Go long ol haf insaed long hem

Go long lis blong ol haf

STORI BLONG FRAN PEJ | ?BAEBOL I RILI TOK BLONG GOD?

Baebol​—I Tok Tru Long Olgeta Samting

Baebol​—I Tok Tru Long Olgeta Samting

Long Saed Blong Saens

NATING se Baebol i no wan buk blong saens, be hem i tok tru taem i tokbaot ol samting long wol blong yumi. Traem luk tu eksampol long saed blong weta mo bodi blong man.

WETA—?OLSEM WANEM REN I STAT?

WETA

Baebol i talem se: “[God] i mekem se wota i go antap, mo wota ya i hivap i kam klaod, nao klaod i mekem se ren i folfoldaon.” —Job 36:27, 28, New World Translation.

Long vas ya, Baebol i tokbaot tri rod we wota i folem. God we i wokem hot blong san, i “mekem se wota i go antap” taem hem i mekem se (1) hot blong san i pulum wota i go antap. Biaen, hem i mekem se (2) wota ya i hivap wanples blong mekem klaod, mo klaod ya nao i mekem se (3) wota i folfoldaon i kambak long graon olsem ren, ston blong aes, o sno. Be tede, ol man blong stadi long weta oli no kasemsave fulwan yet olsem wanem ren i stat. Samting ya i laenap wetem tok blong Baebol we i se: ‘I no gat man i save olsem wanem ol klaod oli fom.’ (Job 36:29) Be Man ya we i Wokem olgeta samting, i kasemsave gud olsem wanem ren i stat, nao i meksua se ol man oli raetemdaon ol save ya i go long Baebol. Hem i talemaot samting ya bifo we ol man oli save eksplenem olsem wanem ren i stat.

BODI—TAEM BEBI I STAT BLONG GRU

OL SEL LONG BODI

King Deved we hem tu i raetem Baebol, i talem long God se: “Bifo we mi bon, ae blong yu i luk mi finis. Mo plan blong olgeta haf blong bodi blong mi, oli stap finis long buk blong yu.” (Ol Sam 139:16, NW) Deved i talem se wan bebi i gru folem wan plan we i stap long wan “buk” we i kamaot longtaem finis bifo. !Samting we yumi sapraes long hem se, Deved i raetem ol tok ya 3,000 yia bifo finis!

Be samwe long yia 1860, man Ostria ya Gregor Mendel we i stap stadi long ol tri, i jes faenemaot olsem wanem wan bebi i stat blong gru. Mo long Eprel 2003 nomo, ol man blong stadi oli jes faenemaot fulwan plan we ol sel insaed long bodi i folem blong mekem wan bebi i gru. Ol sel ya oli gat olgeta save we oli nidim blong wokem ol defdefren pat blong bodi. Ol save ya we oli stap insaed long ol sel blong bodi oli folem wan oda. Samting ya i sem mak long ol leta blong wan diksonari. Ol leta ya mo ol toktok we oli stat wetem ol leta ya, oli folem wan oda. Ol save ya nao oli givim instraksen long ol sel blong mekem se ol sel oli save wokem ol pat blong bodi olsem, bren, hat, lang, mo ol han mo leg. Mo tu, oli mekem se ol pat blong bodi ya oli stap long ol stret ples mo oli fom long stret taem. Taswe i stret nomo we ol saentis oli singaot ol sel blong bodi se “buk blong laef.” ?From wanem Deved i naf blong raetemdaon olsem wanem wan bebi i stat blong gru? Wetem tingting daon hem i se: “Spirit blong Hae God i stap yusum mi blong talemaot ol tok blong hem. Oltaem mi mi stap talemaot ol tok we hem i talem.”—2 Samuel 23:2.

Long Saed Blong Fiuja

I NO isi blong save olsem wanem mo wetaem ol kingdom mo ol taon blong wol ya oli stat mo oli foldaon. Be Baebol i tokbaot plante yia bifo se sam kantri bambae oli foldaon mo i tokbaot evri samting we bambae i hapen long taem ya. Yu traem luk tu eks

BABILON I FOLDAON MO I STAP NATING NOMO

Babilon i rul long ol kantri blong wes Esia blong plante handred yia, mo i gat bigfala paoa antap long ol kantri ya. Hem i bin wan bigfala taon blong wol. Be, samwe long 200 yia bifo we Babilon i foldaon, God i toktok long Aesea we hem tu i raetem Baebol, blong i talemaot wan profet tok se wan man we nem blong hem Sirus, bambae i winim Babilon mo bambae i no moa gat man i laef long ples ya bakegen samtaem. (Aesea 13:17-20; 44:27, 28; 45:1, 2) ?Samting we Aesea i talem i kamtru?

HISTRI

Long naet blong Oktoba 539 Bifo Kraes, King Sirus i winim Babilon. Sloslo ol reva we ol man Babilon oli wokem oli drae, from we i no moa gat man blong lukaot long olgeta. Mo long yia 200 Kristin Taem, Babilon i kam wan drae ples. Tede, ples ya Babilon i stap nating nomo. Samting ya i kamtru olsem we Baebol i talem, “bambae [Babilon] i stap nating nomo.”—Jeremaea 50:13.

?Aesea i karem ol save ya wea? Baebol i talem se hem i luk ol samting ya long wan vison. Aesea i se: “Olgeta. Mi mi luk wan vison, mo long vison ya, mi luk ol samting we bambae i hapen long Babilon.”—Aesea 13:1.

NINEVE—“BAMBAE I KAM WAN DRAEPLES”

Nineve, kapital blong ol ples we Asiria i rul long hem, i wan taon we plante man oli save from ol gudfala samting blong hem we ol man oli wokem. Taon ya i gat ol bigfala rod, ol naesfala ples blong spel, ol tempol, mo ol bigfala pales blong king. Nating se i olsem, profet Sefanaea i talemaot se naesfala taon ya bambae i “kam nogud olgeta, we bambae i no moa gat man i stap long hem, mo bambae i kam wan draeples.”—Sefanaea 2:13-15.

Nineve i foldaon samwe long yia 630 Bifo Kraes, taem Babilon mo Media i kam mekem faet long olgeta. Wan buk i tokbaot taon ya se: “Taon ya i nogud blong 2500 yia.” !Blong plante yia ol man oli no sua sipos i bin gat taon blong Nineve bifo! Samwe long yia 1850, ol man blong digim graon oli digimaot ol samting long ples we Nineve i stap long hem. Tede, ol samting ya oli roten mo oli nogud olgeta. Taswe wan ogenaesesen (Global Heritage Fund) we i lukaot long ol olfala samting olsem, i givim woning se: “Ol samting blong Nineve we oli stap naoia oli save lus bakegen.”

?Sefanaea i karem ol save ya wea? Hem i raetem se “Ol tok we i stap long buk ya, Hae God i givim long [hem].”—Sefanaea 1:1.

Baebol i Ansa Long Ol Bigfala Kwestin Blong Laef

BAEBOL i ansa gud long ol bigfala kwestin blong laef. Traem luk ol eksampol daon.

?FROM WANEM WOL I FULAP LONG FASIN SAFA MO RABIS FASIN?

Long Baebol i gat plante stori blong fasin safa mo ol rabis fasin. Baebol i talem se

  1. “Sam man oli gat paoa, mo ol narafala man oli stap aninit long olgeta, oli stap harem nogud.”Prija 8:9.

    Fasin safa i kam antap bigwan from we ol man oli no naf blong rul long man bakegen, mo oli no rul long stret fasin.

  2. “Samting we oli no tingbaot i save kasem olgeta enitaem nomo.”Prija 9:11, NW.

    Ol samting we yumi no tingbaot—olsem ol bigfala sik, aksiden, ol disasta—i save kilim eni man, long eni ples, mo eni taem.

  3. “Wan man nomo i mekem se sin i kam long wol, mo ded i kamaot from sin.”Rom 5:12.

    Taem God i wokem faswan man mo woman, i no gat sin mo ded. Sin i “kam long wol” taem tufala i jusum blong no obei long God.

Baebol i no tokbaot nomo from wanem ol man oli safa. Hem i promes se Jehova * bambae i spolem fulwan ol rabis fasin mo “bambae i ravemaot wota blong ae blong [ol man], mo bambae i no moa gat man i ded, mo bambae man i no moa krae from we hem i sore, mo bambae i no moa gat man i krae, mo bambae man i no moa harem nogud long bodi blong hem.” —Revelesen 21:3, 4.

?WANEM I HAPEN TAEM YUMI DED?

Baebol i talem se taem man i ded hem i no moa save wan samting mo i no moa save wok. Prija 9:5 i talem se, “ol man we oli laef yet oli save se bambae oli ded, be ol man we oli ded finis oli no moa save wan samting.” Taem man i ded, evri tingting blong hem i no moa “save kamtru.” (Ol Sam 146:4) Taem yumi ded, evri samting long bren blong yumi oli no moa wok, hemia i minim tu hat blong yumi mo ol narafala samting. Taswe, yumi no moa save tingting, filim wan samting, mo wok.

Be, Baebol i no tokbaot nomo samting we i hapen long yumi taem yumi ded. Hem i tokbaot wan gudfala taem tu we ol man bambae oli girap mo oli laef bakegen.—Hosea 13:14; Jon 11:11-14.

?FROM WANEM YUMI LAEF?

Jehova nao i wokem Adam mo Iv. (Jenesis 1:27) Baebol i singaot fas man ya Adam se, “pikinini blong God.” (Luk 3:38) God i wokem ol man from wan risen—hemia blong oli gat wan hapi laef long wol ya blong olwe, mo blong oli save fren wetem Hem. Hemia nao from wanem evri man i gat filing ya blong wantem lanem moa long saed blong God. Baebol i talem se: “Olgeta we oli haremsave se oli nidim God long laef blong olgeta, oli glad.”—Matiu 5:3.

Baebol i talem tu se: “!Ol man we oli harem tok blong God mo oli stap obei long hem, olgeta ya nao oli glad!” (Luk 11:28) Baebol i no tijim yumi nomo long saed blong God, be hem i givhan long yumi tu blong gat wan gudfala laef naoia, mo i mekem se yumi gat hop blong fiuja.

Man We i Stamba Blong Baebol Mo Yu

AFTA we plante milian man raon long wol oli faenem ol pruf long saed blong Baebol, oli talem se Baebol i no jes wan olfala buk blong bifo nomo. !Be oli sua se Baebol i Tok blong God, we hem i yusum blong toktok long ol evri man—hemia i minim yu tu! Baebol i soemaot se God i wantem we yu save hem, mo yu kam fren blong hem. Hem i promes se: “Yufala i mas kam klosap long God, nao hem bambae i kam klosap long yufala.”—Jemes 4:8.

Taem yumi stadi long Baebol bambae yumi kasemsave wan gudfala samting. ?Wanem gudfala samting ya? Taem yu ridim wan buk, yu kasemsave tingting blong man we i raetem. Long sem fasin, taem yumi ridim Baebol yumi kasemsave long ol tingting mo filing blong man we i Stamba blong Baebol, hemia God. Yu traem tingbaot olsem wanem samting ya i gat paoa long yu. !Yu stat blong save tingting mo filing blong Man We i Wokem yu! Mo tu, Baebol i soemaot

?Yu intres blong save moa? Ol Witnes blong Jehova bambae oli glad blong givhan long yu. Oli save mekem plan blong yu save gat wan fri Baebol stadi. Hemia bambae i givhan long yu blong kam klosap moa long Man we i Stamba blong Baebol—Jehova God.

Haf ya i tokbaot sam pruf we i soemaot se Baebol i wan buk we i kamaot long God. Sipos yu wantem save moa, yu luk japta 2 blong buk ya ?Wanem Samting We Baebol i Rili Tijim? we ol Witnes blong Jehova oli wokem. Hem i stap tu long www.jw.org

Yu save wajem video ya tu ?Baebol i Kamaot Long Hu? we i stap long www.jw.org, o yu skanem code ya

Yu luk long OL BUK > OL VIDEO

^ par. 31 Nem ya Jehova, hem i nem blong God long Baebol.