Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 NỌ KE AZA IMA NẸDẸ RRE

Vbene Ikporhu Iyẹn Nọ Maan Ọghe Arriọba Ya Suẹn Hẹ Vbe Portugal

Vbene Ikporhu Iyẹn Nọ Maan Ọghe Arriọba Ya Suẹn Hẹ Vbe Portugal

GEORGE YOUNG rre usun emwa ni lae okọ ẹzẹ gha rrie Europe. Okun ne iran la khian ne a tie ẹre Atlantic kegha vba yo vba rre. Evba nii ẹre Young na yerre iwinna ikporhu iyẹn nọ maan nọ ru vbe Brazil. * Zẹ vbene iran ya khian, ọ na ghi rhie ekhọe daa iwinna nọ khian ya ru vbe Europe. Emwa nibun ma he zẹdẹ họn ikporhu iyẹn nọ maan vbe Spain kevbe Portugal vbe ẹghẹ na kha na. Iwinna eva ẹre Ọtẹn Nokpia Young khian ya ru vbe Portugal. Ọ ghi sẹ evba, ọ na ru emwamwa khẹ Ọtẹn Nokpia J. F. Rutherford nọ khian do ya ọta guan, ọ na vbe ghae asobọrrie 300,000 ne emwa.

George Young fian okun nibun rra vbe ọ mu okhian rrie ehe ughughan ne ọ na ya kporhu

Oyanghan ẹre Ọtẹn Nokpia Young ya vba vbe ọ ghi sẹ Lisbon vbe ukpo 1925. Ọba ẹre ọ te ka kha yan Portugal sokpan arriọba nii keghi sẹ ufomwẹ vbe 1910 vbe otu azẹ ya ẹtin vbe iwegbe la ukpo arriọba. Ọna ẹre ọ ghi si ẹre ne avbe olodigba ọghe Catholic ma na ghi gha mwẹ ọdakha vbene ọ ka ye. Emwa nibun na do gha mwẹ afanvbimu, vbọrhirhighayehẹ, te okhọn wa ye gha rre otọ ẹvbo nii.

Vbe Ọtẹn Nokpia Young ru emwamwa khẹ Ọtẹn Nokpia J. F. Rutherford nọ khian do ya ọta guan, arriọba keghi mu uhi gbọọ rhunmwuda emwa eso ni te si uma isọtẹ daa arriọba nọ rre ukpo. Akọwe ọghe British and Foreign Bible Society keghi tama e Young wẹẹ, ọ gha werriẹ aro daa isievẹn nibun. Ọna ma ya ohan mu e Young hiehie. Ọ na ya nọ emwa ni gbaroghe Camões Secondary School deghẹ iran gha kue ne irẹn loo ọgbẹlẹzẹ ne a na ku iku isasa egbe vbe owebe nii. Iran na kpasẹ yọ!

May 13, 1925 ọre ẹdẹ ne Ọtẹn Rutherford ghi do ya ọta guan. “How to Live on the Earth Forever” ẹre ọ ghaa re uhunmwuta ọghe ọta ne ọ ya guan. Te a wa ya ọta nii wewe vbe ebe iyẹn nibun, erriọ avbe ya sikan uhunmwuta na ye owa nibun. Ekaolotu ọghe ugamwẹ okeke na vbe giẹgiẹ yae wewe vbe ebe iyẹn wẹẹ ne emwa gha begbe vbe egbe “akhasẹ ohoghe” nọ da rre na. Onurho ọghe ọgbẹlẹzẹ ne Ọtẹn Rutherford khian na ya ọta guan ẹre eghian na vbe gha ghae ebe ne iran gbẹn ya rhia eni e Rutherford rua.

Ọrheyerriọ, emwa 2,000 ẹre ọ rre do danmwehọ ọta nii. Ehe hia na vuọn. Emwa ni kpaa rhunmwuda iran ma miẹn ehe tota yi vbe sẹ 2,000. Emwa eso ni ghaa rre orere na hin ugbalaka ne iran mieke na họn ẹmwẹ ne a taa, eso na rrie rrọ ye emadogua eso ne a ya ku iku isasa egbe.

Eghian wa gha gbe owogho. Iran na gha vannọ filo aga kua. Ọtẹn Rutherford ma zẹdẹ ze ye iran re. Ọ keghi hin eteburu ne emwa mieke na gha họn ẹmwẹ nọ taa. Ọ ghi ya ọta guan fo nẹ vbe ogiasọn, emwa ni gberra 1,200 ẹre ọ rhie eni iran kevbe adrẹsi ọghe iran yotọ ne ebe iyẹn mieke na gha sẹ iran obọ. Ẹdẹ ghi gbe, ebe iyẹn ne a tie ẹre O Século keghi guan kaẹn ọta ne Ọtẹn Nokpia Rutherford ya guan.

 A ka gha zedu The Watch Tower ladian nẹ vbe urhuẹvbo Portuguese vbe Brazil. Sokpan, ọ ghi rre September 1925, a na do suẹn gha print ẹre ladian vbe Portugal. Asẹ na ẹre ọtẹn nokpia Virgílio Ferguson nọ rre Brazil ya gha mu egbe Portugal nọ ya ru iyobọ ye iwinna Arriọba. Irẹn vbe Young ka gba winna vbe abotu nọ rre Brazil. Vbuwe ẹghẹ na ẹre Virgilio kevbe Lizzie ne ọvbokhan rẹn ya si gha rrie Portugal. Iran na ya vba ọtẹn nokpia Young vbe evba. Ẹghẹ nọ khẹke ẹre iran ya sẹ Portugal rhunmwuda asẹ nii ẹre Young ya kpa gha rrie ihe ọvbehe ya ru iyobọ ye iwinna ikporhu iyẹn nọ maan. Ọtẹn Nokpia Young vbe winna sẹ Soviet Union.

Ebe asẹ ne a ya dia ẹvbo ya ne arriọba rhie ne Lizzie kevbe Virgílio Ferguson vbe 1928

Ẹghẹ ne ivbiyokuo ghi ya ya ẹtin vbe iwegbe la ukpo arriọba vbe Portugal, etẹn keghi werriẹ aro daa ukpokpo nọ wegbe. Ọtẹn Nokpia Ferguson keghi mudia gbain. Ọ keghi ru iyobọ nọ khẹke ne etẹn nọ ghi zẹ ighẹ alaghodaro ghaa rre iwinna ikporhu iyẹn nọ vbe otọ ẹvbo nii. Ferguson keghi rhie asẹ vbe obọ arriọba na gha loo owa irẹn ya do iko ọghe Ivbiotu e Kristi. Arriọba keghi kpasẹ yọ vbe October 1927.

Vbe ukpo nokaro ne ivbiyokuo suẹn gha kha yan Portugal, emwa ni sẹ odẹ 450 ẹre ọ wee ebe Owa Ọkhẹ. Yevbesọni, etẹn keghi ya asobọrrie kevbe ebe ẹmu wewe iyẹn nọ maan la otọ ẹvbo nibun ni rre ototọ arriọba Portugal, vbe na ghee Angola, Azores, Cape Verde, East Timor, Goa, Madeira kevbe Mozambique.

Vbe odẹ ukpo 1929, ọgbugbo ọkpa ne a tie ẹre Manuel da Silva Jordão na si gha die Lisbon. E Brazil ẹre ọ na họn ọta ne Ọtẹn Nokpia Young ya guan. Ọwarọkpa nii ẹre ọ wa ya yẹrẹro wẹẹ, odẹ ọghe ẹmwata na khin. Erriọ ya do khian ọguọmwadia e Jehova. Irẹn ẹre ọ ghi do ru iyobọ ne Ferguson vbe Portugal. Nọ mieke na sẹtin ru iyobọ nọ khẹke ye iwinna Arriọba, ọ na rhie obọ ye iwinna arọndẹ. Emwamwa ọghe ebe iyẹn na print kevbe na ya wewe keghi do deziẹn, ọni ẹre ọ ghi ru iyobọ ne iko ọgbọn nọ rre Lisbon ya khian nọ digiẹ.

Vbe 1934, Ferguson vbe amwẹ ọnrẹn na werriegbe gha rrie Brazil. Vbe ẹghẹ na, emwa nibun họn iyẹn ọghe Arriọba nẹ vbe Portugal. Vbuwe ẹghẹ ne okhọn ya gha rre Spain kevbe ẹghẹ Okuo Ọgbagbọn Nogieva, etẹn na ye sẹtin mudia gbain vbe odẹ ọghe orhiọn. Ọ mwẹ ẹghẹ ne etẹn khian te ya worua vbe ugamwẹ Jehova sokpan, vbe 1947, iran na werriegbe gbọzinian vbe odẹ ọghe orhiọn vbe otu gie John Cooke nọ ladian vbe owa ebe Gilead gha die Lisbon. Ke ẹghẹ na kpa, etẹn na gha muanyọ muanyọ. Te etẹn ye gha muan sayọ uhiẹn vbe arriọba mu awua ye iwinna ima vbe ukpo 1962. Arriọba ghi werriegbe kpasẹ ye iwinna ima vbe otọ ẹvbo nii vbe December 1974, etẹn ni gberra 13,000 ẹre ọ ghi gha rre Portugal.

Vbe ẹdẹnẹrẹ, etẹn ni rre Portugal gberra 50,000. Etẹn nibun rre ihe eso ne amẹ gbodin lẹga ne a na zẹ Portuguese, vbe na ghee ẹvbo ne a tie ẹre Azores kevbe Madeira. Etẹn eso ni ghi rre Portugal nia keghi re ivbi etẹn kevbe eyẹ ọghe etẹn ni danmwehọ ọta ne Ọtẹn Nokpia Rutherford ya guan vbe ukpo 1925.

Ma kpọnmwẹ e Jehova kevbe etẹn ni ya udinmwẹ rhiegba ye iwinna ikporhu iyẹn nọ maan vbe ẹghẹ nii zẹvbe ‘eguọmwadia e Kristi.’—Rom 15:​15, 16.—Nọ Ke Aza Ima Nẹdẹ Rre vbe Portugal.

^ okhuẹn 3 Ya ghee The Watchtower ọghe May 15, 2014, ipapa 31-32 nọ mwẹ uhunmwuta nọ khare wẹẹ “There Is More Harvest Work to Be Done.”