Go long ol haf insaed long hem

?Wanem Saen Blong “Ol Las Dei” o “Taem Blong En”?

?Wanem Saen Blong “Ol Las Dei” o “Taem Blong En”?

Ansa we Baebol i givim

Baebol i tokbaot ol saen we bambae oli kamaot bifo long “en blong ol samting blong wol ya,” o “en blong wol ya.” (Matiu 24:3; King James Version) Baebol i singaot taem ya se “ol las dei” mo “taem blong en,” o “en.” (2 Timoti 3:1; Daniel 8:19; Easy-to-Read Version) Haf we i kam biaen, hem i ol profet tok we oli tokbaot sam saen blong ol las dei, o taem blong en:

  • Bigfala faet.—Matiu 24:7; Revelesen 6:4.

  • Kakae i sot.—Matiu 24:7; Revelesen 6:5, 6.

  • Graon i seksek bigwan.—Luk 21:11.

  • Ol strong sik, o “ol rabis sik” bambae oli go olbaot kwiktaem.—Luk 21:11, Contemporary English Version.

  • Ol nogud fasin oli kam bigwan moa.—Matiu 24:12.

  • Ol man oli spolem wol.—Revelesen 11:18.

  • Plante man oli gat ol nogud fasin olsem, “oli no save talem tangkiu, mo oli no gat fasin blong holemstrong long ol narafala, . . . oli no wantem lesin long narafala, oli spolem nem blong narafala, oli no save bos long tingting blong olgeta, oli wael olgeta, mo oli no laekem ol gudfala fasin. Bambae oli putum ol fren blong olgeta long han blong ol enemi, oli stronghed, oli flas gogo tingting blong olgeta i go antap tumas.”—2 Timoti 3:1-4.

  • Ol famle oli no joen gud, ol man mo woman “oli no gat sore” mo ol pikinini “oli no obei long papa mo mama blong olgeta.”—2 Timoti 3:2, 3.

  • Plante man oli no lavem God.—Matiu 24:12.

  • Ol man we oli talem se oli man blong God oli gat tu fes.—2 Timoti 3:5.

  • Ol save long saed blong ol profet tok blong Baebol bambae oli kam klia moa, hemia olgeta tu long saed blong ol las dei.—Daniel 12:4.

  • Ol man oli talem gud nius blong Kingdom long olgeta ples long wol.—Matiu 24:14.

  • Long evri ples ol man oli no wantem luksave ol saen we oli soemaot se en i klosap.—Matiu 24:37-39; 2 Pita 3:3, 4.

  • Olgeta profet tok oli kamtru semtaem, i no samfala nomo, be evriwan.—Matiu 24:33.

?Yumi stap laef long “ol las dei”?

Yes. Ol samting we oli stap hapen long wol mo ol samting we Baebol i tokbaot oli soemaot se ol las dei i stat long yia 1914. Long taem ya, Kingdom blong God i stat blong rul long heven, mo wan long ol faswan samting we hem i mekem, hemia se hem i sakemaot Setan mo ol rabis spirit blong hem oli kamdaon long wol ya. (Revelesen 12:7-12) From we Setan i rul long wol ya, yumi save luk klia nomo ol nogud fasin mo aksen we oli stap kamaot long ol las dei ya we i mekem se ‘laef i strong tumas mo i had blong winim ol trabol.’—2 Timoti 3:1.