Go long ol haf insaed long hem

?From Wanem Mi Prea? ?God Bambae i Ansa Long Prea Blong Mi?

?From Wanem Mi Prea? ?God Bambae i Ansa Long Prea Blong Mi?

Ansa we Baebol i givim

Yes. Ol stori long Baebol mo ol samting we oli hapen long laef blong ol man, oli soemaot se God i stap ansa long ol prea. Baebol i talem se: “Olgeta we oli stap ona long hem, oltaem hem i stap givim ol samting long olgeta we oli sot long hem, oltaem hem i stap harem krae blong olgeta, mo i stap sevem olgeta.” (Ol Sam 145:19) Be kwestin ya se God bambae i ansa long prea blong yu no nogat, i dipen long yu nomo.

Samting we i impoten

  • Yu prea long God, be i no long Jisas, Meri, ol tabu man, ol enjel, no long ol aedol mo pija. Jehova God nomo i stap “ansa long ol prea.”—Ol Sam 65:2.

  • Prea blong yu i mas laenap wetem ol samting we God i wantem, we oli stap long Baebol.—1 Jon 5:14.

  • Yu prea long nem blong Jisas, mo yu mas luksave bigfala paoa blong hem. Jisas i talem se: “I no gat man i save kam long Papa blong mi, sipos hem i no pas long mi.”—Jon 14:6.

  • Yu mas gat bilif taem yu prea, mo sipos yu nidim moa bilif, yu mas askem.—Matiu 21:22; Luk 17:5.

  • Yu mas gat tingting daon mo yu tok tru. Baebol i talem se: “Nating we [Jehova i] hae olsem, oltaem [hem i] stap lukaot gud long ol man we tingting blong olgeta i stap daon.”—Ol Sam 138:6.

  • Yu mas gohed blong prea. Jisas i talem se: “Sipos yufala i wantem samting, yufala i mas gohed blong askem, nao bambae yufala i kasem.”—Luk 11:9.

Samting we i no impoten

  • Kantri mo laen blong yu. “God i stap mekem i sem mak nomo long olgeta man. Sipos wan man i fraet gud long God mo i mekem samting we i stret, God i glad long hem nating se hem i blong defren neson.”—Ol Wok 10:34, 35.

  • Yu sidaon no yu stanap. Yu save prea long God nating se yu sidaon, yu bodaon, yu nildaon, no yu stanap.—1 Kronikel 17:16; Nehemaea 8:6; Daniel 6:10; Mak 11:25.

  • Yu prea kwaet no yu prea strong. God i save ansa tu long prea blong man we i prea kwaet nomo we ol narafala oli no save.—Nehemaea 2:1-6.

  • Wari blong yu i bigwan no i smol nomo. God i leftemap tingting blong yu blong yu ‘putum ol trabol blong yu long han blong hem, from we oltaem hem i stap tingbaot yu.’—1 Pita 5:7.