Go long ol haf insaed long hem

Go long lis blong ol haf

 STADI 34

?Olsem Wanem Blong Glad Taem i Gat Wan Jenis?

?Olsem Wanem Blong Glad Taem i Gat Wan Jenis?

“Oltaem God i stap mekem i stret nomo. Mo hem i no save fogetem ol wok ya we yufala i mekem. Hem bambae i stap tingbaot we yufala i lavem nem blong hem.”—HIB. 6:10.

SINGSING 38 Hem Bambae i Mekem Yu Yu Strong

BIGFALA TINGTING *

1-3. ?I gat wanem jenis long laef blong samfala we oli mekem wok blong Jehova fultaem?

ROBET mo Meri Jo i talem se: “Afta we mitufala i spenem 21 gudfala yia long wok blong misinari, papa mo mama blong mi mo papa mo mama blong waef blong mi tu, oli kam olfala mo oli sik. Mitufala i glad blong lukaot long olgeta. Be i had blong lego ples we i kam hom blong mitufala.”

2 Wiliam mo Teri i talem se: “Taem mitufala i sik mo mitufala i no moa save gobak long kantri we mitufala i stap prij long hem, mitufala i krae. Mitufala i laekem tumas blong mekem wok blong Jehova longwe, be naoia i finis.”

3 Aleksi i talem se: “Mifala i save se gavman i wantem klosem branj ofis we mifala i wok long hem, be taem samting ya i hapen mo mifala i mas lego Betel, mifala i harem nogud tumas.”

4. ?Wanem ol kwestin we bambae yumi tokbaot?

4 I gat plante taosen narafala brata mo sista tu, we oli mas aot long Betel o ples we oli prij long hem, mo go mekem wok blong Jehova long wan narafala ples. * I had blong ol gudfala brata mo sista ya oli lego ples we oli laekem tumas. ?Wanem i save givhan long olgeta blong oli glad long jenis ya? ?Yu save mekem wanem blong sapotem olgeta? Ansa blong ol kwestin ya bambae i givhan long yumi evriwan, taem i gat wan jenis long laef blong yumi.

 ?YU SAVE MEKEM WANEM TAEM I GAT WAN JENIS?

?From wanem i had taem i gat wan jenis long laef blong olgeta we oli mekem wok blong Jehova fultaem? (Haf 5) *

5. Sipos i gat wan jenis, ?wanem i save hapen?

5 Nating se yu stap mekem wok blong prij fultaem o yu wok blong Betel, yu lanem blong lavem ol man mo ples we yu wok long hem. Taswe sipos i gat wan jenis, yu save harem nogud tumas. Yu yu sore blong lego ol brata mo sista, mo yu wari long olgeta, antap moa, sipos ol man oli stap agensem mo ronem olgeta. (Mat. 10:23; 2 Kor. 11:28, 29) Mo tu, taem yu go long narafala ples o yu gobak long ples blong yu, i olsem we yu sek long wan niufala kalja. Robet mo Meri Jo i talem se: “Mitufala i no moa save kalja blong mitufala, mo olsem wanem blong prij tu long prapa lanwis blong mitufala. Mitufala i harem se mitufala i strenja long kantri blong mitufala.” Samfala oli gat trabol long saed blong mane. Maet oli wari mo fraet, mo tingting blong olgeta i foldaon. ?Wanem i save givhan?

I impoten blong stap klosap long Jehova mo trastem hem (Haf 6-7) *

6. ?Olsem wanem yu save stap klosap long Jehova?

6 Stap klosap long Jehova. (Jem. 4:8) ?Olsem wanem blong mekem olsem? Yu mas trastem hem se i “stap ansa long ol prea.” (Sam 65:2) Ol Sam 62:8 i talem se: ‘Yu mas talemaot ol trabol blong yu long hem.’ Jehova i save mekem “plante moa samting i bitim olgeta samting we yumi askem no yumi tingbaot.” (Efes. 3:20) Hem i no givim samting ya nomo we yu askem long prea blong yu. Hem i save mekem samting we yu no tingbaot, o samting we i bitim save blong yu.

7. (1) ?Wanem i save givhan long yu blong stap klosap long Jehova? (2) Folem Hibrus 6:10-12, ?wanem i save kamaot sipos yu gohed blong obei long Jehova?

7 Blong stap klosap long Jehova, yu mas ridim Baebol evri dei mo tingting dip long hem. Wan brata we bifo i misinari, i talem se: “Yu mas folem program blong mekem famle wosip mo rerem ol miting, olsem yu bin mekem bifo we jenis ya i kamaot.” Mo tu, yu mas gohed blong joen fulwan long wok blong prij, wetem kongregesen blong yu. Jehova i no save fogetem olgeta we oli gohed blong obei long hem, nating se oli no moa save mekem olsem bifo.—Ridim Hibrus 6:10-12.

8. ?Olsem wanem 1 Jon 2:15-17 i save givhan long yu blong yu tingbaot ol samting we oli moa impoten?

8 Putum tingting long samting we i moa impoten. Yu no mas letem ol wari blong laef oli  “jokem” yu, nao yu kam slak long wok blong Jehova. (Mat. 13:22) Yu no lesin long ol fren mo famle we oli talem se yu mas winim plante mane. (Ridim 1 Jon 2:15-17.) Trastem promes blong Jehova se bambae hem i givim ol samting blong stap strong long bilif, gat kwaet tingting, mo ol samting long saed blong bodi, ‘long stret taem we yu nidim.’—Hib. 4:16; 13:5, 6.

9. Folem Ol Proveb 22:3, 7, ?from wanem i nogud blong mekem bigfala kaon? ?Wanem i save givhan long yu, blong yu mekem ol waes desisen?

9 No mekem bigfala kaon. (Ridim Ol Proveb 22:3, 7.) Plante taem i sas blong muv i go long narafala ples, mo i isi blong mekem bigfala kaon. Taswe, i moa gud yu no mekem wan lon blong pem ol samting we yu no rili nidim. Taem yu stap lukaot long wan famle we i sik, yu harem nogud nao i had blong save hamas kaon blong mekem. I gud yu ‘prea mo krae’ long Jehova, hemia i save givhan long yu blong yu mekem ol waes desisen. Blong ansa long prea, Jehova i save givim pis we i “lukaot gud long hat mo tingting” blong yu. Hem i save givhan long yu blong yu tingting gud mo skelem gud ol samting.—Fil. 4:6, 7; 1 Pita 5:7.

10. ?Olsem wanem blong faenem ol niufala fren?

10 Joen oltaem wetem ol gudfala fren. I gud yu toktok wetem ol gudfala fren, speseli olgeta we oli bin gotru long wan hadtaem olsem yu. Tokbaot ol trabol we yu fesem mo filing blong yu. Hemia i save mekem se yu harem gud. (Pri. 4:9, 10) Ol fren we yu lego olgeta long narafala ples, bambae oli fren gud yet wetem yu. Be yu mas faenem ol niufala fren tu, long ples we yu kam stap long hem. Tingbaot se sipos yu wantem ol gudfala fren, yu mas soemaot se yu wantem kam fren blong olgeta. Tokbaot ol gudfala taem we yu bin gat long wok blong Jehova, nao bambae oli luk glad blong yu, mo bambae oli wantem joen oltaem wetem yu. Maet samfala long kongregesen oli no kasem save from wanem yu laekem tumas blong mekem wok blong Jehova fultaem, be plante narafala bambae oli wantem save moa, nao oli save kam gudfren blong yu. Be yu no mas tokbaot yu wan tumas mo ol wok we yu bin mekem, mo yu no tokbaot ol nogud samting we oli bin hapen.

11. ?Olsem wanem blong mekem mared blong yu i stap gud?

11 Sipos yu bin lego ples we yu prij long hem from we hasban o waef blong yu i sik, yu no mas blemem hem. Mo sipos yu nao yu sik, yu no mas harem se i fol blong yu we hasban o waef blong yu i harem nogud. Tingbaot se yutufala i olsem “wan bodi nomo,” mo yutufala i bin promes long Jehova blong lukaot gud long yutufala, nomata wanem samting i hapen. (Mat. 19:5, 6) Sipos yu sek se yu gat bel nao yu mas lego ples we yu bin prij long hem,  meksua se pikinini ya bambae i save se hem i moa impoten i bitim ples we yu bin stap long hem. Talem long hem oltaem se yu tingbaot hem olsem “wan presen” we Jehova i givim. (Sam 127:3-5) Be yu mas tokbaot tu, ol gudfala taem we yu gat long ples we yu bin prij long hem. Sipos yu mekem olsem, pikinini ya bambae i wantem yusum laef blong hem long wok blong Jehova mo harem gud olsem yu.

OL NARAFALA OLI SAVE GIVHAN

12. (1) ?Yu save mekem wanem blong givhan long olgeta we oli mekem wok blong Jehova fultaem? (2) ?Olsem wanem yu save mekem i moa isi blong oli lan long jenis ya?

12 Tangkiu tumas long ol kongregesen mo ol brata mo sista we oli mekem evri samting we oli naf blong mekem, blong givhan long ol brata mo sista we oli mekem wok blong Jehova fultaem. Oli givim mane mo ol narafala samting we oli nidim, hemia i leftemap tingting blong olgeta mo i givhan long olgeta blong oli gohed. Samfala oli givhan blong lukaot long sam famle blong ol brata mo sista we oli stap mekem wok blong Jehova fultaem long wan ples farawe. (Gal. 6:2) Sipos samfala we oli mekem wok blong Jehova fultaem oli kam stap long kongregesen blong yu, yu no mas ting se oli sanem olgeta oli kam blong stretem olgeta from we oli no wok gud. * I gud yu mekem i moa isi blong oli lan long jenis ya. Welkamem olgeta mo talem ol gudfala toktok from wok we oli bin mekem, nating se maet oli no moa save mekem plante wok. Traehad blong save gud olgeta. Yu save lanem plante samting long olgeta, from we oli gat plante save, oli kasem plante trening, mo oli mekem wok blong Jehova longtaem.

13. ?Olsem wanem yu save givhan long olgeta we i gat jenis long laef blong olgeta?

 13 Samfala we oli kam stap long ples blong yu bambae oli nidim help blong faenem ples blong slip, trak, wok, mo sam narafala samting. Maet oli nidim save tu long ol samting olsem pem takis mo kasem insurens. Samting we oli nidim moa, se yu traem kasem save long jenis long laef blong olgeta. Ating oli stap traehad blong winim trabol long helt blong olgeta o helt blong wan famle. Maet oli harem nogud from ded blong wan famle we oli lavem hem tumas. * Mo tu, nating se oli no tokbaot, maet oli harem nogud from we oli no moa luk ol gudfala brata mo sista we oli besfren blong olgeta bifo. Oli nidim taem blong winim ol filing ya we oli save mekem tingting i fasfas.

14. ?Olsem wanem ol pablisa oli givhan long wan sista we i muv i kam long ples blong olgeta?

14 Gudfala eksampol blong yu mo help we yu givim, i save givhan long olgeta blong oli glad long jenis ya. Wan sista we i prij plante yia long wan narafala kantri, i talem se: “Long kantri we mi stap long hem, mi mekem plante Baebol stadi evri dei. Be long ples ya, i had blong openem Baebol o soemaot wan video long wok blong prij. Ale, sam pablisa oli singaot mi mi go wetem olgeta long ol visit mo stadi blong olgeta. Taem mi luk olsem wanem oli wok had blong gat ol Baebol stadi, mi mi harem gud moa. Mi lanem blong statem ol storian wetem ol man. Naoia mi glad bakegen long wok blong prij.”

!GOHED BLONG MEKEM BES BLONG YU!

Lukaot rod blong mekem moa long wok blong prij long ples blong yu (Haf 15-16) *

15. ?Olsem wanem blong harem gud long niufala ples we yu kam stap long hem?

15 Yu save harem gud long niufala ples we yu kam stap long hem. Yu no mas ting se jenis ya i hapen from we yu no mekem gudfala wok long narafala ples, o wok blong yu i no moa impoten. Luksave olsem wanem Jehova i stap givhan long yu, mo gohed blong prij olsem ol fas Kristin. Nomata weples oli stap long hem, oli “goaot long evri ples blong talemaot gud nius blong tok ya blong God.” (Ol Wok 8:1, 4)  I save gat gudfala frut i kamaot sipos yu gohed blong prij. Sam paenia we gavman i sakemaot olgeta long kantri, oli go long wan narafala kantri klosap we plante man oli toktok sem lanwis. Afta we sam manis i pas, i gat plante niufala grup long teritori ya.

16. ?Olsem wanem blong glad long niufala ples we yu stap long hem?

16 Baebol i talem se: “Oltaem [Jehova] i stap mekem yumi glad, mo fasin ya i stap mekem yumi strong.” (Neh. 8:10) Nating se yu laekem tumas ples we yu stap long hem, be bigfala samting we i mas mekem yu yu glad, hemia se yu fren gud wetem Jehova. Taswe, yu mas stap klosap long Jehova oltaem, mo lukluk i go long hem blong kasem waes mo save blong lidim yu, mo ol tok blong leftemap tingting. Tingbaot se yu lanem blong laekem ples we yu stap long hem bifo, from we yu traehad wetem fulhat blong yu blong givhan long ol man. Traehad bakegen wetem fulhat blong yu long niufala ples we yu stap long hem, nao bambae yu luk olsem wanem Jehova i save halpem yu blong laekem ples ya.—Pri. 7:10.

17. ?Yu mas tingbaot wanem?

17 Yu mas tingbaot se bambae yumi gohed blong mekem wok blong Jehova gogo i no save finis. Be long niufala wol, ating wok blong yumi evriwan bambae i jenis. Aleksi, we yumi tokbaot hem finis, i ting se jenis we i kamaot long laef blong hem, i stap rerem hem from ol jenis long fiuja. Hem i se: “Bifo, mi save se Jehova mo niufala wol i tru, be i olsem we oli stap longwe lelebet. Naoia Jehova i stap stret long fored blong mi oltaem, mo niufala wol i olsem nekis ples we bambae mi go long hem.” (Ol Wok 2:25) Nomata weples yu stap long hem, gohed blong wokbaot wetem Jehova. Hem bambae i no save lego yu, be bambae hem i givhan long yu blong yu glad long enikaen wok blong hem we yu mekem, mo long eniples.—Aes. 41:13.

SINGSING 90 Yumi Leftemap Tingting Blong Yumi

^ par. 5 Sam brata mo sista we oli mekem wok blong Jehova fultaem, oli mas lego wok ya o jenisim ples we oli wok long hem. Stadi ya i tokbaot ol hadtaem we oli fesem, mo olsem wanem oli save glad long jenis ya. Stadi ya i tokbaot tu, ol samting we ol narafala oli save mekem blong sapotem olgeta, mo ol advaes blong Baebol we i save givhan long yumi evriwan, taem i gat wan jenis long laef blong yumi.

^ par. 4 Mo tu, sam olfala brata oli letem wok blong olgeta i go long han blong ol brata we oli yang moa. Yu luk Wajtaoa Oktoba 2018, “Holemtaet Pis Long Tingting Nating Se Laef i Jenis”.

^ par. 12 Ol elda long kongregesen we ol brata mo sista ya oli bin stap long hem, oli mas raetem wan leta blong talemaot olgeta long niu kongregesen. Sipos oli kwik blong mekem olsem, bambae ol brata ya oli save gohed nomo olsem paenia, elda, o man blong givhan.

^ par. 13 Yu luk Wekap! blong 2018 N. 3, “?Wanem i Save Givhan Taem Wan Famle i Ded?

^ par. 57 PIJA: Wan brata mo waef blong hem i krae taem tufala i talem tata long kongregesen long kantri we tufala i misinari long hem.

^ par. 59 PIJA: Taem tufala i gobak long kantri blong tufala, tufala i prea long Jehova blong i givhan long tufala blong winim ol hadtaem.

^ par. 61 PIJA: Jehova i givhan long tufala blong mekem wok blong hem fultaem bakegen. Tufala i yusum lanwis we tufala i lanem finis, blong talemaot gud nius long ol man we oli aot long kantri blong olgeta blong kam stap long ples blong tufala.