Go long ol haf insaed long hem

Go long lis blong ol haf

 STORI BLONG FRAN PEJ | GLAD LONG WOK BLONG YU

Hadwok—?Tok Ya i Blong Bifo Nomo?

Hadwok—?Tok Ya i Blong Bifo Nomo?

Alex i no glad, taem hem i stap leftemap ol bokis, i go long trak blong kampani we hem i wok long hem. Hem i stap tingting se: ‘?From wanem mi stap gohed long wok ya we i no gat wan gudfala samting i kamaot long hem? ?Wetaem bambae mi luk frut blong wok blong mi? !Bambae laef blong mi i kam gud moa sipos mi no moa wok!’

Olsem Alex, tede plante man oli no glad blong wok had. Aron we i wan mekanik, i talem se: “Plante man oli ting se sipos oli mekem wok we oli kasem smol mane nomo, i olsem we oli daon moa long ol narafala. Oli gat tingting ya se: ‘Mi mi mekem wok ya nomo, kasem taem we mi faenem wan narafala wok.’”

?From wanem plante man oli ting se, oli no nid blong hadwok? From we, maet ol toktok we oli kamaot long radio, niuspepa, mo televisin oli pulum olgeta blong ting se oli save gat gudfala laef sipos oli no wok had. Matiu we i wan man blong klinim mo fiksimap ol samting, i talem se: “Ol man oli ting se, taem yu mekem wan wok we i had, bambae yu no save harem gud long laef.” Shane wan man blong klinim yad blong wan haos, hem i luksave se ol man oli gat tingting ya, taswe hem i talem se: “Ol man oli no moa folem olfala tok ya se, sipos yu wok had long fuldei, bambae yu kasem gudfala pei.”

Defren olgeta, plante man we oli glad blong wok had, oli harem gud long laef blong olgeta. Daniel wan man blong wokem haos we i gat 25 yia, i talem se: “Mi mi ting se hadwok i gat gudfala frut blong hem, speseli taem yu gat ol gudfala mak we yu traehad blong kasem.” Andre we i gat 23 yia, i gat sem tingting, hem i se: “Mi mi bilif se glad i joen wetem wok. !Taem yu no traehad long wok blong yu, bambae yu no save glad!

?From wanem ol man olsem Daniel mo Andre, oli gat gudfala tingting blong mekem ol wok we oli had? From we, olgeta oli folem ol rul blong Baebol long laef blong olgeta. Baebol i sapotem fasin ya blong wok had mo blong gohed oltaem blong wok. Baebol i no talem se yumi wok nomo, be hem i soemaot olsem wanem yumi save glad long wok blong yumi.

?Wanem ol rul blong Baebol we oli save givhan long yu blong yu glad long wok blong yu? Mifala i glad sipos yu ridim sam long ol rul ya, long haf we i kam biaen.