Go long ol haf insaed long hem

Go long lis blong ol haf

Ol Jajmen Blong God, ?Yu Ting Se Oli Spolem Ol Man?

Ol Jajmen Blong God, ?Yu Ting Se Oli Spolem Ol Man?

BLONG kasem ansa blong kwestin ya, bambae yumi tokbaot tu jajmen blong God, we Baebol i tokbaot. Faswan hemia bigfala wota we i ron long taem blong Noa, mo nambatu hemia taem God i jajem ol man Kenan.

BIGFALA WOTA WE I RON LONG TAEM BLONG NOA

SAMTING WE OL MAN OLI TALEM: “God i stap spolem ol man, taem hem i mekem bigfala wota i ron mo i kilim olgeta man oli ded, mo i sevem Noa nomo wetem famle blong hem.”

SAMTING WE BAEBOL I TALEM: God i talem se: “Mi mi no glad nating blong luk wan man nogud i ded long sin blong hem. Mi wantem luk we hem i tanem tingting blong hem, i lego ol sin blong hem, nao bambae i laef i stap.” (Esikel 33:11) Sipos i olsem, i minim se God i no laekem nating blong spolem ol nogud man long taem blong Noa. ?Be from wanem hem i spolem ol nogud man ya?

Baebol i talem se taem God i jajem ol nogud man long taem bifo, hem i “soemaot fasin we hem i save mekem long ol man we oli kam biaen, we oli no obei long hem.” (2 Pita 2:5, 6) Yes, taem yumi tingbaot ol jajmen we God i mekem bifo, blong spolem ol nogud man, yumi kasem save moa long filing blong God mo fasin blong hem blong panisim ol man. ?Wanem sam long ol samting we yumi lanem long ol jajmen we God i mekem bifo?

Faswan samting se, nating we God i harem nogud taem hem i spolem ol man, be hem i givim panis long ol man we oli stap spolem narafala. Hem i mas jajem olgeta from samting we oli mekem. Mo biaen, bambae hem i finisim ol fasin we oli no stret, mo fasin ya blong mekem narafala i harem nogud.

Nambatu samting se, from we God i lavem ol man, hem i givim woning fastaem long olgeta bifo we hem i jajem olgeta. Noa i wan prija we i stap talemaot stret fasin, be plante man oli no wantem lesin long hem. Baebol i talem se ol man ya oli no wantem “save se bambae trabol i kam, gogo wota i ron bigwan, i tekemaot olgeta.”—Matiu 24:39.

?I tru se God i givim woning fastaem, bifo we i panisim wan man? Yes. Hem i mekem olsem long ol man blong hem long Isrel bifo. Hem i givim woning long olgeta se, sipos oli mekem ol rabis fasin olsem ol man blong ol narafala kantri, bambae hem letem ol enemi oli kam spolem ples blong olgeta, taon blong olgeta hemia Jerusalem, mo bambae oli tekemaot olgeta oli go wok slef long wan narafala kantri. ?Olsem wanem? ?Ol man Isrel oli obei? Nogat. Oli mekem ol rabis fasin, mo oli bonem ol pikinini blong olgeta tu long faea blong mekem sakrefaes. ?Ale, Jehova i mekem wanem? Jehova i panisim ol man ya. Be bifo we hem i panisim olgeta, hem i sanem ol profet oli go givim woning long olgeta, bakegen mo bakegen, blong oli tanem tingting blong olgeta. Profet Amos i tokbaot Jehova i se: “Hae God i Masta blong yumi, mo ol profet oli man blong wok blong hem, mo oltaem, sipos hem i wantem  mekem wan samting, hem i stap soemaot ol plan blong hem fastaem long olgeta.”—Amos 3:7.

?FROM WANEM YUMI MAS SAVE ANSA?: Ol fasin we Jehova i soemaot taem hem i jajem ol man long taem bifo, oli givhan long yumi blong yumi putum tingting blong yumi i strong long wan gudfala fiuja. Hemia se yumi wet blong luk taem ya we Jehova bambae i jajem ol man we oli stap spolem narafala man, mo oli mekem narafala i harem nogud. Baebol i talem se: “Ol man nogud, Hae God bambae i ronemaot olgeta. . . . Ol man we tingting blong olgeta i stap daon, bambae oli tekem graon ya i blong olgeta. Nao bambae oli harem gud, from we oli stap gud, mo oli gat plante samting.” (Ol Sam 37:9-11) ?Wanem tingting blong yu long wan jajmen we i mekem se ol man oli no moa harem nogud? ?Yu ting se jajmen olsem i soemaot se God i stap spolem ol man, no hem i gat sore long man?

GOD I PANISIM OL MAN KENAN

SAMTING WE OL MAN OLI TALEM: “Faet ya we God i mekem blong panisim ol man Kenan, hem i nogud tumas. God i mekem i strong tumas long olgeta. Faet ya i bitim ol faet tede we tu laen i kilkilim tufala i ded.”

SAMTING WE BAEBOL I TALEM: “Fasin blong [God] i gud tumas, mo hem i stret olwe nomo. . . . Oltaem, tingting blong hem bambae i stap strong long [ol man blong hem]. Oltaem hem i stap mekem ol samting we i stret.” (Dutronome 32:4) God i jajem man long stret fasin. Taswe hemia i no sem mak long ol faet we ol man oli mekem. ?From wanem? From we God i save luk samting we i stap long hat blong man, be yumi ol man yumi no save luk samting ya.

Wan eksampol hemia taem God i jajem tufala taon ya Sodom mo Gomora. Hem i promes se bambae hem spolem gud tufala taon ya. Ebraham i wantem meksua se samting we God bambae i mekem i stret. Hem i no ting se “God bambae i kilim ol man nogud wetem ol stret man.” God i gat longfala tingting. Hem i talem long Ebraham se sipos i gat ten man nomo long Sodom we oli gat stret fasin, bambae hem i no save spolem taon ya. (Jenesis 18:20-33) Yes, i klia nomo se God i save gud tingting blong ol man ya, mo hem i save se rabis fasin blong olgeta i bigwan olsem wanem.—1 Kronikel 28:9.

Long sem fasin, God i jajem ol man Kenan mo hem i promes blong spolem gud olgeta from we fasin blong olgeta i nogud tumas. Ol man oli savegud ol man Kenan, from fasin blong olgeta blong spolem ol man, mo blong bonem pikinini blong olgeta blong mekem sakrefaes long ol narafala god. * (2 King 16:3) God i talem long ol man Isrel se bambae oli tekem kantri blong Kenan. Ol man Kenan oli save samting ya finis be oli girap oli jusum blong stap long kantri ya, mo oli faet agens long ol man Isrel. Hemia i soemaot se oli agensem Jehova tu from we Jehova i stap wetem ol man Isrel.

Mo tu, God i sore long ol man Kenan we oli tanem tingting blong olgeta from ol rabis fasin blong olgeta, mo oli folem ol rul blong God long saed blong klin fasin. Wan eksampol hemia Rehab we fastaem hem i wan woman blong rod. God i sevem hem wetem famle blong hem. Mo tu, taem ol man Kenan long taon ya Gibeon oli askem long God blong i sore long olgeta, God i sevem olgeta evriwan wetem ol pikinini blong olgeta.—Josua 6:25; 9:3, 24-26.

?FROM WANEM YUMI MAS SAVE ANSA?: Jajmen we God i mekem long ol man Kenan, i tijim yumi long wan impoten samting. Yumi stap kam klosap tumas long “Dei ya we God bambae i jajem ol man we oli no obei long hem.” (2 Pita 3:7) Sipos yumi lavem Jehova, bambae yumi harem gud, taem bambae hem i spolem ol rabis man we oli stap mekem i strong tumas long ol man, mo we oli sakemaot stret fasin blong hem.

Ol man oli savegud ol man Kenan se oli stap spolem narafala, mo oli agensem God mo ol man blong hem

Jehova i lavem ol man. Hem i talem long ol papa mo mama se samting we tufala i jusum, i save mekem se pikinini blong tufala i kasem laef, no i ded. Baebol i talem se: “!Mi mi wantem tumas blong yufala i jusumaot laef! Hae God i God blong yumi, mo yufala i mas lavem hem, yufala i mas obei long hem, mo oltaem, tingting blong yufala i mas strong long hem. Sipos yufala i mekem olsem, bambae yufala wetem ol pikinini blong yufala . . . yufala evriwan i laef.” (Dutronome 30:19, 20) Taem yu ridim ol tok ya, ?yu ting se hemia i toktok blong wan God we i stap spolem ol man? ?No hem i toktok blong wan God we i lavem ol man, mo i wantem we oli mekem ol desisen we oli stret?

^ par. 15 Ol man blong digim graon oli faenemaot sam samting we i soemaot se, ol man Kenan bifo oli stap bonem ol bebi blong mekem sakrefaes long ol god blong olgeta.