Gberra gha rhie uhunta

Gberra gha rhie dọmwadẹ uhunmwuta ni rre uwu ẹre

Avbe Osẹe Jehova

Hannọ urhuẹvbo Edo

Rhie Aro Tua Ẹmwẹ Ne Kpataki Nọ Rre Otọ

Rhie Aro Tua Ẹmwẹ Ne Kpataki Nọ Rre Otọ

“Te iran gha rẹn wẹẹ, wẹ ọkpa ọre Nọyaẹnmwa [“Jehovah,” NW] nọ khaevbisẹ yan emwi hia ni rre otagbọn.”—PSM. 83:18.

IHUAN: 46, 136

1, 2. (a) De ẹmwẹ ne kpataki nọ rre otọ nọ kaẹn ima hia? (b) Vbọzẹe ne ọ na khẹke ne ima rẹn vbene ẹmwẹ na ru ekpataki sẹ hẹ?

ẸMWẸ igho ẹre ọ wa mu emwa nibun vbe ẹdẹnẹrẹ. Emwi ọvbehe i rrọọ ne iran mu roro gberra ẹmwẹ igho. Nọ ne emwa ọvbehe, iwinna ẹgbẹe, egberranmwẹ kevbe na sẹtin fian emwi gbua ẹre ọ mu iran.

2 Ọ mwẹ ẹmwẹ nọ rre otọ nọ ru ekpataki sẹ ena hia, ọni ọre na sinmwi oseghe ne ọdakha ọghe Jehova. Ọ ma zẹdẹ khẹke ne ima rhie aro gberra ẹmwẹ na. Sokpan deghẹ ima ma begbe, osi ọghe evba gha re, evba gha da kevbe ọlọghọmwa ughughan ne ima werriẹ aro da sẹtin ya ima mianmian. Ma gha gele rẹn vbe nọ ru ekpataki sẹ hẹ ighẹ ẹmwẹ nọ rre otọ na, nọ dekaan asẹ ne Jehova mwẹ na ya kha, ọ gha ru iyobọ ne ima ya mudia gbain vbuwe ọlọghọmwa ne ima rhirhi gha ye. Irẹnmwi na gha vbe ya ima sikẹ e Jehova sayọ.

VBỌZẸE NE Ọ NA RU EKPATAKI

3. De vbene Setan ya gbodan ye ukpo ọdakha ọghe Osanobua hẹ?

3 E Setan keghi gbodan ye ukpo ọdakha ọghe Jehova nọ rhiema wẹẹ, e Jehova ma gbegba nọ gha kha yan evbayi rhunmwuda ẹi ya obọ esi mu iran, ẹi vbe gualọ umamwẹ  ọghe iran. Emwi ọvbehe ne Setan ya ọna kha ọre wẹẹ, emwa nagbọn ghaa kha yan egbe iran, ẹre agbọn khian na maan iran. (Gẹn. 3:1-5) Emwi ne Setan tama e Job rhiema wẹẹ, ai miẹn ọmwa nọ gele ya ekhọe hia hoẹmwẹ Osanobua, ọmwa ke ọmwa nọ rre ibavbaro gha sọtẹ daa ọdakha ọghe Jehova. (Job 2:4, 5) Ọna ẹre ọ si ẹre ne Jehova na rhie ẹghẹ yọ, nọ mieke na vẹẹ ne emwa hia rẹn wẹẹ, agbọn ne Esu kha yan i dunna ẹdẹ.

4. Vbọzẹe ne ọ na khẹke na zuze ye ẹmwẹ nọ rre otọ na?

4 E Jehova wa rẹn wẹẹ te Setan ba irẹn ifiẹzọ ohoghe. Vbọ ghi zẹ ne Osanobua na rhie ẹghẹ nọ taẹn ne Esu? Rhunmwuda ẹmwẹ na kaẹn odibosa hia kevbe emwa nagbọn. (Tie Psalm 83:18.) Adam kevbe Ivi keghi hẹe yotọ ighẹ ọdakha ọghe Jehova, erriọ emwa nibun wa vbe lele uviẹn nii ke ẹghẹ nii gha dee. Ọna sẹ nọ gha ya emwa eso gha roro ẹre wẹẹ, ughaghe uviẹn ẹre Esu gbe yi. Ẹmwẹ na keghi susu ye aro emwa nagbọn kevbe emwa orhiọn. Ọna ẹre ọ si ẹre ne ighaegbe kevbe olighi na gba ehe hia vbe uhunmwu otagbọn. E Jehova gha gi ẹre vẹẹ ne emwa hia rẹn nẹ wẹẹ, irẹn ẹre ọ gele mwẹ asẹ na ya khaevbisẹ, emwa hia ghi gbe uhunmwu kotọ ne ọdakha ọghẹe. Ẹghẹ nii, ọfunmwegbe ghi gha rre ehe hia.—Ẹfis. 1:9, 10.

5. De vbene ọdakha ọghe Jehova ya kaẹn ima hẹ?

5 Osanoba gha sinmwi oseghe ne ọdakha ọghẹe nẹ, ọ do vẹẹ ne emwa hia rẹn wẹẹ, irẹn ẹre ọ gele mwẹ asẹ na ya khaevbisẹ. Ẹghẹ nii, arriọba Esu kevbe ọghe emwa nagbọn ghi gbẹro. Arriọba Osanobua ne Mezaia khian kha yan ghi rhihe ẹre. Emwa hia ni mudiaẹse ghi vbe rhiẹre ma wẹẹ, ọdakha ọghe Osanobua ẹre iran yẹrike. (Aiz. 45:23, 24) U hoo na ka ruẹ ba emwa imudiaẹse na ra? U gha hoo na ka ruẹ ba iran, te ọ khẹke ne u rhie aro tua ẹmwẹ ne kpataki nọ rre otọ, u vbe rẹn vbe nọ ru ekpataki sẹ hẹ.

NA SINMWI OSEGHE NE ỌDAKHA RU EKPATAKI SẸ IMIẸNFAN

6. Vbọ ru ekpataki sẹ hẹ ighẹ na sinmwi oseghe ne ọdakha ọghe Jehova?

6 Zẹ vbene a nanaẹn dee sin, ẹmwẹ nọ ghi ru ekpataki sẹ nọ kaẹn emwa nagbọn ọre na sinmwi oseghe ne ọdakha ọghe Jehova. Ọ ru ekpataki sẹ imiẹnfan kevbe oghọghọ ọghe dọmwadẹ ima. Te ọna ghi rhiema wẹẹ imiẹnfan ọghe ima ma ru ekpataki vbe aro e Jehova ra? Hiehie! Sokpan vbe ima ya rẹn hẹ?

7, 8. De afiangbe ne ima khian miẹn vbe oseghe ne Osanobua gha sinmwi ne ọdakha ọghẹe?

7 E Jehova kakabọ hoẹmwẹ emwa nagbọn sẹrriọ wẹẹ, ọ na gie Ovbiẹre gha dee, ne ima mieke na gha mwẹ arrọọ etẹbitẹ. (Jọn 3:16; 1 Jọn 4:9) A na ghi miẹn wẹẹ e Jehova ma ghi mu avbe eyan rẹn sẹ, ọ do rhiema wẹẹ ẹmwata Esu tae vbọ khare wẹẹ, Osanobua i gualọ umamwẹ ọghe emwa nọ kha yan. Iran ni rre obọ ọghe Esu ghi vbe miẹn unu ya gha kha wẹẹ: “Ẹi re te a wẹẹ rẹn dọlegbe dee! Rẹn ghi vbo nia? Avbe erha ima hia wulo nẹ, sokpan vbene emwi hia ye, ke ne a ya bu agbọn tue agbọn, ọre ye ye.” (2 Pita 3:3, 4) E Jehova gha mu eyan rẹn hia sẹ. Ọ gha miẹn emwa rẹn fan rhunmwuda ọna ọre odẹ ọkpa nọ khian ya sinmwi oseghe ne ọdakha ọghẹe. (Tie Aizaia 55:10, 11.) Yevbe sọni, ọdakha ọghe Jehova hẹnhẹn egbe yan ahoẹmwọmwa. Ọna ẹre ọ ya ima mwẹ ilẹkẹtin wẹẹ, ẹi mwẹ ẹghẹ ne Jehova i khian ya gha mwẹ ahoẹmwọmwa daa emwa ni ya ẹkoata gae.—Ẹks. 34:6.

 8 Ukpo ọdakha ọghe Jehova wa hiunsi sokpan ọna ma rhiema wẹẹ imiẹnfan ọghe ima ma ru ekpataki vbe odaro Osanobua. Te ima ghi rẹn nọ ru ekpataki sẹ. Irẹnmwi na gha ru iyobọ ne ima ya rhie aro tua ẹmwẹ ne kpataki nọ rre otọ na, ọ vbe ya ima gha yẹrike ighẹ ọdakha ọghe Jehova.

VBENE JOB YA FI IZIRO ỌGHẸE WERRIẸ

9. De emwi ne Setan khare vbekpae Job? (Ghee efoto nọ rre omuhẹn.)

9 Ebe Job keghi rhiẹre ma vbene ukpo ọdakha ọghe Jehova hiunsi sẹ hẹ. Evba nii ẹre Setan na kha wẹẹ, e Job gha rri oya ne udẹn rri oya ne ẹvbi, ọ gha sọtẹ daa Osanobua. Esu na zẹ ọre vbe iro ne Osanobua tobọre rri e Job oya sokpan e Jehova ma kue yọ. Ọ keghi tama Esu wẹẹ: “A viọ emwi hia ne ọ mwẹ yuẹ obọ.” (Tie Job 1:7-12.) Ovbi ẹghẹ kherhe ẹre emwi hia ya wii e Job—eguọmwadia ọghẹe, emwi irri kevbe ivbiẹre igbe. E Setan keghi do ozere na vbe na miẹn wẹẹ Osanobua tobọre ẹre ọ rri e Job oya. (Job 1:13-19) Vbe iyeke ọni, e Setan na hihiẹ emianmwẹ dan ku e Job. (Job 2:7) Nọ ghi da e Job sẹ ọre ẹmwẹ nọ gbe orhiọn ye ọmwa iwu ne ọvbokhan rẹn kevbe ọse ọre eha ghaa tama rẹn.—Job 2:9; 3:11; 16:2.

10. (a) De vbene Job ya ye Esu khian ọmwa ohoghe hẹ? (b) Vbọ ghi zẹe ne ọ na khẹke ne Jehova dia iziro ọghe Job?

10 E Job keghi ya Esu khian ọmwa ohoghe rhunmwuda ọ ma sọtẹ daa Osanobua. (Job 27:5) Vbọrhirhighayehẹ, e Job keghi mianmian emwi nọ ru ekpataki sẹ vbe ẹghẹ eso rhunmwuda ọghe enegbe ẹre ọ ghi muẹn. Ọ na kue gha roro wẹẹ irẹn i mwẹ abakuru, ọ na vbe gha hoo nọ rẹn evbọzẹe ne irẹn na gha rri oya. (Job 7:20; 13:24) Ma rẹnrẹn wẹẹ ẹi re aro sẹnrẹn e Job ya talọ ẹmwẹ eso nọ ma deyọ; ọrheyerriọ, e Jehova keghi bẹghe ẹre wẹẹ, te ọ khẹke ne irẹn dia iziro ọghe Job. Vbe ọ ya ru ọna hẹ?

11, 12. De vbene Jehova ya dia iziro ọghe Job hẹ? Vbe Job a ghi ru?

11 Ẹmwẹ ne Osanobua tama e Job ẹre ọ rre ebe Job 38 ya sẹ 41 sokpan Osanobua ma tama e Job emwi nọ si ẹre ne ọ na rri oya. Ẹi re ọni ọ vbe si ẹre ne Jehova na dia iziro ọghe Job. Te Jehova gi e Job rẹn wẹẹ, ọ kherhe gbe nọ gha gu irẹn gha suan. Ọ keghi gi e Job rẹn wẹẹ, te ọlọghọmwa nọ werriẹ aro daa ye tuẹin vbe ehe ne ẹmwẹ ne kpataki nọ rre otọ ye. (Tie Job 38:18-21.) Adia na, ẹre ọ fi iziro ọghe Job werriẹ.

12 Emwi dan e Jehova ru ne ọ na dia iziro ọghe Job vbuwe edanmwẹ nọ  wegbe nọ la gberra ra? Hiehie! E Job ma vbe ghee ẹre vberriọ. E Job keghi gbọyẹmwẹ ye adia na. Uhiẹn ọ keghi kha wẹẹ: “Ekhue ẹmwẹ nẹ I talọẹ hia mu mwẹ. I roiro fiwerriẹ vbe uwu ẹbubẹ kevbe emuẹn.” Vbene ẹmwata, adia na wa gele ru iyobọ ne Job. (Job 42:1-6) Elaihu ka vbe rhie adia ne Job. (Job 32:5-10) E Jehova keghi gi emwa ọvbehe rẹn wẹẹ, ẹko wa rhiẹnrhiẹn irẹn ye afiwerriẹ ne Job ru kevbe ne ọ na sẹtin mudia gbain vbuwe edanmwẹ nọ wegbe.—Job 42:7, 8.

13. De vbene adia ne Jehova rhie ne Job ya ru iyobọ nẹẹn vbe ọ la edanmwẹ nii gberra nẹ?

13 Te adia ne Jehova rhie ne Job ye gha ru iyobọ nẹẹn uhiẹn vbe ọ la edanmwẹ nii gberra nẹ. De odẹ nọkhin? “E Nọyaẹnmwa keghi fiangbe okiekie ẹdẹ agbọn ẹ Job sẹ vbene ọ te ka fiangbe omuhẹn ọnrẹn.” Ọ ghi sẹ ẹghẹ, e Job na werriegbe “biẹlẹ emọ ikpia ihinrọn kẹvbe emọ ikhuo eha.” (Job 42:12-14) E Job wa gha ghọghọ ye emọ nọ dọlegbe do gha mwẹ, sokpan ẹmwẹ ivbiẹre ni ka wulo ye gha dae. Ẹi mwẹ ọ ma vbe gha zẹdia yerre aro oya nọ ka re. Deghẹ Job ye do rẹn evbọzẹe ne ọ na rri oya vberriọ, ọ sẹtin ye gha muẹn roro ugbẹnso, deghẹ ọ gele khẹke ne irẹn rri oya sẹrriọ. Vbọrhirhighayehẹ, deghẹ Job gele gha mwẹ egbe iziro vbenia vbe ekhọe, ọ gha ye adia ne Osanobua rhie nẹẹn rre, ọ vbe fu ẹre ẹko rre.—Psm. 94:19.

Gima rhie aro gberra ọlọghọmwa ne ima werriẹ aro daa ne ima mieke na rhie aro tua ẹmwẹ ne kpataki nọ rre otọ? (Ghee okhuẹn 14)

14. De emwi ne ima miẹn ruẹ vbe okha ọghe Job?

14 Ma ghaa ru erria yan emwi nọ sunu daa e Job, ma do gha mwẹ iziro nọ gbe ye uviẹn kevbe ifuẹko. Ebe Job keghi re ọkpa vbe usun ebe ni rre Baibol na gbẹn “ne a ya ma ima emwi, ne ima sẹtin lekpae izinegbe ọghomwa kevbe ẹtin ne Ebe rhie ye ọmwa iwu gha mwẹ idaehọ.” (Rom. 15:4) Emwi ne ima miẹn ruẹ ọre ne ima ghẹ gi ọghe enegbe ima mu ima sẹrriọ wẹẹ, ma ghi mianmian ẹmwẹ ne kpataki nọ rre otọ na, nọ re na sinmwi oseghe ne ọdakha ọghe Jehova. Ma ghi vbe yerre wẹẹ, odẹ ne ima ya rhiẹre ma wẹẹ ima ye ọdakha ọghe Osanobua ike, ọre ne ima mudia gbain vbuwe edanmwẹ nọ rhirhi gha khin zẹ vbene Job ruẹ re.

15. Ma gha da amuẹtinyan ọghe ima yi vbuwe edanmwẹ, de emwi nọ kie ẹkpotọ yi?

15 Okha ọghe Job keghi fu ima ẹko rre rhunmwuda ọ ya ima rẹn wẹẹ, ẹi re Jehova ọ si ọlọghọmwa ke ọlọghọmwa ne ima ye. Te ọlọghọmwa ra edanmwẹ kie ẹkpotọ yọ ne ima ya ye ọdakha ọghe Jehova ike. (Itan 27:11) Ọna ẹre ọ  zẹe ne ọ na khẹke ne ima gha zinegbe rhunmwuda ẹre “a ya rri ase” vbe obọ Osanobua, ẹre ọ vbe ya ima mwẹ ayayẹro nẹi beghe. (Tie Rom 5:3-5.) Okha ọghe Job keghi suigiẹ yọ wẹẹ e Jehova “vuọn ne itohan kevbe ẹnina.” (Jems 5:11) Gima gha mwẹ ọnrẹn vbe ilẹkẹtin wẹẹ, ma ghaa ye ọdakha ọghe Osanobua ike, ọ gha fiangbe ima. Ọna keghi ru iyobọ ne ima ya gha ye oghọghọ kevbe “izinegbe ye egbe miẹn emwi hia.”—Kọl. 1:11.

YE RHIE ARO TUA RE

16. Vbọzẹe ne ọ na khẹke ne ima yerre wẹẹ na sinmwi oseghe ne ọdakha ọghe Jehova wa ru ekpataki?

16 Vbene ẹmwata, na sinmwi oseghe ne ọdakha ọghe Jehova keghi wa ru ekpataki, sokpan ọ lọghọ na gha ye ẹre rre vbe ẹghẹ hia, rhumwuda ọlọghọmwa ughughan ne ima werriẹ aro daa. Ọlọghọmwa kherhe sẹtin khian nọkhua deghẹ ọ na khian emwi ne ima ghi mu roro vbe ẹghẹ hia. Nọnaghiyerriọ, ma ghaa rre ibavbaro, te ọ khẹke ne ima gha yerre wẹẹ, na sinmwi oseghe ne ọdakha ọghe Osanobua ẹre ọ ru ekpataki sẹ.

17. Ma ghaa zọghae vbe iwinna ugamwẹ ọghe Jehova, de vbene ọ ya ru iyobọ ne ima hẹ?

17 Ma ghaa zọghae vbe iwinna ugamwẹ ọghe Jehova, ọ gha ru iyobọ ne ima ya gha yerre emwi nọ gele ru ekpataki. Vbe igiemwi, ọtẹn nokhuo na tie ẹre Renee kegha khuọnmwi okpe emianmwẹ na tie ẹre strok kevbe kansa. Uwu obalọ ẹre ọ wa gha ye. Vbe a gbaro ghee ẹre vbe owa isinmwinegbe, ọ na gha kporhu ma emwa ni vbe khuọnmwi, emwa ni rre do gha tuọ iran kevbe emwa ni winna vba. Vbe owa isinmwinegbe ọkpa na muẹn gha rrie, uzọla eva vbe ukhiọnmwẹ nọ gbe vba ẹre ọ ya ye ughaẹdẹ 80 kporhu. Agharhemiẹn wẹẹ Renee rẹnrẹn wẹẹ irẹn gha wu, ọ na ye rhie aro tua emwi nọ ru ekpataki sẹ ne ọre na sinmwi oseghe ne odakha ọghe Jehova. Ọna ẹre ọ rhie ifuẹko nẹẹn ne ọ na sẹtin zinegbe.

18. Vbe ima miẹn ruẹ vbe emwi ẹwaẹn ọghe Jennifer?

18 Ma gha vbe sẹtin ye ọdakha ọghe Jehova ike vbe ima ghaa werriẹ aro daa orikhan ọghe ẹdẹgbegbe. Ikpẹdẹ eha ẹre ọtẹn nokhuo na tie ẹre Jennifer ya khẹ okọ ẹhoho nọ khian laọ vbe eke ne okọ ẹhoho na kun sie. Emwi vbenia sẹ nọ ya egbe wọọ ọmwa kevbe nọ ya ọmwa gbe ọ sumẹ segbe. Nọghayayerriọ, Jennifer keghi na erhunmwu gie Jehova nọ ru iyobọ ne irẹn ya kporhu ma emwa nikẹre ni vbe gha khẹ okọ ẹhoho. Ọtẹn nokhuo na keghi sẹtin kporhu ma emwa nibun, ọ na vbe viọ ebe ima nibun ne iran. Ọ na ghi kha wẹẹ: “E Jehova wa fiangbe ẹrhiọn ni loo ro, ẹre ọ zẹe ighẹ I sẹtin rhie urhomwẹ gie eni ẹnrẹn.”

19. Vbọ ye emwa ọghe Jehova lughaẹn ne emwa ugamwẹ ohoghe?

19 Emwa ọghe Jehova ọkpa ẹre ọ rẹn vbene ẹmwẹ nọ rre otọ nọ dekaan ọdakha ọghe Osanobua ru ekpataki sẹ hẹ. Ọna ẹre ọ ya iran lughaẹn ne ugamwẹ ohoghe. Nọnaghiyerriọ, te ọ khẹke ne ima ye gha yẹrike ighẹ ọdakha ọghe Jehova.

20. De aro ne Jehova ya ghee emwa hia ni ye ọdakha ọghẹe ike?

20 Gha mwẹ ọnrẹn vbe ilẹkẹtin wẹẹ, aro nọ ghaan ẹre Jehova ya ghee emwa hia ni ye ọdakha ọghẹe ike lekpae ne iran na gae vbuwe amuẹtinyan kevbe ne iran na zinegbe vbuwe edanmwẹ. (Psm. 18:25) Ako iruẹmwi nọ ghi sọregbe gha rhan otọ evbọzẹe ne ọ na khẹke ne ima ya ẹkhọe hia ye ọdakha ọghe Jehova ike.