Go long ol haf insaed long hem

Go long lis blong ol haf

 STORIAN WETEM | FAN YU

Wan Man Blong Wokem Kompiuta i Tokbaot Bilif Blong Hem

Wan Man Blong Wokem Kompiuta i Tokbaot Bilif Blong Hem

DOKTA FAN YU, i stat wok olsem wan man blong stadi long matematik long ples ya China Institute of Atomic Energy, we i stap klosap long Beijing. Long taem ya, hem i no bilif se i gat wan God, be hem i bilif long evolusen. Be naoia, hem i bilif se God nao i wokem olgeta samting. Wan man blong raetem Wekap! i askem sam kwestin long hem.

Plis yu tokbaot smol long saed blong yu.

Mi bon long yia 1959 long Fuzhou, wan taon long provins blong Jiangxi long Jaena. Taem mi gat 8 yia, Jaena i stap gotru long wan Faet blong Jenisim Kastom long Jaena. Mo oli fosem papa blong mi we i wan enjinia, blong i go wokem rod blong tren long wan draeples we i stap longwe long mifala. Blong plante yia, hem i stap visitim mifala wan taem nomo long wan yia. Long taem ya, mi laef wetem mama blong mi, we i wan tija blong praemeri skul, mo mifala i laef long skul ya. Be long 1970, mifala i mas muv i go long distrik blong Linchuan, long wan vilej we i pua mo i no gat kakae. Nem blong vilej ya Liufang.

?Wanem bilif blong famle blong yu?

Papa i no intres long ol jos mo politik, be mama i wan Budis. Long skul, tija i tijim se laef i kamaot olsem nomo, ale mi bilivim wanem we hem i talem.

?From wanem yu intres long matematik?

Mi intres long matematik from we hem i joen wetem fasin blong faenemaot samting we i tru. Mi go long yunivesiti long yia 1976. Long skul, mi jusum blong stadi long matematik. Afta we mi kasem setifiket, faswan wok we mi mekem, hemia blong faenemaot olsem wanem blong wokem ol masin we oli stap kontrolem niuklia paoa.

?Wetaem yu stat blong ridim Baebol?

Long 1987, mi kam long Yunaeted Stet blong skul blong kasem wan narafala setifiket long wan Yunivesiti long Texas (Texas A&M University.) Mi luksave se plante man long Amerika oli ridim Baebol mo oli bilif long God. Mi harem tu se Baebol i gat plante waestok we yumi save folem, ale mi stat blong ridim.

 Mi luk se ol tijing blong Baebol oli stret blong folem. Be mi faenem i had blong kasemsave long sam haf blong hem, sloslo mi stop blong ridim.

?Wanem i mekem se yu intres blong ridim Baebol bakegen?

Save ya se i gat wan Man we i Wokem olgeta samting i niu long mi, so mi tingting blong mekem wan risej long saed ya

Long 1990, wan Witnes blong Jehova i kam long haos blong mi mo i soem samting we Baebol i talem long saed blong fiuja. Hem i mekem plan blong wan man mo waef blong hem i kam givhan long mi blong kasemsave long Baebol. Waef blong mi Liping, i wan tija blong haeskul. Hem i tijim ol studen blong Jaena long ol paoa raonabaot long yumi. Hem tu i no bilif long God, be biaen, hem i stat blong stadi wetem mi. Mitufala i lanem long Baebol se i gat wan Man we i Wokem olgeta samting. Save ya i niu long mi, so mi tingting blong mekem wan risej long saed ya.

?Afta yu faenem wanem?

Olsem wan man blong stadi long matematik, mi kasem trening blong wokemaot olsem wanem ol samting raonabaot long yumi oli kamaot. Mi lanem tu se blong laef i kamaot olsem nomo we i no folem wan plan, i mas kat sam protin we oli stap finis. So mi traem blong wokemaot olsem wanem wan protin i save kamaot olsem nomo. Protin i wan samting we i had blong kasemsave long hem, mo ol sel blong bodi oli gat plante taosen defdefren protin we oli wok wanples long stret fasin blong olgeta. !Mi luksave se, i no tru we protin i save kamaot olsem nomo we i no folem wan plan! Mi no faenem nating wan save blong evolusen we i mekem mi sua fulwan se wan samting olsem protin we i had blong kasemsave, i kamaot olsem nomo blong wokem ol impoten haf blong bodi. Samting ya i soemaot long mi se, i gat wan Man we i Wokem olgeta samting.

?Wanem i mekem yu bilif se Baebol i kamaot long God?

Taem mi stap gohed blong stadi wetem ol Witnes blong Jehova, mi lanem se Baebol i tokbaot plante profet tok we oli kamtru stret olsem we God i talem. Mi luksave tu ol gudfala samting we oli kamaot taem mifala i folem ol advaes blong Baebol. Samting ya i mekem mi gat kwestin se, ‘?Olsem wanem ol man blong raetem Baebol we oli laef plante taosen yia bifo, oli raetem ol save we i stret yet long yumi tede?’ Sloslo, mi luksave se Baebol hem i Tok blong God.

?Wanem i mekem yu bilif moa se i gat wan Man we i Wokem Olgeta Samting?

Taem mi stap tingting long ol samting raonabaot long yumi, mi bilif fulwan se i gat wan Man we i Wokem olgeta samting. Naoia, mi stap wokem ol program blong ol kompiuta, mo mi sapraes tumas blong luk olsem wanem bren blong yumi i wok gud moa bitim ol program ya. Eksampol, i had blong kasemsave olsem wanem bren blong yumi i save haremsave toktok blong ol man. Plante long yumi i save haremsave toktok blong wan man, nating se man ya i no toktok klia, i laf, i kof, i no save toktok gud, i gat wan aksen blong toktok, i gat eko, i gat noes raonabaot, o voes blong hem i jenis taem i toktok long telefon. Maet yu ting se samting we yumi tokbaot i nating nomo. Be ol man we oli wokem ol program long kompiuta oli tinghae long samting ya. Bren blong ol man i haremsave toktok blong man moa, i bitim wan beswan program blong kompiuta we oli wokem blong i haremsave toktok blong man.

Bren blong yumi i no olsem ol kompiuta. Hem i save kasemsave filing blong man, i haremsave ol aksen blong toktok, mo i save se hu i stap toktok. Ol man blong wokem program blong kompiuta oli traem blong faenemaot olsem wanem ol kompiuta oli save folem fasin blong bren blong haremsave ol toktok. Mi mi sua fulwan se sipos oli mekem olsem, oli stap stadi long wan plan we God i mekem finis.