Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 AKO IRUẸMWI 5

Iko Ne Ima Yo Ẹre Ọ Rhiẹre Ma Aro Ọmwa Ne Ima Khin

Iko Ne Ima Yo Ẹre Ọ Rhiẹre Ma Aro Ọmwa Ne Ima Khin

‘Wa gha ya uwu Enọyaẹnmwa wewe rhinrhin ọ ke ya rre.’—1 KỌR 11:26.

IHUAN 18 Gbọyẹmwẹ Ye Adẹwerriegbe

OLIKA ẸMWẸ ỌGHE AKO IRUẸMWI NA *

1-2. (a) De emwi ne Jehova rhie aro tua vbe ẹbo emwa nibun gha si egbe koko gha do Ugie Ayere Ọghe Uwu E Kristi? (Ghee efoto nọ rre odaro ebe na.) (b) Vbe ima khian ziro yan vbe ako iruẹmwi na?

YA EKHỌE ruẹ zẹ omwa rẹn emwi ne Jehova rhie aro tua, vbe ẹbo emwa nibun gha si egbe koko gha do Ugie Ayere Ọghe Uwu E Kristi. Ẹi re ẹbo emwa ni gbẹbu irẹn rhie aro tua; aro ọre keghi sotọ vbe egbe edọmwadẹ emwa ni rre ugie nii. Vbe igiemwi, ọ rẹn emwa ni rrie Ugie Ayere na ukpokpo. Ọ rẹnrẹn wẹẹ, eso vbuwe iran na werriẹ aro daa ukpokpo nọ wegbe. Ọ rẹn emwa eso ne ẹi rrie iko vbe ẹghẹ hia sokpan, ẹi mwẹ iran ma rrie Ugie Ayere Ọghe Kristi. E Jehova vbe rẹn emwa ni rrie Ugie Ayere vbe ẹghẹ okaro, rhunmwuda iran hoo ne iran rẹn vbene ima ya do Ugie Ayere hẹ.

2 Vbene ẹmwata, ẹko rhiẹnrhiẹn e Jehova vbe ọ ghaa bẹghe emwa nibun ni rrie Ugie Ayere Ọghe Uwu E Kristi. (Luk 22:19) Vbọrhirhighayehẹ, emwi ne Jehova rhie aro tua i re inu emwa ni rrie Ugie Ayere sokpan evbọzẹe ne iran na rrie ugie na, ẹre ọ ru ekpataki vbe odaro e Jehova. Vbe ako iruẹmwi na, ma gha ziro yan inọta ọkpa ne kpataki, ọni ọre: Vbọzẹe ne ima na yo Ugie Ayere Ọghe Uwu E Kristi kevbe iko na do uzọla uzọla ne Jehova mwamwaẹn ne emwa ni hoẹmwẹ ọnrẹn?

(Ghee okhuẹn 1-2) *

IMUEGBERRIOTỌ ẸRE Ọ YA IMA YO IKO

3-4. (a) Vbọzẹe ne ima na yo iko? (b) De emwi ne iko ne ima yo rhiema vbekpae aro ọmwa ne ima khin? (c) Zẹ vbene ebe 1 Kọrinti 11:23-26 khare, vbọzẹe ne ọ na khẹke ne ima gha rrie Ugie Ayere ukpokpo?

3 Evbọ mobọ zẹ ne ima na yo iko ọre wẹẹ, ọ keghi re odẹ ọkpa kpataki ne ima ya rhie ugamwẹ ne Jehova. Emwi ọvbehe nọ vbe ya ima yo iko, ọre wẹẹ, evba ni ẹre Jehova na maa ima emwi. Emwa ni tọn egbe mu keghi roro ẹre wẹẹ, emwi rhọkpa  i rrọọ ne iran khian ruẹ vbe obọ ọmwa ọvbehe. (3 Jọn 9) Sokpan, ma i ye vberriọ, ekhọe hia ẹre ima ya miẹn ọnrẹn yi ighẹ imamwaemwi nọ ke obọ e Jehova rre kevbe otu ọghẹe.—Aiz 30:20; Jọn 6:45.

Iko ne ima yo keghi rhiẹre ma wẹẹ ima mu egbe rriotọ kevbe wẹẹ, ma hoo ne ima rẹn sayọ. Vbọ ya ima yo Ugie Ayere Ọghe Uwu E Kristi? Ẹi re rhunmwuda emwi ne ẹi mwẹ a ma ru nọ sokpan, ọ keghi re rhunmwuda ne ima na ya imuegberriotọ lele iyi ọghe Jesu nọ khare wẹẹ: “Wa gha ru ọna ya ye mwẹ rre.” (Tie 1 Kọrinti 11:23-26.) Ugie na keghi ya ima mwẹ ayayẹro ne ẹi beghe, ọ vbe ye ima re rre wẹẹ e Jehova hoẹmwẹ ima. Vbọrhirhighayehẹ, e Jehova rẹnrẹn wẹẹ, igiọdu ne ima miẹn uhukpa vbe ukpo vbe Ugie Ayere, ma sẹ nọ gha ya ima deziẹn vbe odẹ ọghe orhiọn. Rhunmwuda ọni, ọ keghi ru emwamwa iko na do uzọla uzọla. Imuegberriotọ ẹre ọ ya ima yo avbe iko na. Ughaẹdẹ nibun ẹre ima ya mu egbe khẹ avbe iko na do uzọla uzọla.

5. De vbene emwa ni mu egbe rriotọ ya miẹn itie ọghe Jehova yi hẹ?

5 Ukpo ukpo ẹre Jehova ya gie na tie emwa gha die Ugie Ayere ọghe Ovbiẹre. Emwa imuegberriotọ ẹre ọ miẹn itie na yi. (Aiz 50:4) Ugie Ayere ẹre nibun ka rre, vbe iyeke ọni, iran ghi suẹn iko nikẹre na yo. (Zẹk 8:20-23) Ma kevbe emwa ọgbọn na keghi sọyẹnmwẹ imamwaemwi ne ima miẹn vbe obọ e Jehova nọ re “ọmiọmwafan” kevbe ọyobọ ọghomwa. (Psm 40:17) E Jehova kevbe Jesu ẹre ọ gie na tie ima, ne ima do ruẹ emwi. Ọghe ne ẹmwata, emwi ọvbehe i rrọọ nọ gha sẹ ima ọyẹnmwẹ sẹ imamwaemwi ne ima miẹn vbe obọ iran!—Mat 17:5; 18:20; 28:20.

6. Vbọ ya okpia ọkpa rrie Ugie Ayere Ọghe Uwu E Kristi?

6 Ukpo ukpo, ma keghi hia vbe odẹ ke odẹ, ne ima gie na tie emwa gha die Ugie Ayere Ọghe Uwu E Kristi. Emwa imuegberriotọ nibun ni miẹn itie na yi wa miẹn afiangbe vbọ. Vbe igiemwi, ukpo eso nọ gberra, ọtẹn nokpia ọkpa na rhie ebe itie ọghe Ugie Ayere ne okpia ọkpa. Sokpan okpia nii na wẹẹ irẹn i khian sẹtin rrie Ugie Ayere nii. Vbọrhirhighayehẹ, okpia na ye rrie Ugie Ayere nii. Ọna keghi kpa ọtẹn nokpia na odin. Odẹ ne etẹn ya gbọbokhian ne okpia na keghi yẹẹ ọre sẹrriọ wẹẹ, ọ na suẹn iko na yo. Igbaha kẹkan ẹre okpia na gbe ẹdẹ iko re, vbe ukpo nọ ghi lele Ugie Ayere nii. Vbọzẹe nọ na suẹn gha yo iko hia? Rhunmwuda ne okpia na, na re ọmwa ọmẹhẹ nọ, ẹre ọ zẹe nọ na sẹtin fi werriẹ. Ọtẹn nọ rhie ebe itie ne okpia na keghi kha wẹẹ: “Ọmwa nọ gele mu egbe rriotọ ẹre okpia na khin.” E Jehova ẹre ọ si okpia na gha die ugamwẹ ẹmwata. Vbe na guan na, okpia na dinmwiamẹ nẹ.—2 Sam 22:28; Jọn 6:44.

7. De vbene emwi ne ima ruẹ vbe iko kevbe ako ọghe Baibol ne ima tie vbe Ugie Ayere ghaa bu otọ ya ru iyobọ ne ima hẹ?

7 Emwi ne ima ruẹ vbe iko kevbe emwi ne ima tie vbe Baibol gha sẹtin ya ima khian emwa ni mu egbe rriotọ. Ọ ghaa bu ẹdẹ Ugie Ayere Ọghe Uwu E Kristi, igiemwi nọ maan ne Jesu rhie yotọ nọ dekaẹn imuegberriotọ nọ rhiema kevbe arrọọ ọghẹe nọ ya dẹ ima werriegbe ẹre ima mobọ guan kaẹn vbe iko. Ugie Ayere na ghaa sikẹ otọ, ọ khẹke ne ima tie ako ọghe Baibol ni guan kaẹn emwi ni sunu vbe asẹ ne Jesu ya wu kevbe ẹghẹ nọ ya rhiọ kpaegbe. Emwi ne ima ruẹ vbe iko vbe Ugie Ayere ghaa bu otọ kevbe ako ọghe Baibol ne ima tie vbe asẹ nii keghi ya ima gbọyẹmwẹ ye izọese adẹwerriegbe sayọ. Ọ gua ima kpa ya ya egbe tae Jesu, ọ vbe ya ima ru ahoo ọghe Jehova uhiẹn vbe ima ghaa rre uwu ibavbaro.—Luk 22:41, 42.

 UDINMWẸ ẸRE Ọ YA IMA YO IKO

8. De odẹ ne Jesu ya rhie udinmwẹ ma?

8 Ma vbe ya egbe tae Jesu vbe odẹ nọ ya rhie udinmwẹ ma. Muẹn roro udinmwẹ ne Jesu rhiema vbọ ghi bu ẹghẹ nọ ya wu. Ọ wa rẹn wẹẹ avbe eghian gha ru irẹn emwi oya, iran gha gbe irẹn, iran gha vbe buohiẹn uwu gbe irẹn. (Mat 20:17-19) Ọrheyerriọ, ohan uwu ma muẹn. Ọ ghi bu ẹghẹ nọ ghi wegbe sẹ vbe arrọọ ọghẹe, ọ keghi tama erhuanegbe ẹre ni mwẹ ẹkoata vbe ogba ọghe Getsemani wẹẹ: “Wa kpaegbe ne uwa gia gha khian, ghe, ọmwa nọ ra rhie mwẹ ma, sẹ emwa na fo.” (Mat 26:36, 46) Ẹbu omurhia ghi dee do mu e Jesu khui, Jesu keghi khian ya vba iran, ọ na wẹẹ irẹn ọre Jesu, ọ na vbe tama iran, ne iran gi avbe ukọ ọghe irẹn gha rrie owa. (Jọn 18:3-8) Umiẹn udinmwẹ ne Jesu rhiema vbe asọn nii! Vbe ẹdẹnẹrẹ, etẹn na hannọ zẹ kevbe oghẹn ni khian yin agbọn na vbe etẹbitẹ keghi hia ne iran gha ya egbe taa udinmwẹ ọghe Jesu. De odẹ nọ khin?

Udinmwẹ ne u ya yo iko ọghe Ivbiotu e Kristi keghi rhie igiọdu ne etẹn vbe iko (Ghee okhuẹn 9) *

9. (a) Vbọzẹe nọ na khẹke ne ima gha mwẹ udinmwẹ ne ima mieke na sẹtin gha yo iko vbe ẹghẹ hia? (b) De vbene igiemwi esi ọghe ima ya ru iyobọ ne etẹn ima ni rre eghan?

9 Ugbẹnso, emwi ghi wa wegbe mu ima. Ọ ghaa yerriọ, udinmwẹ ẹre ọ gua ima kpa ya yo iko. Etẹn ima eso i gbe ẹdẹ iko re vbe iran ghaa rre uwu akhiẹ, vbe iran ghaa khuọnmwi ra ẹtin gha fu iran. Etẹn ima eso i vbe gbe ẹdẹ iko re agharhemiẹn wẹẹ iran werriẹ aro daa ukpokpo nọ wegbe vbe obọ etẹn vbuwe ẹgbẹe ra vbe obọ arriọba. Igiemwi ọghe ima wa rhie igiọdu ne etẹn na mu khui rhunmwuda imudiase ọghe iran. (Hib 13:3) Iran gha họn wẹẹ ima ye deziẹn vbe odẹ ọghe orhiọn, ọ gha khọnrẹn wẹẹ ima la edanmwẹ gberra, ọ ghi ya amuẹtinyan kevbe udinmwẹ ne iran mwẹ wegbe sayọ. Emwi vbenian sunu daa ukọ Pọl. Vbe ọ rre eghan vbe Rom, te ẹko wa gha rhiẹnrhiẹn ọnrẹn, ẹghẹ ke ẹghẹ nọ ya họn wẹẹ, etẹn ye ga Osanobua vbuwe amuẹtinyan. (Fil 1:3-5, 12-14) Odẹ ẹghẹ na ya fan e Pọl vbe eghan, ọ keghi gbẹn ebe gie etẹn ne Ivbi e Hibru. Vbe ebe nii, ọ keghi rhie igiọdu ne iran, ne iran ye “gha hoẹmwẹ egbe” kevbe ne iran ghẹ gha gbe ẹdẹ iko re.—Hib 10:24, 25; 13:1.

10-11. (a) De emwa nọ khẹke ne ima gie na tie gha die Ugie Ayere Ọghe Uwu E Kristi? (b) Zẹ vbene ebe Ẹfisọs 1:7 khare, vbọzẹe nọ na khẹke ne ima gha tie iran?

10 Udinmwẹ ẹre ima rhiema vbe ima gha gie na tie etẹn ima vbuwe ẹgbẹe, emwa ne ima gba winna kevbe emwa ni rre ẹdogbo ne ima ye. Vbọzẹe ne ima na gie na tie iran? Emwi ne Jehova kevbe Jesu ru ne ima ẹre ọ gua ima kpa ya gie na tie emwa gha die Ugie Ayere Ọghe Uwu E Kristi. Ma hoo ne iran vbe do ruẹ emwi, ne iran mieke na miẹn afiangbe vbe ẹse ọhẹ ọghe izọese adẹwerriegbe nọ ma te khẹke ima.—Tie Ẹfis 1:7; Arhie 22:17.

11 Ma ghaa yo iko vbe ẹghẹ hia, ọ mwẹ akpa ọvbehe nọ hiunsi ne ima rhiema. Osanobua kevbe Jesu wa rhie akpa na ma vbe odẹ ọghe ọyunnuan.

 AHOẸMWỌMWA KEGHI GUA IMA KPA YA YO IKO

12. (a) De vbene iko ọghomwa ya ya ahoẹmwọmwa ne ima mwẹ dae Jehova kevbe Jesu wegbe sayọ hẹ? (b) De igiọdu ne ebe 2 Kọrinti 5:14, 15 rhie ne ima?

12 Ahoẹmwọmwa ne ima mwẹ dae Jehova kevbe Jesu ẹre ọ gua ima kpa ya yo iko. Emwi ne ima ruẹ vbe iko ẹre ọ ye ahoẹmwọmwa ne ima mwẹ dae Jehova kevbe Jesu wegbe sayọ. Ẹghẹ hia, ẹre ima ya ruẹ vbekpae emwi ne iran he ru ne ima vbe iko. (Rom 5:8) Ugie Ayere Ọghe Uwu E Kristi keghi wa ye ima re rre, vbene ahoẹmwọmwa ne Jehova kevbe Jesu mẹ daa ima kevbe emwa ne ẹi gbọyẹmwẹ ye adẹwerriegbe wegbe sẹ hẹ. Ọyẹnmwẹ nọ sẹ ima ẹre ọ ya ima hia vbe odẹ ke odẹ, ne ima gha ya egbe tae Jesu vbe ẹdẹgbegbe. (Tie 2 Kọrinti 5:14, 15.) Ekhọe ima vbe gua ima kpa ya rhie urhomwẹ ne Jehova rhunmwuda adẹwerriegbe nọ kpemehe ẹre. Ewanniẹn ne ima zẹ vbe iko keghi re odẹ ọkpa ne ima ya rhie urhomwẹ gie Jehova.

13. De odẹ ne ima ya rhiẹre ma wẹẹ ima gele hoẹmwẹ Jehova kevbe Jesu? Rhan otọ re.

13 Ma keghi rhiẹre ma wẹẹ ima gele hoẹmwẹ e Jehova kevbe Jesu deghẹ ima mu egbe ne ima ya sẹ emwi hia rae rhunmwuda ugamwẹ ọghe Jehova. Ma keghi sẹ emwi eso rae ne ima mieke na sẹtin yo iko. Vbe ehe nibun, ẹghẹ ota ẹre etẹn ya do iko, ẹghẹ na, egbe wọọ enibun nẹ. Ufomwẹ uzọla ne emwa ya hẹwẹ ẹre ima ya do iko nọkẹre. Ne ima na ziga yo iko vbe egbe gha wọọ ima nẹ, e Jehova bẹghe ẹre ra? Ọ wa bẹghe ẹre! Vbene ẹmwata, e Jehova wa gbọyẹmwẹ ye ẹrhiọn ne ima loo ne ima ghẹ mieke na gbe ẹdẹ iko re.—Mak 12:41-44.

14. De igiemwi ne Jesu rhie yotọ ne ima, vbe nọ dekaẹn ahoẹmwọmwa nẹi re ọghe ọkẹnrẹn?

14 Ukpowẹ ọghe Jesu ẹre ima lele vbe nọ dekaẹn ahoẹmwọmwa nẹi re ọghe ọkẹnrẹn na rhiema. Vbe Jesu a ya rhie ọna ma hẹ? Ekhọe hia ẹre ọ ya wu ne erhuanegbe ẹre, erriọ wa vbe gha mu ẹmwẹ iran ye okaro. Vbe igiemwi, vbe asọn nokiekie ne Jesu gbe vbe agbọn, egbe keghi wọọ re, orhiọn rẹn ma vbe sotọ, ọrheyerriọ, ẹghẹ nọ taẹn ẹre ọ ya rhie igiọdu ne erhuanegbe ẹre. (Luk 22:39-46) Iyobọ ne Jesu gha sẹtin ru ne emwa ọvbehe ẹre ọ rhie aro tua, ẹi re iyobọ ne emwa ọvbehe gha ru nẹẹn. (Mat 20:28) Ma gha gele gha mwẹ ahoẹmwọmwa nọ wegbe dae Jehova kevbe etẹn ima, te ima khian gha hia vbene ẹtin ima sẹ, ne ima gha yo  Ugie Ayere Ọghe Uwu E Kristi kevbe iko nikẹre na do uzọla uzọla.

15. Vbe nọ dekaẹn iyobọ na ru ne emwa vbe odẹ ọghe orhiọn, de emwa ne ima mobọ rhie aro tua?

15 Ẹgbẹe ọkpa ọghe Ivbiotu e Kristi ẹre ima khin vbe uhunmwu otagbọn hia, ọna ẹre ọ zẹe ne ima na ya oghọghọ loo ẹghẹ nọ somwa ya gie na tie emwa ọvbehe, ne iran do deba ima. Vbọrhirhighayehẹ, “iran ne ima gba re ọkpa vbe ẹgbẹe iyayi,” ni ghi worua vbe odẹ ọghe orhiọn, ẹre ima mobọ rhie aro tua. (Gal 6:10) Odẹ ọkpa ne ima ya rhiẹre ma wẹẹ ima hoẹmwẹ iran, ọre ne ima na rhie igiọdu ne iran, ne iran gha rrie iko, katekate Ugie Ayere Ọghe Uwu E Kristi. Zẹvbe na ghee Jehova kevbe Jesu, ọmwa nọ worua vbe odẹ ọghe orhiọn gha werriegbe bu e Jehova gha dee, ọ keghi sẹ ima ọyẹnmwẹ.—Mat 18:14.

16. (a) De vbene ima khian ya gha rhie igiọdu ne egbe hẹ? De iyobọ ne iko ọghomwa ye ne ima? (b) Vbọzẹe ne ẹghẹ na, na re ẹghẹ nọ khẹke ne ima ya gha yerre ẹmwẹ ne Jesu tae vbe ebe Jọn 3:16?

16 Ugie Ayere ọghe Kristi sotọ nẹ. Friday April 19 ẹre ọ de fi vbe ukpo na. Nọnaghiyerriọ, wa hia ne uwa gie na tie emwa gha die ugie na. (Ghee ne ẹkpẹti “ Gie Na Tie Iran”) Ke ẹghẹ na ya fi ukpo nọ dee, gi ima hia gha rhie igiọdu ne egbe lekpae iko na yo vbe ẹghẹ hia. Zẹ vbene ufomwẹ ọghe agbọn Esu na ya sikẹ otọ, iko na yo ẹre ọ khian ru iyobọ ne ima ya gha re emwa ni mu egbe rriotọ, ni mwẹ udinmwẹ kevbe ni mwẹ ahoẹmwọmwa. (1 Tẹs 5:8-11) Gi ima gha ya ekhọe ima hia gbọyẹmwẹ ye ahoẹmwọmwa nọ wegbe ne Jehova kevbe Jesu mwẹ daa ima!​—⁠Tie Jọn 3:16.

IHUAN 126 Khẹ Ye Egbe Ne U Vbe Mudia Ẹse

^ okhuẹn 5 Ugie Ayere Ọghe Uwu E Kristi, na khian do vbe ota vbe ẹdẹ Friday vbe April 19, 2019, ẹre ọ khian gha re iko nọ ghi hiunsi sẹ vbe ukpo 2019. Vbọzẹe ne ima na yo Ugie Ayere ọghe Jesu? Rhunmwuda, ma hoo ne ima gha ya ẹko rhiẹnrhiẹn e Jehova. Vbe ako iruẹmwi na, ma gha ziro yan vbene Ugie Ayere Ọghe Uwu E Kristi kevbe iko ne ima yo uzọla uzọla ya rhiẹre ma, aro ọmwa ne ima khin.

^ okhuẹn 50 EFOTO NỌ RRE ODARO EBE NA: Ma gie na tie emwa hia vbe uhunmwu otagbọn gha die Ugie Ayere Ọghe Uwe E Krist

^ okhuẹn 52 EMWI NE AVBE EFOTO NA DEMU: Ọtẹn nokpia na, nọ rre eghan ghi miẹn ebe ne ẹgbẹe ọre gbẹn gie ẹre, orhiọn keghi la re iwu. Ọyẹnmwẹ sọe rhunmwuda ẹgbẹe ọre ma mianmiaẹn kevbe wẹẹ, iran ye deziẹn vbe odẹ ọghe orhiọn agharhemiẹn wẹẹ, avbe otu azẹ ni rre ẹdogbo ne iran ye gu egbe khọn.