hia ne otu waa ima re. Ẹghẹ nibun ẹre ima ya gha mu otuẹ ye Spain kevbe Portugal vbe ẹghẹ ne arriọba ya mu awua ye iwinna ima vbe otọ ẹvbo eva na. Ma gha ghi rhie igiọdu ne etẹn nẹ, ma ghi vbe viọ ebe iyẹn kevbe emwi ọvbehe ne iran. Ma vbe ya tuẹ etẹn ima eso ni ghaa rre eghan vbe ẹvbo ne a tie ẹre Cádiz vbe Spain. Ẹko wa rhiẹnrhiẹn mwẹ rhunmwuda, ọta ne I ya guan, wa rhie igiọdu ne iran.

Vbe imẹ vbe ọvbokhan mwẹ kẹ kevbe Patricia vbe Jerry Molohan rrie asikoko nọkhua nọ mwẹ uhunmwuta na: “Peace on Earth” vbe ukpo 1969

 Ke ukpo 1963 gha dee, otu wa loo mwẹ ya ru emwamwa ne etẹn, ni mu okhian gha rrie asikoko ọghe otagbọn hia, ne a do vbe Africa, Australia, Central South America, Europe, Odẹ Ekẹn Ọghe Asia, Hawaii, New Zealand kevbe Puerto Rico. Ma i khian mianmian emwi ẹwaẹn nibun ne ima miẹn vbe asikoko nibun ne ima yo. Ne ima yo vbe Warsaw, Poland vbe ukpo 1989, etẹn nibun ni ke Russia rre keghi rrie asikoko nii. Ọna ọre asikoko nokaro ne iran he yo. Etẹn nikpia kevbe nikhuo ni ghaa rre eghan vbe ukpo nibun vbe Soviet Union, vbe rrie asikoko nii.

Iwinna ọvbehe ne I wa vbe sọyẹnmwẹ ọnrẹn, ọre otuẹ ne a mu gie etẹn ni ga vbe Abotu kevbe arọndẹ na gie yo isi ni rre ehe ughughan vbe uhunmwu otagbọn. Vbe otuẹ nokiekie ne ima mu gha rrie South Korea, ma na ya tuẹ etẹn 50 ni ghaa rre eghan vbe Suwon. Etẹn nii wa rhiẹre ma wẹẹ, iran mwẹ ẹbo izinegbe, iran ya ekhọe hia diakhẹ ẹghẹ ne iran khian ya ya afanvbimu ọghe iran ga e Jehova. Otuẹ ne ima mu gi iran wa rhie igiọdu ne ima.—Rom 1:11, 12.

ALAGHODARO NỌ RHIEGBE MA VBE OTU E JEHOVA WA SẸ MWẸ ỌYẸNMWẸ

E Jehova wa fiangbe emwa rẹn. Vbe I dinmwiamẹ vbe ukpo 1943, odẹ 100,000 ẹre ima ghaa khin vbe uhunmwu otagbọn hia. Emwa ni ghi rre otu e Jehova nia gberra 8,000,000, iran kporhu vbe otọ ẹvbo 240. Vbe nọ dekaẹn umuamwẹ na, etẹn ni ladian vbe owebe Gilead wa ru iyobọ ne gẹdẹgbẹẹ. I wa sọyẹnmwẹ ẹghẹ ne I ya gu iran winna kevbe ẹghẹ ne I ya gu iran ru emwamwa ne iran mieke na sẹtin sẹ ehe ughughan ne otu gi iran yo vbe iran gha ladian nẹ vbe Gilead.

Azẹ ne I ru vbe I ye rre igbama ọghe ne I do ga vbe Abotu wa sẹ mwẹ ọyẹnmwẹ. E Jehova wa fiangbe mwẹ. Ma sọyẹnmwẹ iwinna ne ima ru vbe Abotu, mẹ vbe ọvbokhan mwẹ wa vbe sọyẹnmwẹ ukpamuyọmọ ne ima ya gu etẹn nibun winna vbe ikporhu vbe iko ughughan ni rre ikinkin e Brooklyn. Ma mwẹ ọse nibun ne ima i khian mianmian ẹdẹ.

I ye ga vbe Bẹtẹl. Iyobọ ne ọvbokhan mwẹ ye mẹ i re ne kherhe. Agharhemiẹn wẹẹ I gberra ukpo 84 nẹ, I ye mwẹ iyobọ ne I ye vbe Abotu. Iwinna nọ dekaẹn elẹta kevbe Email nọ ke ihe ọvbehe rre kevbe ne Abotu vbe gie ladian, ẹre I ghi ru nia.

Efoto ne imẹ vbe ọvbokhan mwẹ da mu

Vbene ẹmwata, ukpamuyọmọ nọ hiunsi nọ, na gha rre otu e Jehova rhunmwuda, ọmwa nọ rre otu e Jehova rẹn alughaẹn nọ rre uwu ẹkpo emwa ni ga e Jehova kevbe emwa ne ẹi gae. Ma rẹnrẹn wẹẹ, ẹmwata ne uhunmwu ẹmwẹ ẹre ọ rre ebe Malakai 3:18, NW nọ khare wẹẹ: “Emwa gha dọlegbe miẹn alughaẹn nọ rre uwu ẹkpo ọmwata kevbe ọmwa dan kevbe uwu ẹkpo ọmwa nọ ga Osanobua kevbe ne ẹi gae.” Ẹdẹgbegbe ẹre agbọn Esu ya rhia yọ rhia yọ. Emwa ne ẹi mwẹ ayayẹro kevbe ne ẹi sọyẹnmwẹ ẹre ọ vuọn rẹn. Sokpan emwa ni ga e Jehova keghi sọyẹnmwẹ uhiẹn vbe agbọn nọ wegbe na, rhunmwuda, iran mwẹ ayayẹro ne ẹi beghe. Iwinna ikporhu iyẹn nọ maan ne ima ru keghi re ukpamuyọmọ nọ hiunsi! (Mat 24:14) Ma wa yaro ye ẹghẹ ne agbọn Esu khian ya la hin odẹ rre, vbe iyẹke ọni, agbọn ọgbọn ghi rhihe ẹre. Vbe ẹghẹ nii, ai ghi khuọnmwi, ai ghi vbe wu. Emwa esi hia ghi gha rrọọ vbe etẹbitẹ.