Go long ol haf insaed long hem

Go long lis blong ol haf

 WAN WITNES I STORIAN WETEM NARAFALA

Does God Care About Our Suffering?

Does God Care About Our Suffering?

Haf ya i tokbaot wan Witnes we i stap storian wetem narafala. Yu traem tingbaot se, wan Witnes we nem blong hem Maria i kam long haos blong wan woman nem blong hem Sofia, nao tufala i stap storian.

?FROM WANEM GOD I LETEM OL SAMTING YA OLI HAPEN?

Maria: Mi mi kam long haos blong yu tede blong givim wan samting long yu. Hemia smol pepa ya se, ?Yu Yu Wantem Save Trutok?

Sofia: ?Hemia blong wanem ya, blong skul?

Maria: Yes. Yu luk se long fored blong pepa ya i gat sikis kwestin, hemia se—

Sofia: !Eh! Yu no westem taem blong toktok wetem mi.

Maria: ?From wanem yu talem olsem?

Sofia: From we mi mi no bilif long God.

Maria: Mi glad we yu talemaot tingting blong yu long mi. ?Be longtaem finis yu yu no bilif long God?

Sofia: No, fastaem mi mi stap go long jos. Be longtaem nao mi mi no moa go.

Maria: !A yes! Sore mi no talem nem blong mi long yu. Nem blong mi Maria.

Sofia: Mi Sofia.

Maria: Mi glad blong mitim yu.

Sofia: I Gud blong luk yu tu.

Maria: Yu luk Sofia, mi mi no kam blong fosem yu blong yu bilif olsem mi. Mi wantem askem wan kwestin long yu. ?I gat wan samting we i mekem se yu yu no bilif long God?

Sofia: Yes. Mama blong mi i bin aksiden long wan trak, 17 yia i pas finis.

Maria: Oh, mi sore blong harem samting ya. ?Afta wanem i hapen long hem?

Sofia: Aksiden ya i mekem se, kam kasem naoia, hem i no moa save wokbaot.

Maria: Oh man sore tumas. Mi save se hemia i mekem yu yu harem nogud tumas.

Sofia: Yes, hemia nao i mekem se tingting blong mi i fasfas. Mi stap tingbaot se, ?sipos God i stap, from wanem hem i letem samting ya i hapen? ?From wanem hem i letem yumi harem nogud olsem?

?I RONG BLONG ASKEM OL KWESTIN OLSEM?

Maria: I no rong blong gat tingting olsem, mo i stret nomo we yu askem ol kwestin ya. Taem yumi harem nogud, oltaem yumi wantem save se from wanem samting olsem i hapen. ?Yu yu save se Baebol i tokbaot sam man blong God we olgeta tu oli stap askem ol kwestin olsem?

Sofia: No.

Maria: ?Yu yu glad sipos mi soem wan eksampol blong wan man we Baebol i tokbaot?

Sofia: Yes i oraet.

Maria: Yu traem luk wanem we profet Habakuk i askem long God. Bambae yumitu ridim long Habakuk 1:2, 3, we i talem se: “Hae God. Naoia, long ples blong mifala, ol man oli stap faet, oli stap kilkilim olgeta oli ded. Oltaem, mi stap krae i kam long yu blong yu givhan long mifala. ?Be wetaem bambae yu harem mi, yu tekemaot mifala long ol trabol ya? ?From wanem yu letem mi mi stap luk ol trabol ya olsem?” ?Olsem wanem? ?Yu luk se ol kwestin ya oli sem mak long ol kwestin we yu yu stap askem?

Sofia: Yes.

Maria: ?Yu ting se God i kros long Habakuk from we hem i askem ol kwestin olsem? ?Yu ting se God i talem long hem se hem i nidim moa bilif? !Nogat!

Sofia: !Man i tru ya!

JEHOVA I NO LAEKEM NATING BLONG LUK WE MAN I SAFA

Maria: Baebol i talem se God stap luk ol samting we i mekem yumi harem nogud, mo hem i stap tingbaot yumi.

Sofia: ?Yu minim wanem?

Maria: Bambae mi soem wan eksampol we i stap long Eksodas 3:7. ?Yu yu glad blong ridim vas ya?

Sofia: Oke, i talem se: “Nao Hae God i talem long hem se, ‘Yufala ol laen blong Isrel, yufala i man blong mi, mo mi mi luk finis ol rabis fasin ya we ol man Ijip oli stap mekem long yufala. Mi harem krae blong olgeta ya we oli stap long Ijip, we oli wantem mi mi tekemaot  olgeta long han blong ol man ya we oli stap fosem olgeta blong oli wok slef blong olgeta. Mi mi save finis we oli harem nogud tumas, mo oltaem mi stap tingting long olgeta.’”

Maria: Tangkiu. Folem vas ya we yu ridim, ?yu ting se God i luk ol trabol we ol man blong hem oli stap kasem?

Sofia: Yes, hem i luk trabol blong olgeta.

Maria: God i no lukluk nomo trabol we i kasem olgeta. Yu traem luk samting we las haf blong vas ya i talem. God i talem se: “Mi mi save finis we oli harem nogud tumas, mo oltaem mi stap tingting long olgeta.” ?Ol tok ya oli soemaot se God i tingbaot yumi?

Sofia: Yes, hem i tingbaot yumi.

Maria: Yes. God i no stap lukluk ol trabol blong yumi nomo, be hem i harem nogud tu, taem yumi kasem trabol.

Sofia: !Man tru ya!

Maria: Yu tingbaot fas eksampol ya, mo naoia bambae yumitu luk wan narafala eksampol bakegen. Bambae yumitu ridim long Sekaraea 2:8. Long fas haf blong vas ya i talem se: “Taem wan man i kilim yufala, i olsem we man ya i kilim ae blong mi stret.” ?Yu ting se taem ol man blong God oli harem nogud, hemia i mekem God i harem nogud tu?

Sofia: Yes i luk olsem se hem tu i harem nogud.

Maria: I tru Sofia, God i tingbaot yumi, mo hem i no laekem nating blong luk yumi harem nogud. Taem yumi harem nogud, hem tu i harem nogud wetem yumi.

?FROM WANEM JEHOVA I NO MEKEM WAN SAMTING?

Maria: Bifo mi go, mi wantem talem wan samting long yu.

Sofia: I stret nomo.

Maria: Yu traem tingbaot samting we Baebol i talem long saed blong paoa blong God. Mi stap tingbaot wan vas, hemia long Jeremaea 10:12. ?Yu glad blong ridim vas ya plis?

Sofia: Yes. “Nao Profet Jeremaea i leftemap nem blong Hae God, i talem se, ‘Hae God i mekem wol ya long paoa blong hem nomo. Long waes blong hem, hem i putum wol ya i stap gud, mo long save blong hem, hem i putum skae long ples blong hem.’”

Maria: Tangkiu. Yu traem tingbaot. ?Yu ting se God i gat bigfala paoa blong wokem heven mo wol wetem olgeta samting we oli stap long tufala?

Sofia: Yes.

Maria: Sipos God i gat paoa blong wokem evri samting we yumi luk raonabaot long yumi, ?yu ting se hem i gat paoa tu blong finisim ol trabol we oli stap mekem yumi harem nogud?

Sofia: Yes.

Maria: Tingbaot mama blong yu. ?From wanem yu yu wari taem yu luk se mama blong yu i harem nogud?

Sofia: Hemia from we hem i mama blong mi, mo mi lavem hem.

Maria: I tru mo sipos yu gat paoa blong mekem hem i kamgud bakegen, ?bambae yu yu mekem?

Sofia: Yes, bambae mi mekem ya.

Maria: Baebol i talem se God i gat bigfala paoa, hem i luk we yumi stap harem nogud, mo hem i sore long yumi. Yu traem tingbaot. God i save tekem aksen kwiktaem nomo blong finisim ol trabol we i mekem yumi harem nogud. Be hem i no mekem olsem. ?From wanem? From we hem i bos gud long tingting blong hem.

Sofia: Man, mi neva tingbaot samting ya.

Maria: ?From wanem God i tekem longtaem tumas blong finisim ol trabol we yumi kasem? ?Yu ting se hem i gat wan gudfala risen blong mekem olsem? *

Sofia: Ating yes.

Maria: Mi harem se mobaelfon blong yu i ring, ?i oraet sipos mi kambak long wan narafala taem blong yumitu save storian moa long samting ya?

Sofia: Yes i oraet nomo, mi glad. Tangkiu tumas. *

I gat sam kwestin we yu yu wantem save ansa blong olgeta? ?Yu yu wantem save moa long bilif mo wok we ol Witnes blong Jehova oli stap mekem? Sipos i olsem, yu no fraet blong toktok wetem ol Witnes. Olgeta bambae oli glad nomo blong tokbaot ol samting ya wetem yu.

^ par. 61 Sipos yu wantem save moa, yu luk japta 11 blong buk ya ?Wanem Samting We Baebol i Rili Tijim? we ol Witnes blong Jehova oli wokem.

^ par. 64 Nekis Wajtaoa bambae i tokbaot from wanem God i letem man i safa.