Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

Umozo Ẹre Odẹ Ọghe Ẹmwata Rhie Rre, “Ẹi Re Ọfunmwegbe”

Umozo Ẹre Odẹ Ọghe Ẹmwata Rhie Rre, “Ẹi Re Ọfunmwegbe”

“Wa ghẹ ro ighẹ ọfunmwegbe mẹ rhie rrie agbọn hiehie, ẹi re ọfunmwegbe, umozo nọ.”—MAT. 10:34.

IHUAN: 125, 135

1, 2. (a) De ọfunmwegbe ne ima sọyẹnmwẹ ọnrẹn nia? (b) Vbọzẹe ne ima i na rre agbọn ọfunmwegbe nia? (Ghee efoto nọ rre omuhẹn.)

AI MIẸN ọmwa ne ẹi gualọ ọfunmwegbe kevbe agbẹkunsotọ. Ọna ẹre ọ zẹe ne ima na kpọnmwẹ e Jehova rhunmwuda “ọfunmwegbe” ne ọ ya wee ima. Ọfunmwegbe na, ẹre ọ mu ima orhiọn sotọ. (Fil. 4:​6, 7) Rhunmwuda ne ima na ya egbe fiohan ne Jehova, te ima ghi mwẹ “ọfunmwegbe vbe ehe ne Osanobua ye.” Ọna rhiema wẹẹ ọsie Jehova ẹre ima khin.—Rom 5:1.

2 Sokpan ọ ma he sẹ ẹghẹ ne Osanobua khian ya ru ẹre ne emwa rẹn gha rre agbọn ọfunmwegbe. Vbe ẹghẹ okiekie ẹdẹ ne ima ye na, ighaegbe kevbe emwa ni gbe olighi ẹre ọ gba ehe hia. (2 Tim. 3:​1-4) Zẹ vbe Ivbiotu e Kristi, te ọ khẹke ne ima khẹ ye egbe, ne ima mieke na sẹtin khọnmiotọ yan Esu kevbe imamwaemwi ohoghe nọ ke obọ re rre. (2 Kọr. 10:4, 5) Sokpan ukpokpo ọghe emwa ima vbuwe ẹgbẹe ne ẹi ga e Jehova ẹre ọ tua sẹ. Ne ima mieke na sẹ e Jehova rae, eso sẹtin gha ya ima gbogiẹ rhunmwuda iyayi ọghe ima, iran sẹtin vbe ba ima ifiẹzọ wẹẹ ima khian si ighaegbe ye uwu ẹgbẹe, iran sẹtin wa vbe ya obọ sekhae wẹẹ, iran gha kan ima fua vbuwe ẹgbẹe ra iran ghi kpe ima hin ọmọ rre. De aro nọ khẹke ne  ima ya gha ghee ukpokpo nọ ke obọ ẹgbẹe rre? Vbe ima khian ya sẹtin la isievẹn vbenian gberra hẹ?

DE ARO NỌ KHẸKE NE IMA YA GHEE UKPOKPO ỌGHE ẸGBẸE

3, 4. (a) Vbe imamwaemwi ọghe Jesu a si? (b) Vbọ khian yae kakabọ gha lọghọ na lele ukpowẹ ọghe Jesu?

3 E Jesu rẹnrẹn wẹẹ imamwaemwi ọghe irẹn gha si ighaegbe, nọnaghiyerriọ, te emwa ni lele ukpowẹ ọre khian gha mwẹ udinmwẹ ne iran mieke na setin werriẹ aro daa ukpokpo. Ukpokpo vbenian sẹtin si olighi ye uwu ẹgbẹe. Jesu keghi kha wẹẹ: “Wa ghẹ ro ighẹ ọfunmwegbe mẹ rhie rrie agbọn hiehie, ẹi re ọfunmwegbe, umozo nọ. I do viọ emọ ikpia aro daa erha iran, emọ ikhuo daa iye iran kevbe amwẹ ọmọ daa iye ọdọ. Ẹgbẹe ọmwa gha re oghian ne ọ khọ ẹko ọmwa sẹ.”—Mat. 10:34-36.

4 Emwi ne Jesu yae kha vbe ọ khare wẹẹ, “Wa ghẹ ro ighẹ ọfunmwegbe mẹ rhie rrie agbọn,” ọre wẹẹ, te ọ khẹke ne emwa ni hoo ni lele ukpowẹ ọghe irẹn muẹn roro evbọ gha kẹrikian rhunmwuda, imamwaemwi ọghe irẹn sẹtin si ighaegbe. Vbene ẹmwata, ẹi re te Jesu do si ighaegbe ye uwu ẹgbẹe, ikporhu iyẹn nọ maan ọghe Arriọba ọre iwinna ne Jesu rrie agbọn do ru. (Jọn 18:37) Ọrheyerriọ, ẹi khian gha khuẹrhẹ ne emwa ni ga e Jehova deghẹ emwa vbuwe ẹgbẹe ra avbe ọse na gha gbodan ye odẹ ọghe ẹmwata.

5. De emwi ne erhuanegbe Jesu he ya egbe miẹn?

5 E Jesu khare wẹẹ ukpokpo ọghe ẹgbẹe keghi re ọkpa vbe usun ọlọghọmwa ne erhuanegbe ẹre gha werriẹ aro daa. (Mat. 10:38) Te erhuanegbe Jesu ghaa zinegbe vbe ẹgbẹe iran zaan iran, uhiẹn vbe a kan iran fua vbe ẹgbẹe rhunmwuda e Jesu ne iran ya egbe ba. Ọrheyerriọ, emwi ne iran fiyekegbe ma sẹ emwi rhọkpa vbe a gha yae gie afiangbe ne iran miẹn.—Tie Mak 10:29, 30.

6. Vbọ khẹke ne ima gha yerre vbe ẹgbẹe ima ghaa gbodan ghee ima rhunmwuda ima ga e Jehova?

6 Emwa ni sikẹ ima vbuwe ẹgbẹe ghaa gbodan ghee ugamwẹ ima, te ọ khẹke ne ima ye gha hoẹmwẹ iran, sokpan ma ghi yerre wẹẹ, ahoẹmwọmwa ne ima mwẹ ne Jehova kevbe Kristi ẹre ọ khẹke nọ wegbe sẹ. (Mat. 10:37) Ọ khẹke ne ima gha begbe rhunmwuda Esu sẹtin ya ima ru emwi nọ ma khẹke deghẹ ima hoẹmwẹ ẹgbẹe ima sẹ e Jehova. Gima ziro yan ukpokpo eso nọ ke obọ ẹgbẹe rre kevbe odẹ ne ima khian ya sẹtin lae gberra.

ỌMWA NE A GBA RRE ORỌNMWẸ NE ẸI OSẸE JEHOVA

7. De aro nọ khẹke ne u ya gha ghee ọlọghọmwa ne u ye, deghẹ ọmwa ne uwa gba ru orọnmwẹ i ga e Jehova?

7 E Baibol ya obọ sekhae wẹẹ, emwa ni ru orọnmwẹ gha werriẹ aro daa “orhikhan ẹdẹgbegbe.” (1 Kọr. 7:28) Deghẹ ọmwa ne uwa gba ru orọnmwẹ i ga e Jehova, orhikhan ọghe orọnmwẹ ghi tua sayọ. U ghaa rre ọlọghọmwa vbenian, ghẹ gi ẹtin foẹ, ya aro ne Jehova ya ghee isievẹn vberriọ gha ghee ẹre. Deghẹ ọmwa ne u wa gba rre orọnmwẹ ma hoo nọ ga e Jehova, ọni ma sẹ ne uwa gha ya wannọ egbe ra ne uwa sọ ebe orọnmwẹ. (1 Kọr. 7:12-16) Deghẹ ọdọ ne u rọnmwẹ i ga e Jehova, ẹi khian vbe gha mu asanikaro vbe nọ dekaan ugamwẹ e Jehova. Ọ ghaa yerriọ, te ọ khẹke ne u gha rhie ọghọ nẹẹn rhunmwuda irẹn ọre uhunmwuta ẹgbẹe. Erriọ vbe khẹke ne ọdọ hoẹmwẹ amwẹ ọnrẹn vbene ọ hoẹmwẹ egbe ẹre, ọ gha khọn rẹn wẹẹ ọvbokhan rẹn i ga e Jehova.—Ẹfis. 5:22, 23, 28, 29.

8. De ọta nọ khẹke ne u nọ egbuẹ re deghẹ ọmwa ne uwa gba rre orọnmwẹ i hoo ne u gha yo iko ra ikporhu vbe ẹghẹ hia?

8 Vbua khian ru deghẹ ọmwa ne uwa gba rre orọnmwẹ i hoo ne u gha yo iko ra ikporhu vbe ẹghẹ hia? Ọdafẹn ọtẹn nokhuo ọkpa keghi fian ẹghẹ ne ọtẹn nokhuo na ya yo ikporhu kanmwa. U ghaa rre ihe vberriọ,  u sẹtin nọ egbuẹ wẹẹ: Te arowa mwẹ wẹẹ ne I ghẹ ghi ga e Jehova ra? Deghẹ ẹi erriọ, ọ khẹke ne I ru emwi nọ khare ra? U gha sẹtin gha mu emwi ya oreghe, orhikhan ghi vbe si yo vbe orọnmwẹ ruẹ.—Fil. 4:5.

9. De vbene Ivbiotu e Kristi gha ya maa ivbi iran re hẹ ne iran gha ye ọghọ ne ọmwa ne iran gba ru orọnmwẹ ne ẹi ga e Jehova?

9 Emọ na koko keghi lọghọ deghẹ ọmwa ne a gba ru orọnmwẹ i ga e Jehova. Vbene ọta ye, te ọ khẹke ne u maa ivbuẹ re ne iran gha ‘ye ọghọ ne erha kevbe iye,’ zẹ vbene Baibol khare. (Ẹfis. 6:1-3) Sokpan deghẹ ọmwa ne uwa gba ru orọnmwẹ ma kue yọ vbo? Ọ khẹke ne u ye gha rhie ọghọ nẹẹn, nọ gha re igiemwi esi ne ivbuẹ. Rhie aro tua ako ne arowa ruẹ ra ọvbokhan ruẹ na hia, ne u vbe gha tian rẹn ye emwi esi ne ọ ru. Ghẹ gha ya unu rhia ọmwa ne uwa gba ru orọnmwẹ rua sirra ivbuẹ. Gi ivbuẹ rẹn wẹẹ, dọmwadẹ ima ẹre ọ khian zẹe ne egbe ima deghẹ ima gha ga e Jehova. Uyinmwẹ esi ọghe ivbuẹ sẹtin ya ọmwa ne uwa gba ru orọnmwẹ do ga e Jehova.

Loo ẹkpotọ nọ rhirhi kie ya maa ivbuẹ odẹ ọghe ẹmwata (Ghee okhuẹn 10)

10. De vbene evbibiemọ gha ya maa ivbi iran odẹ ọghe ẹmwata hẹ vbe ẹgbẹe nọ ghae egbe ye ugamwẹ ughughan?

10 Ugbẹnso, ọmwa ne uwa gba ru orọnmwẹ sẹtin hoo ne ivbuẹ deba re gha ru emwi ukpo ra ne iran gha ye sọs. Ikpia eso i zẹdẹ kue ne ọvbokhan iran nọ re Osẹe Jehova gha ya e Baibol maa ivbiẹre emwi. Ọ ghaa yerriọ, te ọtẹn nokhuo nọ rre ihe vberriọ gha hia nọ ye Baibol maa ivbiẹre odẹ ọghe ẹmwata. (Iwinna 16:1; 2 Tim. 3:14, 15) A sẹtin miẹn wẹẹ arowa ọtẹn nokhuo i kue ne ọvbokhan rẹn gha gu ivbiẹre ruẹ e Baibol ra nọ gha viọ iran yo iko. Ọ sẹtin lele adia ọghe arowa ẹre, sokpan ọni ma wẹẹ ne ẹi ghẹ loo ẹkpotọ nọ rhirhi gha kie ya maa ivbiẹ emwi vbekpae Jehova. (Iwinna 4:19, 20) Vbọrhirhighayehẹ, ọ gha sẹ ẹghẹ,  emọ nii ẹre ọ khian tobọ iran zẹẹ deghẹ iran gha ga e Jehova.—Diut. 30:19, 20. *

EMWA VBUWE ẸGBẸE GHAA GBODAN YE UGAMWẸ ẸMWATA

11. De emwi nọ gha sẹtin si ọlọghọmwa ye uwu ẹkpo ima kevbe emwa vbuwe ẹgbẹe ima ne ẹi re Osẹe Jehova?

11 Ọ gha kẹ, ima ma tama ẹgbẹe ima vbe Avbe Osẹe Jehova suẹn gha gu ima ruẹ e Baibol. Sokpan, zẹ vbene amuẹtinyan ọghe ima ya wegbe sayọ, ma keghi bẹghe ẹre wẹẹ te ọ khẹke ne ẹgbẹe ima rẹn vbekpa re. (Mak 8:38) Gia ziro yan emwi eso ne u gha ru deghẹ ẹgbẹe ruẹ kpokpo ruẹ rhunmwuda odẹ ọghe ẹmwata ne u mudia yi.

12. De emwi nọ gha ya emwa ima vbuwe ẹgbẹe gbodan ghee ima? Vbe ima khian ya rhiẹre ma hẹ wẹẹ ima mwẹ agiẹngiẹn daa iran?

12 Gha mwẹ agiẹngiẹn daa emwa vbuwe ẹgbẹe ruẹ ne ẹi Osẹe Jehova. A gha do rẹn odẹ ọghe ẹmwata, o keghi wa gbe ọmwa otiti, sokpan emwa vbuwe ẹgbẹe ima sẹtin gha roro ẹre wẹẹ te a mu ima rẹrẹ ra te ima deba otu dan. Iran sẹtin vbe gha roro ẹre wẹẹ, ima ma ghi hoẹmwẹ iran rhunmwuda ima i ghi deba iran do ugie emwi ukpo ra avbe ugie ọvbehe nọ ma khẹke Ivbiotu e Kristi. Iran sẹtin vbe gha roro ẹre wẹẹ emwi dan gha sunu daa ima vbe ima gha wu nẹ. Vbọrhirhighayehẹ, te ọ khẹke ne ima gha mwẹ agiẹngiẹn daa iran, ma vbe gha danmwehọ iran, ne ima mieke na rẹn vbene ẹmwẹ ima gele ye hẹ vbe ekhọe iran. (Itan 20:⁠5) Ukọ Pọl keghi “ye egbe khian emwi hia ne emwa hia,” ne ọ mieke na sẹtin kporhu ma iran. Ima gha ya egbe tae igiemwi e Pọl, ọ gha vbe biẹ ọmọ esi.—1 Kọr. 9:19-23.

13. De vbene ọ khẹke ne ima ya gha gu emwa ima vbuwe ẹgbẹe guan?

13 Gha ya urhu ne khuẹrhẹ gu iran guan. E Baibol khare wẹẹ: “Wa gi ẹmwẹ uwa gha re nọ maan vbe ẹghẹ hia.” (Kọl. 4:⁠6) Ma sẹtin nọ e Jehova nọ ya orhiọn nọhuanrẹn ru iyobọ ne ima, ne ima mieke na sẹtin gha gu emwa ima vbuwe ẹgbẹe guan vbe odẹ ọghe ọghọ vbe ute. Ẹi re ẹghẹ hia ma khian ya gu iran gha muan ẹmwẹ vbekpae iyayi ọghe iran. Deghẹ emwi ne iran ru ra ẹmwẹ ne iran tae na ya ohu mu ima, ọ khẹke ne ima ya egbe ta ukọ e Pọl nọ khare wẹẹ: “A gha rhovbiẹ ima, ma ghi gha na erhunmwu, a gha kpokpo mwa, ma ghi zinegbe. A gha talọ ku ima, ma ghi gha ya ẹmwẹ rọkhọrọkhọ wanniẹn ẹmwẹ.”—1 Kọr. 4:12, 13.

14. De afiangbe ne a lae miẹn vbe ima ghaa mwẹ uyinmwẹ esi?

14 Gha mwẹ uyinmwẹ. Ọ keghi re emwi nọ maan ne ima gha gu emwa ima vbuwe ẹgbẹe ni gbodan guan vbe odẹ ọghe ọghọ vbe ute, sokpan uyinmwẹ esi ne ima rhiema ẹre ọ ru ekpataki sẹ. (Tie 1 Pita 3:​1, 2, 16.) Gi emwa vbuwe egbẹe ruẹ rẹn lekpae odẹ ne u ya loo arrọọ ruẹ wẹẹ avbe Osẹe Jehova sọyẹnmwẹ orọnmwẹ, iran gbaroghe ivbi iran ẹse, iran i mwẹ obọ vbe uyinmwẹ alama oghẹ kvbe wẹẹ, arrọọ ọghe iran mwẹ evbọ demu. Vbọrhirhighayehẹ, deghẹ emwa ima vbuwe ẹgbẹe ma do deba odẹ ọghe ẹmwata, ọ khẹke ne ima ye gha gha sọyẹnmwẹ, rhunmwuda ne ima na ya ẹko rhiẹnrhiẹn e Jehova.

15. De emwi ne ima gha ru ne ima mieke na sẹtin gbaengbe ne ẹzọ?

15 Mu egbe yotọ. Hia ne u rẹn emwi nọ gha sẹtin si ẹzọ, ne u mieke na rẹn vbene u gha lae hẹ. (Itan 12:16, 23) Ọtẹn nokhuo ọkpa vbe Australia keghi kha wẹẹ: “Te erha arowa mwẹ wa kakabọ gha gbodan ye odẹ ọghe ẹmwata. Ma gha khian mu otuẹ giẹ, te ima ka tama rẹn nẹ vbe efoni, sokpan vbene ima te tama rẹn, te ima ka na erhunmwu ne Jehova ru iyobọ ne ima ya gbe ibiẹ rrie, deghẹ ọ na taa ẹmwẹ nọ ya ohu mu ọmwa. Te ima mu egbe ẹmwẹ ne ima khian taa yotọ ne ima ghẹ ya taa ẹmwẹ nọ gha ya ohu muẹn. Ne  ima ghẹ mieke na taa ẹmwẹ nọ bungbe, ma i kpẹ gbe, ne imuanẹmwẹ nọ dekaan ugamwẹ ghẹ do si ẹzọ.”

16. Vbe ọ khian ru iyobọ nuẹn ne ekhọe ruẹ ghẹ ghi bu abe gbuẹ deghẹ u gu emwa vbuwe ẹgbẹe ruẹ muanẹmwẹ?

16 Vbene ẹmwata, ẹi mwẹ uwẹ vbe emwa ruẹ vbuwe ẹgbẹe, ne ẹi ga e Jehova ma zẹdia gba muan egbe ẹmwẹ. Imuanẹmwẹ vberriọ sẹtin ya ekhọe ruẹ gha bu abe gbuẹ rhunmwuda, u hoẹmwẹ iran. Ọ ghaa yerriọ, u yerre wẹẹ, ahoẹmwọmwa ne u mwẹ ne Jehova ẹre ọ khẹke nọ wegbe sẹ ne u mwẹ ne ẹgbẹe ruẹ. Ẹgbẹe ruẹ gha ghi bẹghe vbene u ya mudia gbain vbe odẹ ọghe ẹmwata, iran gele do rẹn wẹẹ, emwi nọ ru ekpataki nọ rhunmwuda ọ dekaan arrọọ. Vbọrhirhighayehẹ, u i sẹtin gbagbae ye ọmwa egbe nọ do ga e Jehova, sokpan gi iran gha bẹghe ẹre vbe arrọọ ruẹ wẹẹ, a miẹn afiangbe vbe ugamwẹ e Jehova. Osanobua mwa nọ mwẹ ahoẹmwọmwa keghi kie ẹkpotọ ne emwa hia ya zẹẹ vbene iran gha loo arrọọ ọghe iran hẹ.—Aiz. 48:17, 18.

DEGHẸ ỌMWA VBUWE ẸGBẸE RUẸ NA SẸ JEHOVA RAE

17, 18. Vbọ khian ru iyobọ nuẹn ya zinegbe deghẹ ọmwa vbuwe ẹgbẹe ruẹ na sẹ Jehova rae?

17 Ọ keghi re emwi nọ da ọmwa sẹ ugboloko deghẹ ọmwa ima vbuwe ẹgbẹe na tobọre ban iko ne a yo ra deghẹ a kaẹn fua vbe iko. Emwi vbenian gha sunu daa ruẹ, vbọ khian ru iyobọ nuẹn ya zinegbe?

18 Rhiegba ye iwinna ugamwẹ e Jehova. E Baibol na tie, iko ne a mu egbe ẹre yotọ kevbe ne a yo, ikporhu iyẹn nọ maan kẹ kevbe ẹrhunmwu ne a na gha sẹtin ya amuẹtinyan ruẹ wegbe sayọ. (Jud 20, 21) Sokpan, deghẹ ekhọe ruẹ i rre iwinna ugamwẹ ne u rhiegbe yi ghi vbo? Ghẹ gi egbe wọọ. Ye rhiegba ye iwinna ugamwẹ ne u mieke na sẹtin dia iziro ekhọe ruẹ. Emwi vbenian sunu daa ọsian nọ gbẹn Psalm 73. Ọ ke do gha mwẹ iziro nọ ma gba vbe asẹ ọkpa, orhiọn rẹn ma ghi sotọ. Sokpan vbe ọ ghi lao Ọgua Osa, iziro ọghẹe keghi fiwerriẹ. (Psm. 73:16, 17) Iziro ruẹ gha vbe fiwerriẹ deghẹ u na gha ga e Jehova vbuwe amuẹtinyan.

19. Vbua khian ya rhiẹre ma hẹ wẹẹ u ku obọ gbe ba emwamwa ọghe Jehova nọ ya gbe ọmwa hin ọkhọ rre?

19 Ya ekhọe hia ku obọ gbe ba adia ọghe Jehova. E Jehova gha gbe ima hin ọkhọ rre, umamwẹ ọghe ima ẹre ọ yae gualọ. Agharhemiẹn wẹẹ ẹi rhiẹnrhiẹn vbobọvbobọ nii, ọ keghi biẹ ọmọ esi vbe okiekie. (Tie Hibru 12:11.) Vbe igiemwi, e Jehova wẹẹ ne ima ‘ghẹ gu iran mu obọ’ ighẹ emwa ni zẹ utun vbe ehọ. (1 Kọr. 5:11-13) Agharhemiẹn wẹẹ ẹi khuẹrhẹ, te ima gha gbaengbe ne etẹn ima vbuwe ẹgbẹe ne a kan fua vbe iko. Ọ ma khẹke ne ima gha tie iran vbe efoni, ne a gha ya efoni gie uhunmwu gie iran uhiẹn vbe facebook ra ne ima gha gbẹn elẹta gi iran.

20. De ayayẹro ne ima mwẹ?

20 Gha mwẹ ayayẹro. “Ẹtin i fo ahoẹmwọmwa nọ zobọ idaehọ.” Ma mwẹ ayayẹro wẹẹ, emwa ima ni sẹ e Jehova rae, gha werriegbe bu ẹre gha dee. (1 Kọr. 13:7) Ma gha bẹghe afiwerriẹ vbe egbe emwa ima ni sẹ e Jehova rae, ọ khẹke ne ima mu ẹmwẹ iran ye erhunmwu ne ẹtin nọ rre Ebe Nọhuanrẹn rhie ẹrhiọn ye iran iwu, ne iran mieke na sẹtin khuẹnniẹn ye itie ọghe Jehova: “Werriegbe bu mwẹ gha dee.”—Aiz. 44:22.

21. De emwi nọ khẹke ne u ru deghẹ ukpowẹ ọghe Jesu ne u lele si ighaegbe ye ẹgbẹe ruẹ?

21 Jesu khare wẹẹ, ahoẹmwọmwa ne ima mwẹ ne irẹn ẹre ọ khẹke nọ wegbe sẹ ne ima mwẹ daa emwa ọvbehe. Jesu wa gha mwẹ ọnrẹn vbe ilẹkẹtin wẹẹ, erhuanegbe ẹre gha sẹtin da ẹkoata ọghe iran yi uhiẹn vbe ẹgbẹe iran ghaa zẹ iran kpokpo. Deghẹ odẹ ọghe ẹmwata ne u rhiegbe yi si ighaegbe ye ẹgbẹe ruẹ, ya egbe kọ e Jehova ne u mieke na sẹtin musọe. Gha sọyẹnmwẹ rhunmwuda ne u na ya ẹko rhiẹnrhiẹn e Jesu kevbe Jehova. Iran gha fiangbuẹ ye amuẹtinyan ne u rhiema!

^ okhuẹn 10 U gha miẹn ayahọmwaehọ eso nọ dekaan vbene a ya koko emọ hẹ vbe ẹgbẹe nọ ghae egbe ye ugamwẹ ughughan vbe The Watchtower, August 15, 2002 vbe ototọ ne uhunmwuta “Inọta Ne Emwa Nọ.”