Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

Akugbe Nọ Rhiegbe Ma Vbe Ugie Ayere Ọghe Uwu E Kristi

Akugbe Nọ Rhiegbe Ma Vbe Ugie Ayere Ọghe Uwu E Kristi

“U miẹn vbene ọ maan hẹ, u miẹn vbe ọ vbe rhiẹnrhiẹn hẹ ne emwa . . . gha gu egbe yin vbe ọfunmwegbe!”—PSM 133:1.

IHUAN: 18, 14

1, 2. De ugie nọ khian ku emwa kugbe sẹ vbe ukpo 2018? Vbọzẹe? (Ghee efoto nọ rre omuhẹn.)

VBE March 31, 2018, eguọmwadia Osanobua vbe uhunmwu otagbọn hia, gha si egbe koko do Ugie Ayere Ọghe Uwu E Kristi vbe ehe ughughan vbe owẹn a defua nẹ. Ugie Ayere na, ne emwa Osanobua do ukpo ukpo, keghi re ugie nọ ku emwa kugbe vbe odẹ ọghe ọyunnuan. Ugie ọvbehe i rrọọ ne a ya gie ẹre!

2 U miẹn vbene ẹko khian gha rhiẹnrhiẹn e Jehova kevbe Jesu hẹ, zẹ vbene etẹn vbe iko ughughan vbe uhunmwu otagbọn hia khian ya gha do Ugie Ayere na rhinrin ya sẹ ufomwẹ ọghe ẹdẹ ne ẹdẹrriọ. E Baibol tae yotọ wẹẹ, “agbọn ẹvbo ne ọmwa rhọkpa i sẹtin ka” ni ke otọ ẹvbo, uniẹn kevbe urhuẹvbo ughughan rre gha ya urhu nọ la kha wẹẹ: “Obọ Osanobua mwa ne ọ tota vbe ẹkete kevbe Oteghe Ohuan nii, ọre imiẹnfan mwa ke rre.” (Arhie 7:9, 10) Vbe Ugie Ayere Ọghe Uwu E Kristi ne a do ukpo ukpo, odẹ ọghe ọyunnuan ẹre eguọmwadia Osanobua ya rhie urhomwẹ gie Jehova kevbe Jesu Kristi.

3. De inọta eso ne a gha zẹ ewanniẹn yi vbe ako iruẹmwi na?

 3 Vbe ako iruẹmwi na, ma gha miẹn ewanniẹn ọghe avbe inọta na: (1) De vbene dọmwadẹ ima gha ya mu egbe khẹ Ugie Ayere Ọghe Uwu E Kristi ne ima mieke na miẹn ere vbọ? (2) De vbene Ugie na ya ya emwa Osanobua mwẹ akugbe hẹ? (3) De emwi ne ima tobọ ima gha ru, ne akugbe na mieke na wegbe sayọ? (4) Ọ mwẹ ẹghẹ ne a khian ya do Ugie Ayere nokiekie Ọghe Uwu E Kristi ra? Deghẹ a gha miẹn ẹghẹ vberriọ, de ẹghẹ nọ khian gha khin?

ODẸ NỌ KHẸKE NE IMA YA MU EGBE KHẸ UGIE NA NE IMA MIEKE NA MIẸN ERE VBỌ

4. Vbọzẹe ne ọ na khẹke ne ima gha rre Ugie Ayere Ọghe Uwu E Kristi?

4 Muẹn roro vbene ọ ru ekpataki sẹ hẹ ne ima gha rre Ugie Ayere Ọghe Uwu e Kristi. Yerre wẹẹ, iko ne a yo keghi re odẹ ọkpa ne ima ya rhie ugamwẹ ne Jehova. Vbene ẹmwata, aro e Jehova kevbe ọghe Jesu wa sẹ otọ vbe egbe emwa ni hia vbe odẹ ke odẹ ne iran gha rre iko nọ ghi hiunsi sẹ vbe ukpo. Ma hoo ne iran bẹghe ẹre wẹẹ, deghẹ ima ma sẹtin gha rre Ugie na, ẹi ẹmwẹ ima. Ọ ghaa rhiema vbe uyinmwẹ ima wẹẹ iko ne a yo ru ekpataki vbe arrọọ ọghe ima, e Jehova ghi vbe miẹn emwi kpataki dayi nọ gha yae sẹ eni ima rae ye “ebe ayere,” ne a vbe tie ẹre “ebe arrọọ.” Ebe na, ẹre a gbẹnnẹ eni emwa ni khian gha rrọọ vbe etẹbitẹ yi.—Mal 3:16; Arhie 20:15NW.

5. Ẹdẹ Ugie Ayere Ọghe Uwu E Kristi ghaa bu otọ, de odẹ ne ima khian ya ‘gualọ otọ egbe ima, ne ima mieke na rẹn deghẹ ima gele rrọọ vbuwe iyayi’?

5 Ẹdẹ Ugie Ayere Ọghe Uwu E Kristi ghaa bu otọ, ma sẹtin zẹ ẹghẹ kọ ya gha na erhunmwu, ma vbe gha ru erria yan vbene ọ wegbe sẹ hẹ ighẹ asikẹgbe ne ima gu e Jehova mwẹ. (Tie 2 Kọrinti 13:5.) De odẹ ne ima khian ya ru ọna? Ma ghi ‘gualọ otọ egbe ima, ne ima mieke na rẹn deghẹ ima gele rrọọ vbuwe iyayi.’ Inọta vbenian gha ru iyobọ ne ima ya sẹtin gualọ otọ egbe ima ghee: ‘Mẹ gele yayi wẹẹ otu ne Jehova loo ya ru ahoo ọghẹe ẹre imẹ ye ra? I hia vbene ẹtin mwẹ sẹ vbe iwinna ikporhu iyẹn nọ maan ra? Uyinmwẹ imẹ rhiẹre ma wẹẹ okiekie ẹdẹ ẹre a ye ra? Ọ vbe rhiema vbe uyinmwẹ imẹ wẹẹ ufomwẹ agbọn Esu sikẹ otọ nẹ ra? Egbe amuẹtinyan ne I ghaa mwẹ dae Jehova kevbe Jesu vbe I ya egbe fiohan ẹre I ye mwẹ nia ra?’ (Mat 24:14; 2 Tim 3:1; Hib 3:14) Ma gha ra ru erria yan ewanniẹn ọghe avbe inọta na, ma gha rẹn deghẹ ima deziẹn vbuwe iyayi.

6. (a) De odẹ ọkpa ne ima gha ya sẹtin la arrọọ ọghe etẹbitẹ? (b) De vbene ọdiọn ọkpa vbe iko ya mu egbe khẹ Ugie Ayere Ọghe Kristi hẹ? De emwamwa ne uwẹ gha vbe sẹtin ru?

6 Odẹ ọvbehe ne ima gha ya mu egbe khẹ Ugie Ayere Ọghe Uwu E Kristi ọre ne ima gha tie ebe ne otu e Jehova he gbẹnnẹ ladian, ni guan kaẹn vbene Ugie na ru ekpataki sẹ hẹ. (Tie Jọn 3:16; 17:3.) Odẹ ọkpa ne ima gha ya sẹtin la arrọọ ọghe etẹbitẹ ọre ne ima “rẹn” e Jehova, ma ghi vbe mu ẹtin yan Jesu nọ re Ukpọmọkpa ọghẹe. Ugie na ghaa bu otọ, ma sẹtin hannọ ebe eso ne ima gha tie ni gha si ima kẹ Jehova kevbe Jesu sayọ. Vbe ọwara ukpo nibun gha dee, ọna ọre emwi ne ọtẹn nokpia ọkpa ru, vbe Ugie Ayere ghaa bu otọ. Agharhemiẹn wẹẹ ọkpẹre ne ọtẹn na ke ga zẹvbe ọdiọn vbe iko, ọ ye gualọ ebe Owa Ọkhẹ ni guan kaẹn Ugie Ayere Ọghe Uwu E Kristi kevbe ni guan kaẹn ahoẹmwọmwa ne Jehova kevbe Jesu Kristi rhiema, ọ dọlegbe tie dọmwadẹ uhunmwuta na, ọ vbe ru erria yan iran. Ugbẹnso, ọ vbe rhie uhunmwuta ọkpa ra eva bae nọ ka tie. Erriọ vbe ya tie ako ọghe Evbagbẹn Nọhuanrẹn ni guan kaẹn uwu e Kristi ni ladian ukpo ukpo. Odẹ vbenian, ọtẹn na keghi do bẹghe ẹre wẹẹ, ukpo ukpo ẹre irẹn ya mwẹ irẹnmwi sayọ vbekpae Ugie Ayere Ọghe Kristi. Sẹ ehia, ukpo ukpo ẹre ahoẹmwọmwa ne ọtẹn na mwẹ dae Jehova kevbe Jesu vbe ya wegbe sayọ. Ebe na tie vbenian gha vbe ya ima gha gbọyẹmwẹ ye ẹse ne  Jehova kevbe Jesu ru ne ima, ọ vbe ya ima hoẹmwẹ iran sayọ. Ọna gha ya ima miẹn afiangbe nọkhua vbe Ugie Ayere Ọghe Kristi.

UGIE NA KEGHI YA IMA MWẸ AKUGBE

7. (a) De emwi ne Jesu ru vbe asọn ne ọ mu Ugie Ayere ọghe uwu ẹre gbọọ? (b) Vbọ suigiẹ yọ wẹẹ e Jehova gele họn erhunmwu nii?

7 Vbe asọn ne Jesu mu Ugie Ayere ọghe uwu ẹre gbọọ, ne irẹn vbe erhuanegbe ẹre na rhie Evbare Ota Enọyaẹnmwa, ọ keghi na erhunmwu ne erhuanegbe ẹre gha mwẹ akugbe zẹ vbene irẹn vbe Erhae gba rrọọ vbuwe akugbe. (Tie Jọn 17:20, 21) E Jehova wa họn erhunmwu ọghe Ovbi ẹre rhunmwuda ẹbo emwa nibun yayi wẹẹ, e Jehova ẹre ọ gie Jesu gha die agbọn. Emwa ni rrie Ugie Ayere na ukpo ukpo, ẹre ọ suigiẹ yọ wẹẹ, Avbe Osẹe Jehova gele mwẹ akugbe. Emwa ni ke otọ ẹvbo ughughan rre ẹre ọ koko do Ugie Ayere na vbe uhunmwu otagbọn hia. Vbe ehe nibun, awua nọ deghẹ emwa ni kẹ otọ ẹvbo ughughan rre na si egbe koko rhunmwuda ugamwẹ. Sokpan akugbe vbenian ẹre ọ yẹẹ e Jehova kevbe Jesu Kristi.

8. De ẹmwẹ akhasẹ ne Osanobua tama Ẹzikiẹl?

8 Ma wa rẹn wẹẹ e Jehova ẹre ọ zẹe ighẹ ima mwẹ akugbe vbenian, ọna ẹre ọ si ẹre ne ẹi na kpa ima odin. E Jehova ẹre tobọre tae yotọ. Gi ima ziro yan ẹmwẹ akhasẹ ne Osanobua tama Ẹzikiẹl, nọ dekaan erhan ne a khian ku kugbe—“erhan Juda” kevbe “erhan Josẹf.” (Tie Ẹzikiẹl 37:15-17, NW.) “Inọta Ne Emwa Nọ” nọ ladian vbe Watchtower ọghe July 2016 keghi rhan otọ re vbenian: “E Jehova keghi tama Ẹzikiẹl wẹẹ ẹghẹ dee ne Agbẹnvbo Izrẹl khian ya dọlegbe gha mwẹ akugbe, iran ghi vbe werriegbe gha rrie Ẹvbo Ne A Ru Eyan Rẹn. Ẹmwẹ akhasẹ nii vbe dekaan akugbe ne eguọmwadia Osanobua khian gha mwẹ vbe ẹdẹ okiekie.

9. De vbene amusẹ ọghe ẹmwẹ akhasẹ nọ rre ebe Ẹzikiẹl ya rhiegbe ma hẹ vbe Ugie Ayere ne ima do ukpo ukpo?

9 Ukpo 1919 ẹre Jehova werriegbe suẹn gha ru emwamwa nọ ya ku etẹn ne a hannọ zẹ kugbe. Etẹn na, ẹre “erhan Juda” mudia yi. Zẹ vbene ẹghẹ ya khian, iran ni khian yin agbọn na vbe etẹbitẹ, ni mudia ye “erhan e Josẹf,” na gha deba etẹn ne a hannọ zẹ vbe odẹ ọghe ẹmwata, erriọ iran vbe ya gha muan sayọ. Ẹbu eva na keghi do khian “oghẹn ohuan ọkpa.” (Jọn 10:16; Zẹk 8:23) E Jehova yan rẹn wẹẹ irẹn gha ya erhan eva na khian ọkpa vbe obọ irẹn. (Ẹzik 37:19) Nia, te ẹbu eva na ghi ga kugbe vbe ototọ ọdakha ọghe Ọba mwa ighẹ Jesu Kristi, ne ẹmwẹ akhasẹ nọ rre ebe Ẹzikiẹl tie ẹre “Ọba ne ọ yevbe Devid ne ọguọmwadia” Osanobua. (Ẹzik 37:24, 25) Akugbe ne ẹmwẹ akhasẹ nọ rre ebe Ẹzikiẹl guan kaẹn keghi rhiegbe ma ukpo ukpo, vbe etẹn ne a hannọ zẹ kevbe ni khian yin agbọn na vbe etẹbitẹ gha si egbe koko vbe Ugie Ayere Ọghe Uwu E Kristi! De emwi ne dọmwadẹ ima gha ru ne akugbe na mieke na wegbe sayọ.

EMWI NE DỌMWADẸ IMA GHA RU NE AKUGBE NA MIEKE NA WEGBE SAYỌ

10. De emwi nọ khẹke ne ima ru, ne akugbe ne ima mwẹ mieke na gha wegbe sayọ?

10 Ne akugbe ne ima mwẹ mieke na gha wegbe sayọ, te ọ khẹke ne ima gha mu egbe rriotọ. Vbe Jesu rre agbọn, ọ keghi tama erhuanegbe ẹre ne iran gha mu egbe rriotọ. (Mat 23:12) Ma gha gele gha mwẹ ekhọe imuegberriotọ, ma i khian gha ya aro tila ọmwa rhọkpa rua vbene emwa ni rre uwu agbọn ru ẹre. Nọghayayerriọ, ma gha gbe uhunmwu kotọ ne etẹn ni su vbe otu e Jehova. Imuegberriotọ kevbe a họn ẹmwẹ keghi re akpa ni ya akugbe wegbe sayọ vbe iko. Sẹ ehia, te imuegberriotọ ya ẹko rhiẹnrhiẹn e Osanobua rhunmwuda te “Osanobua mu aro igbinna da enọ tọn egbe mu, sokpan ọ ghi gha rhie ẹseọhẹ ne nọ mu egbe rriotọ.”—1 Pit 5:5.

11. De vbene erria ne a ru yan eka kevbe ayọn ne a loo vbe Ugie Ayere ya ya akugbe ọghomwa wegbe sayọ hẹ?

11 Odẹ nogieva ne ima gha ya sẹtin ya akugbe  ọghomwa wegbe sayọ, ọre ne ima gha ru erria yan emwi ne eka kevbe ayọn ne a loo vbe Ugie Ayere demu. Asọn nii, ne a do Ugie Ayere, ẹre ọ wa khẹke ne ima gele muẹn roro emwi ne eka ne a ma gua kevbe ayọn nọ baa ne a loo vbe Ugie Ayere demu. A sẹtin vbe ru erria yan rẹn ọ te sẹ ẹdẹ ne ẹdẹrriọ. (1 Kọr 11:23-25) Eka nọ rrọọ keghi mudia ye egbe ikpakpa ọghe Jesu nọgbae kevbe nọhuanrẹn ne ọ ya zọese vbene ayọn nọ rrọọ na mudia ye esagiẹn nọ dakua. Sokpan, ne ima wa rẹn emwi ne ayọn vbe eka na demu kẹkan ma sẹ. Ọ khẹke ne ima gha yerre wẹẹ, izọese adẹwerriegbe ọghe Jesu keghi re odẹ eva kpataki ne Jehova kevbe Jesu ya rhie ahoẹmwọmwa ma. Jehova keghi gie Ovbi ẹre gha dee nọ do wu ye orukhọ ọghe ima. Jesu ma he, ọ na ya ekhọe hia gha dee do ya arrọọ ọghẹe zọese. Ma ghaa mu ọna roro, ọ ghi gua ima kpa ya gha gbọyẹmwẹ ye ẹse ne iran ru ne ima. Te ahoẹmwọmwa ne ima hia mwẹ dae Jehova vbe otu ọghẹe yevbe ọza nọ gba ima hia kugbe.

Ma ghaa yabọ egbe, te ima ya akugbe ọghomwa wegbe sayọ (Ghee okhuẹn 12, 13)

12. De emwi ne ima miẹn ruẹ vbe erre ne Jesu zẹ nọ rre ebe Matiu 18:23-34?

12 Odẹ nogieha ne ima gha ya sẹtin ya akugbe ọghomwa wegbe sayọ ọre ne ima gha yabọ egbe. Ma ghaa yabọ emwa ni ru emwi nọ sọnnọ ima, te ima rhiẹre ma wẹẹ ima gbọyẹmwẹ ye izọese adẹwerriegbe ọghe Jesu nọ kie ẹkpotọ ye ayabọ orhukhọ ọghe ima. Gia ziro yan erre ne Jesu zẹ nọ rre ebe Matiu 18:23-34. Nọ egbuẹ avbe ọta na: ‘Mẹ rhie emwi ne Jesu maa ima re ye uyinmwẹ ra? Mẹ mwẹ izinegbe vbe egbe etẹn ra? I loo azamemwi vbe I ghaa gu iran loo ra? Mẹ mu egbe ne I ya yabọ etẹn ni ru abakuru daa mwẹ ra?’ Vbene ẹmwata, orukhọ wegbe sẹ egbe, ọni ẹre ọ si ẹre ne ọna lọghọ na yabọ emwa eso ni ru orukhọ nọ wegbe daa ima. Sokpan, erre na ya ima rẹn emwi nọ khẹke ne ima ru. (Tie Matiu 18:35.) Jesu keghi gbẹrorua wẹẹ, e Jehova i khian yabọ ima deghẹ ima ma yabọ etẹn ima ni ru abakuru daa ima, deghẹ esa gele rrọọ ne ima yabọ. Ọ khẹke ne ima kọ ọna ye orhiọn! Ne akugbe ne ima mwẹ mieke na gha wegbe sayọ, te ọ khẹke ne ima gha yabọ egbe.

13. De vbene emwa ni gualọ ọfunmwegbe ya ya akugbe wegbe sayọ hẹ?

13 Ma ghaa yabọ emwa ọvbehe, ọni rhiema wẹẹ, emwa ni gualọ ọfunmwegbe ẹre ima khin. Ukọ e Pọl keghi rhie ibude ne ima, ne ima gha hia vbe odẹ ke odẹ, ne ima sẹtin “dae  yi ighẹ akugbe ne Orhiọn rhie ne ọmwa, vbekpae ọfumwegbe ne ọ dee [ima] hia kugbe.” (Ẹfis 4:3) Ugie Ayere Ọghe Kristi ghaa sikẹ otọ, katekate vbe asọn ọghe Ugie Ayere nii, ẹre ọ na khẹke ne ima muẹn roro, obọ ne ima ya mu emwa ọvbehe. Nọ egbuẹ ọta vbenian: ‘A rẹn imẹ zẹvbe ọmwa ne ẹi rhie emwi ye ekhọe ra? A rẹn imẹ zẹvbe ọmwa nọ loo ẹrhiọn ya gu etẹn ru adọlọ ne ọfunmwegbe kevbe akugbe mieke na gha rrọọ uwu ẹbu etẹn ra?’ Ọ khẹke ne ima ru erria yan inọta vbenian vbe Ugie Ayere ghaa bu otọ.

14. De vbene ima ya rhiẹre ma wẹẹ ima “mu abakuru ọghe etẹn ima wuegbe vbe odẹ ọghe ahoẹmwọmwa”?

14 Odẹ nogienẹ ne ima gha ya sẹtin ya akugbe ọghomwa wegbe sayọ ọre ne ima gha ya egbe ta e Jehova nọ re Osa nọ mwẹ ahoẹmwọmwa. (1 Jọn 4:8) Ọ ma khẹke ne ima taa ẹmwẹ vbenian vbekpae etẹn ima: “Agharhemiẹn wẹẹ e Jehova wẹẹ ne ima hoẹmwẹ etẹn ima, ọ ma gbagbae ye ima egbe ne ima si iran kẹ egbe zẹvbe ọse ọghe obọ ma miẹn uhunmwu ẹi vbiẹ.” Iziro vbenian ma guaẹro ighẹ ibude ne Pọl rhie ne ima vbe ọ khare wẹẹ ne ima “gha mu abakuru ọghe etẹn ima wuegbe vbe odẹ ọghe ahoẹmwọmwa.” (Ẹfis 4:2, NW.) Yẹrẹro wẹẹ, ọ ma kha wẹẹ ne ima gha “mu wuegbe” kẹkan, sokpan ọ wẹẹ ne ima gha ru vberriọ vbe “odẹ ọghe ahoẹmwọmwa.” Alughaẹn rre ẹmwẹ eva na. Emwa ughughan ẹre Jehova miẹn yi vbe otu ọghẹe. (Jọn 6:44) E Jehova bẹghe emwi nọ maan vbe ekhọe etẹn na, ẹre ọ zẹe ne ọ na si iran kẹ egbe. Vbe ọ gha ghi zẹe ne ima i khian na hoẹmwẹ iran? Ọ khẹke ne ima hoẹmwẹ etẹn ima zẹ vbene Jehova vbe hoẹmwẹ iran.—1 Jọn 4:20, 21.

DE ẸGHẸ NE UGIE AYERE NOKIEKIE KHIAN GHA KHIN?

15. Vbe ima ya rẹn hẹ wẹẹ, ọ mwẹ ẹghẹ ne a khian ya do Ugie Ayere nokiekie?

15 Ẹghẹ dee ne ima khian ya do Ugie Ayere nokiekie. Vbe ima ya rẹn hẹ? Vbe ebe nokaro ne Pọl gbẹn gie etẹn ni rre Kọrinti, ọ keghi tama etẹn na hannọ zẹ wẹẹ te iran khian gha do Ugie Ayere Ọghe Uwu E Kristi ukpo ukpo, “rhinrin Nọyaẹnmwa te do rre.” (1 Kọr 11:26) Vbene a ya loo ifiẹmwẹ na “rhinrin Nọyaẹnmwa te do rre” vbe ako na, ma lughaẹn ne ẹmwẹ akhasẹ nọ guan kaẹn ẹghẹ “urremwẹ” ọghe Jesu vbe ẹdẹ okiekie. Jesu keghi kha wẹẹ: “Ama urremwẹ Ovbi Ọmwa gha rhiegbe ma vbe aro iso. Ẹghẹ nii, unu ne a zẹ hia ni rre otọ agbọn na, ghi gbe eve rua vbe iran a bẹghe vbe Ovbi Ọmwa a ya egbe ladian vbe odukhunmwu okuku ne ọ rre aro iso, ke irẹn kevbe ẹtin kevbe Uyi nọkhua. Irẹn ghi gie avbe odibosa re ladian gha rrie igie enenẹ agbọn. Iran ghi ya si ena hannọ zẹ ọghẹe koko ke okhiẹ agbọn ọkpa ya sẹ nọkpa.” (Mat 24:29-31) Ẹghẹ ne a khian ya si emwa “ne a hannọ zẹ koko,” ọre ẹghẹ ne etẹn ne a hannọ zẹ ni ye rre agbọn, khian ya kpa gha rrie ẹrinmwi. Ọna gha sunu vbe iyeke abọ nokaro ọghe orueghe nọkhua vbene okuo Amagẹdọn te suẹn. Vbe iyeke ọni, arhunmwu 144,000 hia ne a hannọ zẹ, ghi deba Jesu khọnmiotọ yan arriọba emwa nagbọn hia. (Arhie 17:12-14) Ọna rhiema wẹẹ, Ugie Ayere ne a khian do kiekie, Jesu ke “rre” do koko etẹn ne a hannọ zẹ, ni ye kẹ rre vbe agbọn na gha rhie ẹrinmwi, ọre Ugie Ayere nokiekie.

16. Vbọzẹe ne ọ na khẹke ne u hia vbe odẹ ke odẹ ne u gha rre Ugie Ayere ọghe ukpo na?

16 Wa gia hia ne ima gha rre Ugie Ayere Ọghe Uwu E Kristi vbe March 31, 2018. Ọ vbe khẹke ne ima rinmwian e Jehova nọ ru iyobọ ne ima, ne dọmwadẹ ima gha yin vbe odẹ nọ gha ya akugbe ọghomwa wegbe sayọ. (Tie Psalm 133:1.) Ma ghẹ mianmian wẹẹ, ẹghẹ dee ne ima khian ya do Ugie Ayere nokiekie. Nọnaghiyerriọ, gi ima gha hia vbe odẹ ke odẹ, ne ima gha rrie Ugie na ukpo ukpo, ma ghi vbe gha gbọyẹmwẹ ye akugbe nọ rhiegbe ma vbe Ugie Ayere Ọghe Uwu E Kristi.