Go long ol haf insaed long hem

Go long lis blong ol haf

 STADI 44

Frengud Wetem Ol Brata Mo Sista Bifo We En i Kam

Frengud Wetem Ol Brata Mo Sista Bifo We En i Kam

“Fren blong yu, oltaem hem i stap soemaot we hem i lavem yu.”—PROV. 17:17.

SINGSING 101 Yumi Joen Gud Blong Wok Wanples

BIGFALA TINGTING *

Bambae yumi nidim ol gudfala fren long taem blong “bigfala trabol” (Haf 2) *

1-2. Folem 1 Pita 4:7, 8, ?wanem bambae i halpem yumi blong winim ol hadtaem?

TAEM yumi stap go klosap moa long en blong “ol las dei,” bambae yumi fesem plante hadtaem. (2 Tim. 3:1) Tingbaot samting we i hapen long wan kantri long wes Afrika, afta long wan eleksen. From we i gat plante trabol mo ol man oli stap faet, ol brata mo sista oli no save wokbaot olbaot blong bitim sikis manis. ?Wanem i givhan long olgeta? Samfala oli go stap long haos blong ol brata long eria we i sef. Wan brata i talem se: “Long taem ya, mi glad tumas we mi gat ol fren raonabaot long mi. Mifala i lefleftemap tingting blong mifala.”

2 Taem “bigfala trabol” i faerap, bambae yumi glad blong gat ol gudfala fren we oli lavem yumi. (Rev. 7:14) Taswe i impoten we yumi frengud wetem ol brata mo sista naoia. (Ridim 1 Pita 4:7, 8.) Yumi lanem plante samting long stori blong Jeremaea, we ol fren blong hem oli sevem laef blong hem bifo we Jerusalem i lus. * ?Olsem wanem yumi save folem eksampol blong Jeremaea?

EKSAMPOL BLONG JEREMAEA I SAVE TIJIM YUMI

3. (1) ?From wanem i isi blong Jeremaea i haed long kona blong hem? (2) ?Jeremaea i talem wanem long Baruk, mo wanem i kamaot from?

3 Jeremaea i stap wetem ol man we oli no laekem hem blong samwe long 40 yia. Maet hemia ol man raonabaot long hem,  mo sam famle blong hem long ples blong hem, Anatot. (Jer. 11:21; 12:6) Nating se i olsem, Jeremaea i no stap hem wan long kona blong hem. Be hem i talemaot ol filing blong hem long gudfala sekretari blong hem Baruk, nao Baruk i raetemdaon blong i givhan long yumi tede. (Jer. 8:21; 9:1; 20:14-18; 45:1) Yumi save se taem Baruk i stap raetemdaon ol samting we i hapen long Jeremaea, tufala i mas frengud mo respektem tufala.—Jer. 20:1, 2; 26:7-11.

4. ?Jehova i askem long Jeremaea blong i mekem wanem? ?Wok ya i mekem wanem long Jeremaea mo Baruk?

4 Blong plante yia finis, Jeremaea i stap talemaot woning long ol man Isrel se Jerusalem bambae i lus. (Jer. 25:3) Jehova i mekem wan moa samting blong traem pulum ol man Isrel blong oli tanem tingting. Hem i askem long Jeremaea blong i raetemdaon ol woning long wan skrol. (Jer. 36:1-4) Taem Jeremaea mo Baruk i mekem wok ya we God i givim long tufala, we maet i tekem plante manis, tufala i mas storian gud long ol samting we i mekem bilif blong tufala i strong.

5. ?Olsem wanem Baruk i soemaot se hem i wan gudfala fren blong Jeremaea?

5 Taem tufala i finisim wok ya blong raetem skrol, Jeremaea i mas trastem fren blong hem Baruk blong i talemaot mesej ya. (Jer. 36:5, 6) Baruk i no fraet blong mekem wok ya we i denja. Traem tingbaot olsem wanem Jeremaea i glad long Baruk, taem hem i go stanap long yad blong haos blong God mo i talemaot ol tok ya. (Jer. 36:8-10) Ol haeman blong Juda oli harem nius blong samting ya we Baruk i mekem, nao oli singaot hem blong i kam ridimaot skrol ya long olgeta. (Jer. 36:14, 15) Ol haeman ya oli wantem talemaot ol tok ya long King Jehoeakim. Be oli kaen long Baruk, oli talem long hem se: “I gud yutufala i ronwe, yutufala i go haed. Mo yutufala i no mas letem man i save weples yutufala i stap  long hem.” (Jer. 36:16-19) !Hemia i wan gudfala advaes!

6. Taem king i agensem Jeremaea mo Baruk, ?tufala i mekem wanem?

6 Taem King Jehoeakim i harem ol tok ya, hem i kros we i kros, i bonem skrol ya, mo i givim oda blong oli arestem Jeremaea mo Baruk. Be Jeremaea i no fraet. Hem i tekem wan narafala skrol, i givim long Baruk mo i talemaot bakegen ol tok blong Jehova, nao Baruk i ‘raetemdaon evri samting we i stap long fas buk ya we king i bonem.’—Jer. 36:26-28, 32.

7. ?Maet wanem i hapen taem Jeremaea mo Baruk i wok tugeta?

7 Taem tu man i fesem wan hadtaem tugeta, plante taem tufala i frengud. Taswe taem Jeremaea mo Baruk i wok tugeta blong raetem bakegen ol tok blong skrol ya we Jehoeakim i spolem, maet tufala i save gud ol fasin blong tufala mo frengud tugeta. ?Eksampol blong tufala ya i save givhan long yumi olsem wanem?

TALEMAOT OL TINGTING MO FILING

8. ?Wanem i save blokem yumi blong yumi no frengud wetem ol narafala? ?Be from wanem yumi mas gohed blong traehad?

8 Sipos wan man we yumi bin talemaot tingting mo filing blong yumi long hem i spolem yumi, maet i had blong yumi tokbaot filing blong yumi long narafala bakegen. (Prov. 18:19, 24) O maet yumi harem se yumi no gat taem mo paoa blong frengud wetem ol narafala, be yumi no mas lego. Sipos yumi wantem se ol brata mo sista oli halpem yumi long ol hadtaem long fiuja, yumi mas lanem naoia blong trastem olgeta, mo yumi mas talemaot ol tingting mo filing blong yumi long olgeta. I impoten blong mekem olsem sipos yumi wantem frengud wetem olgeta.—1 Pita 1:22.

9. (1) ?Olsem wanem Jisas i soemaot se hem i trastem ol fren blong hem? (2) ?Wanem i save mekem se yu frengud wetem ol narafala? Talem wan stori.

9 Jisas i soemaot se hem i trastem ol fren blong hem taem hem i talemaot ol tingting mo filing blong hem long olgeta. (Jon 15:15) Yumi folem fasin blong hem taem yumi talemaot long ol narafala, ol samting we oli mekem yumi glad, ol wari blong yumi, mo ol samting we oli mekem yumi kros. Lesin gud taem narafala i stap storian wetem yu, nao maet yu luksave se plante tingting, filing, mo plan blong yutufala i sem mak nomo. Tingbaot wan sista we i gat 29 yia, nem blong hem Sindi. Hem i frengud wetem Mari-Luis, wan paenia we i gat 67 yia. Tufala i prij tugeta evri Tasde moning, mo tufala i no fraet blong tokbaot plante samting bitwin tufala. Sindi i talem se: “Mi laekem blong tokbaot ol impoten  samting wetem ol fren, from we hemia i mekem se mi save gud olgeta.” Olsem Sindi, sipos yu tokbaot ol tingting mo filing blong yu wetem ol narafala mo yu lesin gud, bambae yu frengud wetem olgeta.—Prov. 27:9.

WOK TUGETA

Ol gudfala fren oli prij tugeta (Haf 10)

10. Folem Ol Proveb 27:17, ?wanem i save hapen taem yumi wok wetem ol brata mo sista?

10 Olsem Jeremaea mo Baruk, taem yumi mekem ol wok blong Kingdom wetem ol brata mo sista, yumi luk ol gudfala fasin blong olgeta, oli tijim yumi long plante samting, mo yumi kam klosap moa long olgeta. (Ridim Ol Proveb 27:17.) ?Bambae yu harem olsem wanem, sipos yu prij wetem wan fren nao yu luk strong bilif we hem i gat, taem hem i tokbaot Jehova mo ol plan blong hem wetem fulhat blong hem? Ating bambae yu laekem hem moa.

11-12. Talem wan stori we i soemaot se taem yumi prij tugeta yumi frengud.

11 Tingbaot tufala stori ya we i soemaot se wok blong prij i mekem yumi frengud. Adelin we i gat 23 yia, i askem long Kandis blong tufala i go prij long wan ples we oli no stap prij tumas long hem. Adelin i talem se: “Mitufala i wantem harem gud mo gat strong tingting long wok blong prij. I nidim wan samting blong leftemap tingting blong mitufala blong mekem bes blong mitufala long wok blong Jehova.” ?Wanem i leftemap tingting blong tufala? Adelin i talem se: “Evri aftenun, mitufala i tokbaot ol filing blong mitufala, ol storian long wok blong prij, mo olsem wanem Jehova i lidim mitufala. Mitufala i harem gud tumas blong storian olsem, mo mitufala i stap save gud mitufala.”

12 Tu singel sista blong Franis, Lela mo Marian, tufala i go prij blong faef wik long Bangui, kapital blong Ripablik blong Sentrol Afrika. Lela i talem se: “Mi mo Marian i kasem sam hadtaem, be taem mitufala i storian gud tugeta mo soemaot trufala lav, mitufala i frengud moa. Taem mi luk se Marian i rere blong lan long niufala ples ya, i lavem ol manples, mo i gat strong tingting long wok blong  prij, mi respektem hem moa.” I no nid blong muv i go long narafala kantri blong frengud olsem wetem narafala. Evri taem we yu go prij wetem wan brata o sista long kongregesen blong yu, yu gat janis blong save gud hem nao bambae yu frengud wetem hem.

LUKLUK GUDFALA FASIN MO FOGIV

13. Taem yumi wok wetem ol fren, ?wanem i save hapen?

13 Taem yumi wok wetem ol fren, yumi luk ol gudfala fasin blong olgeta, be samtaem yumi luk ol slak fasin blong olgeta tu. ?Wanem i save givhan long yumi blong gohed blong joen gud wetem olgeta? Tingbaot Jeremaea. ?Wanem i givhan long hem blong i luk ol gudfala fasin blong ol narafala mo fogivim olgeta?

14. ?Jeremaea i lanem wanem long saed blong Jehova, mo olsem wanem samting ya i givhan long hem?

14 Jeremaea i raetem buk blong Jeremaea, mo tu i luk olsem se hem i raetem buk blong 1 King mo 2 King. Wok ya i mas mekem hem i luksave olsem wanem Jehova i sore long ol sinman. Hem i save se taem King Ehab i tanem tingting from ol rabis wok blong hem, Jehova i mekem se hem i no luk panis we bambae i kasem ful famle blong hem. (1 King 21:27-29) Mo tu, Jeremaea i save se Manase i mekem Jehova i harem nogud moa i bitim Ehab. Be Jehova i fogivim Manase taem hem i tanem tingting blong hem. (2 King 21:16, 17; 2 Kron. 33:10-13) Ol stori ya oli mas givhan long Jeremaea blong i folem fasin blong God blong gat longfala tingting mo sore, taem hem i wok wetem ol fren blong hem.—Sam 103:8, 9.

15. ?Olsem wanem Jeremaea i gat longfala tingting olsem Jehova taem Baruk i letem narafala samting i pulum tingting blong hem?

15 Traem tingbaot samting we Jeremaea i mekem, taem Baruk i letem narafala samting i pulum tingting i gowe long wok blong hem. Jeremaea i no lego fren blong hem, hem i givhan long Baruk taem hem i talem mesej blong God long hem blong stretem hem, be long fasin we i kaen. (Jer. 45:1-5) ?Stori ya i tijim yumi long wanem?

Ol gufala fren oli fofogivim olgeta (haf 16)

16. Folem Ol Proveb 17:9, ?yumi mas mekem wanem blong frengud wetem narafala?

16 Yumi no mas ting se ol brata mo sista oli no save mestem samtaem. Taswe, taem yumi gat sam gudfala fren, yumi mas wok had blong frengud wetem olgeta. Sipos oli mestem, maet yumi mas toktok kaen blong givim advaes blong Baebol long olgeta mo stretem olgeta. (Sam 141:5) Mo sipos oli mekem yumi harem nogud, yumi mas fogivim olgeta. Afta we yumi fogivim olgeta, yumi no mas tokbaot bakegen samting we oli bin mekem long yumi. (Ridim Ol Proveb 17:9.) !Naoia we laef i had, i impoten tumas we yumi lukluk ol gudfala fasin blong ol brata mo sista, i no ol slak fasin blong olgeta! Samting ya i save mekem se yumi gohed blong fren gud wetem olgeta. !Bambae yumi nidim ol gudfala fren long taem blong bigfala trabol!

SOEMAOT TRUFALA LAV

17. ?Olsem wanem Jeremaea i soemaot se hem i wan trufala fren long taem blong trabol?

17 Profet Jeremaea i soemaot se hem i wan trufala fren long taem blong trabol. Taem Ebedmelek, we i wok long haos blong king, i pulumaot Jeremaea long wan wel we i fulap long sofmad, Ebedmelek i fraet se ol haeman blong king bambae oli kilim hem. Taem Jeremaea i save samting ya, hem i no stap kwaet mo hop nomo se fren blong hem bambae i stanap strong. Nating se Jeremaea i stap long prisen, be hem i mekem bes blong hem blong serem ol gudfala promes blong Jehova  wetem Ebedmelek, blong leftemap tingting blong hem.—Jer. 38:7-13; 39:15-18.

Ol gudfala fren oli givgivhan long olgeta long ol hadtaem (haf 18)

18. Folem Ol Proveb 17:17, ?yumi mas mekem wanem taem wan fren blong yumi i fesem hadtaem?

18 Tede, ol brata mo sista oli fesem plante hadtaem. Plante oli stap long ples we i gat faet o i gat wan bigfala etkwek. Long taem olsem, maet yumi save tekem sam brata mo sista oli kam long haos blong yumi. Sipos no, maet yumi save givim sam mane long olgeta. Yumi evriwan i save askem long Jehova blong i givhan long ol brata mo sista ya. Taem yumi save se tingting blong wan brata o sista i foldaon, maet yumi no save wanem blong talem. Be yumi save mekem sam samting blong givhan. Yumi save spenem taem wetem hem. Yumi save lesin long hem mo soemaot sore. Mo yumi save tokbaot wan vas blong Baebol blong leftemap tingting blong hem. (Aes. 50:4) Impoten samting se yu stap wetem fren blong yu taem hem i nidim yu.—Ridim Ol Proveb 17:17.

19. Sipos yumi frengud naoia, ?olsem wanem samting ya bambae i halpem yumi long fiuja?

19 Yumi mas gat strong tingting blong gohed blong frengud wetem ol brata mo sista naoia. ?From wanem? From we ol enemi blong yumi bambae oli talem ol giaman toktok blong traem seraotem yumi. Bambae oli traem mekem se yumi no moa trastem ol brata mo sista. Be ol hadwok blong olgeta bambae i blong nating nomo. Bambae oli no save tekemaot lav ya we i joenem yumi. I no gat wan samting we i save spolem gudfala fasin fren blong yumi. !Fasin fren ya bambae i stap strong tede mo blong olwe!

SINGSING 24 Yu Kam Long Hil Blong Jehova

^ par. 5 Taem en i stap kam klosap moa, yumi mas frengud wetem ol brata mo sista. Long stadi ya, bambae yumi tokbaot samting we yumi lanem long stori blong Jeremaea. Mo tu, bambae yumi tokbaot olsem wanem ol gudfala fren oli save halpem yumi long ol hadtaem.

^ par. 2 Jeremaea i no raetem ol samting long buk blong hem folem taem we oli hapen.

^ par. 57 PIJA: Pija ya i soemaot samting we i save hapen long taem blong “bigfala trabol.” Sam brata mo sista oli haed long wan rum long haos blong wan brata. From we oli bin frengud, oli stap lefleftemap tingting blong olgeta long hadtaem ya. Trifala pija we i kam biaen i soemaot se ol semfala brata mo sista ya oli bin frengud finis bifo we bigfala trabol i stat.