Go long ol haf insaed long hem

Ol Loa Blong God Long Fasin Klin We Man i Jes Faenemaot Plante Yia Biaen

Ol Loa Blong God Long Fasin Klin We Man i Jes Faenemaot Plante Yia Biaen

Samples 3,500 yia bifo, smoltaem bifo we nesen blong Isrel i go insaed long Promes Lan, God i talem se bambae hem i protektem olgeta long ol “rabis sik” we oli bin luk long Ijip. (Dutronome 7:15) Wan rod we hem i yusum, hemia taem hem i givim ol klia instraksen olsem wanem blong blokem ol sik mo blong stap klin long saed blong bodi. Eksampol:

  • Folem ol loa blong nesen ya, oli mas swim mo wasem klos blong olgeta—Levitikas 15:4-27.

  • Long saed blong doti blong man [sitsit], God i se: “Oltaem, bambae yufala i mas makemaot wan ples afsaed long ples ya we yufala i stap long hem, blong ol man oli save go bus long hem. Mo oltaem, yufala i mas karem stik ya blong digim hol, mo blong berem bakegen.”—Dutronome 23:12, 13.

  • Olgeta wetem wan sik we i save pas i go long narafala oli mas stap olgeta nomo afsaed blong sam taem. Bifo oli gobak, olgeta we oli kamgud oli mas wasem klos blong olgeta mo swim bifo oli save kam “klingud.”—Levitikas 14:8, 9.

  • Oli kipim longwe eniwan we i tajem ded bodi—Levitikas 5:2, 3; Namba 19:16.

Ol loa blong Isrel long saed blong helt mo klin fasin oli laenap wetem Medikol save we yumi jes kasem plante yia afta.

Standad blong fasin klin blong ol nara ples oli daon olgeta. Eksampol:

  • Oli sakemaot ol doti long rod. Doti wota, doti kakae, mo ol narafala doti oli mekem ples i no helti nating mo from samting ya, bigfala namba oli kasem ol sik mo plante bebi oli ded.

  • Ol dokta blong taem bifo oli nogat save long saed blong ol bebet we oli kosem sik. Olsem olgeta blong Ijip oli yusum blad blong lised, sitsit blong pelican, ded rat, pispis mo olfala bred blong tritim sik.

  • Doti Wota blong Reva Nael mo ol kanal blong hem we ol man Ijip bifo oli yusum i mekem oli sik from i gat fulap parasaed. From sem risen, plante bebi oli ded from sitsit wota mo ol nara sik olsem we i kamaot from doti kakae.

Be i defren olgeta wetem ol man Isrel, we oli stap helti nomo from we oli folem ol rul we i stap insaed long Loa blong God.