Go long ol haf insaed long hem

?Baebol i Talem Wanem Long Fasin Ya Blong Mared Long Man No Woman We Kala Blong Skin Blong Hem i Defren?

?Baebol i Talem Wanem Long Fasin Ya Blong Mared Long Man No Woman We Kala Blong Skin Blong Hem i Defren?

Ansa we Baebol i givim

God i agri nomo blong man i mared long wan woman we kala blong skin blong hem i defren, from we God i luk se olgeta man oli sem mak nomo. Baebol i talem se: “God i stap mekem i sem mak nomo long olgeta man . . . nating se hem i blong defren neson.”—Ol Wok 10:34, 35.

Yu traem luk sam narafala vas blong Baebol we oli tokbaot mared mo se olgeta man oli sem mak.

Ol man blong defdefren kala oli kamaot long wan man nomo

Olgeta man long wol oli kamaot long fas man ya Adam, mo waef blong hem Iv, we Baebol i singaot hem se “mama blong olgeta man we i laef.” (Jenesis 3:20) From risen ya nao, Baebol i talem se God “i mekem wan man nomo, nao olgeta man long wol oli kamaot long man ya.” (Ol Wok 17:26) Taswe, nating se ol man oli gat defdefren kala blong skin, be olgeta evriwan oli wan famle nomo. ?Be olsem wanem sipos long ples blong yu, ol man oli no laekem nating ol man we kala blong skin blong olgeta i defren, no oli no joen nating wetem ol man olsem?

Ol man we oli waes, oli ‘toktok gud tugeta’

God i agri blong man i mared long woman we kala blong skin blong hem i defren, be i no evri man oli gat sem tingting olsem hem. (Aesea 55:8, 9) Sipos yu wantem mared long wan man no woman we kala blong skin blong hem i defren, i gud yutufala i tokbaot ol kwestin ya se:

  • ?Bambae yutufala i mekem wanem blong winim ol problem we i save kamaot long komuniti no famle blong yutufala?

  • ?Bambae yutufala i givhan olsem wanem long ol pikinini blong yutufala, sipos ol narafala oli agensem olgeta from kala blong skin blong olgeta?

Sipos yutufala i ‘toktok gud tugeta’ fastaem, hemia i save givhan blong mekem se yutufala i gat wan gudfala mared.—Ol Proveb 13:10; 21:5.