Go long ol haf insaed long hem

Go long lis blong ol haf

 WAN WITNES I STORIAN WETEM NARAFALA

?From Wanem Yumi Mas Stadi Long Baebol?

?From Wanem Yumi Mas Stadi Long Baebol?

Haf ya i tokbaot wan Witnes i storian wetem narafala. Yu traem tingbaot se wan Witnes we nem blong hem Brian i storian wetem wan man we nem blong hem Eric.

BAEBOL I TOKBAOT HISTRI WE I TRU

Eric: Mi mas talem long yu se mi mi no gat plante save long Baebol. Taswe, mi no ting se yumitu save storian plante long samting ya.

Brian: Tangkiu blong talem tingting blong yu. Nem blong mi Brian, ?be nem blong yu?

Eric: Eric.

Brian: Mi glad blong mitim yu, Eric.

Eric: Mi tu.

Brian: Mi save askem wan kwestin, ?yu yu gruap long wan famle we oltaem yufala i stap go long jos?

Eric: Yes. Be taem mi go stap long skul, mi no moa go long jos.

Brian: Ah. ?Be yu tekem wanem kos long skul?

Eric: Mi tekem sosial stadi mo histri. Mi mi laekem histri, yu save, hem i tokbaot ol samting we oli hapen bifo mo tede.

Brian: Yes, plante man oli intres long histri. Mo ating yu save, Baebol, hem i wan buk we i tokbaot histri. ?Yu yu yusum Baebol taem yu mekem sam risej?

Eric: Nogat. Mi save se i wan gudfala buk, be mi neva save se Baebol i olsem wan buk blong histri.

Brian: Mi luk se yu gat gudfala tingting mo yu glad blong storian. Sipos yu gat smol taem, mi glad blong soem sam eksampol blong ol histri we oli tru, we oli stap long Baebol.

Eric: I stret, yu save soem. Be mi no gat wan Baebol.

Brian: I oraet nomo. Mi save soem long yu, long Baebol blong mi. Faswan eksampol i stap long 1 Kronikel japta 29, vas 26 mo 27. Ol vas ya oli talem se: “King Deved, pikinini blong Jese, hem i rul foti yia long Isrel. Fastaem, hem i rul seven yia long Juda, we hedkwota blong hem i stap long taon ya Hebron, mo biaen hem i rul toti tri yia bakegen long Isrel, we hedkwota blong hem i stap long taon ya Jerusalem.”

Eric: ?Olsem wanem hemia i wan eksampol blong histri we i tru?

Brian: I gat wan taem we ol man oli talem se King Deved i no bin laef bifo.

Eric: ?Be i tru ya? ?From wanem oli talem olsem?

Brian: I gat sam pruf we oli soemaot se Deved i wan man we i tru, mo hem i laef bifo. Be long 1993, ol man blong digim graon oli faenem wan olfala ston we i gat wan tok long hem, we oli tanem tok ya se “Haos blong Deved.”

Eric: Mi intres tumas long samting.

Brian: I gat wan narafala man bakegen we Baebol i tokbaot hem, be ol man oli talem se hem i no laef bifo, hemia Ponjes Paelat. Hem nao i hed gavman long Judia we i rul long taem blong Jisas. Luk japta 3 vas 1 i tokbaot hem, wetem sam narafala hed gavman long taem ya.

Eric: Yes, mi luk ya. Vas ya i se: ‘Ponjes Paelat, hem i stap hed gavman long Judia, mo i gat Herod we hem i stap rul long Galili.’

Brian: Yes. Blong plante yia sam man blong stadi oli no sua sipos i tru se Paelat i wan man we i bin laef bifo.  Biaen, samwe 50 yia i pas, long Medel Is ol man blong digim graon oli faenem wan ston we nem blong Paelat i stap long hem.

Eric: Mi mi neva harem ol stori ya.

Brian: Mi mi glad blong tokbaot ol stori ya wetem yu.

Eric: Blong talem stret, mi mi gat respek long Baebol, olsem wan gudfala buk, be mi no ting se i gat sam samting we oli stret long taem blong yumi. Maet Baebol i tokbaot histri we i tru, be mi no ting se i gat ol save we oli naf blong givhan long laef tede.

BAEBOL I WAN OLFALA BUK WE I STRET LONG TAEM BLONG YUMI

Brian: Plante man oli gat tingting olsem. Be mi no bilivim tok ya. Hemia wan risen from wanem mi talem olsem: Stat bifo kam kasem tede ol samting we yumi nidim long laef oli no jenis. Eksampol, oltaem yumi nidim kakae, klos, mo wan ples blong slip. Mo tu, oltaem yumi gat fasin ya blong wantem storian wetem narafala, mo blong gat wan hapi famle. ?I tru we yumi evriwan i tinghae long ol samting ya?

Eric: Yes, hemia i tru tumas.

Brian: Baebol i save givhan long yumi long evri samting. Hemia nao from wanem yumi talem se Baebol i wan olfala buk we i stret long taem blong yumi.

Eric: ?Yu minim wanem?

Brian: Bambae mi traem talem long wan defren fasin: Baebol i tokbaot ol rul we oli impoten long taem blong yumi tede, sem mak olsem we oli impoten long taem we oli raetem ol rul ya.

Baebol i tokbaot ol rul we oli impoten long taem blong yumi tede, sem mak olsem we oli impoten long taem we oli raetem ol rul ya

Eric: OK. ?Olsem wanem ol rul ya oli impoten tede?

Brian: Ol rul blong Baebol we oli save lidim yumi, olsem wanem blong yusumgud mane, gat wan hapi famle, mo gat ol gudfala fren. Buk ya hem i olsem wan map we i soemaot rod blong kasem wan ples. Yu traem tingbaot, ?yu yu agri se i no isi blong wan hasban no wan hed blong famle i mekem gud wok blong hem tede?

Eric: Yes i tru, mi agri long wanem we yu talem. Mi wetem woman blong mi, mitufala i mared klosap wan yia nao, mo i no isi blong mitufala i gat sem tingting long wan samting.

Brian: Hemia nao. Be Baebol i tokbaot sam rul we oli wok gud. Yumitu save luk long Efesas japta 5, vas 22, 23, mo 28. Sipos yu glad, yu save ridim ol vas ya.

Eric: I stret. Vas i talem se: “Yufala ol woman we i mared. Yufala i mas ona long ol man blong yufala, olsem we yufala i stap ona long Masta blong yumi, from we man i hed blong woman blong hem, olsem we Kraes i hed blong jos. Kraes i sevem jos ya finis, we jos ya i bodi blong hem.” Mo vas 28 i se: “Long sem fasin, man i mas lavem woman blong hem, i mas lukaot gud long hem, olsem we i stap lukaot gud long bodi blong hem nomo. Taem man i stap lukaot gud long woman blong hem, i olsem we hem i stap lukaot gud long bodi blong hem nomo.”

Brian: Gud. Tangkiu. ?Yu ting se sipos hasban mo waef tufala i folem advaes ya, mared blong tufala i save kam gud?

Eric: Yes, maet. From we i isi nomo blong talem, be i had blong mekem.

Brian: Hemia i tru, from we yumi evriwan i sinman. Be long semfala japta ya, i gat wan vas we i leftemap tingting blong yumi blong yumi no mekem i strong tumas long narafala. * Sipos wan man i wantem fren gud wetem narafala, hem i mas gat stret tingting mo hem i mas glad blong lesin long narafala. Mi mo waef blong mi, mitufala i faenem se ol rul blong Baebol oli givhan long mitufala blong skelemgud ol samting we mitufala i mekem.

Eric: Mi glad blong save samting ya.

Brian: Ol Witnes blong Jehova oli gat wan Websaet, mo i gat ol gudfala advaes we oli save givhan long mared mo famle laef. Sipos yu glad, mi save soem Websaet ya long yu naoia.

Eric: Oke i gud. Mi gat smol taem i stap.

Brian: Gud. Adres blong Websaet ya, hem i www.jw.org/bi. Hemia fas pej blong websaet ya.

Eric: Mi laekem ol pija ya.

Brian: Hemia ol pija we oli soemaot wok we mifala i stap mekem long fulwol. Ah yes, hemia nao. Mifala i gat wan laebri long ples ya, mo yu save faenem ol atikol  we oli tokbaot Mared. Yu go long ples we i talem lukaotem, mo yu taepem mared, ale bambae yu luk ol defdefren atikol we oli kamaot. ?I gat wan long ol atikol ya we yu laekem?

Eric: Yes. Hemia we i se, “?From Wanem Mared i Wan Samting We Yu Mas Tinghae Long Hem?” !Mi ting se mi save yusum hemia!

Brian: Atikol ya i tokbaot sam rod we i save givhan long man mo woman we tufala i mared blong gat wan gudfala mared. Yu traem luk haf ya. ?Yu glad blong ridim?

Eric: Yes oke. Haf ya i talem se: “Blong tinghae long mared, man mo woman tufala i mas ona long tufala.”

Brian: I gat wan vas blong Baebol we i stap. ?Yu glad blong ridim?

Eric: Yes, mi luk. Efesas 5:33, i talem se: “Mo bakegen, i blong yufala wanwan. Man i mas lavem woman blong hem, i mas lukaot gud long hem olsem we i stap lukaot gud long bodi blong hem nomo. Mo woman i mas ona gud long man blong hem.”

Brian: Taswe, ?yu makem samting we man mo woman we tufala i mared, tufala i mas mekem?

Eric: Mi no kasemsave wanem we yu talem.

Brian: Oke, ?yu ting se wan man i wantem se waef blong hem i respektem hem? ?Mo yu ting se wan woman i wantem se man blong hem i mas gat strong tingting blong lavem hem?

Eric: Yes. Hemia i tru.

Brian: Sipos wan hasban i lukaot rod oltaem blong soem lav long waef blong hem, ?yu ting se bambae i isi blong waef blong hem i respektem hem?

Eric: Mi harem olsem se samting we yu talem i stret.

Brian: Taswe, vas ya long Baebol, nating se oli raetem klosap 2,000 yia finis, be ol advaes blong hem oli gud yet tede, long ol man mo woman we oli mared. Sipos oli folem ol advaes ya, bambae oli save glad long mared blong olgeta. Vas we yumi ridim i soemaot se, i impoten blong wan man mo woman we tufala i mared, tufala i mas lavlavem tufala oltaem.

Eric: Mi mas talem tru se, i gat plante samting we Baebol i talem, i bitim wanem we mi mi tingbaot.

Brian: Mi glad blong harem tingting blong yu, Eric. Mi glad blong luk yu bakegen long ples ya mo yumitu save tokbaot smol stamba tok long semfala atikol ya, we i talem se, “Spenem Taem Tugeta” we i stap long Websaet blong mifala. *

Eric: Yes. Mi mo waef blong mi, bambae mitufala i lukluk tugeta.

?I gat sam kwestin we yu yu wantem save ansa blong olgeta? ?Yu yu wantem save moa long bilif mo ol wok we ol Witnes blong Jehova oli stap mekem? Sipos i olsem, yu no fraet blong toktok wetem ol Witnes. Olgeta bambae oli glad nomo blong tokbaot ol samting ya wetem yu.

^ par. 63 Sipos yu wantem save moa, yu luk japta 14 blong buk ya ?Wanem Samting We Baebol i Rili Tijim? we ol Witnes blong Jehova oli wokem.