Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

 OKHA ỌGHE ẸDAGBỌN ỌMWA

E Jehova Ma He Yangbe Mwẹ Ẹdẹ!

E Jehova Ma He Yangbe Mwẹ Ẹdẹ!

I ghaa rre usun ibiẹka ikhuo enẹ ni mu obobo gie Adolf Hitler vbe ọ ya ọta guan nẹ vbe asẹ ọkpa. Vbọzẹe ne I na deba ibiẹka nii ne a hannọẹn? Rhunmwuda, te erha mwẹ wa rhiegbe ye iwinna arriọba e Nazi. Irẹn ẹre ọ ghaa ya imọto mu ọkaolotu ọkpa ọghe otu e Nazi ye ehe nọ rhirhi gha rrie. Iye mwẹ keghi rhiegba ye ugamwẹ Catholic. Te Iye mwẹ te wa gha hoo ne I ya ẹdẹ agbọn mwẹ hia rhiegbe ye ugamwẹ Catholic. Ọ ma te hoo ne I zẹdẹ rọnmwẹ ọdọ. Agharhemiẹn wẹẹ erriọ emwi ghaa ye vbe ẹgbẹe mwẹ, I ma deba otu e Nazi, I ma vbe rhiegbe ye ugamwẹ Catholic. Gu mwẹ rhan otọ re.

ẸVBO ne a tie ẹre Graz vbe Austria ẹre I na waan. Vbe I ghi rre ukpo Ihinrọn, I na ya suẹn owebe ne a na maa emọ ilele ọghe ugamwẹ e Catholic. Emwi ne I miẹn vbe owebe nii keghi kpa mwẹ odin. Te avbe ohẹn Catholic kevbe ikhuo ni rhiegbe ye iwinna ugamwẹ ọghe ẹghẹ hia (nun) wa gha ghẹẹ. Rhunmwuda ọni, odẹ ukpo ọkpa ẹre iye mwẹ kue ne I gbe vbe owebe nii.

Efoto ọghe ẹgbẹe mwẹ, vbe Erha mwẹ yọ ẹwu ọgbalegbe

I ghi kpa hin owebe nii rre, I na gha rrie bọdin skul. Ọ ghi rre asọn ọkpa, Erha mwẹ na do rhie mwẹ vbe owebe rhunmwuda ugbe nọ wẹwẹ ne iran ghaa filo vbe Graz. Okuo na sa kua. Ma keghi lẹ gha rrie Schladming. Te ima da wa la agbadi (bridge) ọkpa gberra vbe iran ye ugbe nọ wẹwẹ guọghọe rua. Ọ vbe mwẹ ẹghẹ ne emwa eso ni rre okọ ẹhoho nọ sikẹ otọ ya te ya osisi fi imẹ vbe iyẹ mwẹ nọkhua vbe owa ima. Okuo nii ghi fo nẹ, ọ keghi do vẹẹ ne emwa rẹn wẹẹ arriọba kevbe esọsi i mwẹ esa ne iran ye.

I NA DO RẸN OSANOBUA NE ẸI YAN GBE EGUỌMWADIA RE

Vbe ukpo 1950, Osẹe Jehova ọkpa na do gha gu iye mwẹ tie Baibol. Iran ghaa ruẹ emwi, I gha danmwehọ iran. I vbe gha lele Iye mwẹ ye iko ugbẹnso. Iye mwẹ ghi do rẹn wẹẹ Avbe Osẹe Jehova ẹre ọ rre odẹ ọghe ẹmwata, ọ keghi dinmwiamẹ vbe ukpo 1952.

Iko ne ima ghaa ye vbe ẹghẹ nii keghi vuọn ne ikhuo ni khian eniwanrẹn nẹ, rhunmwuda ọni, I na gha roro ẹre wẹẹ, otu ọghe ikhuo ni khian eniwanrẹn nẹ nọ. Sokpan vbe ima ghi mu otuẹ gha rrie iko ne igbama na bun, I na ghi do rẹn wẹẹ, ẹi re otu ọghe ikhuo ni khian eniwanrẹn nẹ. Ma ghi werriegbe si gha die Graz, I ma ghi gha gbe ẹdẹ iko re. Asẹ nii ẹre I ya gele do rẹn wẹẹ, Avbe Osẹe Jehova ẹre ọ rre odẹ ọghe ẹmwata. I na vbe do rẹn wẹẹ e Jehova ọre Osanobua ne ẹi yangbe eguọmwadia re. Ọ keghi ru iyobọ ne iran vbe odẹ ọghe ọyunnuan vbe iran ghaa rre uwu ọlọghọmwa ne iran i sẹtin tobọ iran sọfurre yi.—Psm 3:5, 6.

I na do gha mwẹ ahoo ne I ya gha kporhu ma  emwa ọvbehe. Egbe etẹn mwẹ ẹre I na suẹn. Vbe ẹghẹ ne a kha na, etẹn mwẹ nikhuo enẹ nọdiọn kpa hin owa rre nẹ. Etisa ẹre iran enẹ wa gha khin. I na ya gha rhie igiọdu ne iran vbe igue ughughan ne iran ghaa ye, ne iran gie Avbe Osẹe Jehova gha gu iran tie Baibol. Ọ ghi sẹ ẹghẹ, etẹn mwẹ hia na do gha re Osẹe Jehova.

Ọ ghi rre uzọla eva ni suẹn gha kporhu, I na kporhu ma okhuo ọkpa ne ọ rre odẹ ukpo 30. I na suẹn gha gu ẹre tie Baibol. Emwi ne ọ ruẹ keghi sẹ ọre ekhọe, ọ na dinmwiamẹ. Ọ ghi sẹ ẹghẹ, arowa re kevbe ivbi ẹre eva nikpia na vbe dinmwiamẹ. Amuẹtinyan mwẹ keghi do wegbe sayọ vbe ẹghẹ ne I ya gha gu okhuo nii tie Baibol rhunmwuda ọmwa rhọkpa ma gu mwẹ tie vberriọ. Te I wa mu egbe yotọ ẹse ne I mieke na sẹtin maa ọmwa ọvbehe emwi. Ọna keghi ya irẹnmwi mwẹ dinmwi sayọ. Uki April vbe ukpo 1954 ẹre I ya egbe fiohan ne Jehova, I na vbe dinmwiamẹ.

OSANOBUA MA YANGBE MWẸ VBE I WERRIẸ ARO DAA UKPOKPO

Vbe ukpo 1955, I na yo asikoko ọghe uhunmwu otagbọn hia ne a do vbe Germany, France kevbe England. Vbe I rre London, ẹre I na miẹn Albert Schroeder. Ọtẹn nokpia na kegha re ọkpa vbe usun etẹn ni maa etẹn emwi vbe owebe Gilead, okpa vbe usun Ẹbu Nọ Su ẹre vbe gha nọ. Ma ghi mu okhian sẹ ehe ne Aza Emwi Nẹdẹ ọghe Britain ye, Ọtẹn Nokpia Schroeder keghi ma ima ipapa eso ọghe Baibol nẹdẹ ne a ya obọ kẹkan gbẹnnẹ. Eni Osanobua ne a ya Hibru gbẹn kegha rre ako eso vbọ, ọ na vbe gi ima rẹn vbene avbe ebe nii ru ekpataki sẹ hẹ. Imamwaemwi na keghi ya ahoẹmwọmwa ne I mwẹ dae Jehova wegbe sayọ, I na vbe ya ekhọe yan rẹn wẹẹ, te I khian gha loo Ẹmwẹ Osanobua sayọ vbe ikporhu.

Ogieva mwẹ ne ima gba gha ru iwinna arọndẹ ne kpataki vbe Mistelbach vbe Austria, ẹre ọ rre obọ erha ọmwa

January 1 vbe ukpo 1956 ẹre I suẹn iwinna arọndẹ ọghe ẹghẹ hia. Uki enẹ ghi gberra nẹ, otu keghi gie mwẹ gha rrie Austria zẹvbe arọndẹ ne kpataki. Vbe ẹghẹ na, Osẹe Jehova rhọkpa ma zẹdẹ gha rre Mistelbach, nọ re ẹvbo ne a gie mwẹ gha rrie. Ọ mwẹ isievẹn ne I werriẹ aro daa vbe evba. Mẹ vbe ọtẹn nokhuo na gie gha rrie ẹvbo nii keghi wa lughaẹn ne egbe vbe emwi nibun. Ọmọ odẹ ukpo 19 ẹre I ghaa khin, okpẹvbo ẹre I na waan sokpan, ogieva mwẹ kegha rre ukpo 25, igue ẹre ọ na waan. Ii rherhe rhiọrre vbe owiẹ sokpan ogieva mwẹ wa rherhe rhiọrre. Vbe ẹghẹ ota, mẹ i rherhe vbiẹ sokpan aro i miẹn asọn ẹre ogieva mwẹ khin. Ilele ni rre Baibol keghi ru iyobọ ne ima, ẹre ọ zẹe ighẹ ma sẹtin gha loo kugbe vbuwe ọfunmwegbe, ma na vbe gha sọyẹnmwẹ iwinna ima.

Ọ mwẹ ọlọghọmwa ọvbehe nọ wegbe ne ima werriẹ aro daa, sokpan Osanobua ma yangbe ima. (2 Kọr 4:7-9) Vbe ima kporhu vbe igue ọkpa vbe ẹdẹ ọkpa, ivbi igue nii na wẹẹ ne ekita iran zẹ ima khu. Banban, ekita nikhua lẹga ima nẹ, iran na gha gbọọ ima. Ma na da egbe obọ yi, ẹre I na na erhunmwu gie Jehova wẹẹ, “Lahọ, gi ima wa wu vbene iran te vba ima!” Vbe iran khian ghi vba ima, iran na mudia suẹn gha fieghe ẹrhunrhun, vbe iyeke ọni, iran na bibi kpa. Ọ keghi vẹẹ ne ima rẹn wẹẹ, e Jehova ẹre ọ gbogba ga ima. Vbe iyeke ọni, ma na kporhu la ehe hia vbe igue nii, te emwa wa vbe danmwehọ ima. Ọna keghi wa ya ẹko gha rhiẹnrhiẹn ima. Ughaghe ne avbe ekita ma na rri ima ra ne orhiọn ma na gbe ye ima iwu, ẹre ọ zẹe ne iran na rhie ehọ ne ima taa yi. Eso vbuwe iran keghi do khian Osẹe Jehova.

Emwi nọ wegbe na te vbe sunu daa ima vbe ẹdẹ ọkpa. Okpia nọ yan owa ne ima ye na da ayọn gbe egbe. Ọ ghi sẹ owa, ọ na wẹẹ te irẹn khian gbele ima rua. Ọ wẹẹ te ima kpokpo emwa hia vbe ẹdogbo  nii. Ọvbokhan rẹn te hia nọ mu ọre orhiọn sotọ, sokpan ọ ma họn. Ughugha ne ima ye vbe egedege ẹre ima ke gha họn ena hia. Ma na ghi zẹgiẹ viọ aga kọ ẹkhu ima, ẹre ima na suẹn gha rhọ emwi. Ma ghi kie urho, ọ sikẹ ọkpẹn onurho ima nẹ, ọ da abẹ nọ taẹn yi. Awarọkpa nii ma ya viọ emwi ne ima mwẹ lẹ la iyeke owa fua. Ima ma ghi werriegbe la owa nii.

Ma na ya mu ughugha vbe hotẹl. Ọ sẹ ukpo ọkpa ne ima gbe vbe hotẹl nii. E hotẹl ne ima ghaa ye nii, wa ya iwinna ikporhu ọghe ima gha mwẹ alaghodaro. De odẹ nọ khin? Adesẹ ẹvbo ẹre hotẹl nii ghaa ye. E hotẹl nii ẹre emwa eso ne ima gu ruẹ e Baibol na hoo ne ima gha ruẹ emwi. Vbọ ma he kpẹ vba, ma na suẹn gha do iko ọghe book study kevbe ọghe iruẹmwi e Watchtower vbe ughugha ima vbe hotẹl nii. Ọ sẹ arhunmwu 15 ni ghaa deba ima.

Ma gbe gberra ukpo ọkpa vbe Mistelbach, otu ke gie mwẹ gha rrie ẹvbo ne a tie ẹre Feldbach nọ rre odẹ ahọ ọghe Graz. Imẹ vbe ọtẹn nokhuo ọvbehe ẹre otu gie gha rrie Feldbach sokpan iko rhọkpa ma vbe gha rre evba. Ughugha ne kherhe ma ghaa ye vbe egedege ne a ya erhan bọ. Ne ọ na gha re owa ne a ya erhan bọ, te ẹhoho wa gha kpe la owa rhunmwuda ọni, ma keghi ya ebe khiọ avava erhan ne ẹhoho ke kpe la owa. Uhae ẹre ima na vbe gha sa amẹ. Ẹrhiọn ne ima loo ro kevbe izinegbe ne ima mwẹ rẹn keghi biẹ ọmọ esi. Vbọ ghi rre uki eso ne ima sẹ evba, a keghi muẹn gbọọ ighẹ ẹbu na ma he kpasẹ yi nọ gha re iko. Vbene ẹghẹ ya khian, orhunmwu 30 vbuwe ẹgbẹe ọkpa ne ima gu tie Baibol, na do khian Osẹe Jehova!

Emwi ẹwaẹn vbenian keghi ya mwẹ gha gbọyẹmwẹ yọ sayọ ighẹ odẹ ne Jehova ya mudia ne emwa ni mu iwinna Arriọba ye okaro. Ma ghaa rre ọlọghọmwa ne ọmwa rhọkpa i sẹtin sọfurre yi, e Jehova i yangbe ima hiehie.—Psm 121:1-3.

OSANOBUA KEGHI MUDIA MẸ

Vbe ukpo 1958, a keghi do asikoko ọghe uhunmwu otagbọn vbe New York City, vbe Yankee Stadium kevbe Polo Grounds. I na gbẹn ebe gie abotu nọ rre Austria wẹẹ I gha hoo ne I yo, ẹre iran na nọ mwẹ deghẹ I gha hoo ne I yo Owebe ne ukpogie 32 ọghe Gilead. Vbọ gha ghi zẹ ne I khian na kue ne ukpamuyọmọ vberriọ la mwẹ ban? Awarọkpa nii ẹre I ya kue yọ.

Ọtẹn Nokpia ọkpa ne a tie ẹre Martin Poetzinger ẹre I ghaa tota ke vbe Owebe Gilead. Ọtẹn na, wa rhie oya ọghe ohanabe vbe agọ irrioya ọghe Nazi. Ọ ghi sẹ ẹghẹ, ọ na do gha re ọkpa vbe usun Ẹbu Nọ Su. Ma ghaa ruẹ emwi vbe klass ugbẹnso, ọtẹn nokpia Martin gha khian gu mwẹ gbe ọdẹn, ọ ghi fẹko nọ mwẹ wẹẹ, “Erika, vbe a ya ọni kha vbe urhuẹvbo e Germany?”

 Ọ ghi rre odẹ uki eva vbe ukhiọnmwẹ ne ima he gbe vbe owebe nii, ọtẹn nokpia Nathan Knorr na do tama ima, ehe na khian gie ima gha rrie vbe ima gha ladian nẹ. Paraguay ẹre a gie imẹ gha rrie. Rhunmwuda ne I na ye gha re ọvbokhan, erha mwẹ ẹre ọ kpasẹ yọ I ke gha rrie Paraguay. Uki e March 1959 ẹre I sẹ ẹvbo nii. Owa ni tota yi kegha re owa ne avbe arọndẹ ne a gie yo isi tota yi vbe ẹvbo ne a tie ẹre Asunción. Mẹ vbe ọtẹn nokhuo ọvbehe ẹre otu gie gha rrie ẹvbo nii.

Asẹ nii ẹre I ya miẹn ọtẹn nokpia nọ vbe gha re arọndẹ ne a gie yo isi ne a tie ẹre Walter Bright. Owebe ne ukpogie 30 ọghe Gilead ẹre ọ yo. Ọ ghi sẹ ẹghẹ, ma na ru orọnmwẹ. Ma eva ẹre ọ ghi gba gha werriẹ aro daa isievẹn nọ ghi rhirhi de rre. Ma gha werriẹ aro daa edanmwẹ nọ wegbe, eyan ọghe Jehova nọ rre ebe Aizaia 41:10 ẹre ima tie. Ọ keghi kha wẹẹ: “Wa ghẹ fian afianma, I gu uwa rrọọ. Mẹ ọrọre Osanobua uwa, wa ghẹ gie emwikemwi mu uwa ohan. I gha ya uwa wegbe.” Ako na wa gha ya ima mwẹ ilẹkẹtin wẹẹ, zẹ vbene ima ya hia ne ima gha mu iwinna Arriọba ye okaro vbe arrọọ ọghe ima, Osanobua i khian yangbe ima.

Ẹghẹ eso ghi vbe gberra nẹ, otu na gie ima gha rrie ọkpẹn ehe ne Brazil vbe otọ ẹvbo ọvbehe na gba miẹn uwu. Evba nii ẹre avbe olodigba ne a gha gie igbama eso, ne iran do gha filo ugbe ye owa ne ima ye, ẹi re te nene owa ka wegbe. Ẹghẹ nii, ẹre arowa mwẹ ya suẹn gha gu ọkaolotu ọghe avbe olakpa nọ rre ẹdogbo nii tie Baibol. Irẹn ẹre ọ ghi ru emwamwa ne a vbe olakpa gbaroghe owa ima vbe uzọla ọkpa, ọni ẹre ọ ghi zẹe ighẹ iran ni kpokpo ima, zẹ ima obọ vbe ẹkun. Asẹ nii ẹre ima ya kpa gha rrie ẹdogbo ọvbehe nọ maan sẹ ne ima ka ye. Ikinkin na keghi re ehe ne Brazil vbe Paraguay na gba miẹn uwu. Ako na wa gha maan rhunmwuda ma sẹtin gha do iko vbe Brazil kevbe Paraguay. Vbene otu te gie ima gha rrie ihe ọvbehe, iko eva ni ma kpọlọ gbe ẹre ọ ghi gha rre evba.

Vbe imẹ vbe arowa mwẹ ga zẹ vbe arọndẹ ne a gie yo isi vbe ẹvbo ne a tie ẹre Asunción vbe Paraguay

E JEHOVA NA YE GHA GBARO GHEE MWẸ

Ọbo ebo eso ka tama mwẹ wẹẹ Ii khian sẹtin hanmwa biẹ. Ọ ghi rre ukpo 1962, ọ keghi kpa imẹ vbe arowa mwẹ odin vbe I ghi suẹn gha hanmwa. Ma na ghi si gha rrie ọkpẹn ehe ne ẹgbẹe arowa mwẹ ye vbe Hollywood nọ rre Florida vbe America. Vbe ọwara ukpo nibun, mẹ vbe arowa mwẹ ma ghi sẹtin gha ru iwinna arọndẹ rhunmwuda emọ ne ima ghi gha gbaro ghee. Ọrheyerriọ, te ima ye gha mu iwinna Arriọba ye okaro vbe arrọọ ọghe ima.—Mat 6:33.

Vbe ima sẹ Florida vbe November 1962, ọ mwẹ emwi nọ kpa ima odin. Emwa ni rre ẹdogbo nii i hoo ne emwa nekhui kevbe nọfua gha ru emwi kugbe. Rhunmwuda ọni, etẹn ima nekhui kevbe nọfua ma vbe gha do iko kugbe, iran ma vbe gha kporhu vbe ako ọkpa. Sokpan obọ ọkpa ẹre Jehova ya mu agbẹnvbo hia, irẹn i vbe kue ne uyinmwẹ vberriọ gha rhiegbe ma vbe uwu ẹbu emwa rẹn. Vbọ ma he kpẹ vba, etẹn nekhui kevbe nọfua na gha ru emwi kugbe. Obọ e Jehova ghaa rre emwamwa nii rhunmwuda, iko nibun na do gha rre ikinkin nii.

Ukpo 2015 ẹre arowa mwẹ ghi wu. E kansa ẹre ọ gbẹe. Vbene ẹmwata, ọdọ nọ rẹn enegbe nọ. Vbuwe ukpo 55 ne ima ya rọnmwẹ egbe, te ọ wa gha rhiẹre ma wẹẹ irẹn hoẹmwẹ e Jehova, ọ wa vbe ru iyobọ ne etẹn nibun. I yaro ye ẹghẹ ne I khian ya werriegbe miẹn ọnrẹn vbe ọ gha ghi ya egbe ọgbọn rhiọkpaegbe.—Iwinna 24:15.

Ọ gberra ukpo 40 ne I ya rhiegbe ye iwinna ugamwẹ ọghe ẹghẹ hia. Vbuwe ẹghẹ na, e Jehova wa fiangbe mwẹ. Ẹmwẹ ne unu i sẹ mwẹ ya kpọnmwẹ ọnrẹn. Vbe igiemwi, mẹ vbe arowa mwẹ ghaa rre asikoko ughughan ne orhunmwu 136 ne ima gu tie Baibol na dinmwiamẹ. Sokpan, ọ mwẹ ẹghẹ eso ne ima ya gha rre uwu ọlọghọmwa. Ọrheyerriọ, te ima ye gha ya ẹkoata ga Osanobua. Ma na sikẹ ọre sayọ, ma na vbe gha mwẹ ọnrẹn vbe ilẹkẹtin wẹẹ, ọ gha ya emwi hia dinnodẹ vbọ gha sẹ ẹghẹ. Erriọ gele gha ye zẹẹ!—2 Tim 4:16, 17.

Ẹmwẹ arowa mwẹ wa ye da mwẹ, sokpan iwinna arọndẹ wa rhie igiọdu mẹ. Ọ keghi wa sẹ mwẹ ọyẹnmwẹ ne I na maa emwa emwi vbekpae Osanobua kevbe ayayẹro ọghe arhiọkpaegbe. Vbene ẹmwata, Ii sẹtin ya unu kaẹn odẹ hia ne Jehova ya mudia mẹ. E Jehova gele mu eyan rẹn sẹ. Ọ gbaro ghe mwẹ, ọ rhie ẹrhiọn yọ mwẹ iwu, ọ mudia mẹ, ọ ma yangbe mwẹ ẹdẹ.—Aiz 41:10.