Go long ol haf insaed long hem

Go long lis blong ol haf

?God Hem i Hu?

?God Hem i Hu?

 Yumi Lanem Samting Long Tok Blong God

?God Hem i Hu?

Ol tok we oli kam biaen oli tokbaot sam kwestin we maet yu yu stap askem, mo oli talem weples yu save ridim ansa blong ol kwestin ya long Baebol blong yu. Ol Witnes blong Jehova bambae oli glad blong tokbaot ansa blong ol kwestin ya wetem yu.

1. ?God hem i hu?

God ya we i tru, hem nao i Mekem olgeta samting long heven mo long wol. Baebol i singaot hem se “King we rul blong hem i stap oltaem nomo, gogo i no save finis.” Hemia i min se hem i no gat stat blong hem, mo bambae hem i neva gat en blong hem tu. (Revelesen 15:3, NW) From we God i Stamba blong laef, i stret we yumi mekem wosip long hem nomo.—Ridim Revelesen 4:11.

2. ?God i olsem wanem?

I no gat man we i luk God samtaem, from we hem i Spirit. Hemia i min se hem i Hae moa long olgeta laef samting long wol ya we yumi save luk. (Jon 1:18; 4:24) Yumi save luk ol fasin blong God long olgeta samting we hem i mekem. Yu traem tingbaot olsem wanem ol defdefren kaen frut mo flaoa oli naes tumas mo oli plante. Samting ya i mekem yumi luksave lav mo waes blong God. Taem yumi tingbaot we heven mo wol oli bigwan olsem wanem, hemia i tijim yumi se God i gat olgeta paoa.—Ridim Rom 1:20.

Yumi save lanem moa ol fasin blong God long Baebol. Yu traem tingbaot, Baebol i talem long yumi, wanem we God i laekem, mo wanem we hem i no laekem. Mo tu, Baebol i talem ol fasin we God i mekem long ol man, mo i talemaot tu wanem samting we hem i mekem, taem ol defdefren trabol oli kamaot.—Ridim Ol Sam 103:7-10.

3. ?God i gat wan nem?

Jisas i talem se: “Papa blong mifala. Yu yu stap long heven. Nem blong yu i tabu. Mifala i wantem we olgeta man oli ona long yu.” (Matiu 6:9) I tru God i gat plante taetel, be hem i gat wan nem blong hem nomo. Long ol lanwis blong yumi wanwan, fasin blong talem nem ya i defdefren. Long bislama, oltaem yumi talem “Jehova.”—Ridim Eksodas 3:14, futnot.

Ol man oli tekemaot nem blong God long plante Baebol mo oli putum ol taetel olsem Masta no God long ples blong hem. Be taem ol man oli raetem Baebol fastaem, nem ya blong God i stap bitim 7,000 taem. Taem Jisas i stap eksplenem tok blong God long ol man, oltaem hem i yusum nem blong God. Long rod ya, hem i halpem ol man blong oli save God.—Ridim Jon 17:26.

  4. ?Jehova i kea long yumi?

Jehova i soemaot se hem i kea long yumi, taem hem i lesin long ol prea blong yumi. (Ol Sam 65:2) ?From we fasin blong harem nogud i kam antap bigwan, hemia i min se God i no kea long yumi? Sam man oli talem se God nao i stap mekem yumi safa, from we hem i wantem traem yumi, be tingting ya i no tru. Baebol i talem se: “I longwe long fasin blong tru God blong mekem nogud fasin.”—Job 34:10, NW; ridim Jemes 1:13.

God i soemaot se hem i gat respek long yumi, taem hem i letem yumi blong yumi jusum rod we yumi wantem folem. ?Olsem wanem? ?Yumi jusum blong mekem wok blong God? (Josua 24:15) Tede, ol man oli safa moa from we plante man oli jusum blong mekem i nogud long ol narafala. Jehova i harem nogud, taem hem i luk ol nogud fasin ya.—Ridim Jenesis 6:5, 6.

Klosap nao, Jehova bambae i yusum Jisas blong karemaot ol nogud samting we oli mekem ol man oli safa, mo ol man we oli stap mekem ol nogud fasin ya. Go kasem taem ya, Jehova i gat gudfala risen blong letem man i safa blong smoltaem yet. Haf ya bambae i kamaot bakegen long wan narafala Wajtaoa, mo bambae i eksplenem from wanem God i letem man i safa.—Ridim Aesea 11:4.

5. ?God i wantem we yumi mekem wanem?

Jehova i mekem yumi long fasin ya we yumi naf blong kasem save long hem, mo lavem hem. Jehova i wantem we yumi lanem trutok long saed blong hem. (1 Timoti 2:4) Sipos yumi stadi long Baebol, hemia bambae i halpem yumi blong save gud God olsem wan Fren.—Ridim Ol Proveb 2:4, 5.

Jehova nao i givim laef long yumi, taswe yumi mas lavem hem moa, i bitim we yumi lavem wan narafala man. Yumi save soemaot long God se yumi lavem hem, taem yumi toktok wetem hem long prea, mo taem yumi mekem ol samting we hem i askem long yumi blong mekem. (Ol Proveb 15:8) Jehova i askem long yumi blong mekem ol gudfala fasin we oli soemaot se yumi lavem ol narafala.—Ridim Mak 12:29, 30; 1 Jon 5:3.

Blong save moa, lukluk japta 1 blong buk ya, we ol Witnes blong Jehova oli wokem.

[Tok blong pija long pej 11]

?God i gat wan gudfala risen blong letem man i safa blong smoltaem?