Go long ol haf insaed long hem

Go long lis blong ol haf

 ROD BLONG DAONEM WARI

?Wanem Ya Wari?

?Wanem Ya Wari?

Taem yu fesem wan trabol, sam samting oli hapen insaed long bodi blong yu. Bren i mekem se ol homon * oli kam fulap long evri haf blong bodi. Oli mekem hat i pam kwik, blad presa i go antap, yu sot win, mo ol masel oli taet. Kwiktaem nomo, bodi i rere blong tekem aksen. Taem trabol ya i finis, bodi i gobak olsem fastaem.

SMOL WARI I GUD, BIGFALA WARI I NOGUD

Smol wari i gud from we i mekem se bodi i rere blong fesem hadtaem o denja. Hemia i stat long bren, mo i mekem se yu save tekem aksen kwiktaem. Mo tu, i givhan long yu blong yu kasem samting we yu traehad from, o yu wok gud, maet long wan eksam, intaviu blong wok, o spot.

Be wari we i stap longtaem o wari bitim mak i save spolem yu. Taem bodi blong yu i taet oltaem, yu save kam sik, kros, harem nogud, fogetem samting, tingting i fasfas, mo yu fraet. Fasin blong yu i save jenis, mo fasin we yu mekem long narafala tu. Plante man we oli wari oltaem oli stat blong dring bitim mak, tekem drag, kakae bitim mak, mo smok. Maet i kam mowas nao tingting i foldaon, yu no moa gat paoa blong mekem wan samting, o yu wantem kilim yu wan i ded.

Maet wari i no mekem sem samting long evri man, be i save mekem plante defren kaen sik i kamaot, nao klosap evri haf blong bodi i no moa wok gud.

^ par. 3 Sam kemikol we oli givhan long ol haf insaed long bodi blong oli wok gud.

^ par. 22 Ol sel o grup blong sel we oli wokem ol homon blong bodi i yusum.