Go long ol haf insaed long hem

Go long lis blong ol haf

Yu Mas Wekap Gud Olsem Jeremaea

Yu Mas Wekap Gud Olsem Jeremaea

 Yu Mas Wekap Gud Olsem Jeremaea

“Mi [Jehova] mi stap lukluk, blong mekem se tok ya we mi mi talem bambae i kamtru.”—JER. 1:12.

1, 2. ?From wanem Jehova i yusum pijatok blong tri ya amon, blong tokbaot fasin blong hem blong “stap lukluk”?

OLBAOT long ol hil blong Lebanon mo Isrel, i gat wan tri we oli kolem amon. Evri yia, klosap long en blong Jenuware mo stat blong Februari, tri ya i wan long ol fas tri blong karem flaoa. Ol flaoa blong tri ya amon, oli naes tumas, oli hafhaf red mo waet. Long lanwis Hibru, ol man oli putum nem blong tri ya se, “hemia we i girap eli.”

2 Taem Jehova i jusum Jeremaea blong i kam profet blong hem, hem i yusum tri ya amon we i girap eli, olsem wan pijatok blong soemaot wan trutok we i impoten tumas. Taem Jeremaea i statem wok blong hem olsem profet, Jehova i soem wan vison long hem. Long vison ya hem i luk wan han blong tri ya amon. ?Wanem mining blong samting ya? Jehova i talem se: “Mi mi stap lukluk, blong mekem se tok ya we mi mi talem bambae i kamtru.” (Jer. 1:11, 12) Jehova i yusum pijatok ya blong talem se, hem tu i stap girap eli olsem tri ya amon we hem i faswan blong givim flaoa evri yia. Yes, Jehova i talemaot eli long ol man wanem we bambae hem i mekem long fiuja, i min se hem i talemaot ol samting longtaem bifo we oli hapen. Mo tu, Jehova i “stap lukluk,” blong meksua se ol samting we hem i talem bambae oli kamtru. Jehova i mekem olsem long ol man Juda. Hem i sanem ol profet blong hem oli go blong givim woning long olgeta. Ol profet ya oli talemaot panis we bambae oli kasem sipos oli no obei long Jehova. (Jer. 7:25) Jehova i “stap lukluk,” go kasem taem we profet tok blong hem i kamtru. Ale long yia 607 B.K.T., long stret taem we Jehova i jusum, panis we Hem i talemaot i kasem neson blong Juda we i tanem baksaed long tru wosip.

3. ?Yumi mas bilif strong long wanem samting long saed blong Jehova?

 3 Tede tu, Jehova i stap lukluk blong meksua se tok blong hem i kamtru. Jehova i no save mestem blong mekem tok blong hem i kamtru. ?Ale, fasin ya blong Jehova we hem i stap lukluk olsem, i mas gat paoa long yu olsem wanem? Long yia we yumi stap long hem naoia, hemia yia 2011, ?yu yu bilif strong se Jehova i “stap lukluk” blong mekem ol promes blong hem oli kamtru? Ol promes blong Jehova bambae oli kamtru, be sipos tingting blong yumi i hafhaf long saed blong sam long ol promes ya, ale naoia i taem blong wekap. Yumi no mas letem slip i winim yumi. (Rom 13:11) Jeremaea i wan profet blong Jehova, mo hem i wekap gud oltaem. I gud yumi tingbaot wanem we Jeremaea i mekem blong stap wekap. Mo i gud yumi tingbaot from wanem Jeremaea i stap wekap blong mekem ol wok we God i givim long hem. Hemia i save halpem yumi blong luk wanem samting we yumi save mekem blong gohed strong long wok we Jehova i givim long yumi.

Wan Nius We i Impoten Tumas

4. ?Wanem i mekem se i no isi blong Jeremaea i mekem wok ya we God i givim long hem? ?From wanem i impoten tumas we nius ya i kasem ol man hareap?

4 Ating Jeremaea i gat samwe long 25 yia blong hem taem Jehova i givim wok long hem olsem wajman. (Jer. 1:1, 2) Nating se i olsem, Jeremaea i harem olsem se hem i yangfala tumas, hem i no naf blong toktok long ol lida blong neson blong hem. Ol man ya oli olfala moa long hem mo oli holem bigfala wok long ples blong hem. (Jer. 1:6) Hem i mas tok long ol giaman profet, ol haeman, ol pris, mo olgeta we oli “gohed blong mekem ol rabis fasin” nao oli ‘gowe long God, mo oli no wantem kambak.’ Hem i mas talemaot rong blong olgeta mo i mas talemaot panis we Jehova bambae i givim long olgeta. (Jer. 6:13; 8:5, 6) Haos blong God we King Solomon i wokem, hem i stamba ples blong wosip we Jehova i agri long hem blong klosap fo handred yia. Be Jehova i talem se bambae i spolem ples ya mo bambae hem i stap olsem ples nating nomo. Ol man blong narafala kantri bambae oli kam, oli spolem Jerusalem mo Juda, mo ol man we oli stap long ples ya bambae oli go kalabus. Hemia nao nius we Jeremaea i mas go talemaot long ol manples blong hem. !I klia se nius ya i impoten tumas mo hem i mas hareap blong talemaot!

5, 6. (a) ?Jehova i stap yusum grup ya we i olsem Jeremaea tede blong oli mekem wanem? (b) ?Long stadi ya bambae yumi tokbaot wanem?

5 Jehova i lavem ol man long wol. Taswe tede, hem i jusum wan grup blong ol Kristin we tabu spirit i makemaot olgeta, blong oli mekem wok olsem wajman. Oli mas givim woning long ol man se i no longtaem bambae God i jajem wol ya. Plante plante yia finis grup ya i mekem wok olsem Jeremaea. Oli stap talem long ol man se yumi mas tingting gud long ol samting we oli stap hapen long taem blong yumi. (Jer. 6:17) Baebol i soemaot we Jehova i gat ol plan blong hem mo hem i makemaot stret taem blong mekem olgeta oli kamtru. Hem i no stap tektaem tumas blong mekem samting. Dei blong hem bambae i kam long stret taem we hem i makem finis, mo bambae i kam long wan taem we man i no save.—Sef. 3:8; Mak 13:33; 2 Pita 3:9, 10.

6 Yumi no mas fogetem se bambae Jehova i mekem niufala wol ya we stret fasin nomo i stap long hem, i kamtru i no longtaem. Grup ya we i olsem Jeremaea, oli save samting ya, taswe oli wok strong. Mo save ya i halpem ol fren blong olgeta, we olgeta tu oli man blong Jehova, blong oli wekap oltaem blong luksave se i impoten tumas blong talemaot tok ya naoia. ?Save ya i mekem wanem long yu? Jisas i talem se olgeta man oli mas jusum blong stanap long saed blong Kingdom blong God. Long stadi ya, bambae yumi tokbaot tri gudfala fasin we oli givhan long Jeremaea, blong hem i wekap oltaem blong mekem wok ya we God i givim long hem. Mo trifala fasin ya oli save halpem yumi tu, blong yumi wekap olsem Jeremaea.

Lavem Ol Man

7. Nating se wok blong Jeremaea i had, ?olsem wanem lav i pusum hem blong prij?

7 ?Wanem i pusum Jeremaea blong prij, nating se i no isi? Jeremaea i lavem ol man. Hem i save se ol man oli trabol tumas, mo trabol blong olgeta i kamaot from we ol lida oli no mekem gud wok blong olgeta blong lukaot long ol man. (Jer. 23:1, 2) From we Jeremaea i save samting ya, hem i soemaot se hem i lavem ol man mo i gat sore long olgeta. Hem i wantem we ol manples blong hem oli harem Tok blong God, mo hem i wantem we oli laef. Hem i tingting tumas long olgeta, nao hem i krae from we hem i save wanem trabol we bambae i kasem olgeta. (Ridim Jeremaea 8:21; 9:1.) Ol tok we Jeremaea i raetem long buk blong Ol Krae, oli soemaot gud se Jeremaea i laekem nem blong Jehova mo neson we i karem nem blong Jehova, mo hem i tingting plante long tufala samting ya. (Krae 4:6, 9) Ol man tede oli olsem ‘ol sipsip we oli trabol tumas, oli no moa gat paoa mo i no gat man blong lukaot long olgeta.’ ?Taem yu luk olgeta, yu  harem olsem wanem? Ating yu wantem tumas blong talemaot gudfala nius blong Kingdom blong God long olgeta, blong mekem olgeta oli harem gud. ?Yu yu harem olsemia?—Mat. 9:36.

8. ?Wanem i soemaot se Jeremaea i no kam kros taem hem i safa?

8 Jeremaea i safa long han blong ol man ya we hem i wantem tumas blong givhan long olgeta. Nating se i olsem, hem i no givimbak fasin nogud blong ol man ya, mo hem i no kam kros. Hem i gat longfala tingting mo hem i kaen gud long olgeta man, wetem rabis king ya Jedekia tu. Jedekia i givim raet long ol haeman blong oli kilim Jeremaea i ded. Be Jeremaea i no kros long king ya. Hem i askem strong long Jedekia blong i obei long Jehova. (Jer. 38:4, 5, 19, 20) ?Olsem wanem? ?Yumi lavem tumas ol man olsem we Jeremaea i lavem olgeta?

Yumi Mas Letem God i Mekem Tingting Blong Yumi i Strong

9. ?Wanem i soemaot se God nao i mekem tingting blong Jeremaea i strong?

9 Taem Jehova i givim wok long Jeremaea, fastaem Jeremaea i traem faenem eskius blong i no mekem wok ya. Fasin ya blong Jeremaea i soemaot we hem i no bon wetem strong tingting. Taswe bigfala paoa we Jeremaea i gat taem hem i mekem wok blong profet, i kamaot from we hem i trastem Jehova fulwan. Tru ya, Jehova i “olsem wan strong man blong faet” we i stap wetem profet ya. Hem i givim paoa long Jeremaea blong hem i naf blong mekem wok blong hem. (Jer. 20:11) Ol man oli rimemba gud Jeremaea from we hem i gat strong tingting mo i no fraet. !Taswe taem Jisas i kam long wol mo i stap mekem wok blong Papa blong hem, sam man oli ting se Jisas hem i Jeremaea we i laef bakegen!—Mat. 16:13, 14.

10. ?Wanem wok we ol tabu Kristin oli mas mekem “long ol king blong olgeta kantri, wetem ol haeman”?

10 Jehova i “King blong ol man long olgeta kantri.” Hem i givim tok blong hem long Jeremaea, blong i go talemaot panis we bambae hem i givim long ol neson mo ol kingdom. (Jer. 10:6, 7) ?Olsem wanem long ol Kristin tede we tabu spirit i makemaot olgeta? ?Olgeta tu oli mas talemaot tok blong God “long ol king blong olgeta kantri, wetem ol haeman”? (Jer. 1:10) Hae King blong heven mo wol i givim wan wok long grup ya we i olsem Jeremaea, olsem we hem i bin givim wok long Jeremaea bifo. Taswe ol man blong God we tabu spirit i makemaot olgeta, oli gat raet blong talemaot ol tok blong God agens long ol neson mo kingdom blong wol. God ya we i Hae Olgeta i givim raet long olgeta. Oli yusum tok blong God, Baebol, blong talemaot se God bambae i rutumaot ol neson mo kingdom tede, mo bambae hem i spolem olgeta long taem we hem i jusum finis mo long rod we hem i wantem. (Jer. 18:7-10; Rev. 11:18) Olgeta we oli stap long grup ya we i olsem Jeremaea, oli gat strong tingting se bambae oli no lego wok ya we God i putum long han blong olgeta. Hemia wok blong talemaot long olgeta ples long wol, ol panis we Jehova bambae i givim long ol man nogud.

11. ?Wanem i save halpem yumi blong yumi gohed blong prij nating se yumi kasem hadtaem?

11 I tru, samtaem tingting blong yumi i foldaon taem ol man oli agensem yumi, oli no wantem save long nius we yumi stap talem long olgeta, mo taem yumi kasem sam narafala hadtaem. (2 Kor. 1:8) Be yumi mas gohed, olsem Jeremaea. Yumi no mas letem ol samting ya oli mekem yumi slak. Taswe yumi gohed blong prea long God, yumi askem long hem blong i givhan long yumi, yumi trastem hem blong i halpem yumi, mo yumi ‘mekem tingting blong yumi i strong.’ (1 Tes. 2:2) Yumi mekem ol samting ya from we yumi mas wekap gud blong mekem ol wok we God i putum long han blong yumi. Wan long ol wok ya, hemia blong gohed strong blong talemaot se olgeta giaman Kristin skul (Krisendom) bambae oli lus. Jerusalem bifo, we hem i tanem baksaed long Jehova, hem i lus. Hemia i olsem pija blong samting we bambae i hapen long Krisendom tede. Grup ya we i olsem Jeremaea i stap talemaot se naoia hem i dei blong Jehova blong ‘sevem man,’ be i no hemia nomo. Oli stap talemaot tu, se naoia hem i taem we Jehova bambae i “flatemdaon ol enemi” blong hem.—Aes. 61:1, 2; 2 Kor. 6:2.

Yumi Mas Glad

12. ?Olsem wanem yumi save se Jeremaea i glad long wok blong hem, mo wanem i halpem hem blong stap glad?

12 Jeremaea i glad long wok we hem i mekem. Hem i talem long Jehova se: “[Jehova]. Yu yu God blong mi, mo yu gat olgeta paoa. Mi mi man blong wok blong yu.Taem yu toktok long mi, mi lesin gud long tok blong yu, mo oltaem, tok ya blong yu i mekem mi mi harem gud, mi glad we mi glad.” (Jer. 15:16) Jeremaea i luksave se hem i stap wok long nem blong God ya we i tru, mo hem i stap talemaot tok blong God ya. Taswe hem i tinghae long wok ya. I gud blong makem poen ya se, taem Jeremaea i tingting tumas long ol tok we ol man oli talem blong jikim hem, hem i no moa  glad. Be taem hem i putum tingting blong hem i stap long tok ya we God i givim long hem blong talemaot, hem i tingbaot we tok ya i gud tumas mo i impoten tumas, ale hem i glad bakegen.—Jer. 20:8, 9.

13. ?From wanem i impoten tumas blong stadi long ol trutok we oli dip moa, blong yumi no lusum glad?

13 Tede, sipos yumi wantem glad oltaem long wok blong prij, yumi mas kakae ol “strong kakae.” Hemia i min se yumi mas kasem ol trutok blong Baebol we oli dip. (Hib. 5:14) Taem yumi stadi long ol save we i dip, yumi mekem bilif blong yumi i kam strong moa. (Kol. 2:6, 7) Samting ya i mekem we yumi luksave moa olsem wanem ol fasin blong yumi oli save mekem Jehova i glad. Sipos i had blong faenem wan taem we i stret blong rid mo stadi long Baebol, yumi mas lukluk gud long program blong yumi mo jenisim sam samting. Sipos yumi spenem sam minit nomo evri dei blong stadi mo tingting dip, hemia i naf blong pulum yumi i kam klosap moa long Jehova. Mo samting ya bambae i mekem yumi ‘harem gud, yumi glad we yumi glad,’ olsem Jeremaea.

14, 15. (a) ?Wanem gudfala frut i kamaot taem Jeremaea i holemstrong long wok we God i givim long hem? (b) ?Ol man blong God tede oli luksave wanem long saed blong wok blong prij?

14 Jeremaea i no kam slak blong talemaot ol woning mo panis blong Jehova. Be hem i tinghevi tu long narafala wok ya blong hem se i gat sam samting we hem i mas ‘wokem gud, mo stanemap i kam strong.’ (Jer. 1:10) Wok ya blong Jeremaea i karem frut. Sam man Jiu wetem sam man we oli no laen blong Isrel tu, oli no ded taem Babilon i spolem Jerusalem long yia 607 B.K.T. Long olgeta ya, i gat ol man  long laen blong Rekab, man ya Ebedmelek, mo Baruk. (Jer. 35:19; 39:15-18; 43:5-7) Ol fren ya blong Jeremaea oli holemstrong long God mo oli ona gud long God. Oli olsem pija blong ol man tede we oli gat hop blong laef olwe long wol, hemia ol fren blong grup ya we i olsem Jeremaea. Yes, grup ya we i olsem Jeremaea tede, i glad tumas blong wokem gud bilif blong “bigfala kampani” ya. (Rev. 7:9, NW) Long sem fasin, olgeta long bigfala kampani oli glad tumas blong givhan long ol man we oli wantem tumas blong save trutok.

15 Ol man blong God oli luksave se wok blong talemaot gud nius i givhan long ol man we oli harem, be i no hemia nomo. Hem i wan haf blong wosip we yumi mekem long God tu. Sipos man i lesin no man i no lesin, yumi glad nomo from we wok blong prij hem i wan wok we yumi mekem blong Jehova.—Sam 71:23; ridim Rom 1:9.

!Yu Mas ‘Wekap Gud’ Blong Mekem Wok We Yu Kasem!

16, 17. ?Olsem wanem ol tok blong Revelesen 17:10 mo Habakuk 2:3 oli soemaot se taem blong yumi i no taem blong slip?

16 Taem yumi tingbaot gud profet tok blong Revelesen 17:10, yumi luksave se yumi stap laef long wan taem we i impoten tumas, mo i no taem blong slip. Namba seven king ya, hemia Politik Paoa blong Inglan mo Amerika, i stanap finis mo i gohed yet blong rul. Baebol i tokbaot king ya se: “Taem we hem [namba seven king] i kamtru, bambae hem i stap smoltaem nomo.” Naoia “smoltaem” ya klosap bambae i finis. Profet Habakuk i leftemap tingting blong yumi taem hem i tokbaot en blong rabis wol ya, i se: “Taem blong ol samting ya i no kam yet . . . Maet yu luk se i tektaem tumas blong kam, be bambae i mas kamtru long stret taem blong hem, mo yu yu mas wet long hem.”—Hab. 2:3.

17 I gud yu tingbaot ol kwestin ya: ‘?Ol samting we mi mi mekem long laef blong mi oli soemaot we mi mi bilif se taem blong yumi i impoten tumas? ?Laef blong mi i soemaot se mi mi bilif we en i klosap? ?Ol desisen blong mi mo ol samting we oli impoten long mi, oli soemaot wanem? ?Oli soemaot we mi mi no moa bilif se en i klosap, no maet oli soemaot we mi mi no moa bilif se en bambae i kam?’

18, 19. ?From wanem i no taem blong slodaon naoia?

18 Wok blong grup ya we i olsem wajman, i no finis yet. (Ridim Jeremaea 1:17-19.) Yumi glad we ol Kristin we tabu spirit i makemaot olgeta oli stanap strong, oli olsem “wan taon we stonwol i goraon long hem,” mo oli “olsem pos we oli wokem long aean.” Olgeta ya oli lukluk i go long Tok blong God blong kasem paoa blong finisim wok blong olgeta. Trutok ya i olsem ‘strap we oli taetem finis long bel blong olgeta.’ (Efes. 6:14) Bigfala kampani tu i wok wetem strong tingting blong givhan long grup ya we i olsem Jeremaea long wok we God i givim long olgeta.

19 Naoia i no taem blong slodaon long wok blong Kingdom, be hem i taem blong tinghevi long tok ya we i stap long Jeremaea 12:5 (Ridim.) Yumi evriwan i stap kasem ol trabol mo yumi mas stanap strong. Ol trabol ya we oli traem bilif blong yumi, oli olsem ‘ol man we yumi stap resis wetem olgeta.’ Taem “bigfala trabol” i stap kam klosap moa, yumi mas tingbaot se bambae yumi kasem ol trabol we oli nogud moa. (Mat. 24:21) Ol trabol ya we oli nogud moa, bambae oli olsem we yumi stap resis wetem “ol hos.” Tru ya, man we i resis wetem ol hos hem i nidim paoa we i bigwan tumas, mo tingting blong hem i mas strong blong gohed blong resis. Taswe taem ol samting oli traem yumi naoia, yumi mas lanem fasin blong stanap strong. Samting ya i save mekem se yumi rere blong stanap strong long taem blong ol trabol we oli nogud moa.

20. ?Tingting blong yu i strong blong mekem wanem?

20 !Yumi evriwan i save folem fasin blong Jeremaea, mo yumi save finisim wok blong prij we God i givim long yumi! Jeremaea i gohed 67 yia blong mekem wok blong profet. Ol fasin olsem lav, strong tingting, mo glad, oli halpem hem blong i no lego wok ya. Ol naes flaoa blong tri ya amon oli mekem yumi tingbaot bakegen se Jehova i no stap slip. !Hem i “stap lukluk” blong mekem tok blong hem i kamtru! From samting ya, yumi mas stap wekap mo talemaot tok blong God. Jeremaea i naf blong mekem olsem, mo yumi tu yumi naf.

?Yu Yu Tingbaot?

• ?Fasin blong lavem man i givhan olsem wanem long Jeremaea, blong hem i wekap gud blong mekem wok we God i givim long hem?

• ?From wanem yumi nidim we God i mekem tingting blong yumi i strong?

• ?Wanem i halpem Jeremaea blong i no lusum glad?

• ?From wanem yu yu wantem stap wekap gud?

[Kwestin]

[Tok blong pija long pej 31]

?Bambae yu gohed nomo blong prij taem ol man oli agensem yu?