Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

Sinmwi Oseghe Ne Ọdakha Ọghe Jehova!

Sinmwi Oseghe Ne Ọdakha Ọghe Jehova!

“Nọyaẹnmwa kevbe Osanobua mwa! Wẹ sẹe ne ọ gha miẹn uyi kevbe ọghọ, kevbe ẹtin. Rhunmwuda wẹ ọre ọ yi emwi hia. Zẹ vbene u hoo, ọre u ya rhie arrọọ ne iran kevbe ẹfe.”—ARHIE. 4:11.

IHUAN: 112, 133

1, 2. De emwi nọ khẹke ne ima kọ ye orhiọn? (Ghee efoto nọ rre omuhẹn.)

VBE ako iruẹmwi nọ lae, ma ruẹ ọre vbene Esu ya ba e Jehova ifiẹzọ hẹ. Ọ wẹẹ te Osanobua loo ọdakha ọghẹe ghee ihan kevbe wẹẹ, emwa nagbọn ghaa kha yan egbe iran, ẹre agbọn khian na maan iran. Ẹmwata gele na khin ra? Gia kha wẹẹ emwa nagbọn ni wẹẹ iran gha kha yan egbe iran, gele sẹtin do gha rrọọ vbe ẹtẹbitẹ. Uwẹ yayi wẹẹ agbọn gha te maan iran ra? Emwi gha te gele dunna ne uwẹ ra deghẹ u i rre ototọ ọdakha ọghe Osanobua?

2 Inọta ne dọmwadẹ ima gha rhie ewanniẹn yi na khin. Te ọ khẹke ne ima muẹn roro ẹsẹsẹmwẹse nọ mieke na gele vẹẹ ne ima rẹn wẹẹ, odẹ ne Osanobua ya khaevbisẹ ẹre ọ maan sẹ, ọ vbe khẹke ne ima ya ekhọe hia yẹrike. Gia ziro yan, emwi ne Baibol khare vbekpae ọdakha ọghe Osanobua nọ ya ima yayi wẹẹ, irẹn ẹre ọ gele khẹke nọ khaevbisẹ.

E JEHOVA ẸRE Ọ MWẸ ASẸ NE A YA KHAEVBISẸ

3. Vbọzẹe ne a na miẹn wẹẹ, e Jehova ọkpa ẹre ọ khẹke nọ khaevbisẹ?

3 E Jehova ẹre ọ khẹke nọ khaevbisẹ yan agbọn vbe ẹrinmwi rhunmwuda irẹn ọre Osa ne udazi kevbe Ayi. (1 Krọ. 29:11;  Iwinna 4:24) Vbe Arhie Maan 4:11, e Jọn keghi miẹn umian ọghe orhunmwu 144,000 ni khian gu e Jesu kha vbe ẹrinmwi. Iran keghi kha wẹẹ: “Nọyaẹnmwa kevbe Osanobua mwa, uwẹ sẹe ne ọ gha miẹn uyi kevbe ọghọ, kevbe ẹtin. Rhunmwuda uwẹ ọre ọ yi emwi hia. Zẹ vbene u hoo, ọre u ya rhie arrọọ ne iran kevbe ẹfe.” Ne Jehova na re ayi ọghe emwi hia, irẹn ẹre ọ mwẹ asẹ na ya kha yan emwa nagbọn kevbe emwa orhiọn.

4. Vbọzẹe na gha na kha wẹẹ, te ọmwa nọ sọtẹ daa e Jehova loo asẹ na ya zẹ ne egbe ọmwa ghee ihan?

4 E Setan ma yi emwi rhọkpa, nọnaghiyerriọ, ẹi mwẹ asẹ ne a ya kha yan agbọn vbe ẹrinmwi. Esu kevbe evbibiẹ ima nokaro keghi mema sọtẹ daa ọdakha ọghe Jehova. (Jer. 10:23) Iran kegha re evbayi ni mwẹ asẹ ne a ya zẹ ne egbe iran, sokpan iran gele gha mwẹ asẹ na ya hẹe ẹmwẹ ye Osanobua obọ ra? Emwa nagbọn keghi loo asẹ na ya zẹ ne egbe ọmwa ẹdẹgbegbe vbe odẹ ughughan sokpan iran i mwẹ asẹ na ya sọtẹ daa Osanobua nọ re Ayi kevbe Ẹzi Arrọọ. Vbene ẹmwata, te ọmwa nọ sọtẹ daa e Jehova loo asẹ ne a ya zẹ ne egbe ọmwa ghee ihan. Zẹvbe emwa nagbọn, ma keghi gualọ adia kevbe ọdakha ọghe Jehova.

5. Vbọzẹe ne ima na mwẹ ilẹkẹtin wẹẹ Osanobua buohiẹn ata?

5 Emwi ọvbehe nọ zẹe ne Jehova na re Ọmwa nọ khẹke nọ Khaevbisẹ ọre nọ na loo asẹ ọghẹe ya buohiẹn ata. E Jehova keghi kha wẹẹ: “Rhunmwuda ahoẹmwọmwa mwẹ i beghe, emwi nọ gbae kevbe nọ hẹnhẹn ọre I ru.” (Jer. 9:24) Ẹi re uhi ne emwa ni ma gba yi ẹre Osanobua ya rẹn emwi nọ khẹke ne irẹn ru. E Jehova mwẹ ekhọe nọ gbae ne a ya buohiẹn ata, nọnaghiyerriọ, irẹn ẹre ọ yi uhi ne emwa nagbọn gha lele. E Baibol keghi kha vbekpae Jehova wẹẹ, “Ẹmwata kevbe uhunmwu ẹmwẹ, ọre a gbe ẹyotọ arriọba ruẹ yan,” ọni ẹre ọ si ẹre ne ima gha na sẹtin hẹnhẹn egbe yan avbe uhi, ilele kevbe atamuolọyan ọghẹe. (Psm. 89:14; 119:128) Nọ ya lughaẹn ọre wẹẹ, e Setan nọ baa e Jehova ifiẹzo wẹẹ, ẹi khaevbisẹ vbe odẹ nọ khẹke ma he sẹtin ze emwi ru, ne ibuohiẹn ata gha rre ehe hia vbe uhunmwu otagbọn.

6. Vbọzẹe ne Jehova na re ọmwa nọ mwẹ asẹ na ya khaevbisẹ yan agbọn na?

6 Emwi ọvbehe ye rrọọ nọ zẹe ne Jehova na re ọmwa nọ khẹke nọ Khaevbisẹ, ọni ọre ne irẹn na mwẹ irẹnmwi kevbe ẹwaẹn nọ gbae na ya gbaroghẹ agbọn vbe ẹrinmwi. Vbe igiemwi, Osanobua keghi rhie ẹtin ne Ovbi ẹre nọ ya mu emwa ni khuọnmwi okpe emianmwẹ egbe rran. Ena keghi re emianmwẹ ne avbe ọbo ebo ma sẹtin gbe. (Mat. 4:23, 24; Mak 5:25-29) Ọna ma gha re emwi ọyunnuan vbe odaro e Jehova, rhunmwuda ọ mwẹ irẹnmwi nọ dinmwi nọ dekaan vbene egbe ima ya winna hẹ kevbe wẹẹ, ọ mwẹ ẹtin na ya mu ọmwa egbe rran. Ọ vbe mwẹ ẹtin na ya huọn emwa ni wulo kpaegbe kevbe na ya gbe ukhu ẹre rua ighẹ odekun ẹrhia.

7. De alughaẹn ne egbe nọ rrọọ ne ẹwaẹn ọghe Jehova kevbe ọghe emwa ne Esu kha yan?

7 Agbọn ne Setan kha yan ye gualọ obẹlẹ ne iran gha la ya bu ẹzọ nọ rre uwẹ ẹkpo ẹvbo kevbe agbẹnvbo ughughan, sokpan e Jehova nọ mwẹ ẹwaẹn hia, ẹre ọ khian sẹtin ru ẹre ne ọfunmwegbe gha rre ehe hia vbe otagbọn na. (Aiz. 2:3, 4; 54:13) Zẹ vbene ima ya rẹn e Jehova sayọ, ima ghi do gha mwẹ egbe iziro ọghe Pọl vbe ọ khare wẹẹ: “U miẹn vbe ẹfe Osanobua bun hẹ! U miẹn vbene ẹwaẹn kevbe irẹnmwi ọnrẹn dinmwi hẹ! De ọmwa nọ gha sẹtin rhan otọ vbene ọ ta ẹmwẹ yi hẹ? Gha rẹn vbene ọ ru emwi hẹ?”—Rom. 11:33.

 ODẸ NE JEHOVA YA KHAEVBISẸ ẸRE Ọ MAAN SẸ

8. Vbọzẹe ne odẹ ne Jehova ya kha na yẹẹ ruẹ?

8 E Baibol gima rẹn wẹẹ e Jehova ẹre ọ mwẹ asẹ na ya khaevbisẹ. Ọ vbe gima rẹn wẹẹ, odẹ ọghe ahoẹmwọmwa ẹre Jehova ya khaevbisẹ. Ọna ẹre ọ si ẹre ne Arriọba ọghẹe na maan sẹ ọghe emwa ọvbehe, ere ọ vbe si ẹre ne emwa ne irẹn kha yan na mwẹ agbẹkunsotọ. Irẹn keghi re “Osanobua ne ọ vuọn ne agiẹngiẹn, ne ai sẹtin rherhe ya ohu mu, ne ọ mwẹ ahoẹmwẹ nẹi beghe kevbe amuẹntinyan.” (Ẹks. 34:6) E Jehova keghi ya obọ esi mu eguọmwadia ọghẹe. Ma i sẹtin gbaroghe egbe ima vbene Jehova ya gbaroghe ima. Ne Esu na wẹẹ Jehova i gualọ umamwẹ ọghe eguọmwadia ọghẹe, ohoghẹ ẹre ọ tae, rhunmwuda e Jehova ẹre ọ gie Ukpọmọkpa nọ mwẹ gha die agbọn na, ne ima mieke na gha mwẹ arrọọ ọghe etẹbitẹ!—Tie Psalm 84:11; Rom 8:32.

9. Vbe ima ya rẹn wẹẹ e Jehova i rhie aro gberra dọmwadẹ ima?

9 E Jehova hoẹmwẹ emwa rẹn hia, ẹi vbe rhie aro gberra dọmwadẹ ima. Vbe igiemwi, ukpo iyisẹn eha ẹre Jehova ya loo avbe ọbuohiẹn ya miẹn Ivbi Izrẹl fan hin obọ eghian iran rre. Vbuwe ẹghẹ nọ wegbe na, e Jehova ma rhie aro gberra e Rut nẹi re ovbi Izrẹl, nọ sẹ emwi hia rae do deba ugamwẹ ẹmwata. E Jehova keghi fiangbẹe, ọ na do gha mwẹ ọdọ esi kevbe ọmọ okpia. Ọ ma fo ye evba, ọ gha ghi rriọkpaegbe, ọ ghi do rẹn wẹẹ, uniẹn ọghe ovbiẹre ẹre Mezaia ghi la ladian. U miẹn vbene ọ gha vbe gbe ọre otiti hẹ vbe ọ gha rẹn wẹẹ, ọkpa vbe usun ebe ni rre Baibol, na vbe tie ẹre Rut ẹre a gbẹn okha ọghẹe yi!—Rut 4:13; Mat. 1:5, 16.

10. Vbọzẹe ne ima gha na kha wẹẹ, e Jehova i ya obọ nọ tọn mu emwa nọ kha yan?

10 E Jehova i ye obọ nọ tọn mu emwa nọ kha yan. Emwa ne irẹn kha yan keghi sọyẹnmwẹ rhunmwuda iran mwẹ afanvbimu. (2 Kọr. 3:17) E Devid keghi kha vbekpae Jehova wẹẹ: “Uyi kẹvbẹ ẹtin lẹga ẹrẹ, ẹtin kevbe oghọghọ vuọn Ọgua Osa ẹre.” (1 Krọ. 16:7, 27) Etan ne ọsihuan na vbe kha wẹẹ: “Ọ ma kin iran ni so ihuan ya rho ruẹ, iran ni rrọọ vbe uwu uwanmwẹ itohan ruẹn. Rhunmwuda uwẹ, ọre ọyẹnmwẹ na sẹ iran ne ebi ro, iran ghi vbe gha rho ruẹ ba ẹmwẹ umamwẹ ruẹn.”—Psm. 89:15, 16.

11. De vbene ima khian ya gha mwẹ ilẹkẹtin nẹi beghe wẹẹ odẹ ne Jehova ya khaevbisẹ ẹre ọ gele maan sẹ?

11 Ma ghaa ru erria yan umamwẹ ọghe Jehova, ọ gha ya ima gha mwẹ ilẹkẹtin nẹi beghe wẹẹ, odẹ nọ ya khaevbisẹ ẹre ọ gele maan sẹ. Ma ghi do gha mwẹ egbe iziro ọghe ọsihuan nọ khare wẹẹ: “Ẹdẹ ọkpa na yae vbe Ọgua Osa ruẹ maan sẹẹ arriaisẹn na yae vbe ehe ọvbehe!” (Psm. 84:10) E Jehova ẹre ọ yi ima, nọnaghiyerriọ, irẹn ẹre ọ rẹn emwi ne ima gualọ, nọ gha ya ima gele gha sọyẹnmwẹ. Irẹn gele wa kpemehe emwi hia ne ima gualọ. Emwi nọ maan ẹre a lae miẹn ighẹ emwikemwi ne irẹn wẹẹ ne ima ru, erriọ vbe ya ima sọyẹnmwẹ.—Tie Aizaia 48:17.

12. Vbọ mobọ zẹ ne ima na ye ọdakha ọghe Jehova ike?

12 E Baibol gima rẹn wẹẹ, vbe iyeke Ukpo Arriaisẹn Ọkpa Ne Jesu Khian Ya Kha, emwa eso gha ye sọtẹ daa ọdakha ọghe Jehova. (Arhie. 20:7, 8) De emwi nọ khian ya iran sọtẹ? Esu nọ. A gha ghi fan rẹn nẹ, ọ ghi werriegbe hia nọ koẹ ye ekhọe emwa nagbọn wẹẹ, iran gha sẹtin gha mwẹ arrọọ ọghe etẹbitẹ vbene iran i na rre ototọ ọdakha ọghe Jehova. Erriọ ẹre ọ ka ruẹ dee yi. Sokpan ọna i re ẹmwata hiehie. Inọta nọ ghi khẹke ne ima nọ egbe ima re ọre wẹẹ: Ma gha ya ohoghe vberriọ yi ra? Deghẹ ima gele hoẹmwẹ e  Jehova, ima na gha gae rhunmwuda emwi nọ maan nọ he ru ne ima, ima na vbe gele yayi wẹẹ, irẹn ẹre ọ mwẹ asẹ Na Ya Kha yan agbọn vbe ẹrinmwi, te ohoghe vberriọ khian gha sọnnọ ima. Sokpan e Jehova nọ khaevbisẹ vbe odẹ ọghe ahoẹmwọmwa, ẹre ima khian gha yẹrike.

YA EKHỌE HIA SINMWI OSEGHE NE ỌDAKHA ỌGHE OSANOBUA

13. De odẹ eso ne ima ya sinmwi oseghe ne ọdakha ọghe Osanobua?

13 Vbene ẹmwata, ọdakha ọghe Jehova sẹ ne ima gha ya ekhọe hia yẹrike. E Jehova ẹre ọ gele mwẹ asẹ na ya khaevbisẹ kevbe wẹẹ, odẹ nọ ya khaevbisẹ ẹre ọ vbe maan sẹ. Ma gha sẹtin sinmwi oseghe ne ọdakha ọghe Jehova deghẹ ima mudiaẹse, deghẹ ima gae vbuwe amuẹtinyan kevbe deghẹ ima ru emwi vbe odẹ ne irẹn kue yi. Ma ghaa ya egbe tae Jehova, te ima rhiẹre ma wẹẹ, ma hoẹmwe ọnrẹn kevbe wẹẹ ima ye ọdakha ọghẹe ike.—Tie Ẹfisọs 5:1, 2.

14. De odẹ nọ khẹke ne ediọn kevbe uhunmwuta ẹgbẹe ya gha ya egbe tae Jehova?

14 Ma ruẹ ọre vbe Baibol wẹẹ odẹ ọghe ahoẹmwọmwa ẹre Jehova ya khaevbisẹ. Avbe uhunmwuta ẹgbẹe kevbe ediọn ni ya egbe tae Jehova, keghi loo asẹ ne iran mwẹ vbe odẹ ọghe ahoẹmwọmwa. Iran i vbe ya obọ nọ tọn mu emwa ne iran mwẹ asẹ yan. Odẹ vbenia ẹre Pọl ya ye egbe tae Osanobua kevbe Ovbiẹre. (1 Kọr. 11:1) E Pọl ma kpikpi emwa ra nọ gha gbagbae ye iran egbe ne iran ru emwi nọ khẹke. Nọghayayerriọ, te ọ ghaa rinmwian iran. (Rom. 12:1; Ẹfis. 4:1; Fil. 8-10) Erriọ e Jehova ya ru emwi zẹẹ, erriọ vbe khẹke ne ima hia ya gha ru emwi.

15. De vbene ọghọ ne ima rhie ne emwa ne Jehova loo ya su ima ya rhiẹre ma wẹẹ ima ye ọdakha ọghẹe ike?

15 Ma rhie ọghọ ne emwa ne Jehova loo ya su ima ra? Ma ghaa lele adia ne iran rhie ne ima, te ima rhiẹre ma wẹẹ, ima yẹ ọdakha ọghe Jehova ike. Deghẹ ima ma rẹn otọ afiwerriẹ ra emwamwa eso ne  iran ru, ọ ma khẹke ne ima gha gbe olighi. Olighi ẹre emwa ni rre uwu agbọn gbe, sokpan emwa ni rre ototọ ọdakha ọghe Jehova i ru vberriọ. (Ẹfis. 5:22, 23; 6:1-3; Hib. 13:17) E Jehova gha fiangbe ima deghẹ ima ku obọ gbe ba emwamwa ọghẹe.

16. De vbene ọ khẹke ne ima ni ye ọdakha ọghe Osanobua ike ya gha ru azẹ?

16 Ma gha vbe sẹtin rhiẹre ma wẹẹ ima ye ọdakha ọghe Jehova ike lekpae azẹ ne ima ru. E Jehova ma wa ye uhi ye emwi hia nọ dekaan arrọọ. Sokpan adia ne irẹn rhie ne ima, ẹre ọ ya ima rẹn aro ne irẹn ya ghee emwi. Vbe igiemwi, e Jehova ma wa hae ye ugan aro ukpọn ne ima khian gha yọ. Sokpan irẹn gima rẹn wẹẹ ukpọn nọ rre oreghe ẹre khẹke Ivbiọtu e Kristi ọghe ata. (1 Tim. 2:9, 10) Irẹn vbe hoo ne ima gha muẹn roro nẹ, ma ke ru azẹ rhọkpa, nẹ ghẹ mieke na rhua emwa ọvbehe owẹ. (1 Kọr. 10:31-33) Azẹ ne ima ru ghaa re nọ ya ẹko rhiẹrhiẹn e Jehova, te ima rhiẹre ma wẹẹ ma ye ọdakha ọghẹe ike.

Gha sinmwi oseghe ne ọdakha ọghe Osanobua vbe atamuolọyan ne uwa ru zẹvbe ẹgbẹe (Ghee okhuẹn 16-18)

17, 18. De odẹ eso ne emwa ni ru orọnmwẹ nẹ ya rhiẹre ma wẹẹ iran ye ọdakha ọghe Jehova ike?

17 Gia ziro yan odẹ ọkpa ne emwa ni ru orọnmwẹ nẹ gha ya sẹtin sinmwi oseghe ne ọdakha ọghe Jehova. Deghẹ ọlọghọmwa na ma te yaro yi na ghi rhiegbe ma vbe orọnmwẹ vbo? Ọlọghọmwa vberriọ sẹtin ya egbe orọnmwẹ wọọ ima. Emwi vbenia gha sunu, ọ khẹke ne ima yerre obọ ne Jehova ya mu Ivbi Izrẹl. E Jehova keghi kha wẹẹ, te irẹn yevbe na ghee ọdafẹn Ivbi Izrẹl. (Aiz. 54:5; 62:4) Sokpan te iran ghaa yin vbene a ghee okhuo nọ ye agbọn lọghọ ọdafẹn ọnrẹn! Ọrheyerriọ, egbe iran ma wọọ e Jehova. Ẹghẹ hia ẹre ọ ya gha yabọ iran, ọ ma vbe mianmian ile nọ gu iran ta. (Tie Psalm 106:43-45.)

18 Te ọ khẹke ne Ivbiotu e Kristi ni ru orọnmwẹ nẹ gha ya egbe tae Jehova. Ọlọghọmwa gha rhiegbe ma vbe orọnmwẹ, iran i rhie owẹ gberra ilele ọghe Baibol ya sọfurre yọ. Iran rẹn wẹẹ, e Jehova ya iran khian ọkpa nẹ, rhunmwuda ọni, ọ khẹke ne iran sikan mu egbe. Zẹ vbene Baibol khare, ọkpa vbuwe iran na fi owẹ ye oha, ẹre iran khian na sẹtin sọ ebe orọnmwẹ, vbe iyeke ọni, ọdọ ra amwẹ sẹtin werriegbe ru orọnmwẹ. (Mat. 19:5, 6, 9) Iran na gha hia, ne ọrọnmwẹ ọghe iran gha mwẹ adogbannọ, te iran ye ọdakha ọghe Jehova ike.

19. De emwi nọ khẹke ne ima ru vbe ima gha ru abakuru?

19 Rhunmwuda ima ma gba, ẹi mwẹ ima ma ru emwi nọ sọnnọ e Jehova ugbẹnso. Irẹn wa rẹn ọna, ẹre ọ si ẹre nọ na ye arrọọ ọghe Kristi dẹ ima werriegbe. Nọnaghiyerriọ, ma gha ru abakuru, ọ khẹke ne ima rinmwian e Jehova nọ yabọ ima. (1 Jọn 2:1, 2) Ne ima gha te ya gha gbe ọsumẹ segbe vbe na miẹn wẹẹ ọghe ima fo nẹ, te ọ khẹke ne ima ye abakuru ọghe ima waan ne egbe. Ma gha rhikhan mu e Jehova, ọ gha yabọ ima, ọ vbe ya egbe rran ima vbe odẹ ọghe orhiọn, ne ima mieke na sẹtin ye gha gae.—Psm. 103:3.

20. Vbọzẹe ne ọ na khẹke ne ima ye ọdakha ọghe Jehova ike vbe ẹghẹ na?

20 Vbe agbọn ọgbọn, te emwa hia khian gha rre ototọ ọdakha ọghe Jehova, ọ vbe gha maa iran emwi. (Aiz. 11:9) E Jehova wa ma ima emwi nibun vbe ẹghẹ na nia. Ọ gha rherhe zuze ye ẹmwẹ nọ rre otọ nọ dekaan ọdakha ọghẹe. Nọnaghiyerriọ, ẹghẹ na ẹre ọ khẹke ne ima ya sinmwi oseghe ne ọdakha ọghẹe lekpae ne ima gha họn ẹmwẹ nẹ, ne ima gha gae vbuwe amuẹtinyan kevbe na gha hia na gha ya egbe taa re vbe emwi hia ne ima ru.