Go long ol haf insaed long hem

ADVAES LONG FAMLE | MARED

?Olsem Wanem Blong Gat Longfala Tingting?

?Olsem Wanem Blong Gat Longfala Tingting?

“Ol samting we i hapen evri dei i mekem se i had blong gat longfala tingting. Taem yu singel, fasin ya i no impoten tumas, be hasban mo waef i mas gat longfala tingting blong mekem mared i hapi.”—Jon.

 ?From wanem yu mas gat longfala tingting?

  • Mared i mekem se yu luksave moa ol slak fasin blong hasban o waef blong yu.

    “Afta we yu mared blong smoltaem, i isi nomo blong yu luk ol slak fasin blong hasban o waef blong yu. Taem yu stat blong mekem olsem, bambae i isi blong yu lusum longfala tingting.”—Jesena.

  • Taem yu no gat longfala tingting, yu no tingting gud fastaem long ol tok blong yu.

    “Mi mi kwik blong talemaot ol tingting blong mi, mo samtaem mi kwik tumas. Sipos mi gat longfala tingting, bambae mi tingting gud nao mi save sipos mi mas talem wan samting o nogat.”—Kamen.

    Baebol i talem se: “Man we i gat lav, tingting blong hem i longfala, mo hem i kaengud.” (1 Korin 13:4) I stret nomo we man mo woman we tufala i lavlavem tufala, oli gat longfala tingting. Be i no oltaem samting ya i hapen. Jon we yumi tokbaot hem long stat i talem se: “Olsem ol narafala gudfala fasin, i moa isi blong lusum longfala tingting i bitim we yumi kam gud moa long hem. Taswe, yumi mas traehad oltaem blong kam gud moa.”

 ?Olsem wanem blong soemaot longfala tingting?

  • Taem wan samting i traem longfala tingting.

    Eksampol: Hasban o waef blong yu i tok strong long yu. Maet yu wantem givimbak fasin ya long hem.

    Rul blong Baebol: “I nogud yu yu man blong kros kwik. Mo i nogud yu holem kros blong yu i stap longtaem, from we hemia i fasin blong man we i no gat hed.”—Prija 7:9.

    ?Olsem wanem blong soemaot longfala tingting? Yu stop smol. Bifo we yu givimbak, i gud yu tingbaot fastaem se maet hasban o waef blong yu i no minim blong talem wan tok we i spolem yu. Buk ya Fighting for Your Marriage i talem se: “Plante taem yumi mekem samting from we yumi ting se hasban o waef i minim nomo, be maet i no olsem.”

    Nating se hasban o waef blong yu i minim nomo blong talem wan samting we i stikim yu, be longfala tingting bambae i mekem se yu blokem yu blong yu no givimbak mo mekem trabol ya i mowas. Baebol i talem se: “Sipos i no moa gat faeawud, bambae faea i ded.”—Ol Proveb 26:20.

    “Sipos yu harem se waef blong yu i stap kam enemi blong yu, i gud yu stop smol mo yu tingbaot from wanem yu laekem hem, mo kwiktaem yu mekem wan samting we i kaen long hem.”—Etan.

    Yu traem tingbaot:

    • ?Yu mekem wanem, taem hasban o waef blong yu i talem o i mekem wan samting we i spolem yu?

    • ?Olsem wanem yu save soemaot longfala tingting taem samting ya i hapen bakegen?

  • Taem wan samting i hapen bakegen mo bakegen.

    Eksampol: Oltaem waef blong yu i let, mo yu kam kros from we yu mas wet long hem.

    Rul blong Baebol: “Yufala i no mas hareap blong kros long yufala, mo yufala i mas glad blong fofogivim yufala.”—Kolosi 3:13.

    ?Olsem wanem blong soemaot longfala tingting? Yu traehad moa blong frengud wetem hasban o waef blong yu i bitim we yu tingbaot yu wan. I gud yu askem se: ‘?Sipos mi kam kros bae mi mekem se mitufala i fren gud o mitufala i no moa fren gud?’ Mo tu, yumi mas tingbaot se “yumi evriwan i mekem mastik plante taem.” (Jemes 3:2) Hemia i min se yu tu yu mas kamgud moa.

    “Samtaem mi gat longfala tingting long ol fren blong mi moa i bitim long hasban blong mi. Mi ting se hemia from we mi spenem plante taem wetem hasban blong mi mo mi luk ol slak fasin blong hem. Be longfala tingting i soemaot lav mo respek, taswe hem i impoten insaed long mared blong mi.”—Nia.

    Yu traem tingbaot:

    • ?I isi blong yu soemaot longfala tingting taem hasban o waef blong yu i mestem?

    • ?Olsem wanem blong soemaot longfala tingting nekis taem?