Go long ol haf insaed long hem

Go long lis blong ol haf

 KWESTIN BLONG OLGETA WE OLI RIDIM MAGASIN YA . . .

?Jisas i Promes Long Man Ya Blong Brekem Loa Se Bambae Hem i Laef Long Heven?

?Jisas i Promes Long Man Ya Blong Brekem Loa Se Bambae Hem i Laef Long Heven?

Kwestin ya i kamaot from we Jisas i promes long wan man blong brekem loa we i hang long pos klosap long hem, se bambae hem i laef long Paradaes. Folem Baebol long Bislama, Jisas i talem se: “Tru mi mi talem long yu. Tede, yu bambae yu stap wetem mi long Paradaes.” (Luk 23:43) Be, long ol olfala hanraet blong Baebol, oli tanem tok ya olsem: ‘Tru mi mi talem long yu tede, se bambae yu yu stap wetem mi long Paradaes.’ Jisas i no stap talem long man ya se, long sem dei ya bambae hem i go laef wetem hem long heven. ?Yumi save samting ya olsem wanem? I gud blong makem se Jisas i no talem ples we Paradaes ya bambae i stap long hem. ?Olsem wanem? ?Jisas i minim se man ya bambae i go laef wetem hem long heven?

I gud we fastaem yumi luk sipos man ya i gat ol fasin we i mekem se hem i save laef long heven, no nogat. Olgeta man we oli gat hop ya blong laef long heven, oli mas baptaes long wota mo long tabu spirit. Olsem nao, oli kam disaepol blong Jisas mo oli kam pikinini blong God. (Jon 3:3, 5) Wan narafala samting se, oli mas folem ol rul blong God long saed blong ol gudfala fasin, mo oli mas soemaot ol fasin olsem tingting daon, holemstrong long God mo sore long man. (1 Korin 6:9-11) Oli mas stap tru long God mo long Kraes go kasem en blong laef blong olgeta long wol ya. (Luk 22:28-30; 2 Timoti 2:12) Sipos oli wokem ol fasin ya, God i luk se i stret blong oli laef bakegen mo oli naf blong mekem bigfala wok we i stap wet long olgeta long heven. Hemia blong oli pris mo oli king wetem Kraes long heven, blong rul antap long ol man, gogo wan taosen yia i pas.—Revelesen 20:6.

Be man ya we i hang long pos klosap long Jisas, hem i wan man blong brekem loa, taswe hem i mas ded olsem wan man blong brekem loa. (Luk 23:32, 39-41) I tru, man ya i gat respek long Jisas, taem hem i talem se: “Taem we yu yu kam King, nao yu kam long paoa blong yu, plis yu tingbaot mi bakegen.” (Luk 23:42) Be hem i no baptaes blong kam wan disaepol blong Jisas we tabu spirit i makemaot hem. Mo long laef blong hem, hem i no mekem samting we i stret mo hem i no obei long God. Hem i no olsem ol gudfala man blong Jisas we oli soemaot se oli holemstrong long God kasem we oli ded. Taswe, ?yu ting se Jisas bambae i promes long man ya blong i joen wetem hem mo ol man blong hem, blong oli rul long heven?—Rom 2:6, 7.

Yu traem tingbaot pijatok ya. Sipos wan man i stilim mane blong yu, nao hem i kambak, i askem blong yu fogivim hem. Ating bambae yu no putum hem long kot. ?Be yu ting se yu save trastem hem blong i lukaot long bisnes blong yu no long famle blong yu? Nogat. Bambae yu wantem moa blong askem long wan man we yu trastem hem fulwan blong i mekem ol wok ya. Long sem fasin, olgeta man we bambae oli go laef long heven, oli mas pruvum long laef blong olgeta se oli stap leftemap ol rul blong God. Mo God i trastem olgeta fulwan se bambae oli save soemaot ol fasin ya taem oli rulum ol man. (Revelesen 2:10) Man ya blong brekem loa i no soemaot samting ya long laef blong hem, nating se hem i tanem tingting blong hem long las minit nomo.

?Be i tru se Jisas i talem long man ya blong i go stap long heven long sem dei ya? Samting ya i no tru from we Jisas i no go antap long heven long sem dei ya. Hem i stap “insaed long graon,” no long beregraon blong tri dei. (Matiu 12:40; Mak 10:34) Mo afta we hem i laef bakegen, hem i stap 40 dei long wol, bifo we hem i go long heven. (Ol Wok 1:3, 9) Taswe, man ya i no go stap long heven wetem Jisas long sem dei ya we Jisas i toktok long hem.

?Ale, wanem mining blong Paradaes we Jisas i tokbaot? Jisas i min se taem man ya i laef bakegen long ded, bambae hem i save harem gud long Paradaes we bambae i stap long wol ya, we Jisas nao bambae i rul long hem. (Ol Wok 24:15; Revelesen 21:3, 4) Sipos yu wantem kasem save moa long saed blong Paradaes ya, mo blong faenemaot samting we yu mas mekem blong stap long hem, i gud yu toktok wetem wan Witnes blong Jehova.

?Jisas i Promes Long Man Ya Blong Brekem Loa Se Bambae Hem i Laef Long Heven?bambae-yu-stap-wetem-mi-long-paradaes?Jisas i Promes Long Rabis Man Se Bambae Hem i Laef Long Heven? | KWESTIN&ANSA‘Tru mi talem long yu. Tede, bambae yu stap wetem mi long Paradaes.’ Tok blong Jisas long Luk 23, i mekem kwestin i kamaot se: ?Man ya bambae i laef wea?jisas, paradaes, heven, luk 23, man blong brekem loa, laef long heven?Jisas i Promes Long Man Ya Blong Brekem Loa Se Bambae Hem i Laef Long Heven??Jisas i promes long man ya blong brekem loa se bambae hem i laef long heven?Jisas i talem long rabis man ya se: “Bambae yu stap wetem mi long Paradaes.” ?Hem i minim wanem??Jisas i Promes Long Man Ya Blong Brekem Loa Se Bambae Hem i Laef Long Heven??Jisas i promes long man ya blong brekem loa se bambae hem i laef long heven?