Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

“Idaehọ Ne Iran Mwẹ Vbe Ehe Ne Osanobua Ye Ọre Imẹ Vbe Mwẹ”

“Idaehọ Ne Iran Mwẹ Vbe Ehe Ne Osanobua Ye Ọre Imẹ Vbe Mwẹ”

“Adam ne okiekie keghi re Orhiọn ne ọ rhie arrọọ ne ọmwa.”—1 KỌR. 15:45.

IHUAN: 151, 147

1-3. (a) De imamwaemwi nọ khẹke nọ gha re ọkpa vbe usun enọ ru ekpataki vbe ugamwẹ ima? (b) Vbọzẹe ne imamwaemwi ọghe arhiọkpaegbe na ru ekpataki? (Ghee efoto nọ rre omuhẹn.)

DE EWANNIẸN ne u gha zẹ deghẹ ọmwa na nọ ruẹ wẹẹ, ‘Vbọre usun imamwaemwi ne kpataki vbe ugamwẹ ọghe uwa?’ Ẹi mwẹ u ma kha wẹẹ, u yayi wẹẹ e Jehova ọre Ayi ọghe Arrọọ, e Jesu ẹre ọ ya arrọọ ọghẹe de ima werriegbe kevbe wẹẹ, emwa ọghe Osanobua gha yin e paradais vbe etẹbitẹ vbe ne ẹi khian ghi kpẹ gbe. Sokpan, u gha ya unu kaẹn arhiọkpaegbe zẹvbe ọkpa vbe usun imamwaemwi ne kpataki ọghe ugamwẹ ruẹ ra?

2 Ọ khẹke ne arhiọkpaegbe gha re ọkpa vbe usun imamwaemwi nọ ru ekpataki vbe ugamwẹ ima, ọ gha khọn rẹn deghẹ ima yaro yọ, wẹẹ ima gha miuhunmwu vbe orueghe nọkhua ra ma i khian wu a te miẹn wẹẹ ima la agbọn ọgbọn. Ukọ e Pọl keghi gi ima rẹn evbọzẹe ne arhiọkpaegbe na re ẹyotọ ne ima bọ iyayi ọghe ima yan. Ọ keghi kha wẹẹ: “Adeghẹ a i huẹn iran ni wulo kpaegbe, a ma vbe huẹn Kristi kpaegbe khekherriọ.” Akpawẹ e Kristi ma rhiọ kpaegbe, ẹi ghẹ gha kha zẹvbe Ọba nia, kevbe wẹẹ, ikporhu ne ima kpe vbekpa re gha te gha re ihoi. (Tie 1 Kọrinti 15:12-19.) Vbọrhirhighayehẹ, ma rẹnrẹn wẹẹ e Jesu rhiọ kpaegbe. Iyayi na ẹre ọ ya ima lughaẹn ne avbe Sadusi ni ma zẹdẹ yayi wẹẹ emwa ni wulo gha sẹtin rhiọ kpaegbe. Ọ gha khọn rẹn deghẹ emwa ya ima gbe ogiẹ,  te ima khian ye gha mwẹ iyayi nọ wegbe wẹẹ, emwa ni wulo gha rhiọ kpaegbe.—Mak 12:18; Iwinna 4:2, 3; 17:32; 23:6-8.

3 E Pọl keghi kha wẹẹ, usun emwi ne a ka ruẹ zẹvbe Ivbiotu e Kristi ọre wẹẹ, a gha “huẹn eniwu kpaegbe.” (Hib. 6:1, 2) Ọ keghi nianiaẹn wẹẹ irẹn mwẹ amuẹtinyan ighẹ emwa ni wulo gha rhiọ kpaegbe. (Iwinna 24:10, 15, 24, 25) Sokpan imamwaemwi ọghe arhiọkpaegbe keghi re usun emwi ne a ka ruẹ vbe “ikporhu ẹmwẹ Osanobua,” zẹvbe Ivbiotu e Kristi. Te ọna ghi rhiẹre ma wẹẹ ọ ma ru ekpataki ra? Hiehie! (Hib. 5:12) Vbọzẹe ne ọ na ru ekpataki?

4. De inọta eso ne emwa gha sẹtin nọ vbekpae arhiọkpaegbe?

4 Emwa gha da suẹn gha tie e Baibol, iran nibun keghi tie okha ọghe arhiọkpaegbe ni sunu vbe ẹghẹ nọ gberra, vbe na ghee okha ọghe Lazarọs. Zẹ vbene iran ya mwẹ irẹnmwi sayọ, iran ghi vbe do rẹn wẹẹ Ebraham, e Job, kevbe Daniẹl ghaa mwẹ ilẹkẹtin wẹẹ, a gha huẹn emwa ni wulo kpaegbe vbe odaro. Sokpan de ewanniẹn ne u khian zẹ, deghẹ ọmwa na nọ ruẹ ọta vbenian: Vbọzẹe ne u na mwẹ ilẹkẹtin wẹẹ, eyan ọghe arhiọkpaegbe ne a ru vbe ukpo iyisẹn nibun nọ gberra gha mwẹ amusẹ? E Baibol sunu ye odẹ ẹghẹ ne arhiọkpaegbe khian ya sunu ra? Ewanniẹn ọghe avbe inọta na gha ya amuẹntinyan ọghe ima wegbe sayọ. Nia, gi ima ziro yan ewanniẹn ne Baibol zẹ.

ARHIỌKPAEGBE NỌ MWẸ AMUSẸ VBE ORRE NIBUN GHI GBERRA NẸ

5. De arhiọkpaegbe ne ima khian ka ziro yan?

5 Ọmwa gha wu, a na wẹẹ a gha huọn rẹn kpaegbe vbobọvbobọ nii, u sẹtin yaeyi. (Jọn 11:11; Iwinna 20:9, 10) Sokpan, a na wẹẹ a gha huẹn ọmwa nọ wu nii kpaegbe vbe ukpo iyisẹn nibun gha ghi gberra nẹ ghi vbo? Uwẹ gha yayi ra? Uwẹ gha yayi wẹẹ emwi vberriọ gha gele sunu, deghẹ te ọmwa nii da wu ra ọ kpẹre ne ọ wu? Vbene ẹmwata, ọ mwẹ arhiọkpaegbe ọkpa ne uwẹ yayi wẹẹ ọ gele sunu, agharhemiẹn wẹẹ, ukpo iyisẹn nibun gberra nẹ, ọ ke do mwẹ amusẹ. De arhiọkpaegbe nọ khin? De vbene ọ ya kaẹn ayayẹro ne u mwẹ wẹẹ emwa ni wulo gha rhiọ kpaegbe vbe odaro?

6. De vbene amusẹ ọghe ẹmwẹ akhasẹ nọ rre Psalm 118 ya kaẹn Jesu hẹ?

6 Nia, gia ziro yan arhiọkpaegbe ne a taa yotọ, nọ ghi do mwẹ amusẹ vbe orre nibun ghi gberra nẹ. Ẹmwẹ akhasẹ na rre ebe Psalm 118. Ughaghe Devid ẹre ọ gbẹn ọnrẹn. Ako nii keghi kha wẹẹ: “Miẹn ima fan Nọyaẹnmwa miẹn ima fan! . . . Te Osanobua gha fiangbe ọmwa ne ọ dee vbe eni e Nọyaẹnmwa!” Ẹmwẹ nọ rre ako na, ẹre ebu emwa ya gbe ọbokhian ne Jesu, vbe ọ hin ekẹtẹkẹtẹ lae Jerusalẹm vbe ẹdẹ uwu ẹre ghi sikẹ otọ nẹ vbe Nisan 9. (Psm. 118:25, 26; Mat. 21:7-9) Sokpan de vbene Psalm 118 ya guan kaẹn arhiọkpaegbe nọ ghi do mwẹ amusẹ vbe orre nibun ghi gberra nẹ? Ghee ẹmwẹ akhasẹ ọvbehe nọ rre ako na. Ọ wẹẹ: “Okuta ne iran ni bọ owa he ighẹ ẹi maan, keghi werriegbe do khian amamiẹn a i ru ne ọ rrọọ.”—Psm. 118:22.

“Iran ni bọ owa” keghi he Mẹzaia (Ghee okhuẹn 7)

7. De obọ ne Ivbi e Ju ya mu e Jesu?

7 “Iran ni bọ owa” ni he Mẹzaia keghi re avbe ọkaolotu ọghe Ivbi e Ju. Ẹi re te iran he ẹre yotọ kẹkan, iran ma vbe yayi wẹẹ irẹn ọre Kristi. Yevbesọni, iran na si uma ne iran gbẹe rua. (Luk 23:18-23) Obọ iran ẹre Jesu ye la.

A keghi huẹn e Jesu kpaegbe nọ do gha re “okuta amamiẹn a i ru” (Ghee okhuẹn 8, 9)

8. De vbene Jesu ya do gha re “okuta amamiẹn a i ru”?

8 De vbene Jesu ne a he kevbe ne a gbua ya do gha re “okuta amamiẹn a i ru” hẹ? Ọna keghi sunu vbe a huẹn ọnrẹn kpaegbe vbe idin. Jesu tobọre rhilo ẹmwẹ na ginna erre ọkpa nọ zẹe. Vbe erre nii, okpia nọ yan ugbo kegha gie eviẹn ọnrẹn gie emwa ni gbaro ghee ugbo ẹre. Sokpan, obọ dan ẹre emwa ni gbaro ghee ugbo nii, ya gha mu eviẹn enọ yan ugbo, zẹ vbene Ivbi Izrẹl ya gha ya obọ dan mu avbe akhasẹ ne Osanobua ghaa gie gi iran. Vbe okiekie, nọ yan  ugbo keghi gie ovbi ẹre gha khian. Iran mu ọghọ yọ re egbe ra? Hiehie! Iran ni gbaro ghee ugbo keghi gbe ovbi enọ yan ugbo rua. E Jesu ghi zẹe erre na nẹ, ọ na taa ẹmwẹ nọ rre ebe Psalm 118:22. (Luk 20:9-17) E Pita vbe ya unu kaẹn ako ọghe e Baibol na, vbe ọ gu “olotu avbe Ju, avbe ediọn, kevbe iran ni ma emwa Uhi” guan. E Pita keghi gi iran rẹn wẹẹ, “Jesu ne ovbi Nazarẹt” ne uwa gbua, ẹre “Osanobua huẹn kpaegbe vbe idin.” Vbe iyeke ọni, e Pita keghi kha wẹẹ: “Okuta ne iran ni bọ owa he ighẹ ẹi maan, dọlegbe do khian ne ọ ghi maan sẹ ehia.”—Iwinna 3:15; 4:5-11; 1 Pit. 2:5-7.

9. De emwi ọyunnuan ne ebe Psalm 118:22 guan kaẹn?

9 Ẹmwẹ akhasẹ nọ rre ebe Psalm 118:22 rhiẹre ma wẹẹ, a gha huẹn ọmwa kpaegbe vbe idin vbe orre nibun gha ghi gberra nẹ. A gha he Mẹzaia, a ghi vbe gbẹe rua sokpan, a gha huẹn ọnrẹn kpaegbe nọ do gha re okuta amamiẹn a i ru. A ghi huẹn Jesu kpaegbe nẹ, e Baibol keghi kha wẹẹ, “Eni ọvbehe i rrọọ, vbe agbọn na, ne Osanobua rhie ne emwa wẹẹ a gha lae miẹn imiẹnfan.”—Iwinna 4:12; Ẹfis. 1:20.

10. (a) De ẹmwẹ akhasẹ nọ rre ebe Psalm 16:10? (b) Vbọ ya ima rẹn wẹẹ, ẹmwẹ akhasẹ nọ rre Psalm 16:10 ma mwẹ amusẹ vbe egbe Devid?

10 Gia vbe ziro yan ako ọvbehe vbe e Baibol nọ vbe guan kaẹn arhiọkpaegbe nọ sunu. Ọ gberra ukpo arriaisẹn ọkpa, arhiọkpaegbe na ke do mwẹ amusẹ. Ọna sẹ nọ gha ya ilẹkẹtin ọghe ima wegbe sayọ wẹẹ, arhiọkpaegbe sẹtin sunu agharhemiẹn wẹẹ ọ kpẹre ne a tae yotọ. Vbe ebe Psalm 16, e Devid keghi kha wẹẹ: “Wẹ degue mwẹ hin ẹtin uwu rre nẹ. Ọmwa ne uwẹ hoẹmwẹ ọnrẹn nẹ, wẹ i ra sọrae ye otọ.” (Psm. 16:10) Emwi ne Devid tae vbe ako na ma rhiema wẹẹ, irẹn i khian wu hiehie, ra a i khian ree irẹn ye idin. E Baibol gi ima rẹn wẹẹ, e Devid ghi khian ọmaẹn nẹ, ọ na wu. Vbe iyeke ọni, “a na ree ẹre ye Jerusalẹm.” (1 Ọba 2:1, 10) De ọmwa ne ako na ghi guan kaẹn?

11. De ẹghẹ ne Pita ya rhan otọ ẹmwẹ akhasẹ nọ rre Psalm 16:⁠10?

11 E Baibol yevbe gi ima rẹn. Ọ ghi gberra ukpo arriaisẹn ọkpa nẹ vbe Devid gbẹn emwi nọ rre Psalm 16:10, e Pita keghi rhan otọre ma Ivbi e Ju kevbe emwa ne ẹi re Ivbi e Ju. Ọna kegha re uzọla eso vbe Jesu ghi rhiọ kpaegbe nẹ. (Tie Iwinna 2:29-32.) E Pita keghi tama iran wẹẹ, e Devid wu nẹ ọ kpẹre, a vbe ree ẹre nẹ. Iran ne Pita ghaa gu guan ma zẹdẹ muan emwi ne Pita tae, uhiẹn vbe ọ khare wẹẹ, “Devid rẹnrẹn emwi ne Osanobua khian ru, ọ keghi guan kaẹn ẹmwẹ arhiọkpaegbe ọghe Mẹzaia.”

12. De vbene ebe Psalm 16:10 ya mwẹ amusẹ hẹ? De ilẹkẹtin nọ rhie ne ima vbe nọ dekaan eyan ọghe arhiọkpaegbe?

12 E Pita keghi ya ẹmwẹ ne Devid tae vbe ebe Psalm 110:1 ya suigiẹ ye ẹmwẹ nọ taa dee. (Tie Iwinna 2:33-36.) Odẹ ne Pita ya loo Evbagbẹn Nọhuanrẹn ya rhan otọ Psalm 16:10 keghi ya emwa ni gbẹbu yayi wẹẹ, e Jesu ọre “Nọyaẹnmwa kevbe Mẹzaia.” Yevbesọni, iran keghi do rẹn wẹẹ, ẹghẹ ne Jesu ya rhiọ kpaegbe ẹre ẹmwẹ akhasẹ nọ rre Psalm 16:10 ya mwẹ amusẹ. Ẹghẹ eso ghi gberra nẹ, obẹlẹ na ẹre Pọl vbe la, vbe ọ gu Ivbi e Ju guan vbe ẹvbo ne a tie ẹre Antiọk vbe Pisidia. Odẹ ne Pọl ya rhan otọ ako na, keghi yẹẹ iran sẹrriọ wẹẹ, iran na wẹẹ nọ dọlegbe gha dee. (Tie Iwinna 13:32-37, 42.) Ọ na sẹ nọ gha ya ima gha mwẹ ilẹkẹtin wẹẹ, ẹi mwẹ vbe nọ gha kpẹ sẹ hẹ, emwa ni wulo gha rhiọ kpaegbe zẹ vbene Jesu vbe ya rhiọ kpaegbe.

DE ẸGHẸ NE ARHIỌKPAEGBE KHIAN YA SUNU?

13. De inọta ne emwa eso sẹtin nọ vbekpae arhiọkpaegbe?

13 Ọ keghi re emwi nọ rhie igiọdu ne ọmwa wẹẹ, arhiọkpaegbe sẹtin sunu agharhemiẹn wẹẹ ọ kpẹre ne a tae yotọ. Ọna sẹtin ya emwa eso gha roro ẹre wẹẹ: ‘Te ọni  ghi rhiema wẹẹ ọ gha kpẹ I ke miẹn emwa mwẹ ni wulo ra? De ẹghẹ ne arhiọkpaegbe khian gha khin?’ Jesu keghi tama avbe ukọ re wẹẹ, ọ mwẹ emwi eso ne iran i khian sẹtin rẹn otọ re. Ọ keghi kha wẹẹ: “Ẹghẹ ne ọ khian gha khin, kevbe emwi ne ọ gha sunu, Erha mwẹ mwamwaẹn nẹ, ọ ma kan uwa hiehie ne uwa rẹn ẹghẹ ne ọ khian gha khin.” (Iwinna 1:6, 7; Jọn 16:12) Vbọrhirhighayehẹ, ma rẹn odẹ ẹghẹ ne arhiọkpaegbe khian gha khin.

14. De vbene arhiọkpaegbe ọghe Jesu ya lughaẹn ne ọghe emwa ne a huẹn kpaegbe vbene ọ te sẹ ẹghẹ Jesu?

14 Ne ima mieke na rẹn otọ re sayọ, ma gha guan kaẹn arhiọkpaegbe eso ne avbe akhasẹ taa yotọ. Vbuwe ehia ne iran taa yotọ, ọghe Jesu ẹre ọ ghi ru ekpataki sẹ. Akpawẹ e Jesu ma rhiọ kpaegbe, ma rhọkpa i ghẹ gha mwẹ ayayẹro wẹẹ ima gha werriegbe miẹn emwa ima ni wulo. Emwa ne Ẹlaija kevbe Ẹlaisia huẹn kpaegbe vbene ọ te sẹ ẹghẹ Jesu, ye dọlegbe wulo, iran na vbe kẹkẹ. Ne ọghe Jesu ya lughaẹn ọre wẹẹ, “a huẹn Jesu kpa vbe idin rre nẹ, ẹi ghi wu ọvbehe, uwu i ghi mwẹ ẹtin vbe uhunmwu ẹnrẹn ọvbehe.” Ẹrinmwi ẹre Jesu ghi ye nia, ẹi ghi dọlegbe wu amaiwẹ te ọ khian kẹkẹ.—Rom 6:9; Arhie. 1:5, 18; Kọl. 1:18; 1 Pit. 3:18.

15. Vbọzẹe ne Jesu na re ọmwa “okaro” ne a huẹn kpaegbe gha rrie ẹrinmwi?

15 E Jesu ọre ọmwa okaro ne a huẹn kpaegbe gha rrie ẹrinmwi kevbe wẹẹ, arhiọkpaegbe ọghẹe ẹre ọ vbe hiunsi sẹ ọghe emwa hia ni rrie ẹrinmwi. (Iwinna 26:23) Jesu keghi tama avbe ukọ re wẹẹ, iran gha deba irẹn kha zẹvbe ọba vbe ẹrinmmwi. (Luk 22:28-30) Sokpan, te iran khian ka wu, a ke huẹn iran kpaegbe gha rrie ẹrinmwi zẹvbe emwa orhiọn. E Pọl keghi kha wẹẹ “a huẹn Kristi kpa vbe idin nẹ, ne aro miẹn ehe na dae wẹẹ, avbe emwa ni wulo, a gha huẹn iran kpaegbe.” Ọ na vbe rhie tẹ wẹẹ, a gha vbe huẹn emwa ọvbehe kpaegbe gha rrie ẹrinmwi: “Sokpan, dọmwadẹ ọghẹe vbe ehe ne ọ na sẹ ọre egbe, Kristi, ne ọ re ne okaro vbe uwu ehia, vbe iyeke ọnii, iran ni re ọghe Kristi vbe ẹghẹ ne ọ gha ya rre.”—1 Kọr. 15:20, 23.

16. Vbọ ya ima rẹn odẹ ẹghẹ ne a khian ya huẹn emwa kpaegbe gha rrie ẹrinmwi?

16 Ẹmwẹ ne Pọl tae ẹre ọ ya ima rẹn odẹ ẹghẹ ne a khian ya huẹn emwa kpaegbe gha rrie ẹrinmwi. Ọni ọre ẹghẹ “urremwẹ” ọghe Kristi. Ọ kpẹre ne Avbe Osẹe Jehova ke ye Baibol maa emwa re wẹẹ, ukpo 1914 ọre omuhẹn ọghe “urremwẹ” e Kristi kevbe ama nọ rhiẹre ma wẹẹ, ufomwẹ ọghe agbọn Esu na sotọ nẹ.

17, 18. De emwi nọ khian sunu daa etẹn eso ne a hannọ zẹ vbe ẹghẹ urremwẹ e Kristi?

17 E Baibol yevbe rhan otọre sayọ vbene arhiọkpaegbe ọghe emwa ni rrie ẹrinmwi khian gha ye hẹ. Ọ keghi kha wẹẹ: “Ma hoo ne uwa rẹn ẹmwata ne ọ rre ẹmwẹ emwa ni wulo nẹ . . . Ma yayi wẹ Jesu wu, ọ keghi vbe dọlegbe rhiọ kpaegbe, rhunmwuda ọnii, ma yayi wẹẹ emwa ni ya Jesu yi, vbene iran te wulo, Osanobua gha vbe dọlegbe viọ iran  lele Jesu gha dee . . . Ma ni gha ye gha rre agbọn vbe ẹdẹ ne Nọyaẹnmwa gha rre, ma i khian ke odaro ne iran ni ka wulo nẹ. A gha họn urhu ne ọ gha datu, urhu ne ọ gha ta emwi ne a gha ru . . . Iran ni ya Kristi yi vbe ẹghẹ ne iran na wulo, a ghi ka huẹn iran kpaegbe nẹ. Vbe iyeke ọnii, ma ni khian gha rre agbọn vbe ẹghẹ nii, a ghi si ima hia koko ba iran vbe ideghedeghe iso, ne a ya vba Nọyaẹnmwa vbe aro iso. Ẹghẹ nii, ma ghi gha gu Nọyaẹnmwa rrọọ ẹdẹdẹmwẹdẹ.”—1 Tẹs. 4:13-17.

18 1914 ọre omuhẹn ọghe “urremwẹ” e Kristi. Asẹ nii, ẹre arhiọkpaegbe ọghe emwa ni rrie ẹrinmwi ya suẹn. Etẹn ne a hannọ zẹ ni khian ye gha rre agbọn vbe ẹghẹ orueghe nọkhua ẹre a khian “si koko vbe ideghedeghe iso.” (Mat. 24:31) Iran ne a khian “si koko vbe ideghedeghe iso” i ra wulo. Ọni rhiema wẹẹ, “udemwurri” ẹre a khian ya fi iran werriẹ. “Ẹgiẹgiẹ, vbe ifuẹn aro ọkpa, ẹghẹ ne okpe ne okiekie gha na tu.”—1 Kọr. 15:51, 52.

19. De arhiọkpaegbe nọ maan ne ima yaro yi?

19 Vbe ẹdẹnẹrẹ, Ivbiotu e Kristi nibun i khian deba e Kristi kha vbe ẹrinmwi rhunmwuda a ma hannọ iran zẹ. Sokpan, iran diakhẹ “Ẹdẹ Nọyaẹnmwa” nọ re ẹghẹ ne Osanobua khian ya fuẹn agbọn Esu rua. Ọmwa rhọkpa ma rẹn ẹdẹ ne Osanobua khian guọghọ agbọn Esu, sokpan osẹ rhiẹre ma wẹẹ ẹghẹ nii sotọ nẹ. (1 Tẹs. 5:1-3) Vbe iyeke ọni, arhiọkpaegbe nọ lughaẹn ne ne ima guan kaẹn sin ghi suẹn, ọni ọre arhiọkpaegbe ọghe emwa ni khian yin e paradais vbe otagbọn na. Emwa ne a gha huẹn kpaegbe ghi do khian emwa ni gbae, iran vbe gha rrọọ vbe etẹbitẹ. Arhiọkpaegbe na ẹre ọ maan sẹ ọghe “ivbi ikhuo ni wulo” na huẹn kpaegbe vbe ẹghẹ nẹdẹ sokpan iran na werriegbe wulo.—Hib. 11:35.

20. Vbọzẹe ne ima na mwẹ ilẹkẹtin wẹẹ Osanobua gha huẹn emwa ni wulo kpaegbe ọkade ọkade?

20 Vbe nọ dekaan arhiọkpaegbe ọghe emwa ni rrie ẹrinmwi, e Baibol keghi kha wẹẹ a gha huẹn “dọmwade ọghọe vbe ehe ne ọ na sẹ ọre egbe.” (1 Kọr. 15:23) Erriọ Osanobua khian vbe ya mwamwa arhiọkpaegbe ọghe emwa ni khian yin agbọn ọgbọn ọkade ọkade. Emwi ọyunnuan khian wa gha nọ. Inọta eso vbenian sẹtin gha rre ima ekhọe: Emwa ni wulo vbe ẹghẹ ne ima ye na, ẹre a khian huẹn kpaegbe vbe omuhẹn ọghe Ukpo Arriaisẹn Ọkpa ne Kristi khian ya kha ra? Ọ ghaa yerriọ, emwa ni rẹn iran ẹre ọ khian gbe ọbokhian ne iran. Ra eguọmwadia e Jehova nẹdẹ ni ghaa re ọkaolotu ọghe emwa rẹn, ẹre a khian ka huẹn kpaegbe ne Osanobua mieke na loo iran ya ru emwamwa nọ khẹke ọghe vbe na khian ya gha su emwa rẹn hẹ vbe uhunmwu otagbọn na ra? Emwa ni ma zẹdẹ ga Jehova ghi vbo? De ẹghẹ na khian ya huẹn iran kpaegbe? De ehe ne iran khian dia vbe a gha huẹn iran kpaegbe? Ma sẹtin gele gha mwẹ inọta nibun vbenian vbe ekhọe, sokpan, esa i rrọọ ne ima gha kpokpo egbe ye emwi vbenian. Te ọ khẹke ne ima gha mwẹ izinegbe kevbe ilẹkẹtin wẹẹ, ọ gha sẹ ẹghẹ, e Jehova gha mwamwa emwi hia zẹvbe nọ kere.

21. De ayayẹro ne u mwẹ vbekpae arhiọkpaegbe?

21 Vbene ọ te sẹ ẹghẹ nii, ọ khẹke ne ima gi amuẹtinyan ne ima mwẹ daa Jehova wegbe sayọ. Irẹn keghi loo e Jesu ya rhie ilẹkẹtin ne ima wẹẹ, emwa ni wulo ni rre ayere ọghe Osanobua gha rhiọ kpaegbe. (Jọn 5:28, 29; 11:23) Yevbesọni, emwi ọvbehe ne Jesu tae suigiẹ yọ wẹẹ, e Jehova gele mwẹ ẹtin ne a ya huẹn emwa ni wulo kpaegbe. Ọ keghi kha wẹẹ, Ebraham, Aizik, kevbe Jekọb, “emwa ni rre agbọn ẹre ehia khin vbe obọ re.” (Luk 20:37, 38) Nọnaghiyerriọ, ena hia ne ima ziro yan sin, sẹ nọ gha ya ima gha mwẹ ilẹkẹtin nọ wegbe vbe na ghee Pọl, nọ khare wẹẹ: “Idaehọ ne iran mwẹ vbe ehe ne Osanobua ye ọre imẹ vbe mwẹ wẹẹ emwa hia . . . gha . . . kpaegbe vbe orinmwi.”—Iwinna 24:15.