Go long ol haf insaed long hem

Go long lis blong ol haf

Taem yu gat gudnem o gudfala fasin, ol narafala oli trastem yu mo respektem yu

‘Gudnem i Moa Gud i Bitim Fulap Mane’

‘Gudnem i Moa Gud i Bitim Fulap Mane’

LONG sam ples ol man oli tinghae long gudnem o gudfala fasin, from we fasin ya i protektem olgeta. Maet i protektem olgeta long ol nogud tok o ol giaman tok we ol narafala (maet oli toktok, oli raetem, o oli mekem wan video) oli talem agens long olgeta. Samting ya i mekem yumi tingbaot wan waes tok blong bifo we i se: “Gudnem i moa gud, i bitim fulap mane; taem man i respektem yu hemia i moa gud i bitim silva mo gol.” (Ol Proveb 22:1, NW) ?Olsem wanem blong gat gudnem mo mekem ol narafala oli respektem yumi? Ol nambawan advaes blong Baebol oli save givhan long yumi.

Eksampol, traem luk samting we Baebol i talem long Ol Sam japta 15. Man blong raetem Sam i ansarem kwestin ya se, “?Hu man we i stret blong go long Haos Tapolen blong [God]?” Hem i se: “Man we i stret blong mekem olsem, hemia man we . . . oltaem i stap mekem ol samting we i stret. Ol tok blong hem i tru mo i stret, mo hem i no save giaman long ol narafala man. . . . . Hem i no save mekem ol samting nogud long ol fren blong hem, mo i no save tok nogud blong spolem nem blong ol man raonabaot long hem. Hem i no save laekem ol man we yu yu tanem baksaed long olgeta . . . Oltaem hem i stap mekem ol samting we hem i promes blong mekem, nating we i had tumas long hem. . . . Mo hem i no save tekem mane long man we i wantem pem hem.” (Ol Sam 15:1-5) ?Bambae yu respektem wan man we i gat ol gudfala fasin olsem?

Wan narafala fasin tu we i mekem se man i save respektem yu, hemia tingting daon. Ol Proveb 15:33 i se: “Sipos [man] i wantem blong ol man oli ona long hem, hem i mas mekem tingting blong hem i stap daon.” I gud blong tingbaot se: Ol man we oli gat tingting daon oli luksave ol slak fasin blong olgeta mo oli wok had blong kam gud moa long ol fasin ya. Mo tu, oli rere blong talem sore long narafala, sipos oli mekem hem i harem nogud. (Jemes 3:2) Be olgeta we oli praod oli kros kwiktaem nomo. Ol Proveb 16:18 i talem se: “Man we i praod bambae i kasem trabol we i spolemgud hem, mo man we i flas tumas bambae i foldaon we i foldaon olgeta.”

?Be sipos wan man i talem sam giaman toktok blong spolem gudnem blong yu? ?Bambae yu kros mo tekem aksen kwiktaem blong stretem samting ya? I gud yu askem yu wan se, ‘?Sipos mi traem blong toktok from gudnem blong mi, bambae mi mekem se giaman toktok ya i kam bigwan moa?’ Samtaem i gud blong go long kot blong stretem bisnes ya, be Baebol i givim advaes se: “Yu no hareap blong go long kot blong talemaot wan samting we yu yu luk.” Mo Baebol i talem tu se, ‘sipos yu wetem fren blong yu, yutufala i rao from wan samting, i moa gud yutufala nomo i stretem bisnes ya.’ (Ol Proveb 25:8, 9) * Taem yumi folem ol advaes ya, yumi no spenem plante mane blong go long kot.

Baebol i no wan buk blong ol skul nomo. Hem i wan buk we i save lidim laef blong yumi. Man we i folem ol fasin we Baebol i tokbaot, ol narafala oli respektem hem mo hem i gat gudnem.

^ par. 5 I gat sam moa advaes long Matiu 5:23, 24; 18:15-17 we yumi save folem blong stretem ol raorao.