Go long ol haf insaed long hem

Go long lis blong ol haf

 STORI BLONG FRAN PEJ | ?HU YA OL WITNES BLONG JEHOVA?

?Ol Witnes blong Jehova oli bilif long wanem?

?Ol Witnes blong Jehova oli bilif long wanem?

Ol Witnes blong Jehova oli bilif se, ‘olgeta tok blong Baebol oli kamaot long God fastaem, mo ol tok ya i stret gud long yumi.’ (2 Timoti 3:16) Oli letem Baebol i lidim laef blong olgeta, mo i tijim olgeta long God. Mo tu, Baebol i tijim olgeta long samting we oli mas mekem, blong oli save gat wan gudfala laef.

Baebol i talem se: “Ol man oli mas save se yu, we nem blong yu Jehova, yu nomo yu Hae God blong olgeta ples long wol.” (Ol Sam 83:18, NW) Taswe, ol Witnes blong Jehova oli mekem wosip long Jehova God nomo. Mo from we oli Witnes blong hem, oli talemaot nem blong hem long ol narafala man.—Aesea 43:10-12.

Ol Witnes oli Kristin, taswe oli bilif se Jisas i “Pikinini blong God” * we i kamdaon long wol olsem Mesaea. (Jon 1:34, 41; 4:25, 26) Hem i ded, mo afta we hem i laef bakegen, hem i go long heven. (1 Korin 15:3, 4) Plante yia biaen, hem i kam King long Kingdom blong God. (Revelesen 11:15) Kingdom ya, hem i wan tru gavman we bambae i mekem wol ya i kam Paradaes. (Daniel 2:44) Baebol i talem se: “Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.”—Ol Sam 37:11, 29.

Ol tok ya blong Benjamin Cherayath, we i wan lida blong Katolik, i stap long niuspepa blong Jemani (Münsterländische Volkszeitung): “Taem [ol Witnes] oli ridim Baebol, oli bilif se God nao i stap toktok long olgeta. Taem oli kasem trabol, oli luk long Baebol blong traem faenem rod blong winim trabol ya. . . . Oli bilif se Tok blong God i stret yet tede.”

Ol Witnes blong Jehova oli bilif se ol rul blong Baebol oli save givhan long ol man tede. (Aesea 48:17, 18) Taswe oli folemgud ol rul ya. Yu traem tingbaot: Baebol i givim woning se yumi no mas mekem ol samting we oli spolem bodi mo tingting blong yumi. Taswe ol Witnes oli no smok mo oli no tekem drag. (2 Korin 7:1) Mo tu, oli no drong, oli no slip olbaot, mo oli no stil, from we Baebol i agensem ol fasin ya.—1 Korin 6:9-11.

^ par. 5 Baebol i talem se Jisas i “stret Pikinini blong God” from we Jehova hem wan i mekem hem, mo tu, hem i faswan long ol samting we Jehova i mekem.—Jon 3:18; Kolosi 1:13-15.