Go long ol haf insaed long hem

?Wanem i Hapen Taem Man i Ded?

?Wanem i Hapen Taem Man i Ded?

Ansa we Baebol i givim

Baebol i talem se: “Ol man we oli laef yet oli save se bambae oli ded, be ol man we oli ded finis oli no moa save wan samting.” (Prija 9:5; Ol Sam 146:4) Taswe, taem yumi ded, yumi no moa stap. Ol dedman oli no save tingting, wok, mo harem samting.

“Bambae yu yu kam graon bakegen”

Taem Adam i no obei long God, God i toktok long hem mo i eksplenem samting we i hapen taem yumi ded, i se: “Mi mi wokem yu long graon fastaem, mo bambae yu yu kam graon bakegen.” (Jenesis 3:19) Taem God i no wokem Adam long “graon” yet, Adam i no stap. (Jenesis 2:7) Long sem fasin, taem Adam i ded, hem i gobak long graon mo hem i no moa stap.

Sem samting i hapen long ol man we oli stap ded tede. Long saed blong ol man mo ol anamol, Baebol i talem se: “Tufala i kamaot long graon, mo bambae tufala i gobak long hem bakegen.”—Prija 3:19, 20.

Ded i no rili en blong evri samting

Plante taem Baebol i talem se ded i sem mak long slip. (Ol Sam 13:3; Jon 11:11-14; Ol Wok 7:60) Man we i slip ded, hem i no save eni samting we i stap hapen raonabaot long hem. Long sem fasin, man we i ded i no save eni samting. Be Baebol i talem se God i save wekemap ol dedman, mo mekem olgeta oli laef bakegen. (Job 14:13-15) Taem ol dedman oli laef bakegen, bambae oli luksave se ded i no en blong evri samting.