Go long ol haf insaed long hem

?Baebol i Talem Wanem Long Saed Blong Fasin Blong Lukaotem Ol Olfala Papa mo Mama?

?Baebol i Talem Wanem Long Saed Blong Fasin Blong Lukaotem Ol Olfala Papa mo Mama?

Ansa we Baebol i givim

Ol pikinini we oli bigman finis oli gat impoten wok ya blong meksua se ol olfala papa mo mama blong olgeta oli gat samting we oli nidim. Baebol i talem se ol pikinini we oli bigman finis oli mas “mekem bilif blong olgeta i wok long laef blong olgeta taem oli lukaot gud long famle blong olgeta mo pembak kaon blong olgeta long ol papa mo mama blong olgeta . . . , from we hemia wan samting we God i glad long hem.” (1 Timoti 5:4, New International Version) Taem ol pikinini we oli bigman finis oli lukaot gud long olfala papa mo mama blong olgeta, oli stap obei tu long tok blong Baebol se oli mas ona long papa mo mama blong olgeta.—Efesas 6:2, 3.

Baebol i no talem ol smosmol rul long saed blong fasin blong lukaotem ol olfala papa mo mama. Nating se i olsem, Baebol i givim eksampol blong sam man mo woman we oli bilif we oli mekem olsem. Mo tu, i givim sam gudfala advaes we i save givhan long olgeta we oli stap lukaotem ol olfala papa mo mama blong olgeta.

 ?Ol man we Baebol i tokbaot oli lukaotem ol olfala papa mo mama blong olgeta olsem wanem?

Oli lukaotem olgeta long ol defdefren rod, folem fasin blong laef blong olgeta.

  • Josef i laef longwe long olfala papa blong hem, Jekob. Be taem we Josef i naf, hem i mekem rod blong Jekob i kam stap klosap moa long hem. Josef i givim haos mo kakae long papa blong hem, mo i lukaotem hem long taem blong trabol.—Jenesis 45:9-11; 47:11, 12.

  • Rut i muv i go long kantri blong palika blong hem mo i wok had blong lukaotem hem.—Rut 1:16; 2:2, 17, 18, 23.

  • Jisas, bifo we hem i ded, i jusum wan man blong lukaotem mama blong hem Meri, we i luk olsem i wan wido long taem ya.—Jon 19:26, 27. *

 ?Wanem gudfala advaes i save givhan long olgeta we oli stap lukaotem ol olfala papa mo mama blong olgeta?

Baebol i tokbaot sam stamba trutok we i save givhan long olgeta we oli lukaotem ol olfala papa mo mama blong olgeta, nating se samtaem oli save harem se bodi olgeta i taed mo tingting i hevi.

  • Ona long papa mo mama blong yufala.

    Samting we Baebol i talem: “Yufala i mas ona long papa mo mama blong yufala.”—Eksodas 20:12.

    ?Olsem wanem blong folem stamba trutok ya? Taem yu letem papa mo mama blong yu i mekem samting we oli naf blong mekem, yu stap soem ona long olgeta. Letem olgeta i mekem prapa desisen blong olgeta long saed blong fasin we oli wantem narafala i lukaotem olgeta. Long semtaem, yu soem ona long olgeta taem yu mekem samting we yu naf blong mekem blong givhan.

  • Traem kasem save long filing blong olgeta mo fogivim olgeta.

    Samting we Baebol i talem: “Sipos yu gat hed, bambae yu no save kros kwik. Sipos wan man i mekem i rong long yu, nao yu no tingbaot, hemia i wan gudfala fasin.”—Proveb 19:11.

    ?Olsem wanem blong folem stamba trutok ya? Sipos wan olfala papa o mama i talem wan samting we i no kaen o i no soemaot tangkiu long yu, traem askem yu wan se, ‘Bae mi harem olsem wanem sipos mi mi no naf blong mekem plante samting olsem hem?’ Taem yu traem blong kasem save long filing blong hem mo blong fogivim hem, bae yu no mekem trabol ya i kam bigwan moa.

  • Lukaotem advaes.

    Samting we Baebol i talem: “Man we i stap holem ol gudfala advaes we ol man oli givim long hem, bambae laef blong hem i save gohed gud, be man we i tanem baksaed long ol advaes olsem, ol plan blong hem bambae oli foldaon.”—Proveb 15:22.

    ?Olsem wanem blong folem stamba trutok ya? Mekem risej blong faenemaot olsem wanem blong dil wetem ol problem blong helt we papa o mama blong yu i gat. Faenemaot samting we komuniti blong yu i save mekem blong givhan long ol olfala. Storian wetem ol narafala we oli lukaotem ol olfala papa mo mama blong olgeta. Sipos yu gat ol brata mo sista, traem gat wan famle miting blong tokbaot nid blong papa mo mama blong yu, olsem wanem blong lukaotem olgeta, mo olsem wanem blong wok tugeta mo givgivhan.

    Traem gat wan famle miting blong tokbaot olsem wanem blong lukaotem ol olfala papa mo mama blong yu

  • Gat tingting daon.

    Samting we Baebol i talem: “Man we i mekem tingting blong hem i stap daon, hem i wan waes man.”—Proveb 11:2.

    ?Olsem wanem blong folem stamba trutok ya? Luksave samting we yu naf mo no naf blong mekem. Eksampol, tingbaot hamas taem mo paoa we yu gat. Samting we yu naf blong mekem blong papa mo mama blong yu i dipen long samting ya. Sipos yu luk se wok blong lukaotem olfala papa no mama blong yu i bigwan tumas, tingbaot sipos yu save askem sam narafala memba blong famle o wan narafala man blong kam givhan.

  • Lukaotem yu wan.

    Samting we Baebol i talem: “I no gat man we i no laekem nating prapa bodi blong hem. Man i stap fidim bodi blong hem mo i stap mekem i gud long hem.”—Efesas 5:29.

    ?Olsem wanem blong folem stamba trutok ya? Nating se yu gat wok ya blong lukaotem papa mo mama blong yu, yu mas tingbaot nid blong yu wan tu, mo nid blong famle blong yu sipos yu mared. Yu mas kakae gud. Yu mas gat naf taem blong slip. (Prija 4:6) Mo yu mas tekem sam spel. Sipos yu mekem olsem, bae tingting, filing, mo bodi blong yu i naf moa blong lukaotem papa mo mama blong yu.

 ?Baebol i talem se ol olfala papa mo mama i mas laef long haos blong pikinini blong hem?

Baebol i no talem stret sipos ol pikinini we oli bigman i mas lukaotem papa mo mama blong hem long haos blong hem. Sam famle i jus blong lukaotem olgeta long haos blong olgeta fastaem, be biaen oli harem se i moa gud sipos olfala papa no mama i go stap long wan narafala ples we bae oli lukaotem gud hem. Maet famle i mas gat wan miting blong mekem desisen we i beswan long evriwan.—Galesia 6:4, 5.

^ par. 12 Wan buk we i givim moa save long Baebol i tokbaot stori ya se: “I luk olsem Josef [hasban blong Meri] i ded longtaem finis, mo boe blong hem Jisas i stap lukaotem [Meri], mo ?naoia we bae [Jisas] i ded bae hu i lukaotem hem? . . . Long taem ya Kraes i tijim ol pikinini blong tingbaot nid blong ol olfala papa mo mama blong olgeta.”—The NIV Matthew Henry Commentary in One Volume, pej 428-429.