Go long ol haf insaed long hem

Go long lis blong ol haf

Taem yutufala i storian gud wetem pikinini, hemia i olsem wan brij we i joenem yufala

 OL PAPA MO MAMA

5: Toktok Tugeta Oltaem

5: Toktok Tugeta Oltaem

?I MINIM WANEM?

Hemia taem yufala evriwan long famle i talemaot ol tingting mo filing blong yufala.

?FROM WANEM I IMPOTEN?

I no isi blong toktok wetem ol yangfala. Taem pikinini i smol, hem i talemaot evri samting long yu. Be taem hem i kam yangfala, hem i no toktok plante long yu, mo i had blong save tingting mo filing blong hem. I olsem we yu stanap long wan saed blong reva mo hem i stanap long narasaed. !Be long taem ya, hem i nidim moa we yu toktok long hem, nating we i luk olsem se hem i no wantem!

?YU SAVE MEKEM WANEM?

Yu mas rere enitaem blong toktok, nating sipos yangfala i wantem toktok let long naet.

“Maet yu wantem talem se: ‘!Mi mi stap wetem yu fuldei be yu no wantem toktok! ?Naoia yu wantem toktok a?’ Yu no mas komplen taem yangfala i wantem toktok wetem yu. Hemia nao samting we evri papa mo mama i wantem.”—Lisa.

“Mi mi laekem blong slip eli, be sam long ol nambawan storian we mi gat wetem yangfala blong mi, oli hapen afta long medel naet.”—Hebet.

RUL BLONG BAEBOL: “I nogud man i stap lukaot rod we i save givhan long hem nomo. Hem i mas lukaot rod blong givhan long ol narafala man.”—1 Korin 10:24.

Lesin gud. Wan papa i talem se: “Taem yangfala blong mi i stap toktok, plante taem mi mi stap tingbaot narafala samting. Be hem i luksave. !Mi no save giaman long hem!”

Sipos yu no stap lesin gud, yu ofem TV mo lego mobaelfon. Putum tingting blong yu fulwan long samting we yangfala i stap tokbaot. Soemaot se yu stap lesin gud long wari blong hem, nating se i wan smol samting nomo.

“Pikinini i mas save se ol filing blong hem oli impoten long yu. Sipos no, bambae hem i no moa talemaot, o bambae hem i talemaot long narafala man.”—Maranda.

“Sipos pikinini i talem samting we i no stret nating, yu no mas faerap long hem.”—Antony.

RUL BLONG BAEBOL: “Yufala i mas lesin gud.”—Luk 8:18.

Tekem janis blong storian taem yufala i stap mekem samting tugeta. Pikinini i save toktok moa taem hem i no lukluk stret long fes blong papa o mama blong hem.

“Plante taem mi storian gud wetem pikinini taem mitufala i stap ron long trak, from we mitufala i no lukluk stret long mitufala, be hem i sidaon long saed blong mi nomo.”—Nikol.

Long taem blong kakae tu, yu save storian gud wetem pikinini.

“Taem famle i joen wanples blong kakae, evriwan oli tokbaot wan gudfala samting mo wan nogud samting we i hapen long olgeta long dei ya. Hemia i mekem se mifala i joen gud, mo evriwan oli save se oli no nid blong fesem ol trabol olgeta nomo.”—Robin.

RUL BLONG BAEBOL: “Evri man i mas rere oltaem blong lesin, i no mas hareap blong toktok.”—Jemes 1:19.