Go long ol haf insaed long hem

?Hu i Waef Blong Ken?

?Hu i Waef Blong Ken?

Ansa we Baebol i givim

Ken i fasbon boe blong faswan man mo woman, mo i mared long wan long ol sista blong hem o wan nara woman we i famle blong hem. Yumi save se i olsem from samting we Baebol i talem long saed blong Ken mo famle blong hem.

Sam save long saed blong famle blong Ken

  • Evri man i kamaot long Adam mo Iv. God i “mekem wan man [Adam] nomo, nao olgeta man long wol oli kamaot long man ya, mo hem i putum olgeta oli stap long evri ples long wol.” (Ol Wok 17:26) Waef blong Adam, Iv, i kam “mama blong olgeta man we i laef.” (Jenesis 3:20) Taswe, Ken i mas mared long wan woman we i kamaot long Adam mo Iv.

  • Tufala ya Ken mo brata blong hem Ebel i faswan long ol pikinini we Iv i bonem. (Jenesis 4:1, 2) Taem Ken i kasem panis from hem i kilim brata blong hem, hem i komplen se: “Sipos wan man i faenem mi, bambae i kilim mi ya.” (Jenesis 4:14) ?Ken i fraet long hu? Baebol i talem se Adam i “bonem ol narafala pikinini bakegen, sam we i boe mo sam we i gel.” (Jenesis 5:4) Samting ya i soemaot se, maet Ken i fraet se ol narafala pikinini blong Adam mo Iv oli kilim hem.

  • Long taem bifo, ol man oli mared long famle blong olgeta nomo. Ebraham we i wan man blong bilif, i mared long sista blong hem. (Jenesis 20:12) Faswan loa we i agensem fasin ya hemia Loa blong Moses we i kamaot sam handred yia afta long taem blong Ken. (Levitikas18:9, 12, 13) I Luk olsem se ol pikinini we oli bon long taem bifo bodi blong olgeta i no save kam nogud olsem ol pikinini long taem blong yumi sipos papa mama blong olgeta oli famle nomo.

  • Baebol i soemaot se stori blong Adam, Iv mo famle blong tufala i wan stori long histri we i tru. Histri blong ol man stat long taem blong Adam i no stap nomo long buk blong Jenesis we Moses i raetem, i stap tu long ol buk we Esra mo Luk i raetem (Jenesis 5:3-5; 1 Kronikel 1:1-4; Luk 3:38) Ol man blong raetem Baebol oli tokbaot stori blong Ken olsem wan histri blong ol man.—Hibrus 11:4; 1 Jon 3:12; Jud 11.