Baebol i talem se, God i no stamba blong ol nogud samting we i hapen. Ol hadtaem we yumi kasem, oli no stap long plan blong God taem hem i wokem Adam mo Iv. Be, tufala nao i tanem baksaed long rul blong God, mo tufala i jusum blong folem prapa tingting blong tufala, long samting we i gud mo samting we i nogud. From samting ya, tufala i kasem ol hadtaem.

 Ol hadtaem we yumi kasem tede, oli kamaot from nogud desisen blong Adam mo Iv. Be God i no stamba blong ol hadtaem we yumi kasem.

 Baebol i talem se: “Taem wan samting i traem yumi, yumi no mas talem se: “God ya i stap traem mi,” from we ol samting nogud oli no save traem God mo tu God i no save yusum ol samting nogud blong traem ol man.” (Jemes 1:13) Evri man i save kasem hadtaem, hemia i minim tu ol man we God i glad long olgeta.